《瞬間看地球》Stranger's Blog

今日行程：

座間味島 → 座間味村觀鯨協會 → 高月山展望台 → 海畑 → 阿真海灘 → 女瀬ノ崎 → OTS (とまりん営業所) → 百年古家 ~ 大家

今日第一站係「座間味島」
過座間味島係為咗轉船去觀鯨，觀鯨協會叫我哋出發前要 send email 或致電確認，睇吓天氣如何再決定係咪成行~
所以我哋出門前，喺酒店度請職員為我哋致電過去~
不過可能太早，未有人接聽~

先前佢叫我哋喺泊港俾錢，咁直覺就覺得嗰度會有辦事處，反正我哋都幾近泊港，唔理喇，過咗去先算~
出門前寄存埋行理喺酒店先~
喺酒店櫃檯附近，見到啲關於座間味島嘅旅遊資料，就攞咗少少袋住，冇得觀鯨的話，靠佢晒喇！

由酒店行過泊港只係幾分鐘，好快就行到~
不過售票處仲未開門，仲有十五分鐘先開，亦唔覺有觀鯨協會嘅辦事處，咁就周圍行吓先啦~

 

差唔多夠鐘就返返去等開門~
售票處開咗門之後，俾啲文件佢睇，其實一如心中所想，佢只係發售由泊港來回座間味島嘅船飛，甚麼觀鯨協會根本就唔關佢事~
於是我哋請求對方幫忙致電詢問，對方都好好人，幫我哋打電話，接通咗就遞個電話筒俾我哋~

唉，我哋日文太屎，淨係識聽對方話「分かりません」，最清楚聽到嘅係「bad condition」、「I don't know」
問佢係咪可以過嚟，對方答：「bad condition」
問佢係咪唔需要過嚟，行程取消，對方答：「I don't know」
我哋講嘅其他嘢，對方就話：「分かりません」

雖然，出發前都決定，觀鯨團唔成行的話，只要唔落雨都會過座間味的，不過成行與否買嘅回程船飛時間會有唔同，而家唔知成唔成行，都唔知點預好！
我哋當然可以買單程飛，到時先再喺嗰邊睇情況再買想要嘅單程飛返泊港，不過我睇過有人話試過滿咗座，買唔到飛返嚟，嘩，真係點都博唔過！
買唔到飛返嚟，蝕咗本來訂嘅一晚酒店、仲要喺座間味島搵住宿、行程當然有影響，如果仲要觀唔到鯨，真係戇居到暈！
咪嘞，一於買埋最遲嗰班船返泊港！
我哋買嘅兩程船飛都係快船，快船 50 分鐘，慢船 120 分鐘，不過買快船唔係貪船程快，純粹係夾返啲時間觀鯨同預時間遊吓座間味島~

買飛前要填咗表先~
 

買好飛，要去第二邊上船，過到去又未夠鐘，啪定暈浪丸再周圍行吓~
我哋就係搭呢隻船~

 

上咗船，以為冇咩人搭，點知上吓又多啲，上吓又多啲，不過好多都似係過去做嘢嘅，唔係著西裝就著制服，得少部份係著便服嘅啫~
開船喇，嘩，好彩啪咗丸，咁鬼浪嘅！

唔夠一個鐘就浪到過座間味島~
 

一上船就見到觀鯨協會嘅辦事處~
 

入到去表明身份，對方即時遞上表格俾我哋填~
咦，要填嘢，出發在望喇呱！
真係笑住嚟填呀！

填呀填，都係填啲人名呀，電話呀咁~
其實我唔知點解要填電話，我哋實由頭到尾痴住你哋咖啦，不過是旦啦，人哋叫得你填就梗係有原因，填就填~

填完之後，有個講英文嘅女仔職員同我哋講，未搵到鯨魚嘅蹤影，不過佢哋會繼續搵，希望 1030 前會搵到咁話，唔怪得之要留電話啦~
唉，我哋嘅心情真係好似坐過山車咁，原來一直都活喺自己嘅幻想世界裡面......

