今日行程:

Day 01:Siloam 汗蒸幕 → 酒店(寄存行李) → 大使館找換店 → 一品香 → 德壽宮 → N 首爾塔 → 全州中央會館

 

 

一直坐飛機都冇刻意去感受機師嘅駕駛技術,不過今次真係有好唔同嘅體驗~
唔單止全程機都好定,連降落都非常定,落地嗰吓嘅震盪可以話係未試過咁少,原來咁大架飛機,以咁高嘅速度降落地面,都可以咁清脆利落,好嘢!

順利入咗境,就去買交通卡~
交通卡,比較多人用嘅,一定係 T-Money,其次係 Cashbee~
今次我決定買 Cashbee,貪佢喺某啲便利店買某啲產品會有折,同埋喺釜山增值會方便啲~
不過出發前得知而家用 T-Money 喺釜山地鐵都可以輕易增值,點都好,我都係決定買 Cashbee~

早就知道 Cashbee 只有 7-11 有出售,入咗境之後就去搵 7-11,同職員講要三張 Cashbee,並每張增值 10000 韓圜~
個職員就梗係賣慣賣熟啦,好快手,而我就好忙咁搵啲韓圜出嚟俾錢,第一次用韓圜係論盡啲,要慢慢睇~

我搵好錢抬頭一望,佢增值緊嘅係 T-Money!
其實就小事到不得了,人哋都增值緊,邊有得退吖,算吧,要咗佢啦~

今日第一站係「Siloam 汗蒸幕」
搭完凌晨機,搵個地方休息吓就最好~
嚟到韓國,去汗蒸幕就係最佳選擇~
初時只係著眼喺 Sparex 同龍山之間揀一間,但係其實兩間都好唔就腳~
因為我聽日一早要去金浦國際機場,所以訂咗今晚住嘅地方喺首爾火車站附近,而我想汗蒸幕完去酒店寄存行李方便啲,上面所提到嘅兩間汗蒸幕都唔算方便~
後來我睇到 Siloam 呢間汗蒸幕,我相信汗蒸幕應該間間差唔得太多,網上面亦唔見有負評,就決定去呢間汗蒸幕~

買完 T-Money,仲有大半個鐘先有車,出面天寒地凍,諗住等陣先出去~
不過後來有人企咗出去等車,入面又有為數不少嘅人喺度休息,如果呢班人都係搭呢班車,而我哋又排最尾嘅,分分鐘上唔到車,咁就麻煩嘞!
咪嘞,出去排定隊穩陣啲~

出面同入面,當然係兩個世界,出面只有五度,不過又唔係想像般咁凍,其實喺度等車都還可以,唔會話覺得辛苦~
陸陸續續有人排隊,但都唔算太多人,到車到時太約只有十幾人~
01.jpg

02.jpg

03.jpg  

喺香港搭旅巴,如果有大型行李,一般都係自己放入車側行李架,而且保安措施係零,邊個早落車,就可以任攞~
喺韓國呢度就唔同,大型行李,只需要放喺車側,會有職員處理,仲會為每件行李貼上編號,另一相同編號貼紙就俾物主,以便取回行李時相認,咁就安全喇!

上車時,司機會負責收錢,仲可以找贖~
開車喇,唔知點解司機揸得好慢,我再留意吓路面,係極少車,不過,原來路面限速係 40km/h,咁個司機又真係幾守法~
揸得慢,唔一定代表坐得舒服,都真係要睇司機手車得唔得,呢個司機就得喇,快好慢好都幾定,好嘢!

開車之後,我就拎手機個 offline maps 嚟睇吓 work 唔 work,見到個浮標喺地圖跟住條馬路行,嗯,掂呀!

個司機手車咁定,又正值凌晨時份,真係想唔瞓著都唔得......所以好快就到站......
落咗車,對照返行李編號就可以攞返行李~
真正開始旅程!

