《瞬間看地球》Stranger's Blog

今日行程：

Day 02：田染荘 → 昭和の町 → 地獄めぐり → 溫泉水蒸氣瞭望台 → 鶴見岳展望台 → 酒店 → グリルみつば (宿：別府)

起身嘅時候，最關心係有冇落雨，唉，落緊大雨呀~~~
明明講好咗噚日落晒咖嘛！>_<!!!

今日第一站係「田染荘」
田染荘係一處水稻田，我哋奢望可以睇到金黃色嘅稻田，但其實我哋知道呢個時份，應該都已經收割了，不過都唔緊要，我哋都覺得就算係收割咗，環境都係好靚嘅~

去田染荘嘅途中，我哋都好留意四圍環境，睇吓有冇紅葉嘅蹤影，可惜，真係冇乜~

田染荘有兩個觀景地方，一個係正式嘅展望台，一個係隱密嘅觀賞點~
呢兩個賞景地方都花咗我好多時間去搵~
因為我只係睇到人哋嘅相，但睇唔到喺邊度影出嚟，亦搵唔到有圖或任何資訊俾我知道個確實位置~
我只係憑住張相去推測影相嘅方向，喺 google maps 度慢慢搵，感覺有啲大海撈針咁~

最後俾我搵到正式展望台嘅所在地，隱密嘅觀賞點呢，就只係知道大概位置，到時去到再搵吓~

嚟到田染荘，一如所料，所有稻米已被收割~
不過環境就幾唔錯，如果有啲陽光就更好喇~

展望台入口~
 

正式展望台呢度有少少紅葉~
 

有啲假人，唔留心去望吓，真係以為有人釣緊魚......
 

田染荘隨影~
 

而另一個賞景點，只知喺穴井戸観音嗰邊嘅山頭，於是我哋就向嗰邊進發~
一路行，一路都覺得唔係好似，因為冇車路向山上行~
我哋去到山後面，條路好窄，窄到我都唔係好敢入，屎塔就話佢落車行入少少睇吓咩環境先~
由於現場係有機會阻住人，我就唔係好方便落車，只好由佢去探路~

隔咗一陣，屎塔返嚟，佢話唔覺得呢邊可以去到，而且入面好窄，實在唔適宜揸車入去~
咁就冇計喇，可能呢個隱密嘅觀景地方係要步行上山先可以去到，我哋只好放棄~

下一站係「昭和の町」
幾條由昭和時代已經存在，昔日外貌仍然完好保存至今嘅街道~

昭和の町停車場隨影~
 

嚟到昭和の町，冇乜人，就算有嘅都唔似係遊人，好清靜~
成條街都彌漫住一份懷舊味道，而且係真真實實嘅街道，唔係特登搭出嚟嘅景，都幾有氣氛，再加上落緊雨，仲加添咗一份詩意~
 

行經一間舖頭有隻狗，屎塔就走埋去逗吓佢，有位大嬸好熱情咁招呼我哋，佢好努力用有限嘅英語同我哋溝通，問我哋邊度嚟，又話隻狗拍過廣告仲攞過獎~
 

阿大嬸又同對面舖頭個阿姐講：Hong Kong、English
既然係咁，就過埋對面舖頭行吓~

呢間舖頭主要係賣幾十年前嗰啲玩具，至於係咪昭和年代就唔知喇~
 

臨走時阿姐 sell 我哋買「駄果子屋之夢博物館」+「昭和之夢町三丁目館」聯票，我見同到場先買一樣價錢，就幫佢買咗~

由於落雨關係，我哋冇行晒咁多條街，行夠就去兩間博物館~
 

我哋首先入咗「駄果子屋之夢博物館」
嘩，真係不得了！有部份收藏品，對我哋嚟講係非常有紀念價值，平時唔會諗起，但見到的話就會非常有感覺！
唔係嚟到呢個博物館，可能呢生人都唔會再記起呢啲事物~
 

跟住就入埋「昭和之夢町三丁目館」
呢間館係模擬昭和年代當時嘅場景，都值得睇吓~
 

博物館大堂呢度，有部古董車，我哋發現呢部車度門係開得嘅，想話坐入去感受吓，於是我哋就問吓職員，其實都預咗係唔得，只係我哋又唔見有任何告示話唔可以坐入去，即管問吓，點知得到嘅答案竟然係容許嘅！