初時我覺得有啲奇怪，而家大約 1000，點解要定個時間喺 1030 呢？如果 1100 搵到呢？出唔出海？不過都冇咩點為意~
咁我哋就諗住周圍行吓，總之 1030 前返到嚟~
離開前佢哋仲試打咗我哋嘅電話，屎塔嘅唔響，我嘅就響，咁都 OK 啦~

正常離開之際，有個男人嗌住我哋，講咗幾句日文加手勢，似係叫我哋唔好走，跟住識英文嗰個女仔就同我哋講要留底聽講座~
唔怪得設定個時間為 1030 啦，梗係個講座到 1030，希望聽完可以出發！

成個講座都係個男人講嘢，仲有時有啲互動環節，佢梗係講日文啦，互動部份就冇我哋份嘞~
不過就有個男仔喺側邊拎住個 file 揭吓揭吓，係個男人講緊嘅內容嘅英文譯本，咁都大概知佢講咩，咁梗係日文版會豐富啲啦~
 

其間提到鯨魚嘅 size，就可以望吓地下~
 

現場計埋我倆就只有三對人，少人得難以置信，可能因為佢都唔肯定係咪可以成行，所以有啲人決定唔過嚟啦~

講座講到 1025 就完，講員同櫃檯嘅人你眼望我眼，其間櫃檯電話響起，一直期待已久嘅電話終於都響起！
不過......不過，結果係仲未搵到!!!

聽完講座就此解散，不過我哋知道仲有希望，因為佢哋話會繼續搵，搵到就會打俾我哋~
佢哋亦知道我哋買咗 1620 船飛走，計算返啲時間，1400 仲未搵到鯨魚的話，今次行程睇到鯨魚嘅盼望，等於徹底幻滅！

此時此刻，只好閒逛座間味島~
出發前都有諗過如果冇得觀鯨喺座間味做咩好，睇過啲資料，發覺除咗觀景台同埋沙灘，都冇咩其他嘢喇，所以都懶得做功課，嚟到攞啲地圖跟住行吓就算~

下一站係「高月山展望台」
我哋離開咗觀鯨協會，打開份地圖，睇睇睇，突然有人喺身邊用英文問我哋去邊，原來就係之前識講英文嗰個女仔~
近近地(其實都唔近，只係比其他近)，想去「高月山展望台」，佢指咗個方向俾我哋，仲話過少少就有旅遊中心~

咦，好喎，有旅遊中心，可能有多啲資料睇吓~
過到旅遊中心，發現啲資料同我哋喺酒店攞嘅一樣......

好啦，起程去高月山展望台~
穿過座間味嘅村落，向上山方向行~

 

行行吓見到有個「平和之塔」入口，不如上去睇吓啦~
 

上到去就真係得個塔，不過呢度冇其他人，感覺都幾舒服~

 

喺呢度坐咗陣，喺休息嘅時候發現，屎塔著緊對襪係上次佢個妹去完沖繩嘅手信，上面織有大大隻「OKINAWA」字樣！
又會咁啱嘅，又帶你返嚟沖繩喇~

休息完就繼續行程，我喺呢個塔嘅右邊發現咗條樓梯，我睇返手頭上嘅地圖，想睇吓呢條樓梯去邊嘅，不過地圖冇顯示呢條樓梯~
於是我就攞個 offline map 出嚟睇，哈，竟然有！原來行呢條樓梯上，係會慳返少少路程，我哋決定行呢條樓梯，好過行馬路上~
 

咁當然啦，唔係話行完條樓梯就到目的地，只係行少咗少少路啫~
行完條樓梯，我留意到 offline map 嗰度顯示仲有第二條樓梯，又可以慳返少少路程~
我一路行一路留意，過晒龍都唔見有樓梯，咁唯有繼續沿馬路行上去啦~
差唔多到嘅時候，見到先前聽講座嘅其中一對男女落緊山，我哋互相點了頭，但並沒有說甚麼~

終於都到喇！

 