由車站去 Siloam 汗蒸幕,只需約十分鐘步程,不過由於要橫越首爾站嘅火車軌,我哋需要走上火車站先做得到~
04.jpg  

上得火車站,不如順利換埋幾日後由釜山去首爾嘅 KTX 火車飛~
其實半夜都唔知換唔換到,不過反正焗上去火車站,就行去睇睇~
05.jpg  

上到去見到售票處有職員,就走過去,俾網上購票後嘅確認信佢睇,就咁就換到飛~
不過個女職員嘅面口,十足十釜山嘅一個地區 - 西面!
06.jpg  

換完飛就搵路過對面,再跟地圖行,好易就搵到~
07.jpg

08.jpg  

Siloam 汗蒸幕呢度,分兩種價錢,一種只係休息,唔用其他設施;另一種係可以享用絕大部份設施,當然包括汗蒸幕~
我初時只係諗住休息瞓幾個鐘就算(屎塔同 David 就會使用汗蒸幕),對其他設施冇咩大興趣,不過當對方話俾我知,如果只係休息,就只能去某一樓層,其他幾層都唔可以進入~
咁樣咪好唔方便?而且我本身諗住唔用佢嘅設施姐,都想周圍行吓咖~
相差只係 2000 韓圜,即刻改變主意,買貴啲嗰隻~

初時佢俾咗兩女一男嘅衣服我,我係同佢講嘢嗰個,唔會認錯我係女仔啦,咁即係佢認錯咗 David 係女仔~ XDDD
我同佢講返嘅時候,佢一路笑一路換返俾我,哈哈~

買完飛,我同屎塔就要喺呢度分開,唔知對方係咪睇得出我哋依依不捨,特別提醒我哋,可以喺二樓重逢~ XDDD

我同 David 入咗去男嗰邊,入到去,首先要寄存對鞋同個篋,再用鞋櫃鎖匙換儲物櫃鎖匙~
根據返鎖匙嘅編號去搵個儲物櫃,即場換衫~

喺呢個男性嘅空間,有一半男性都係赤裸嘅,我多次提醒 David 唔好眼望望,自然啲~
但其實我都係強裝自然,當作平常~

換完衫,就用 Whatsapp 同屎塔聯絡,喺二樓重逄,跟住一齊上五樓~

五樓係睡眠區,成層都係俾人瞓覺嘅地方,啱晒我同屎塔~
如果要喺大廳嗰啲地方瞓,真係唔掂,第一冇安全感,第二會有人行嚟行去,第三好鬼光,點可能係合適嘅睡眠地方~
當地人可能習慣咗,我同屎塔就係唔得~

睡眠區呢,燈光好暗,一樣有大廳,但冇咩人行,全部人都係瞓,仲有間大房,走廊位一樣有好多人瞓喺度,走廊兩旁有好多類似小山洞嘅位,分兩層,每個山洞係俾一個人捐入去瞓嘅,呢啲就啱晒我同屎塔~
不過要搵空位都唔容易,就算有,都唔係相鄰位~
最後搵到個相鄰位,不過其中一個就有上手留低嘅被鋪同枕頭,為咗大家可以瞓喺隔離,我唯有拎走啲被鋪同枕頭~
山洞入面有盞燈,可以開關,盞燈係暗紅色嘅,開咗都只係影響到山洞入面嘅人,唔會影響到其他人,呢個設計唔錯~

至於 David,佢都有一齊上五樓,不過佢就自己搵窿捐,自己搞掂~

熟睡咗幾個鐘,算係叉足電~
醒嘅時候,有個男人打斜倒轉咁瞓咗喺我門口,真係好隨意,幸好我都仲夠位走~

大家梳洗好就去試吓啲汗蒸幕~
我哋只係識分溫度高低(正常人都識分......),功效呢,就唔太清楚喇,反正都係抱住試吓嘅心態,功效嘅嘢,算吧~

試咗個 50 度嘅,OK 喎,頂得吓,不過我為免出汗,留咗唔係好耐就走咗出嚟,跟住走去試咗個 -14 度嘅,嘩,想留耐啲都唔得啦!
再試咗個 60 度,當然都係好快走返出嚟~
見到有個 86 度嘅,真係連入去嘅衝動都冇,過門而不入~

