今日行程：
Day 04：北一硝子三號館 → 夢之音 → 白之戀人 → 豐田還車 → 狸小路 → 豐田租車 → 宏樂園 → 雪印 → 豐田還車 → JR Tower → 藻岩山 → Norbesa(摩天輪)
為咗要浸多幾次溫泉，今朝 0600 就起身。XDDD
浸完溫泉就去食早餐，早餐梗係又係和式啦......
食完早餐就去門口影咗一陣相，門外滿地都係雪，好靚，睇見就已經好開心。
開車前望到一幕好靚嘅景象。
離開前，屎塔自言自語咁問咗一句：「唔知幾時再有機會嚟呢？」我心中暗自回答：「我諗機會真係微啲......」
真正開始今日嘅行程，其實嚟到第四日，氣溫好似開始回升，我哋對落雪嘅希望開始減少......
一早就開車去北一硝子三號館，同樣，都係要靠 GPS 嘅幫助，輸入晒資料就可以開車。
好快到咗附近，但基於 signal 會 delay 嘅關係，我哋到咗門口都唔知，行到過晒籠......
於是我哋停埋一邊，打算 reset 個 GPS，叫佢再帶我哋去~
Set 好晒，滿以為可以起行，點知......
GPS 螢幕上出現咗句說話：你已到達目的地的附近。
我頂！GPS 唔肯帶路！@@
咁唯有自己行啦，開車無耐，見到有間便利店門口泊咗兩部車，隔離仲有一個位，邪惡嘅念頭又再產生起嚟，嘿嘿！
準備倒車上壆之際，有一班人行過，幾乎可以肯定佢哋係嚟自香港嘅旅行團！
我入咗後波，以極慢嘅速度，可以話係逐吋逐吋咁去，成班人行得鬆散，但就冇一個會停低俾我泊車，我覺得好離譜！
唉，等咗分幾兩分鐘先可以泊上去......
泊完車就向北一硝子三號館進發！
其實都冇咩期望啦，咪又係玻璃製成品嘅舖頭~
呢間嘢都幾大間，地下一層，上面一層，上面果層仲可以通過隔離舖，喺隔離舖又可以落下一層，其實全部都係屬於三號館嘅。
本來抱住都係果啲嘢嘅心態去睇吓，但係事實完全超出我哋意料之內！
呢個三號館所賣嘅一樣係玻璃製成品，但不同嘅係，佢係一間賣藝術品嘅舖頭！！！
隨手拎起一件都可以用藝術品嚟形容！！！
真係好靚......好靚......
好可惜，咁多間相類似嘅舖頭，最靚係呢間，但就唯獨呢間唔俾影相，真係嘥晒。
出咗門口，因為出口同入口唔同，我哋都有啲迷失。
下一處就係去搵夢之音，照住地圖行，其實好難搵，最後都係要問人~
但附近著實人影都冇隻......
好彩，見到個伯伯放緊狗，我哋走上前問吓佢。
佢似乎唔係好識夢之音係咩嚟，但佢識少少英文，我就叫佢指俾我哋睇，我哋喺地圖邊度，佢睇咗好耐，都有分幾兩分鐘，係咁睇本地圖，又轉吓佢咁，最後佢直情郁身，我哋梗係跟住佢啦，佢行咗幾步就指一指入面條街，哈，原來我哋就喺夢之音背脊 ！XDDD
同樣地，都唔會抱有咩期望嘅心態入內。
夢之音分兩層，入面有屎塔喜愛嘅 Hello Kitty，仲有好多龍貓同其他卡通公仔產品，有啲仲係北海道限定嘅。
始終各樣卡通公仔都係為港人所熟悉嘅，所以呢間舖頭比同類型嘅舖頭好睇得多。
好，要離開小樽喇，有啲唔捨得，因為小樽好靚，好有特式，真係想留耐少少......
