《瞬間看地球》Stranger's Blog

今日行程：

Day 06：熊本城 → 黑亭 → 搭汽車渡輪過島原 → 仁田峠展望所 → 雲仙地獄 → 稻佐山 → 草花洛 (宿：長崎)

今日第一站係「熊本城」
一座非常美麗嘅天守閣~

揸車到咗熊本城外圍，有幾個停車場，後面有車跟住，費事阻住人，就求其揀咗個停車場入，最後揀咗個貴嘅，哈......

喺遊覽熊本城嘅過程入面，不時落起雨嚟，時大時細，還好唔算太大，都冇咩影響遊覽嘅興致~

今次我哋主要遊覽天守閣及附近一帶，其他地方，興趣不大，就省略了~

天守閣有分大小天守，我哋見小天守冇咩人行，就去小天守先~
註：內部有部份地方禁止攝影

行完小天守就行大天守~
註：內部有部份地方禁止攝影

行完天守閣就行本丸御殿大広間~

喺天守閣對外望時，望到宇土櫓，可以喺宇土櫓望返過大小天守，於是又走過去行吓~

熊本城嘅天守閣真係好靚，非常值得嚟參觀一吓~

下一站係「黑亭」
一間很有名氣，食黑蒜麵嘅餐廳~

去到黑亭嘅時候，嘩，好多人排緊隊！
咁就弊嘞，我哋陣間 1300 要搭船過島原，而家係 1130，時間真係好緊迫~
我諗住放棄，喺附近搵啲嘢食算，不過屎塔話不如等吓先，睇吓情況再決定~
咁我哋就商議好，1200 都未到我哋，一定要離開~


又好彩喎，1145 就到我哋~
入咗座之後，只係叫咗最出名嗰兩樣嘢，都唔理夠唔夠食，總之就叫呢兩樣，食完就走~

招牌豚肉黑蒜麵~
湯底唔算十分濃，不過蒜味獨特，好特別，幾好食~


豚肉丼~
上面提到話唔理夠唔夠食，就係因為呢碗嘢好細碗~
未落蛋之前，好食，不過係普通嘅好食，唔係好特出~
落埋蛋撈勻佢嚟食，嘩，好食嘅程度真係有提升，令到呢碗普通嘅豚肉飯變得不普通，好味道！


下一站係「仁田峠展望所」
賞楓名所以一~

由熊本過仁田峠，可經陸路，但就要兜好大好大個圈先到，所以我哋都係採用最正路嘅方法，由熊本港搭汽車渡輪過島原港，之後先再揸車過去~
搭汽車渡輪，對某啲遊人嚟講，可能係一件新奇又有趣嘅事，對我自己言，雖然唔係第一次，但我仍然覺得唔係一件好普通嘅事~
而呢次，除咗連埋部車搭船，仲有另一樣新奇有趣嘅事，就係餵海鷗~
搭船餵海鷗嚟講，我自己都唔係第一次，十多年前去仙台試過一次，而我都好想帶屎塔去體驗吓，終於都有機會~

去到熊本港，工作人員聽到我一開口就講英文，即刻就講咗我個名出嚟(之前預先訂咗位)，可能呢班船得我哋唔係日本人卦~
跟住佢哋嘅指示，停好車，就走入大樓內買船飛先~

之前聽人講話上船前可以買定食物餵海鷗，所以我買完船飛就問嗰位小姐，邊度可以買到食物餵雀~
之後嗰位小姐就帶咗我哋去隔籬嘅商店，拎咗包蝦條，原來係蝦條......
我哋前幾日買咗包蝦條，食咗幾日都食唔晒，就喺今朝先掉咗，早知......
我又真係唔記得當年都係餵蝦條......

買好晒嘢，就走返上車，離開大樓時，發現落緊大雨，唉，咁咪餵唔到海鷗......
唯有希望開船時冇雨啦~

等到可以開車喇，跟住前面啲車，一架一架咁揸上隻船度，唔同韓國，呢度唔駛倒車入，就咁向前駛就得~


泊好車之後，工作人員就會搵啲木方攝喺個轆嘅前後，作為安全之用，呢樣係上次喺韓國搭汽車渡輪時冇嘅~

非常非常咁幸運，開船時真係停咗雨！好嘢！
我哋走到露天位置，已經見到有人餵緊海鷗，不過人唔多，仲有位俾我哋去餵~


兩邊都有幾十隻海鷗跟住隻船，只要遞上蝦條，最多不用兩秒就被吃掉，有時係一遞已經冇咗......

屎塔餵得好開心，成個天真無邪嘅　女咁~

好快就餵晒一包蝦條，之後發現原來船上面都有賣呢啲蝦條，不過價錢就貴一倍~
餵完蝦條，再等咗一陣，啲海鷗就冇再跟住，可能每次都係得開頭先有人餵~ XDDD
之後我哋就入返室內，買咗杯雪糕，一邊食，一邊休息~