差唔多喇,就換返衫準備離開~
離開嘅程序,同入嚟時掉轉,換返衫,還儲物櫃鎖匙就可以攞返鞋櫃鎖匙,攞返個篋,著返鞋就可以離開~

喺汗蒸幕入面,啲韓國人真係好悠閒,好寫意,就好似喺屋企咁,想點灘都得,真係一個很不錯嘅活動~

朝早嘅 Siloam 汗蒸幕~
09.jpg

10.jpg  

下一站係去酒店寄存行李~
過去酒店,又要橫越一次火車軌,自然,又要上返火車站行過去~
間酒店好近首爾地鐵站十號出口,所以我嘅概念係,上咗火車站,搵地鐵站方向,再落地鐵搵埋十號出口就去到~

沿途雜影~
11.jpg

12.jpg

13.jpg

14.jpg  

好順利咁出咗十號出口,上咗地面睇住地圖,一路行,一路心裡覺得唔對路,第一,感覺真係唔駛行咁遠;第二,我而家身處嘅位置,確實係遠離緊間酒店~
咁唯有行返轉頭,差唔多到返地鐵站,我知咩事喇~

一出地鐵有條細街,係斜路嚟,間酒店就喺斜路嘅中段,而我一出地鐵就無視呢條細街,係咁向前行,梗係越行越遠啦~
其實點解我一出地鐵之後會無視呢條細街呢?我諗永遠係一個謎......

雖則去旅行,我唔係好介意拖住個篋周圍去,不過拖住個篋上呢條斜路,都幾係嘢~

去到酒店,原先只係諗住寄存行李,點知搞搞吓,佢俾埋房鎖匙我哋,可以上埋房,咁仲好~
上到房,間房真係好細,連個篋都開唔晒,只可以開一半,同新宿太子有得 fight,不過呢啲嘢一分錢一分錢,你俾幾錢先~
不過其實我都唔係好介意,有幾多時間喺酒店吖~

放低晒啲唔需要帶出街嘅嘢就出去嘞~

下一站係「大使館找換店」
呢間找換店可以話係韓國最出名嘅找換店之一,基本上上網搵韓國找換店,佢都一定榜上有名~
出發前我只係換咗少量韓圜,夠應付到埗至汗蒸幕就得,之後就嚟呢度先再換,希望個兌換率好啲~

第一次搭首爾地鐵,其實同其他方差唔多,大同小異,首爾嘅地鐵仲會為每個站編上編號,咁就更易睇,冇咁易搭錯車~

順利到達大使館找換店,今日個兌換率係 142.6,幾好喎~
不過呢,有人話有時隔離嗰間個兌換率仲好,咁我哋梗係睇埋隔離嗰間啦,結果個兌換率係一樣~
咁換生不如換熟(其實我都未幫襯過......),梗係喺大使館換啦~
15.jpg  

下一站係「一品香」
去一品香,純粹想試一吓韓式炸醬麵,一品香喺正大使館找換店隔離,方便就腳~

坐低咗,菜單有晒中文,咁炸醬麵就實叫咖啦~
三個人叫嘢都幾麻煩,我同屎塔都唔鍾意分嘢食嘅,平時我哋兩個去,一人食到一半交換,快手淨腳,但同 David 就唔可以~

我好怕食人口水尾,除咗屎塔,其他人夾過食過嘅嘢,基本上我都唔想掂,但有啲情況冇得你揀就冇計~
唔鍾意分嘢食,又唔食人口水尾,其實站在我同屎塔立場,蝕嘅唔係我哋,係 David~
我同屎塔可以故我,一人一份交換食,冇分別,係 David 試少咗嘢姐~

咁我哋就梗係唔會衰到唔分嘢俾 David 食啦,唔鍾意都要分,叫咗嘅嘢,大家都有份食就最好~
我同屎塔除咗叫個炸醬麵,仲叫咗個三鮮麵,David 就一個人食一個炸醬麵~

職員一早就俾咗三杯茶我哋,由於我唔飲得茶,於是就叫佢俾杯水我~
轉頭上檯嘅係成支樽裝水,嘩,會唔會收我天價咖?
我即刻問佢幾錢支,佢話係免費嘅!
真係大鄉里!

