《瞬間看地球》Stranger's Blog

今日行程：

Day 05：稻積水中鍾乳洞 → 白水水庫 → 高千穗峽 → Tokyu Hands → 勝烈亭 (宿：熊本)

今日第一站係「稻積水中鍾乳洞」
本來我哋已經對鍾乳洞冇太大興趣，因為之前都睇過幾次，不過呢個同我哋睇過嘅有少少唔同，佢有一部份係喺水入面，加上適當嘅燈光效果，營造出一個相當美麗嘅環境，所以就算千里迢迢，我哋
就都願意走過去看看~

揸車過去嘅途中，見到大大個路牌指住「稻積水中鍾乳洞」，但 GPS 所指嘅方向，同路牌唔同~
我哋都好糾結，究竟跟牌好定跟 GPS 好呢？

其實跟牌肯定較好嘅，但路牌指指吓就冇指嘅情況，基本上每次旅程都會發生，到時都係要靠 GPS，咁倒不如一開始就跟 GPS 啦~
就係咁，我哋就選擇咗跟 GPS 行~

途中經過一處地方好似幾靚，就停低行吓~

到咗稻積水中鍾乳洞，原來呢度係一個園區，稻積水中鍾乳洞係區內其中一個地方~
唔計鍾乳洞，眾多地方之中，我哋揀咗「昇龍大観音」呢邊嚟行吓~

之後就真係入鍾乳洞~


鍾乳洞前有個虹の淹~


鍾乳洞裡面分兩邊，兩邊各有盡頭，沒有出口亦互不相通，走到盡頭，需要沿路返回分岔口再到另一邊繼續遊覽~


走完一邊，有點失望，實在不及在沖繩睇過嘅咁壯觀，可以話係唔同類型嘅鍾乳洞~
但失望還失望，我哋仲未睇晒嘛，或者好戲在後頭呢~

行返轉頭再行埋另一邊~
行完喇，都係失望~
其實兩邊都係差唔多嘅嘢，其實都係普通嘅鍾乳洞(當然從學術或歷史上一點也不普通)，還好，因為佢，我哋先會去原尻瀑布，感恩~

鍾乳洞，同我哋期望嘅有落差，係一回事，係主觀感受，另一回事係，覺得基本燈光或故事做得唔夠好，這點相對比較客觀吧~
燈光：有啲地方冇故事性，亦冇特別之處，亦冇危險性，但有光照住；有啲地方有故事性或地面不平或上方有突出物，但就冇光照住~
其實仲有一處係連有幾級樓梯都冇光照住，我自己用手機嘅閃光燈嚟做照明，一不小心，好易仆親~
故事：鍾乳洞內有唔少地方都被設定為一個特定場景，不得不承認我想像力或智慧唔夠，有啲真係唔係好明，但係唔緊要，呢個係我個人問題；但有啲真係一睇就可以發揮無限想像去編一個故事，一個場景，但又冇咁做~

總括嚟講，無論主觀感受，還是客觀感覺，都係我哋睇過嘅最唔好睇嘅一個~

上次去沖繩睇鍾乳洞，比原先預計用多咗一倍時間，而呢度，就只係用咗預計嘅一半時間......

睇完鍾乳洞，就喺園區內隨便行吓~

下一站係「白水水庫」
曾被評為日本最美水壩~

其實呢個景點真係差點胎死腹中，因為出發前已經被人否定咗唔去，其實亦難怪，一個堤壩，有啲水不停流落嚟，有咩好睇？
所以原先嘅行程入面係冇佢嘅存在~

而喺離開稻積水中鍾乳洞後，我哋係出發前往高千穗峽嘅，途中見到有白水水庫嘅路牌，屎塔又糾結，不如去埋~
咁我又睇吓地圖，又評估吓時間，其實去埋都可以嘅，因為鍾乳洞早咗離開嘛，所以決定去埋~

今日天氣好好，加上九州中部環境真係令人覺得好舒服，求其影幾張相都咁靚~

到咗白水水庫，禁止進入，只可遠觀~
不過，我見個個都唔理，越過圍欄，所以我哋都......