上到嚟自然又係得我哋兩個，喺我哋坐低享受緊現場環境嘅時候，有三個講日文嘅男人嚟咗，不過佢哋唔似上嚟睇景，有個男人指住遠處係咁講，又到另一邊繼續講~
我哋都睇夠喇，就離開，就喺我哋離開時，嗰三個男人都走喇，佢哋有揸車上嚟，喂喂，可唔可以車埋我哋呀~~~
其實佢哋主動話車，我都唔會坐啦~

回程落山時，我哋又討論去邊好，本來講好咗去「稲崎展望台」，因為山上面有指示牌行過去，不過我哋諗諗吓，我哋唔應該離觀鯨協會太遠，否則佢哋打嚟話隨時可以出發就大件事！
打消念頭，慢慢行返落山再搵嘢食~

落咗山行入村，見到有五隻貓，終於都發現貓蹤，我哋當然都有停低撩吓佢哋啦~
佢哋隻隻都唔怕人，可能喺呢度生活，從未遇上過被虐待事情，所以完全冇自我保護嘅意識吧~

黑色呢隻最曳，周圍撩事鬥非！ 
 

另外一隻黑色貓，瞓到好似昏迷咁，點篤佢都唔理人~
 

呢隻就右後腳殘廢~
   

留意隻灰色貓，冇腳掌咖，可能唔識過馬路嘅後果......
 

呢隻肥晒喺塊面度，我哋叫佢肥面仔~
 

繼續行，見到有得租單車，不過屎塔唔多喜歡踩單車，所以諗都冇諗過會租~
 

行吓行吓見到宮崎駿動畫嘅模型~
 

再行到大街，完全唔覺有嘢食，得一間嘢寫住天婦羅鮮魚，我哋望過吓，唔覺營業中，再講吖，如果冇其他正餐食，我都唔會諗啦，淨係食天婦羅咩~
行第二邊入村，都真係行咗好多個路口，轉咗好幾個彎，終於搵到兩間疑似食店！
我同屎塔約定一人去一間，跟住再出返大路交換訊息~

大家都刺探完軍情，出返大街，但彼此都有啲距離，唔想離遠大聲嗌去交換訊息，我哋就用咗一個大家都明嘅手勢去表示，結果係兩間都營業中~
我睇嗰間就有點西式，其實就唔係好鍾意，不過冇得揀的話都可以嘅，屎塔睇嗰間就食沖繩そば，咁梗係食地道嘢啦！

於是就入咗「海畑」
海畑格局，有一半係塌塌米，一半係普通檯櫈，我哋梗係揀普通檯櫈~
 

叫咗碗沖繩そば + 豬軟骨 + 沖繩炊飯
   

再加一碗墨魚そば + 豬手 + 沖繩炊飯
 

麵呢，係唔錯，不過呢啲麵唔會俾到你覺得「嘩，好好食呀！」呢種感覺，唔會話特別好食~
首次食沖繩嘅豬軟骨，很不錯！
至於豬手，真係不得了，豬手本身夠大隻，肉厚但夠稔，膠質豐富，而且非常入味，可以話難得食到咁好食嘅豬手！
非常慶幸揀咗呢間嘢嚟食！
 

由於我哋實在太過眼闊肚窄，基本上唔係幾食得晒咁多嘢，但又唔想食剩晒，所以食到尾基本上都係邊休息邊慢慢食~
就喺呢個時候，門外有兩個人喺度裝吓裝吓，原來又係之前撞到嗰對男女~
不過唔知咩原因，裝完一輪冇入嚟食，走咗~

而家係 1330 喇，我第一萬零一次檢查電話，結果都係沒有未接來電......
儘管食咗咁好嘅一餐，依然未能平伏我哋忐忑嘅心情，要是早早知道沒有希望還好......