落咗單,職員就上咗啲前菜,可能佢見我哋個樣有啲猶豫,就同我哋講,免費的~
再次大鄉里......

啲麵到喇,炸醬麵,未食之前嘅心理準備,係預咗會偏甜,我自己未必鍾意食~
食落其實都還可以,係油膩咗少少~
16.jpg  

反而個三鮮麵幾好,真係有鮮味,尤其啲菜(唔肯定係咪黃牙白),索咗啲湯汁,非常鮮甜,成碗嘢最好食就係啲菜~
17.jpg  

David 食咗一個炸醬麵,唔夠飽,要再叫嘢食,但佢竟然 encore 佢都覺得麻麻地嘅炸醬麵,奇怪~

呢餐,叫做試過吓韓式炸醬麵係點嘅,個人嚟講,認真麻麻~

下一站係「德壽宮」
之前掙扎緊,去景福宮定德壽宮好,最後決定去德壽宮~
雖然景福宮比較大,不過其實我對呢啲宮廷嘢麻麻地,倒不如揀個就腳啲嘅就算~

我選擇步行過去德壽宮,遠其實唔係好遠,不過中途多次遇上冇路行,要行落地下街先過到馬路,都幾麻煩,不過市中心路面使用比較緊張,呢啲都好正常嘅~

行到去德壽宮對面,有啲展覽嘅東西,就行埋去睇吓~
雖然睇唔明聽唔明,但唔難睇得出同環保有關~
18.jpg

19.jpg

20.jpg  

到咗德壽宮入口,見到告示牌寫住啲換班時間,我先猛然醒起,今日係星期日,係冇換班睇咖喎,連我自己啲功課都有寫,咁點解我會安排今日嚟呢?
其實當時我真係諗唔明,我做功課時係有反覆檢查過啲開放時間,確保唔好喺人哋唔開放時先去~
不過喺寫遊記呢刻,我終於知道點解喇!
我只係有睇到德壽宮星期日都開,所以就過咗關,冇為意換班嘅時間~

本身我對睇唔睇到換班冇所謂,安排到就梗係睇埋,不過呢個旅程唔係得我自己呢,仲要顧埋另外兩位嘅意願~
今次我真係大意咗,對唔住兩位團友喇......

入到德壽宮,面積唔算好大,建築物間間差唔多,而且同北京故宮嘅建築(外觀)有幾分相似~
呢度唔多人,我哋都係好悠閒咁周圍行吓睇吓,冇話好細心好仔細咁觀賞~|
21.jpg

22.jpg

23.jpg

24.jpg

25.jpg

26.jpg

28.jpg

29.jpg

30.jpg

31.jpg

32.jpg

33.jpg

34.jpg

35.jpg

36.jpg

37.jpg

38.jpg

39.jpg

40.jpg

41.jpg  

行行吓,見到有班著古服嘅人好似巡遊咁操緊過嚟,唔知做咩,當刻嘅念頭係:唔通係換班儀式?
其實又唔似係,不過算啦,不必深究~
42.jpg

43.jpg  

喺德壽宮都逗留咗唔少時間,比預期遲咗唔少~
我決定唔去明洞聖堂,不過唔去明洞聖堂,直接上首爾塔又似乎太早,點好呢?