屎塔話呢度好靚，好彩有嚟到~

我哋嚟嗰時只有幾個人，但到我哋打算走時，呢度起碼有幾十人~

我哋行返過去入口時，離遠已經見到有個著住制服，心口掛牌嘅人行緊過嚟，我哋覺得佢係嚟趕人嘅，好彩我哋都諗住走~
行到水庫前(仲係喺禁區內)擦身而過，沒有眼神交流，對方亦沒打算同我哋講嘢，其實佢係咪嚟趕人呢？
套用現時流行講嘅一句：可能係，除非唔係~

越過禁區牌，前方係幾十個五六十歲左右嘅阿叔阿嬸，一群同年紀嘅人，可能係類似一日遊嘅團卦~

我哋諗住影多兩張相就走人，喺影緊相嘅時候，有位女仕主動同我哋傾偈~
佢問我哋係咪中國人，佢係用極為不流利嘅國語(普通話？)去問我哋~
我哋一時間都唔識反應，好吧，就本能反應咁同佢講：中國的香港人......
原來呢位女仕正在學習漢語，可能想抓緊每一個機會去練習吧，真係認真又有心，好嘢！
說到半路，佢開始將話題轉到聖經，信教嘅，可能都有一顆傳道的心吧，由於我哋係無神論者，實在搭不上咀，對方最後遞上卡片(同教會有關嘅)，互說再見，我們便離開~

下一站係「高千穗峽」
九州最出名景點之一，喺度仲可以划艇~

去高千穗峽嘅路，幾乎全部係喺深山中行駛，兩旁有不少楓葉，兩旁係指馬路兩旁，即兩旁地下......
如果喺楓葉盛開時行經此路，實在真係不得了！

呢一大段路，全條路都危機四伏，因為呢度係雙程路段，但多數路面都只係僅夠兩部車行駛，就好似入赤柱行經水壩咁，係就係夠兩部車行，但你只能將車維持喺極低車速~
喺極窄又極多彎嘅路段行駛，精神極度集中，肌肉亦呈繃緊狀態，而且仲係維持一段長時間，其實真係身心俱疲~


差唔多到時，發現通往停車場嘅路封咗，可能因為人多關係吧~
根據指示，去到第二個停車場，最前一部車獲放行，之後就唔再俾車入，可能真係得返一個位~
於是我哋又照指示去到第三個停車場，今次冇問題喇，不停放車入~

跟住前車行咗二百幾三百米路，終於見到個停車場，仲有好多位~
車入就快，但要行斜路行返上嚟就......

停車場呢邊嘅風景都很不錯~


上到車場入口，就要諗吓點去返高千穗峽，因為感覺上都離開咗好遠吓~
喺車場入口，見到有穿梭巴士，再研究吓，確定呢條線行經各停車場，再載客到高千穗峽嘅，100 円一個，就搭呢架車啦~

喺等車嘅時候，見到遠處有個牌寫住，步行往高千穗峽約需 25 分鐘~
嗯，車呢，就每 20 分鐘一班，其實如果啱啱走咗車，行過去都不失為一個選擇~
不過排喺我哋前面嘅都有約十個人，咁正路就唔係啱啱走咗車嘅，等陣睇吓點先~

等咗五分鐘，有車到喇，有冇位上呢？
答案係冇！仲要係啱啱到我哋冇位上......

咁，行唔行好呢？我個人呢，就唔介意行吓嘅，行吓睇吓附近環境都好，不過屎塔就有啲猶豫~
我明呀，喺一個咁陌生嘅環境要行 25 分鐘，識路就 25 分鐘姐，行行吓行錯路就......
結果我哋都仲未有決定，就有另一班車嚟，距上一班車只係一分鐘到~

去到高千穗峽，第一時間去睇吓划艇情況先，因為今日咁多人，真係未必可以划到艇~
咦，冇乜人排隊喎，其實會唔會已經截咗......

去到龍尾(其實前面得兩個人)，見到寫住要等兩個半鐘，咁咪等到五點？
但呢度又話閂五點喎！不過我又見佢手持鬧鐘，鐘上面嘅時間係四點半，從佢嘅身體語言，估計係叫人四點半返嚟~
咁我諗都冇咩問題嘅，因為划船係限半個鐘，划完就收工，啱啱好~

結果我哋都順利買到飛，叫我哋四點返嚟登記~
最後做埋我哋後面兩個人就正式收檔，咁我哋都算好彩喇，排到尾二~

買咗飛，就去食嘢先~
由於時間實在唔算太鬆動，我哋都冇仔細睇吓有咩食，視線範圍內只係見到一間食肆，睇過又啱食，就呢間啦~
呢間嘢叫「千穂の家 食事処」，一落車就見到~