要走始終都要走，我哋就行返去部車度，好彩都係冇抄牌。=P
跟住就係返去札幌，下一站係白之戀人。
噚日由札幌去小樽行高速公路時，見到有啲路牌係一隻咖啡杯咁嘅，我哋估係中途休息站。
仲記得過往到日本時，跟團坐旅遊巴士，途經休息站都會入一入去，但昨日就因為發現得太遲，所以冇入到，我哋打算今日回程時入一入去。
第一個見到嘅咖啡杯，係金山，喺兩公里後，我開始好留意好小心咁望實啲路牌。
冇錯，係我，而唔係我哋，因為領航員早已進入夢鄉，呼呼入睡，只好由司機兼職埋......
好快就到咗入口，我刻意好小心咁停車，熄匙，領航員依然固我，我唯有......嘿嘿！弄醒佢！
停車場係免費嘅。
北海道到處都有呢隻淫棍公仔，都唔係好特別姐......
我哋入到去又係買雪糕食，都唔錯。
食完嘢就繼續上路，高速公路費一樣係 800 日元。
一個鐘到就到達白之戀人，停車場入口有保安駐守，佢俾咗張卡紙我哋，上面有一撻空白位，估計係要喺某處指定地方蓋一個印，就可以免費泊車，希望我冇估錯。
泊完車就走上去，一上到去就去到商店部份，都幾多人，但冇乜特別。
出咗商店，係露天地方，根據指示牌，去到工房地方，先知道我哋行錯咗，一開始就應該行工房先，行行吓就會順道到達商店先離開嘅......
點都好啦，入到去要買飛入場，買完飛就上去，工房主要都係講佢嘅歷史、用料同製作過程，仲有一條走廊可以睇到啲製作過程。
中途見到張海報，唔知佢噏乜X呢！=P
我哋就冇咩興趣去親身體驗做餅過程，所以行完就算。
行完工房我就去問返買飛果啲員工，去邊度蓋停車場印，哈，原來就係喺佢度！
蓋完印再行，當然係去到商店啦，我哋都冇買嘢就走咗。
白之戀人係值得去嘅，但去完又冇乜特別嘢講，可能只有親身去過先會有印象卦......
白之戀人嘅模型。
下一站返酒店放低行李先交車，開車前就搞搞個 GPS 先。
一如所料，出停車場時，個保安收咗張卡紙，望一望蓋印嘅位置，就放我哋走。
去到酒店附近，就喺對面搵個位停低，屎塔留喺車睇車，我就去寄存行李先。
搞掂晒就開車去交車，一樣都係靠 GPS。
交車前，去 Shell 入油先，因為如果交車時唔係入滿油，豐田會收返油錢，油價當然比油站高。
但係個油站職員係咁跳舞，我哋搞咗好耐，又倒車又向前都唔明佢咩意思！@@
擾攘咗好一陣子，終於明佢咩意思，原來我嘅停車位置不正確，佢條喉管唔夠長......@@
佢啲舞又真係跳得屎，因為個油站係望到豐田間舖嘅，佢係咁指出面 ，其實對面就係豐田，我以為佢叫我返豐田先入，但其實又冇咩理由......
其實佢只要拎條喉出嚟，拉到盡都入唔到，咁我咪明囉！@@
成個跳舞過程，最少用咗五分鐘！
入咗大約 1000 日元。
註：相中升數並非屬於我的。
入完油，就揸返去交車，途中見到部車......
其實當地好多車都係咁，哈哈！=D
交車時，職員完全冇睇車身有冇花痕，日本人對人嘅信任，對我，作為喺香港長大同生活嘅人嚟講，呢種感覺好陌生！@@
個職員檢查油量時，支油針比 F 還要低......
有冇搞錯，我明明入咗油咖喎！(查實我入完油又真係冇留意係咪 Full 咗......)