行街?我同屎塔都唔好,David 就冇所謂,行又得唔行又得~
咁算啦,早啲上去首爾塔啦,上面都有少少嘢行吓嘅~

下一站係「N 首爾塔」
大城市嘅觀光塔,總係覺得要到一到,否則就覺得個旅程好似欠缺咗啲嘢咁~

上首爾塔,可以搭吊車,可以搭巴士~
咁,作為遊客,點都要坐吓吊車嘅~
我嘅計劃係搭吊車上山,搭巴士落山~

由德壽宮行去吊車站,淨睇地圖計算就 23 分鐘,實際我相信就唔止嘅~
反正有時間,慢慢行~
途中又經過唔知幾多次地下街,好鬼煩~

沿途街景~
44.jpg

45.jpg  

行行吓,見到有集會,本來都冇乜特別,望上少少,嘩,原來有兩個人準備喺個大招牌上面跳落嚟!
不過呢,只係事先安排好嘅行動,實有晒安全措施嘅~
46.jpg  

行到去吊車站前,先要搭部幾特別嘅 lift 上去,其實話特別又唔係好特別,只係我自己未見過姐~
部 lift 係透明嘅,唔係直上直落,而係斜嘅,就好似部 lift 搭緊扶手電梯上落咁~
47.jpg  

喺等 lift 嘅時候,見到個情景,其實係錯覺嚟,不過令到我同屎塔笑到停唔到咁滯,但又要顧及禮貌,我哋只好強忍住唔好大笑~
個情景係咁嘅,等 lift 嘅地方,有一兩張長椅,有個大嬸坐咗喺上面,頭戴紅色帽,身穿黃色衫,眼尾望到佢,第一刻感覺以為麥當奴叔叔嚟咗~ XDDD

搭完 lift 行兩步就到售票處,都幾多人,好彩早啲上嚟~
到咗售票處,睇吓啲價錢牌,我神志不清嘅事件又發生......

我明明定好搭吊車上,搭巴士落,除咗試吓唔同嘅交通工具,搭巴士仲可以去到我哋今晚食飯嘅地方嘅附近,近好多,唔駛又行成半個鐘~
到買飛時,我竟然掙扎好唔好回程都搭吊車,完全唔知自己諗乜,搭巴士又平又近又方便,就喺我神志不清嘅情況下,我買咗三個成人來回吊車飛......
我唔係買錯,我係決定好要咁買,咁先奇!

我硬係覺得計劃呢次韓國嘅行程,唔夠專心,原因不明,究竟係因為第一次去韓國(自由行計),定係因為第一次同 David 去旅行(認真自遊行計)?
希望呢啲唔係精神病嘅先兆......

呢程吊車,好多人,迫到連轉身都轉唔到,而我哋就正正向住完全冇嘢睇嘅地方......
屎塔喺呢個時候,做咗樣幾令我意想不到嘅事情~
佢竟然請佢身邊身材高大嘅法國男人幫佢影一影另一邊嘅風景,真係估佢唔到!
48.jpg  

搭完吊車出到室外,凍咗好多,又大風,衫似乎唔係好夠,不過都 ok 嘅~

一路向住 N 首爾塔嘅方向向上行,見到有啲螺旋形嘅炸薯......嗯......唔知形容佢係條定片定串好呢?
我哋見都幾多人買咗,好似幾好食咁,就買一條嚟試吓~

嘩,真係幾好食喎,好有薯味,薯片厚道啱啱好,唔太厚又唔太薄,加上凍凍地食吓熱嘢,認真唔錯!
49.jpg

50.jpg  

再向上行,就行到啲周圍都係鎖頭嘅地方,欄杆上每一吋都係鎖頭,真係有啲怕個欄杆負荷唔到會有咩危險!
我同屎塔就完全唔 buy 呢種所謂嘅約誓,我份人太唔浪漫,屎塔亦都好實際~
當然,對於咁多人會咁做我又冇咩意見嘅,大家都係貪呢份浪漫嘅氣氛姐~
51.jpg