我哋叫咗「高千穗牛陶板燒定食」同埋「刈干定食」
高千穗牛陶板燒定食，據介紹，係攞過獎嘅，不過主要都係日文字，唔太清楚攞咩獎，斷估唔會係攞難食獎卦！
啲牛真係幾好食，有牛味又夠腍，好味道！

刈干定食呢，照字面解，真係唔識解，睇圖見佢有條魚，我哋都鍾意食魚嘛，就試吓~
其實真係唔知咩魚嚟，食落好有魚味，外面煎得乾脆，但內裡嘅肉非常多汁而且極為嫩滑，正！

食完嘢仲有少少時間，就去條橋度行吓影吓相~
呢度基本上都係指定影相位嚟~

差唔多時間，就行落岸邊登記，落到去時，其實我哋係未夠鐘，不過對方見冇人嚟登記，就俾咗我哋先~
我自己就從來未划過艇，都唔知自己划成點，點都好，總之唔好划到去個瀑布度就得嘞~ XDDD

整個划艇範圍入面，艇嘅數目唔少，但尚算適中，唔會太密~
而瀑布附近範圍，就好似有一度隱形保護罩咁，半徑範圍內，一隻艇都冇~ =P

而我自己，可以話係雞手鴨腳，連啲鴨都笑我......
不過要唔划向瀑布，都總算係控制得到~

只係划咗半個鐘，好攰，好攰，真係好攰，比揸幾個鐘車要攰得多......
划艇係一件唔難上手嘅事，但要艇得好，確實係唔容易~

要欣賞呢度嘅美景，一定要落到嚟坐艇先感受到~

划完艇，同樣要搭返穿梭巴士去停車場，當然亦要步行二百幾米去攞車......

下一站係「Tokyu Hands」
屎塔話希望去 Tokyu Hands 行吓，半個鐘都好，所以就安排咗去熊本市嘅 Tokyu Hands~

比預期早咗離開高千穗峽，諗住睇吓附近有咩地方可以去吓，想話去吓「通潤橋」，不過又確實好唔順路，都係算吧，早啲去 Tokyu Hands，等屎塔可以行耐啲都好~

輸入咗 MAPCODE，顯示嘅資料令我感到有啲奇怪，因為佢計算嘅所需時間比我預計嘅長半個鐘有多，開咗車先算~

我一向都覺得 GPS 準確度幾高，尤其日本嘅 GPS，今次都唔例外！
因為原來距目的地十幾公里已經出現大塞車，開吓停吓開吓停吓，足足塞咗成個鐘咁滯~
捱到目的地時係 1920，屎塔話算吧，唔去喇，就係咁，經過門口，過門不入，任務失敗......

下一站係「勝烈亭」
熊本非常出名食炸豬扒嘅餐廳~

去到勝烈亭對開嘅大型停車場，我做咗一件錯事......
一般呢類停車場，出口同入口係同一個位置，路面闊度係足夠同時間兩車一出一入咁通過~
而勝烈亭，出入口係分開嘅，而我駛到出口時，因冇車喺度等出，所以冇警覺到呢個係出口嚟，就喺人哋出嘅地方入......
當我轉咗一半時，兩線都有車嚟緊，不過由於係路口嘅關係，車速一般都唔高，而呢兩架車直情可以話係非常慢，一前一後，被我亂入後，都唔覺佢哋需要狠狠咁減速~
由於情況實在尷尬，我本能地想盡快逃離，眼見後車有讓我走嘅跡象，我就係兩車一前一後之間嘅空隙穿過，穿過時遞手表示謝\歉意~

勝烈亭~


入到勝烈亭，已經有六七個人等緊，諗住同職員講我哋兩位，但我發現職員嘅態度係冇諗住問我哋幾多位~
此時，身邊有位小姐，以身體語言教我哋登記，原來要喺本簿度自己填嘅，唔怪得啦~

等咗十五分鐘到就有位~
我哋點咗一份豬蝦蠔，一份全份都係豬~
豬：肉非常嫩，呈粉紅色，有肉汁，好香~
蝦：新鮮，肉爽~
蠔：蠔味特出，三樣之中，我最鍾意蠔~

醬汁方面有兩款，分別係「元祖洋風」同埋「特製和風」
我個人比較鍾意元祖洋風，冇咁甜~

怪不得勝烈亭可以做到咁出名，真係好好食，就算全部都係炸物都好，一點膩嘅感覺都冇~

飯後喺附近行咗陣超市同藥品店，之後揸車去酒店，完結今日行程~