食完飯準備離開，等咗一萬一千一百秒嘅電話終於都響喇！
而且仲係觀鯨協會嘅人打嚟，我心諗，未到兩點就打嚟，似係有好消息喎！

我已經做好準備，用一秒賣單，十秒內跑到返觀鯨協會準備出海觀鯨！
可惜，對方傳嚟嘅係壞消息，仍然沒有鯨蹤！

唉，花咗差唔多成千蚊港幣過嚟座間味島，為出海觀鯨，為座間味貓群，結果完全唔係想像中咁樣~
冇計啦，我哋收拾心情，再睇吓地圖，一於行去「阿真海灘」啦~

其實我哋除咗打算行去阿真海灘，仲打算行埋去「神の浜展望台」及「女瀬の崎展望台」，不過就要行到去阿真海灘，睇睇時間再決定~

出返大街見到間油站，嘩，好簡陋吓喎！部車仲要襯返個油站......
 

我哋慢慢行，慢慢行，途經一個叫「マリリンの像」，背後嘅故事就唔清楚喇~

 

喺呢個島，唔難見到有锈跡嘅車~
 

好似行咗幾個鐘咁，終於到「阿真海灘」，現場有一對母子(估計)，坐喺度對住個靚海灘傾偈，呢個畫面真係溫馨！
 

外面有啲營地，可以租住的~
 

水清，其實沖繩嘅海灘，都冇咩邊個唔係水清卦~

 

我哋都喺海灘行咗陣，不過我哋心理上做唔到對母子咁 hea，睇夠行過休息夠就想去下個地方~

不過而家出發去下個展望台，會有點趕，怕回程趕唔切搭船，唔理喇，自己睇住時間做人，唔夠時間就唯有放棄再行返轉頭去碼頭啦~

一路行一路行，都唔知已經行咗幾耐，好似人哋喺荒漠行咗幾日幾夜咁，我哋經過「神の浜展望台」嘅分岔路~
以而家時間嚟睇，兩個展望台，只能二選一，就揀個高啲嘅「女瀬の崎展望台」

由碼頭行過嚟，絕大部份時間都係得我哋兩個，真係正到爆，上到觀景台，呢個感覺更加強烈，對住咁壯闊嘅美景，好似全世界都屬於我哋咁~
呢個展望台就真係未嘆夠就要走喇，趕唔切回程嘅船就麻煩~

 

返轉頭呢程就真係比嚟嘅時候行快咗，不過我覺得絕對趕得切，所以其實冇擔心過~
回程經過阿真海灘，抄捷徑，唔行沙灘外圍，直接由小路落沙灘打直行，慳返啲路程~

就喺沙灘呢度，遇上了一群山羊，不過係有人帶嘅~
有隻仲嘗試過幾次交配，可惜唔成功~
時間有限，未能留下嚟睇山羊，匆匆影咗幾張相就要離開~
 

差唔多返到碼頭，又見到嗰對男女，不過佢哋係相反方向咁行，今日呢班船係最後一班，唔通佢哋喺島上住一晚嘅？
等到有船到，排隊等上船，哈，又見到佢哋，四條友都渡過咗無聊嘅一天......

借網友 badboyntm 嘅相貼一貼先~
註：以下關於鯨魚嘅相及文字均來自網友 badboyntm 的~
發現鯨踪~~有水花在海面上~
 

見到鯨魚尾巴~~
 

船長駛近D，耐心等候下，鯨魚再度出現~~
 

再黎神鯨擺尾~~
 

返到泊港，就行返酒店攞返行李先，再行返 OTS (とまりん営業所)
之前聽唔止一個網民講過，話無啦啦 upgrade 咗部 Prius C 俾佢哋，我都想呀，唔知有冇機會呢？

 

入到去，俾晒資料，個姐姐開始做嘢，吖，佢啲英文幾好喎，可能同一樣嘅嘢講得太多，都已經琅琅上口~
亦可能因為同一樣嘅嘢講得太多，呢位姐姐講嘢好機械式，一輪機關槍式嘅說明，冷冰得像機器，不過佢又唔係冇禮貌，只係太過機械罷了~

搞完手續，都冇提過話會 upgrade 俾我，我都打定輸數~
攞車要上停車場五樓，出咗 lift 步入停車場已經見到兩個 OTS 嘅職員，俾咗啲資料佢，佢哋喺兩部車之間來回係咁望~
望咩呢？係咪未準備好呀？喂，再隔籬有部 Prius C 喎，我唔介意咖~ XDDD