個職員指一指又講咗一堆日文，我都預咗要俾錢，我同佢講我頭先剛剛入咗油(我指一指 Shell)，差啲想拎埋張單俾佢睇，佢聽完我講就點點頭，示意冇問題。
我估計係電子油量計嘅問題而已。
部車冇問題，簽妥文件就諗住走人，點知佢有錢俾返我！@@
奇嘞，冇啦啦俾錢我嘅？@@
睇返文件，原來我早咗一個鐘交車，佢退返一個鐘頭租車錢俾我！嘩，有冇搞錯，咁都有嘅，實在太好喇，等於唔駛錢入油！=P
離開油站，就搭返電車過市中心搵ラ-メソ三月食拉麵。今日係 20/2，我哋有電車一日票用，唔駛再俾錢。=)
到站後，點睇地圖都搵唔到間嘢，後來上咗某商場問吓人，商場職員話間嘢摺咗......@@
咁我哋只好喺附近睇吓有咩食啦，但係諗諗吓，下一站係去狸小路行街，不如過咗狸小路先搵嘢食。
咁我哋就行去狸小路，狸小路係札幌出名嘅購物街，分五段，每段都係有頂嘅，但又唔係商場咁......
我哋呢刻都幾肚餓，亦唔想嘥太多時間去搵嘢食，求其搵咗間，見到都有啲吸引力。
叫咗兩樣嘢，都幾好食！日本乜鬼都好食嘅......@@
定係心情使然呢~=)
等緊啲嘢嚟嘅時候，我問屎塔而家幾點，佢冇戴錶，所以要搵部手提電話出嚟睇(當時我唔方便搵自己果部)，佢係咁摷，又搵褸袋，又問我有冇袋到，我同佢搵暈都冇......
我偷偷地用個腦記低我哋嘅對白......
屎塔：「你今朝執嘢冇執到咩？」
橫八：「冇喎，我淨係見我部電話，我以為你收起咗你果部。 你今朝襟完鬧鐘放咗喺邊？重溫返今朝嘅情況諗吓。」
屎塔：「今朝？今朝......我......掉咗喺被度。你走前有冇睇到？」
橫八：「我走前都有留意有冇拎漏嘢，但你部電話係白色，被又係白色，我真係睇唔到......@@」
屎塔：「唉，唔通留底咗喺宏樂園......」
橫八：「好有咁嘅可能......」
呢刻，屎塔嘅心情可謂非常複雜，一邊埋怨自己嘅唔小心，一邊為部電話默哀......=(
睇到佢咁嘅樣，真係心都痛......
唔得！我呢個充滿智慧嘅男人，係時候要做啲嘢！
橫八：「電話之嘛，返到香港咪買過部，我送俾你！你部嘢都用咗好耐啦，咪換過部囉。=)」
屎塔：「唉......」
我深知道講乜都冇用，送幾部俾佢，佢都唔會開心返。我呢個充滿智慧嘅男人，要再諗吓計！突然間，我諗起，佢部手機有我哋今次旅行嘅相喎！手機就唔值錢姐，相就真係無價寶，唔得！我呢個充滿智慧嘅男人，要諗諗辦法，我要攞返部手機！
橫八：「你認真啲諗吓，部手機喺宏樂園嘅機會係咪好高？」
屎塔：「係卦......」
呢刻叫佢認真諗吓，其實真係冇咩可能......XDDD
佢嘅心情已經跌到落谷底......