差唔多埋岸，我哋就落返車，啲工作人員會掃走喺轆嘅前後嘅木方~
開車時，只係向前行，即係後面入，前面走，好方便~

到咗仁田峠展望所，一樣係冇乜楓葉，不過呢種感覺都真係慣囉~

本來如果有楓葉睇，我哋會搭纜車上埋妙見岳，不過而家咁樣，梗係唔上，PLAN B 啟動~

下一站係「雲仙地獄」
雲仙市內嘅溫泉泉源~

唔上妙見岳，就去雲仙地獄~

雲仙地獄有幾個停車場，我出發前已經揀好想泊邊個場，不過去到發現已經滿咗~
不過我都有印象其他幾個停車場喺邊，諗住兜過去睇吓，點知喺我想走之際，有兩部車駛走，正！

泊好車，一開車門，強烈嘅硫磺味即刻攻入車廂，嗰刻真係想即刻閂返度門~
其實就當然唔會啦，唔通閂埋門開車走咩，會適應嘅，係初頭難頂啲姐~

成個區域都瀰漫住陣陣白煙，有時濃起上嚟，直情睇唔到嘢~

成個區域都有唔少水管同開關掣~


檔主跌咗蛋落地，成為貓貓嘅大餐~

呢幅相幾有趣~


雲仙地獄，最特別嘅情景，其實一落車已經感受到，圍住園區行一個圈，睇嘅嘢都係一樣~
所以，我哋都係比預期早咗完成~
有時間多，自然又諗吓有邊度去，結果最後都冇加插到景點，因為時間又唔係真係好多，不如早啲開車，以免好似噚日咁遇上大塞車~

下一站係「稻佐山」
上稻佐山，為咗睇夜景~
稻佐山嘅夜景，被稱為新世界三大夜景，取代咗函館~
當時函館被稱為百萬夜景，個朵已經好勁，稻佐山呢，仲勁，被稱為千萬夜景！

做功課時，我哋係有少少覺得過份誇大，亦一度放棄咗呢個景點，睇人哋啲相，覺得不外如是，言過其實~
後來喺計劃行程時，咁啱喺長崎嘅夜晚得閒，先諗住上去睇吓，衰啲講句係攝時間......

好彩決定早啲上山，行經諫早呢頭，真係塞車~

嚟到長崎市市區，GPS 顯示仲有 5 KM 就到，5 KM？咁咪即係好快就到？但我哋仲係市區平地喎？
再一次，帶住懷疑去相信個 GPS~

好快就上到山頂，原來個展望台唔係好高，所以先有之前嘅疑惑~

上到山頂，有交通管制，因為真係太多車，跟住佢哋嘅指示，又泊咗個離景點有點遠嘅停車場~
泊好車，知道有穿梭可以去返觀景點，亦見到有部份人選擇行路，我唔知屎塔基於咩原因去決定，佢選擇咗行......
點解噚日喺高山穗唔行呢？點解今晚又凍又大風仲要夜麻麻又選擇行呢？
有啲嘢，永遠唔會有答案......

征服咗一條又一條嘅樓梯，聽盡選擇步行嘅人嘅喘氣聲，我哋終於嚟到「岩隱れ展望所」
不過呢個岩隱れ展望所，距離真正嘅千萬夜景展望台，仲有 400 米，仲有唔知幾多級樓梯......

岩隱れ展望所，位置唔算係好理想，景色一般~


繼續往上爬，我聽到有人話好後悔冇搭穿梭巴士~ XDDD

幾經辛苦，終於嚟到展望台......嘅下面~


終於嚟到展望台，靚，真係靚，難怪可以成為新世界三大夜景~
(後記：返嚟睇返啲相，同現場睇實在係有一段距離((我又唔識影相呢))，正如我哋出發前睇人哋啲相一樣~)


呢度嘅夜景，係越睇越有味道，好幸運最終有選擇上嚟~

下一站係「草花洛」
我哋嚟呢度主要係食長崎名物鹽烤鯛魚~

嚟到草花洛，門口掛住一條告示，相信係話今日嘅預約已滿，好彩有預先預約，否則就食唔到喇~

一開門口，又係叫我名(鹽烤鯛魚預訂)，對方笑容滿面，表現開心之餘，仲極為有禮~
佢帶咗我哋上二樓，原來留咗間房俾我哋~


睇完 MENU，打算叫懷石料理，佢有分三種，本來想叫 Super Deluxe，不過又怕食唔晒，決定叫 Deluxe~
準備叫嘢時，服務員托住條鯛魚入嚟，嘩，咁大條咖，唔好叫 Deluxe 喇，叫 Standard 好喇，否則真係怕食唔晒~

鹽烤鯛魚個鹽殼都幾硬，要用佢俾埋嗰個鎚仔嚟揼爆佢~
就住揼係冇用，真係要大力少少先整得爆個鹽殼~

條鯛魚真係美味非常！
魚肉嫩滑又有魚味，我同屎塔一人一啖，係咁食，成條食晒！
(後記：官網介紹呢條鯛魚係用「真鯛」嚟形容，屎塔有個同事對日本文化有啲認識，佢話高質嘅鯛魚先會用真鯛呢個稱謂~)

到懷石料理，佢係逐樣上嘅，所以就冇得一次過影晒所有嘢~
坦白講，唔係每樣嘢都知係咩嚟，但每樣嘢都係用心製作，絕對食得出！
全部，係全部都好食！擺盤又靚，呢餐真係高尚嘅享受！

當中最令人感到奇怪嘅係，最尾先上一碗白飯，咁，搵咩送呢？
佢上碗白飯時係連埋一碟小漬物，咁好明顯，係用嚟送飯啦，無知嘅我，食之前覺得好奇怪~
嚟到呢一刻，算係食到尾聲，其實真係幾飽，仲嚟碗白飯，真係唔想食~
不過本住唔好浪費食物同製作者嘅心機，我嘗試用啲漬物嚟送飯~
一食，頂吖，又幾好食喎！結果，一碗白飯，一碟漬物，全部送晒落肚！


再講一次，成 set 懷石料理，全部，係全部都好食！擺盤又靚，呢餐真係高尚嘅享受！
呢餐食咗差唔多七百蚊港幣，我覺得幾抵食~

食完嘢就揸車去酒店，完結今日行程~