最後俾咗部 Mitsubishi ~ Mirage 我，唔......三菱都好！
 

開車時里數為 25335 KM

下一站係「百年古家 ~ 大家」
刻意安排夜晚先嚟，因為想試吓真正嘅阿咕豬係點嘅~
食晏嗰啲，就咁一碗飯嘅定食，主觀覺得未必可以食到真正阿咕豬嘅味道~
而且晚餐價錢唔係真係好貴，都可以接受到~

出發前梗係輸入目的地資料做定位之用先啦~

之前都有過數次嘅自駕遊經驗，不過今次係第一次用 MAPCODE，所以我好頑皮咁想挑戰吓個 MAPCODE~
全程唔用電話號碼，唔用旅遊書或網上睇到嘅 MAPCODE，一於全部地方都自製 MAPCODE，睇吓係咪咁準先！

準備輸入 MAPCODE 時，發現咗兩樣嘢：
1. 「大家」嘅 MAPCODE 冇記低，即係冇 MAPCODE 可用......
2. 喺冇仔細研究嘅情況底下(反正冇 code 喺手，費事研究住)，唔見有 MAPCODE function......

既然冇 code 可用，焗用電話號碼做定位~

黃昏時間嘅那覇，車多到不得了，四圍都係車~
一路都係慢車，我一路揸一路留意當地嘅駕駛文化~
停車時，唔會跟貼前車；好少車切線；匯合位一架跟一架，唔會有人封位~
大家都好好耐性，亦都好禮讓，而我就學當地人咁，有人讓我的話，閃兩吓死火燈以示謝意~

呢部車有個 ECO mode，就係每次踩停部車佢都會熄車，放 brake 就會著車~
不過佢個系統都幾敏感，踩停半秒就熄車，brake pad 有少少異動就即刻著返車，其實我未必係放 brake，只係有少少壓力變化而已~
呢頭咁鬼多車，遇著呢個 ECO mode，真係煩死人！有時要快反應開車，就係俾佢拖慢晒，最後我都係熄咗呢個 mode，咪煩我！

今次除咗堅持用 MAPCODE 之外，仲堅持不走高速公路，因為我真係想好好感受沖繩嘅駕駛感覺~
呢次真係好好咁感覺到喇，由那覇一路慢車慢到近美國村先開始順返啲......

一路去到啲雙線雙程嘅道路，俾部慢車頂住，其實又唔可以話佢慢，佢只係跟車速上限行，守規矩啫~
一路跟住佢行都真係行咗好耐，就算佢轉灣離開咗我行緊嘅路，好快就有第二部車頂住，我真係深深咁感覺到沖繩嘅駕駛文化......

去到差唔多到，記得網友 ESEX 提醒，入去嘅路口好易過咗，要留意現場指示牌，結果我好成功咁冇錯過到個路口~
入咗路口之後，行經一啲好靜嘅路，現場完全唔似係去一間餐廳應行嘅路，似係去一啲近似香港圍村嘅路~
跟 GPS 行，行行吓就話已經到咗目的地~
唔係下化，我就算未嚟過，都可以好肯定咁講，一定未到！
好彩，現場有好清晰嘅指示，就由呢度開始，我就係靠呢啲指示牌去到目的地的~

入到餐廳，唔見有客，覺得奇怪，向店員表明來意，不過佢似乎只係知道(睇手勢)我哋二人用膳，冇留意我話訂咗位，不過算啦，反正成間餐廳都冇客~
經過某柱位，見到貼咗張紙，上面有兩行，第一行已經被劃去，第二行，左邊格係我個姓，右邊格係個 2 字，十成十係我嘅訂座資料啦~
於是我就指一指俾店員睇，佢就知道個 booking 係我咖喇~
雖然現場冇客，但我都唔想俾人覺得訂咗位又唔嚟，都係講聲佢知好啲嘅~

入到去，佢係任我哋自己揀位坐，咁梗係啦，都冇客~
我哋揀咗個中間位坐，當然係揀咗喺小瀑布隔籬~
(可能太興奮，竟然冇好好咁影張瀑布相......)
 