我計一計啲時間，覺得可以返一返去。
橫八：「返去攞囉！手機冇咗好小事，但啲相我真係唔想冇咗！」
屎塔：「吓？」
橫八：「係呀，你諗吓，如果部手機真係喺宏樂園，我哋攞得返嘅機會好高！」
屎塔：「我哋邊有咁多時間......同埋點返去呀~=(」
橫八：「時間？有，跟住我哋去行街之嘛，我同你都唔好咖啦，只不過要到此一遊姐，其實我哋都到咗啦，仲喺狸小路食緊嘢！犧牲行街嘅時間，之後果啲再就一就，我哋一樣唔會錯過任何景點。搭車方面，我哋可以再到豐田租車，租車前，叫個女仔打電話過去，問吓先，有咪過去，冇就冇計啦。」
屎塔：「都好......」
嘿嘿，有啲起色喇！
食物到咗之後，我有我食，佢有佢食，好明顯，大家都諗緊同一件事，究竟攞唔攞得返部手機呢？
屎塔罕有地以一個極快嘅速度，完成佢嘅午餐！
橫八：「你好肚餓咩？@@」
屎塔：「快啲食完快啲行吖嘛......」
好，我都要食快啲！
食完午餐，我哋就行去電車站搭電車過豐田。
我哋一直都有少少擔心，究竟跳隻咩舞，先可以話俾豐田個女仔知我哋留底咗部電話喺宏樂園，叫佢幫我哋打去問問呢？
到達豐田，有一男一女，女嘅就係之前服務我哋果位。
屎塔喺紙上寫住「遺失 電話」我就攞部電話出嚟，指一指，又圈住宏樂園嘅電話同名。初時個女仔都唔係好明，跳過一輪舞之後，佢終於明白！
我用字問佢打電話過小樽(宏樂園所在嘅城市)是否有料，諗住要錢就我俾，好彩係冇料嘅。
佢打過去，電話接通咗，屎塔又寫埋日文(佢寫日文好似畫公仔咁~XDDD)話俾個女仔知我哋間房名，個女仔同對方講完一輪，真係講咗好耐，係咁不停爆啲日文出嚟！跟住又細心聽對方講一輪，我哋真係心急死，但又要等，真係急死人！@@
經過一輪講同聽，又靜咗一陣，相信係對方去搵緊部電話。對方再次講嘢，個女仔向我哋作出一個 OK 嘅手勢，我哋終於鬆一口氣！
佢又指一指地下，我呢個充滿智慧嘅男人，即時意會到，佢問我哋係咪今日過去攞，我即時點頭示意係！
個女仔收咗線之後，好快手咁幫我哋搞手續，首先問我哋係咪一切不變，其實佢只係做手勢同講日文，我都唔知點解我會明佢講咩......
其實除咗租嘅時間，其他實在冇所謂。佢最少要租六個鐘，當時係三點鐘，佢間舖頭收七點，即係話，我只有四個鐘，但絕對夠用。
好，手續搞掂俾埋錢，我示意我會 1900 前交車。
但就仲係要等一陣，因為佢哋實在太盡責，一定要洗埋部車先 交俾我哋......@@
終於等佢洗完車，要再次 check 吓車身有邊度有花，今次由個男仔負責，我冇乜點仔細睇，反正交車時佢哋都唔睇嘅。今次租嘅，即係今朝還果部，哈哈~=D
開車前，當然要搞吓部 GPS 先啦，一切準備好，出發！
今次再開車，感覺自然好多，始終叫做有皮毛嘅經驗......
去到噚日果個路口，我再次錯過！！！幾經曲折，先上得返扎樽道......
成個過程，領航員都係唔知嘅，因為佢正在努力......休息中 ！@@
因為先前嘅錯路，浪費咗唔少時間，所以上到公路，我就......
去到收費亭前，左邊有條小路，剛好喺收費亭前落橋，根據 GPS 嘅引領，我正係要行呢條路。(噚日去小樽係遠過宏樂園好多嘅~)
正喎！唔駛錢！
於是我就落橋啦，我實在開心得太早，一落橋轉個右彎，原來仲有收費亭！XDDD
嚟到收費亭，例牌問我哋由邊度嚟同會去邊，我哋答由札幌嚟同會去宏樂園。
點知個大叔以為我哋問佢點去宏樂園！@@
係咁講日文，又拎張地圖(預先印製好去宏樂園嘅地圖)出嚟係咁指，講咗分幾鐘，唉，你實在太好客喇......
