《瞬間看地球》Stranger's Blog

今日行程：

Day 03：祖谷葛藤橋+琵琶の滝 → 大步危遊船 → 弘人市場 → 大丸(高知店) → 播磨屋橋 → Aeon(高知店) → 佐田沈下橋 → 味劇場ちか → 酒店(オオズプラザホテル)

原先計劃我同屎塔(預媽咪都會去)一早起身去「落合集落展望台」，不過嚟到考慮到路況唔太理想，決定取消呢個行程，因為我覺得會趕唔切返嚟食早餐~

一早起身，就走咗上去露天溫泉嗰度，希望冇人咁早上嚟，可以影吓相~

影影吓，時間有啲緊，費事為咗等纜車而遲到，我哋決定步行落返去~


溫泉酒店一泊二食，所以早餐就喺酒店食~
一樣嘅環境，食物亦沒有太大驚喜~


今日第一站係「祖谷葛藤橋+琵琶の滝」
全條橋以藤蔓為主要材料建成，係從前深山溪谷地帶唯一嘅交通設施~

呢度被稱為四國內嘅秘境，其實我覺得嚟得四國德島縣旅遊嘅，相信絕大部人都會嚟，還算得上是秘境嗎？

我哋已經算好早嚟，至少現場唯一嘅舖頭仲未開門，但橋上面已經有好多遊人，於是我哋就去遊覽琵琶の滝先~
琵琶の滝，睇人哋啲相，覺得只係一個小小瀑布，不過嚟開藤橋，就順道遊覽~
嚟到現場，發覺呢個瀑布一啲都唔小，有一定高度，水量亦多，絕對有一定嘅觀賞價值~


遊覽完瀑布，就行落去河邊~
嘩，條河咁靚嘅！
河邊啲大石係淺綠色，仲好似識發光咁，好靚！
河水就係似翡翠綠色咁，成個環境好靚，呢一幕係睇人哋啲相未有過嘅，好有驚喜！

有位大叔叫我哋幫佢影相，佢就擺出各種驚險姿勢，又喺石與石之間路嚟跳去~
大叔著住對唔防跣嘅皮鞋，睇見佢就牙煙，有時又見佢跣一跣，有時又見佢好似失重心咁，真係好驚佢出事......

離開河邊，望過去藤橋，一樣咁多人，咁都冇計啦，冇得無了期咁等~
過到去買埋飛，我哋見後面冇咩人，就喺入口影吓相先~
影吓影吓，發現售票處之前，嚟咗一團人，不過成團人咁嚟，實會等齊人，再講解吓先會入場，所以我哋都唔心急~
影完相開始行嘞，前面嗰團人已經走到中後段，後面嗰團人又未入場，正，我哋可以毫無顧慮咁行~

呢條藤橋真係幾特別，全條橋只見有藤同木，不過其實又真係幾危險，因為橋面木與木之間，罅隙大得絕對可以插隻腳落去~
如果向前踏時岔錯腳，插咗落罅隙，重心又向前，咁啱又扶唔穩，可能會直接拗斷腳......
真係越諗越危險，我多次提醒宇宙最論盡嘅屎塔要非常小心，最緊要扶穩先好向前踏步~


行到中段，正常嚟講，應該會停一陣欣賞吓風景，不過我就真係冇呢份心情，只係想盡快離開，都係嗰句，條橋實在太危險，危險得唔想停留多一秒~
回頭望一望後面嘅情況，嘩，原來嗰團人已經殺緊上嚟~
本身喺我哋同嗰團人之間，有一對香港男女，而家已經完全被嗰團人淹沒，好慘......

橋上面望出去嘅風光~


河下面應該有好多部手提電話......