坐低咗，就有店員拎住兩份餐牌走埋嚟，一份係韓文，一份係中文~
佢見我哋攞咗份中文嘅，就叫另一個人嚟招呼我哋，係一個操北京腔國語嘅男仔~

打開餐牌，想叫嘅餐都係二人份起，唔得喎，咁咪試唔到 shabu shabu 同陶板燒兩種風味......
我哋又明知固問一吓，二人份係一定要叫兩個餐定一個餐最少二人份，結果當然冇驚喜啦~
於是我哋就問佢，二人份係咪真係夠兩個人食？因為我見嗰幅相就好似唔係好多嘢食咁，但對方話夠，冇理由唔信佢咖~

再問佢有冇單叫嘅，佢就將散叫嘅餐牌顯示俾我哋睇，就係咁，我哋就叫咗一份 shabu shabu 同一份陶板燒，但就冇其他跟御膳餐一碟碟嗰啲嘢囉~
亦由於有旅遊書講佢嘅豆腐非常好食，成 525 円一舊，只係大過粒骰仔少少，就點嚟試吓！

落完單好快就有嘢上，先嚟兩個爐先，一個打邊爐用嘅 gas 爐，呢度就俾 shabu shabu 用嘅；一個就立體四方型嘅爐，上面有啲橫紋，完全唔係餐牌嗰個樣，不過我又相信佢唔會係俾錯嘢，因為成個餐牌都冇呢個爐嘅樣~
放低咗兩個爐，再俾埋兩件用餐紙質地製成嘅圍裙，嘩，咁大陣象？
 

食物開始上喇，兩份嘢睇落係唔同嘅，我仲以為會一樣嘅添~
醬汁有三種：麻醬、唔知咩汁、海鹽

先講陶板燒，我一直都有種直覺陶板燒會惹味啲，好食啲，好心急咁就試陶板燒先~
唔怪得要俾圍裙，啲豬油(唔駛另外落油，係豬肉本身嘅油嚟)彈得幾犀利，唔理你有冇份落手燒，只要坐喺度嘅都要用圍裙，否則啲豬油會彈到成身都係~
陶板燒有樣麻煩，初時比較好啲，但整多幾塊，啲豬肉一放落去就會痴實塊板，基本上你想整熟佢又唔整爛塊肉係極高難度，結果一大片就會變成幾小片~
放入口，咦，真係幾好食喎，好香豬味，感覺有一點點油膩，只係一點點而已，絕不過份，唔會話因為咁而唔想食~
分別試過點三種醬同唔點任何嘢，以海鹽較為突出，能將味道提升~

到 shabu shabu 喇，簡單，淥熟佢就搞掂~
放入口，嘩！勁意外，比陶板燒更香，整片豬肉連脂肪放入口，非常有豬香味，而且絕對沒有油膩感！幸福嘅感覺油然而生！
分別試過點三種醬同唔點任何嘢，今次啱啱相反，點海鹽反而味道最差，點其餘兩樣同唔點都非常不錯~

不得不提，兩樣豬肉都有跟蔬菜，陶板燒嘅主要跟青紅黃椒；shabu shabu 嘅主要跟菜，呢樣真係好重要，除咗外觀冇咁單調，邊食菜邊食肉就冇咁膩，否則只係豬肉豬肉豬肉，幾好食都唔食得多~
 

到嗰舊豆腐......仔，真係中晒伏！八成似中式腐乳！佢冇咁鹹，質感冇咁實，但對我嚟講，還是一舊腐乳！
空口食腐乳，真係第一次！
 

非常滿足同幸福咁食完呢一餐！
食完飯就返酒店，研究咗一陣就搵到輸入 MAPCODE 嘅頁面~
返酒店條路有一段冇街燈，非常暗，單靠自己部車嘅燈真係唔多夠，但又唔可以開高燈，要揸得好專心，否則好易出事~
途經便利店，買咗啲宵夜同早餐，完結今日行程~