今次平少少，只需 700 日元。
離開咗公路，好快就到達宏樂園，我哋入到去說明來意，一分鐘後 ，部手機同個主人終於可以重逢！=)
道謝與及道別之後，我哋繼續趕路，哈哈！
我同屎塔講，我可以答佢今朝條問題。
佢問過：唔知幾時再有機會嚟呢？
咪就係今日囉！=P
我哋打算去埋雪印先交車，由於出發前並冇諗過要揸車去雪印，自然冇準備雪印嘅電話號碼，點算好呢？好彩，雪印好近 JR 札幌站，我哋就搵 JR 嘅位置出嚟，再搵出雪印嘅位置，但原來一啲都唔易，最後我哋都以一個唔太肯定嘅心態，設定某處為終點站(不中雪印也不遠)。
回程時好快就經過收費亭，佢俾咗張紙我哋，上面唔知寫咩，但係就唔收錢，可以開車走。奇怪......
唔通回程唔收？？？係就好呀！
一路行，又過咗大半個鐘，到咗另一個收費亭，先知道之前我好天真同好傻！今次收 1100 日元！@@
不過都貴得有道理，因為今次個目的地係遠好多，過咗收費亭都仲有一大段路要行~
去到某處，GPS 顯示我哋已經到咗，我哋唯有停埋一邊再睇地圖，當我駛埋一邊時，雪印就喺我哋嘅正左方！=D
但係我哋喺街邊，部車點算呢？於是我落車走入雪印問吓啲姐姐，我問佢哋最近嘅停車場喺邊，但佢哋唔明我講乜，我唯有用紙寫「最近駐車場」，佢哋就示意喺舖頭後面已經有停車場。
我開車繞到後面，見到有個 P 字，即刻扭入去睇睇。
嘩，立體駐車場？乜 Q 嚟咖？有幾立體先？@@
同職員傾咗兩句，我講英文佢講日文~XDDD
最後都知道要開車入個鐵兜，入去前，乘客要落車先，我好慢好慢咁駛入去，原來入面有鏡可以睇到前轆入得啱唔啱位嘅 ......
好，泊完就熄匙落車，個鐵兜就會連部車唔知兜咗去邊，總之我係睇唔到嘅......
又一次新奇好玩又刺激嘅玩意！真係一次好好嘅體驗，好多謝屎塔留底咗部電話喺宏樂園！=P
泊完車就行返去雪印，地下係商店，上一層係 Cafe，我哋就上咗上面坐低食雪糕，都幾好食咖！
食完雪糕就要去攞車交返去豐田。
攞車時都等咗幾耐，因為佢一個人要做好多嘢，跌落嚟果部車又唔係順序嘅，會出現遲嚟先上岸嘅情況。
等攞車時我哋研究緊地下嘅圓盤有咩用......
最後見到人用，先知道，呢個盤係幫助攞車嘅人唔駛掉頭 ，認真方便又細心！
終於見到我哋部車吊到落嚟，我上車再倒車，但我個位係冇圓盤嘅，所以要自己掉頭，果個人就不停叫後吖後吖(當然係講日文)，佢幫我睇位，直至我開車走。
一腳踢果個人又要收錢，又要出單，又要控制部機吊走部車，又要控制部機拎返有人攞嘅車出嚟，又要控制個圓盤，更加要幫人睇位，仲要睇到部車走咗先得，我睇佢真係忙到呢......
離開咗停車場，我哋就靠 GPS 去豐田。
今次 GPS 好耐都未指示我哋嘅正確位置(平時開車後要幾秒先會顯示返部車喺條路度)，過咗兩個街口都仲係指住我哋喺停車場入面！@@
我哋唯有泊埋一邊再從新設定過部 GPS，但結果一樣！！！
我以為部 GPS 壞壞地，我哋只好博一鋪，認定個大方向，一路係咁行，過咗幾條街，個 GPS 先指返我哋喺條馬路度，有驚無險咁安全抵達豐田。
到埗前，我見油標仲係顯示 FULL，所以今次我冇再去入油~=P
一入到去，個位小姐就用日文問我哋攞唔攞得返部電話，我以微笑點頭。
跟住到個男仔收車，又問我哋攞唔攞得返部電話，我都係以微笑點頭。
一切搞掂晒，我哋下一步係要去 JR 站附近嘅 JR Tower，即 T38。
由於事出突然，出發前冇睇過由豐田去 JR 站係點去嘅，但憑我研究過嘅資料，我好快就諗到點搭車好。
記憶中，山鼻9条電車站係可以步行過去中島公園地鐵站(南北線)嘅，由地鐵站搭去札幌站就可以步行到 JR Tower。
於是我哋就捉住個男仔問，問吓點行過去地鐵站。
個男仔作出一個雙手握軚扭動嘅姿勢，我哋知道佢講緊駕駛，我哋車都交咗，當然唔係問點揸車去，經過一輪舞蹈，我哋終於都明佢咩意思！佢話車我哋過去！嘩！有冇咁好人呀 ！真係有啲唔係幾好意思......