我哋行到中尾段，有個男人喺條橋中間超快又冇扶咁急步走過，令到條橋有一陣子高幅度嘅搖晃~
呢啲人真係麻鬼煩，好X型咩，搞到成條橋係咁搖，陣間你整斷腳仲要麻煩人去救你，累已累人嘅白痴！

最後大家都安全行完條橋，放心晒~

隨影~

下一站係「大步危遊船」
乘坐遊覽船於大步危中遊走，感受大自然嘅鬼斧神工~

嚟到泊好車，望一望條河~


條河又清又碧綠，好靚~


到達售票處，去個洗手間先~
去洗手間時，見到有團台灣旅行團正準備乘船，心想，大鑊，遲過佢哋可能有排等！
我見佢哋都要去洗手間，咁多人應該要用相當嘅時間，於是我同屎塔就立刻上上層買飛同填好乘客資料先~
搞掂之後再衝落去，冇喇冇喇，嗰團人已經行緊去乘船位置......
咁冇計啦，只好尾隨~


之前泊好車望落河度，見到有四隻船泊咗喺度，而家去到乘船處，只有三隻，如果呢團人用得晒三隻船，即係我哋有可能要等半個鐘以上......
嚟到佢哋仲唔係即刻上船，仲要搞大合照......

等到佢哋開始落船，上滿一隻，開走，上滿埋第二隻，再開走，嘿嘿，原來兩隻船已經可以載晒佢哋成團人~
我哋五個上咗船，跟住又有幾個上船，隻船七成滿就開船~

沿途風景雖好，但變化不大，我事前已經知道唔係一個好精彩嘅旅程，不過都想帶媽咪嚟遊覽吓~

喺回程時，都算有啲特別經歷~
首先講返去程，差唔多到一個比較狹窄嘅位，前方回程嘅船喺嗰個位度停咗好耐，唔知做乜，初時諗可能係有咩特別嘢要停低介紹吓咁，都冇乜為意~
到我哋回程時，又喺嗰個位度停，但船家都冇講嘢，前方又有隻船痴住啲岩石，唔知做乜~
岩石上方係一條小小小瀑布，唔通係刻意停喺瀑布下俾遊人觀賞？
而我哋就係等佢哋睇完就到我哋埋位？
不過越睇越唔似，冇理由停成十分鐘欣賞呢個小小小瀑布~
真係越諗越唔明，兩隻船停喺度成十五分鐘唔郁，做乜鬼~

最後經過船家嘅溝通(我當然係唔知佢哋講乜)，我哋隻船就駛過去瀑布下嘅船，平排再綁繩扎穩，跟住對方嘅船就走兩個男乘客過嚟~
表面上當然估到係太重，但行程都去咗五份四，而家只係回程，點解之前行得到，而家唔得呢？
謎底終於都解開，原來回程時水流好急，對方逆流而上唔夠力，要減磅~

至於我哋呢，其實都試咗幾次先行到，仲要係好吃力，好慢好慢咁向前抗衡湍急嘅逆流~
回望返對方，仍然係努力緊，我哋同佢哋嘅距離越拉越遠，不過最都係成功嘅~

總算為平平無奇嘅旅程(於我而言)增添一點色彩~

下一站係「弘人市場」
弘人市場係高知市內一個美食市場，相信每人都可以喺度搵到喜愛嘅食物~

到咗弘人市場，嘩，好多人！就咁睇都幾多嘢食~
好唔容易先搵到張檯，我負責坐底睇袋睇檯，佢哋就四出覓食~
好快就不停有美食送到~

平靚正正正嘅蟹膏！
一份對我嚟講係有啲多，阿飛竟然買多個嚟食，好瘋狂......


海膽寿司，非常不錯！


弘人市場最出名嘅食品 - 稻草炙燒鰹魚~
好食，真係好食！口感好好，肉亦好鮮甜，正！


稻草炙燒鰹魚是這樣煉成的~


其他食品雖不算非常出色，但一點也不差~


弘人市場場外場內~

離開停車場時先知，原來有消費泊車優惠，不過買嘢食時唔知道，冇俾泊車卡對方蓋印，冇啦~

下一站係「大丸(高知店)」
去大丸係為咗買聽日去青島(貓島)嘅人同貓糧，因為島上係冇餐廳嘅~

由弘人市場行過去只需幾分鐘~
期間阿珊去咗藥妝店買嘢，佢知道時間已經遲咗，所以佢都好快手快腳咁衝入去速速揀速速買~
屎塔見狀都走入去買啲嘢，佢本身冇諗住買嘅，不過反正都要等珊，就自己都買吓嘢，又幫朋友買吓嘢咁~
到阿珊買完，屎塔就排緊隊俾錢，我見到阿珊有啲唔開心，仲同阿飛講好想上去上層買化妝品~
(阿珊係唔知我喺佢後面)
於是我就上前同阿珊講，想買咪上去買啦，唔緊要咖~
阿珊聽到即刻一邊講「好嘢」一邊成支箭咁衝咗上樓上~