嗯......唔通當時嘅日本人係比較矮細嘅？我已經唔係高又唔係肥嘅人，不過都好難先坐到入去，坐到入去都仲係勁逼，點揸車？
部車三前速，而且仲入到波，好嘢！
 

外邊擺咗幾部古董車~
 

下一站係「九州自然動物公園」
呢個動物園，可以坐特製車入獅子老虎嘅生活園地，幾特別~

去緊動物園嘅途中，喺高速公路遇上分岔路，但 GPS 冇提示亦冇指示，一時間我都唔知行左定行右~
到好近都未有指示，同埋分岔路初段都係直路，想估吓都冇得估，只好是旦揀一邊~
我呢世人其中一樣好彩係我冇咩興趣去賭場玩大細，否則肯定經常輸到香港都返唔到~
二選一，以我自己嘅運氣，當然係會揀咗錯嗰條啦！
GPS 上面嘅浮標，偏離道路，係偏離道路，因為我哋行緊嘅呢一條路，喺 GPS 上係唔存在嘅，可能係新路嚟，唔怪得佢冇指示啦，佢都唔知有分岔路......
當然佢亦冇俾條新路我哋行，佢只係任憑我哋喺路與路之間穿梭~
咁冇計啦，只好行住先，到下個出口就落返地面等佢再帶過路~

經過一條又一條嘅隧道，終於都有出口，不過距離分岔路處已經好遠好遠......
落返地面，即時已經有新指示，我跟住行，似乎佢都係想帶我返高速公路~
突然我有個想法，不如唔去動物園啦！
一來，今日遲咗出門口，今日肯定有行程要刪減~
二來，今朝嘅行程亦用多咗時間，今日肯定有行程要刪減~
三來，行錯路去鬼咗咁遠，今日肯定有行程要刪減~
四來，雨越落越大，啲獅子老虎都唔知仲會唔會周圍行，同埋睇其他動物都肯定唔方便，咁嘅天氣真係唔適宜去動物園~
反正要刪行程，不如就刪減動物園啦！
我提出咗呢個想法，屎塔十秒內已經贊成，趁仲未上高速公路就好停埋一邊再輸入下個地點嘅 mapcode 入 GPS~

下一站係「地獄めぐり」
即係別府嘅八大天然溫泉泉口，又稱「地獄巡遊」
分別為：「血の池地獄」「龍巻地獄」「白池地獄」「鬼山地獄」「かまど地獄」「山地獄」「海地獄」「鬼石坊主地獄」

首先我哋去血の池地獄先，去嘅中途都係行高速公路過去，大霧加上大雨，導致現場嘅能見度唔夠 50 米，視野非常差~
中途見到有休息站，我哋決定喺度食啲嘢當午餐~
 

咖喱牛肉飯，牛肉比較肥，但咖喱味道唔錯~
 

炸蝦烏冬，蝦冇乜味道，烏冬質感就幾好~
 

食完嘢繼續旅程，距目的地仲有 4KM 時，我哋見到「坊主地獄」，唔通我哋到咗其中一個地獄？
唔理咁多，轉入去睇睇~

睇完一輪都未確定係咪八地獄之一，決定走去售票處問問~
得到嘅答案，呢度唔係~
 

上返車，睇睇地圖，發現另外三個地獄更近我哋而家嘅位置，相信係因為之前行錯路，導致方位錯晒~
本來我嘅計劃係由北向南行，行晒八個地獄，途經「溫泉水蒸氣瞭望台」就去埋先，而家就變咗由南向上行，最後先去「溫泉水蒸氣瞭望台」

三個地獄之間，步行可達~
「海地獄」
主要係呢個大嘅藍色池~
 

另外仲有個紅色細池，冇咁多煙~
 

仲有足湯，屎塔就浸咗一陣~
 

海地獄隨影~
 

「鬼石坊主地獄」
入面有好大大小小沸騰嘅泥漿~
 

「山地獄」
呢個地獄嘅池好細，亦冇乜特別之處~
 

呢度仲係一個小型動物園~
 

咁大隻河馬，要食幾多片呢啲紅蘿蔔先夠呢？
 

山地獄隨影~
 

之後向北行，再參觀另外三個地獄，彼此間亦係步行可達~
「かまど地獄」
呢個池同之前嗰啲差唔多~
 

飲得嘅溫泉水~
 

手‧足湯~
 

「鬼山地獄」
呢個呢，唔知咩事，淨係見到煙......
 