喺車上面，屎塔講笑咁話：不如叫佢車我哋到 JR Tower。XDDD
直駛咗幾個街口就到達地鐵站口前，我哋落咗車之後都以好多謝佢嘅態度向佢道謝同道別。(我哋落車前，佢已經快步落咗車想同我哋開車門！@@)
我哋走落地鐵站，搭到札幌站，200 日元一個。
再行咗一段地下城就到 JR Tower。
去到要上六樓，再買飛，先可以喺六樓搭專上三十八樓。
JR Tower 其實只係一座商業大廈嘅三十八樓，360 度都係落地玻璃，可以環觀整個札幌市。
其中最有噱頭嘅係男廁(女廁冇咖)~
下一站係上藻岩山睇札幌夜景，先前買嘅 Sapporo Romantic Passport 係包埋上山纜車嘅來回費用嘅。
因為下一站係上山嘅關係，我哋就喺 JR Tower 著埋條雪褲先行。
首先我哋行返去地鐵站，搭地鐵由札幌站到大通站，200 日元一個。
再由大通地鐵站步行去西4丁目電車站，搭電車至ロ一プウェイ入口站，再行過去山麓站(即係纜車站)。
由電車站行過去山麓站，中途指示好唔清晰，我哋都要估吓估吓先去到，途中經過好多冰嘅地面，好斜嘅雪地面，都幾辛苦。
行到中途，我哋見到一塊牌......
WTF！！！本旅遊書明明話閂 2130 咖喎！現時係 1953！唔理得咁多，我哋加快腳步，上到去睇吓咩事先。去到某處乾嘅石屎地面，眼見前面就係山麓站入口，我同屎塔講，我上去先，你慢慢行。(因為屎塔對鞋仲有少少夾腳，行得唔係咁好，所以我打算喺安全嘅情況底下先放底佢，自己行快少少)
上到去同個女仔溝通完一輪，屎塔都已經到，我哋得到嘅答案係......
山麓站收 2000，但上去嘅纜車收 1900......=(
咁仲有冇其他方法上山呢？巴士或者的士呢？一場嚟到，的士就的士，貴就貴，真係唔緊要！
個小姐嘅回覆係，通往山頂嘅山路已經因路面結冰嘅關係封咗，要上山頂只有坐纜車，但纜車又已經收咗工......
呢刻嘅我，真係唔能夠接受現實！
點解會搞成咁呢？點解呢？
本旅遊書話山麓站收 2130，我計劃 2000 去到，冇問題喎！
唉，我知喇，旅遊書講嘅係夏天嘅收工時間，冬天係收 2000，本書仲要係季節限定，係講北海道嘅冬天嘅......
呢刻，失望、沮喪、憤怒，不停咁向我襲擊，成個人快要崩潰......=(
好失望，好嬲，本書刊錯收工時間不特止，仲要冇提過上山嘅纜車會喺收工前一個鐘停駛！
一個普通打工仔，可以有幾多時間？可以有幾多金錢？可以有幾多機會去旅行？世界咁大，有幾多機會會遊同一個地方兩次？
除此之外，我買咗 Sapporo Romantic Passport，但用唔到最貴果樣項目，仲嘥咗錢！
嘥錢！嘥時間！嘥心機！呢次意外，成為咗呢個旅程嘅一大遺憾！
其實少少錢又算得係咩吖，俾多一倍可以上山我都俾啦！但係呢刻，好正常咁將所有受影響嘅事都拎晒出嚟曬冷啦！
真係想告X間出版社！告X班編輯！
我好努力咁控制自己嘅情緒，唔想影響埋屎塔，其實佢又咪同我一樣咁失望，不過佢就可能少咗一份憤怒，始終個行程係我編，出咗偏差，我會怪責自己......