52.jpg  

上鎖頭就聽得多,亦見過,不過呢度唔只上鎖頭,亦有好多人鎖個電話套喺度,相信係因為可以寫多啲字呱~
53.jpg

54.jpg  

坦白講,呢度啲鎖多到完全冇美感,雜亂不堪~
55.jpg

56.jpg  

上到 N 首爾塔嘅呢層,有廣場,有商店,又有鎖鎖頭嘅地方,當然仲有最主要嘅 N 首爾塔入口啦~

由廣場望出去嘅風景,唔算太靚,咁居高臨下,又唔會太差嘅,只係同其他地方比,我覺得遜色咗啲~
57.jpg  

N 首爾塔~
58.jpg

59.jpg  

部單車用咁粗胎,好奇怪......
60.jpg  

商店就冇咩特別,至於鎖鎖頭嘅地方,點都會上去行個圈嘅~
61.jpg

62.jpg  

如果將個鎖鎖住喺度,代表兩個人嘅心可以緊緊扣在一起,咁,生晒锈嘅鎖,又代表啲咩呢?
63.jpg  

行夠就買飛上塔,都係嗰啲一秒唔知上幾多米嘅超快 lift,上到上面有兩層嘅~
上到去出 lift 係高層,好自然會行近窗邊望吓風景,嘩......
我嘩嘅,唔係風景有幾正,而係,嘩,咁鬼污糟嘅!
玻璃外層非常污糟,作為以觀光睇風景為主嘅觀光塔,真係完全唔可以接受!亦未喺其他地方遇過!
64.jpg

65.jpg  

行咗一個圈,唔覺有一塊特別乾淨,走落下層睇吓先~
嗯,呢層好啲,不過都唔算好乾淨~
風景就唔算太靚,不過可以睇到日落又加返啲分~
66.jpg  

期間有隻人扮嘅熊走出嚟,佢走出嚟扮睇日落,幾過癮,不過隻熊人衫太像真,有啲嚇人......
67.jpg  

日落完畢~
68.jpg  

呢刻天未黑晒,理應等天黑晒,睇埋夜景先離開,不過我哋三個都唔係好想留喺度~
可能因為攰,可能因為玻璃污糟,可能因為景唔吸引,可能,樣樣都有啲呱~
點都好,隨心而行,想走就走啦,冇咩可惜嘅~

山頂雜影~
70.jpg

69.jpg

71.jpg

72.jpg

73.jpg

74.jpg

75.jpg  

入黑之後,氣溫更低,真係想盡快離開呢個山頭~
搭完吊車,等返嗰部 lift 落返地面,等 lift 嘅地方,上方有屏風,下方則通風,現場勁大風,嗰對腳好似結咗冰咁冇晒感覺......

下一站係「全州中央會館」
主要係去食韓式拌飯,呢間網上評語不錯~

回程冇搭巴士,即係又要行餐死嘅,不過其實感覺都冇乜嘢,又唔係好攰又唔覺好凍,行吓行吓就到~

呢間嘢都幾多香港人嚟,舖入面有一半都係香港人~
76.jpg  

我同屎塔叫咗鮑魚拌飯,David 叫咗生牛肉拌飯,另外再叫咗個蔘雞湯~
77.jpg

78.jpg

79.jpg  

我哋真係見識少,鮑魚上檯時係生嘅,我哋嗱嗱聲倒入個鍋入面拌勻佢~

幾好食!雖然我哋叫嘅係鮑魚拌飯,但好食係好食在個拌飯本身,同鮑魚無關~
拌飯本身有幾款材料,食落口感非常豐富,鮑魚只係配菜(於我而言),冇咩特別,成鍋拌飯係幾有特式~

個蔘雞湯都幾好飲,可惜吖,冇乜蔘味~

食完嘢就返酒店,途中買咗啲生果同明早早餐~
80.jpg

81.jpg  

arrow
arrow

    Stupid Stranger 發表在 痞客邦 留言(0) 人氣()