呢度仲係一個鱷魚館~
 

又多又大條，其實真係有啲驚~
 

有條鱷魚 BB 同標本喺呢間屋仔入面~
 

「白池地獄」
呢個呢，又係唔知咩事，淨係見到煙......
 

除咗地獄，仲有個魚池~
 

又有食人魚~
 

之後向北行，再參觀另外兩個地獄，彼此間亦係步行可達~
「血の池地獄」
血紅色嘅地獄~
 

「龍巻地獄」
呢個比較別，同其他七個唔同，佢係 30 ~ 40 分鐘自然地噴射一次，我哋等咗十多分鐘就見到，否則就無緣了，因為龍巻地獄呢度都就閂門，再等唔到就要走~
噴射時仲有燈光效果~
 

其實我哋今日都好幸運，由「坊主地獄」(即一開始非八大地獄之一)至「龍巻地獄」，幾乎冇落過雨，只係最後兩個地獄間斷咁落吓~
要知道遊覽呢八大地獄都係露天的，如果落住大雨去遊覽，實在狼狽不堪加非常掃興，幸運幸運~

下一站係「溫泉水蒸氣瞭望台」
從高處望吓別府呢個城市，會見到好多地方不停冒煙，好特別~

天色昏暗，又落緊大雨，其實都係啦，深知上到嚟都睇唔到啲咩，反正有時間，咪又去睇吓囉~
勉強睇到啦~
 

下一站係「鶴見岳展望台」
係一個山腰嘅展望台

我哋專做埋啲無謂嘢，明知冇嘢睇，照去，就當冇嘢做揸架車周圍去~
結果一如所料啦~
 

下一站係「グリルみつば」
一間提供豐後牛料理嘅餐廳~

雖然今晚住嘅酒店免費提供車位，不過車位有限，我哋怕太夜去到會冇位泊車，所以早已計劃好完咗行程之後，去酒店泊車先，跟住再步行去 グリルみつば~

途中經過免費手湯，手痕浸咗一陣~
 

グリルみつば
 

打開 menu，其實都係以豐後牛為主打，最後叫咗兩個餐，一個係 Sirloin Steak 150g，另一個係 Filet Steak 130g

先上嘅係餐包同粟米湯，餐包冇特別，粟米湯好香粟米味，加咗幾粒烤過嘅麵包粒，呢個湯味道幾好~
 

再嚟就係沙律，冇特別出色嘅地方，不過感覺新鮮~
 

主角上喇，先到嘅係 Sirloin，牛味唔算濃，不過肉汁非常豐富，非常好食！
 

再嚟嘅係 Filet，牛味稍稍濃一點，質感較好，同樣肉汁非常豐富，我哋比較鍾意 Filet，正！
 

點牛肉嘅調味料有三種：醬油、鹽、山葵，我自己就意醬油多啲，屎塔就鍾意山葵多啲~
 

最後係雪芭，雪芭上面有紅藍梅，連埋雪芭一齊食幾好食，不過就唔及上次去小樽宏樂園食過嘅咁好食，可能人哋用嘅係北海道牛乳？
 

其實仲有飲品，只係一杯普通飲料~

非常滿足嘅一餐，滿足得步行回酒店嘅時候都仲懷念緊~

返到酒店，想話用吓 wifi，不過點整都唔彈個 confirm page(酒店有講要喺 confirm page 度 confirm) 出嚟~
噚晚間酒店只有大堂有 wifi，懶得落去，點知今晚又用唔到，吹脹~

隔咗個幾鐘冇理佢，屎塔部電話突然收到 whatsapp，再試吓係順利上到網，但 wifi 嘅 confirm page 係從來冇彈過出嚟，我就到瞓覺都未成功過，奇怪~