其實我都有責任，我唔應該盡信本書，應該上官方網睇睇，唉，講乜都冇用，當汲取教訓，下次做好啲啦~
我不停安慰自己，我仲有機會嚟北海道，因為北海道仲有好多地方未去，而去北海道，札幌差唔多可以話係必經嘅，咁下次咪可以再嚟囉。
屎塔就冇怪過我，佢仲安慰我，其實我都知佢好，不過我的確要啲時間去平伏自己嘅心情~
好喇，我哋唔知因為怒火中燒還是真係行到熱，我哋決定喺山麓站除返條雪褲先走。
沿途行返落去都幾跣，因為有啲係冰面，我哋好小心咁落到平地，搭返電車到すすきの(即係薄野)站，再行去 Norbesa。
Norbesa 係一個商場，我哋當然唔係去行街啦，為嘅，係乘搭鬧市中嘅摩天輪，有名咖，叫做 Noria。
費用係喺 Sapporo Romantic Passport 入面包埋嘅。
摩天輪都係咁啦，冇乜特別，睇吓札幌夜景咁囉，又驚完一輪咁囉，腳仔都軟埋......
Sapporo Romantic Passport 可以退役 lu~
(其實藻岩山張纜車飛係三個月內有效嘅，但係......但係.......)
又到食嘢時間，我計劃好去食一間叫炭炭嘅食店，係炭燒食品嘅食店，書本推介食黑毛和牛、帆立貝同埋大蝦。
一去到坐底，唉，原來要自己燒，原本我以為係佢燒埋俾我哋食嘅......
要我自己燒真係唔會揀呢間！點都好，既然坐底咗，是但啦~
一打開本 Menu，真係唔係好識叫，冇乜圖。最後我哋就叫咗推介果三樣，等食物嚟嘅時候，有兩個香港人入嚟，就坐咗喺我哋隔離。
我哋坐緊嘅地方係類似一間開放式嘅房咁嘅，得兩張檯，而家就成間房都香港人！@@
去旅行，真係唔想咁樣......
都冇計啦~
食物到喇，新鮮就係新鮮嘅，但一嚟到要自己燒，真係大打折扣！(屎塔話麻麻地......)
食完呢三樣嘢，梗係唔夠飽啦，我哋打算睇吓附近有咩食，行咗一陣，其實真係冇咩地方吸引到我哋入去食，屎塔就提議買杯麵食，據說日本嘅杯麵，求其買都唔會太差，於是我一口就贊成。
我哋走入便利店 Lawson，就掃咗三個杯麵同兩杯布甸。
買完就行返酒店，呢個時候條街好凍，我哋又冇著雪褲，但又唔係咁熟路，都捱咗一陣先返到酒店，好辛苦！@@
返到房，食咗布甸先(因為未有熱水整麵食)，再隊咗兩個杯麵食，飽晒！仲淨一個杯麵食唔落。=P
每日點滴：
白之戀人之前因為一啲醜聞而關閉，商店就喺上年開返，工房就喺今年一月尾開返，我哋好好彩，啱啱好可以遊埋工房，否則，白之戀人真係可以唔駛去，冇咗工房，淨得商店，有咩好睇？
發覺留底部電話喺宏樂園果陣，見到屎塔唔開心同內疚個樣，真係好慘......
雖然完全冇行過狸小路，但我哋都唔覺得有咩可惜。哈哈！
今日最難忘嘅係，臨時租車過小樽同埋上唔到藻岩山！
仲有車我哋去地鐵站嘅豐田職員，真係好好人！
唉，今日仲未感受到落雪，機會好微囉，成街都溶緊雪，就連肉體都感覺到越嚟越暖......
留言列表