雖然行程係我同屎塔一齊計劃嘅，但我又覺得我哋冇權限制團員做自己想做嘅嘢，一齊去旅行最緊要大家都開心，如果只係為咗百份百實踐計劃好嘅行程，而忽略其他人感受，咁樣係絕對冇意思~

去到大丸，迅速搵到超市，不過超市唔大，冇貓糧，人糧亦唔太搵到合適嘅，唯有陣間揸車去 Aeon 買~

下一站係「播磨屋橋」
播磨屋橋係高知名勝，其實佢只係以前一位商人為咗方便與另一商家往來而私下建造嘅一條橋，而家則有人稱為日本三大最失望景點之一~
既然佢喺弘人市場附近，就去失望吓囉~

由大丸行過去只係分兩分鐘步程~

嚟到播磨屋橋，真係影個相就可以走，唔係貪近可以行過嚟，可能真係唔會嚟~

下一站係「Aeon(高知店)」
去 Aeon 一定買到人糧貓糧啦！

Aeon 好大，停車場都好大，目測九成車位都已被佔用，好好彩，行咗幾個路口就有車位，更好彩嘅係，我哋泊個位係對正超市！
落咗車之後，我哋分頭行事，我同屎塔買貓糧，另佢哋就買人糧~

貓糧呢，就好容易買到，人糧就麻煩啲，所以我哋買完貓就走過去佢哋度，睇吓點情況~
經過一輪討論，終於買好晒所需物品~

呢刻比我原定時間足足遲咗一個鐘有多，所以我決定唔去喺四万十川嘅安並水車里，雖然時間慳唔到幾多，但去得四万十川，真係唔想連一條沈下橋都去唔到，慳到幾多就幾多~
我原先嘅計劃係去完安並水車里，慢慢(梗係唔阻人先得啦)駛去佐田沈下橋，沿途欣賞吓風景咁~

下一站係「佐田沈下橋」
佐田沈下橋係四万十川眾多沈下橋嘅其中一條~
沈下橋嘅由來，係因四万十川水漲時，河水會淹蓋橋面，因而得名~

離開咗市區道路，係連續不斷嘅單線雙程山中彎路，極花精神！

經過兩小時嘅折磨，嚟到佐田沈下橋，覺得呢邊泊車唔係咁方便，於是我就駛上橋面，過咗對面再睇情況~
橋面望落唔太窄，當然肯定唔可以容許同時有兩部車一齊行，不過由於冇圍欄，係有啲心理壓力~
過到對面，路面寬闊，停埋一邊唔會阻人~

沈下橋嘅設計，最大特點係冇欄杆，咁樣就可以令漲潮時嘅河水得以更順暢咁通過，唔會因為有欄杆而絆住樹枝或雜物，另水位變得更高~
當然，冇欄杆嘅存在，保養嘅費用亦得以減低~
而橋嘅側面及柱腳亦設計成圓面而非平面，用途當然都係為咗令水流通過得更暢順~

期間有車經過，雖則係絕對夠位讓行人同車輛平排通過，但畢竟係冇欄杆，多少有啲危險~


慢步於佐田沈下橋之上，細意欣賞四万十川美好風光~

單單遊覽佐田沈下橋，以四万十川呢個風光如畫嘅地方嚟講，係遠遠不夠，期望將來再有機會重臨，細意遊覽一番~

下一站係「味劇場ちか」
一間喺四万十川，類似居酒屋嘅食肆~

呢次旅程，有四個人都有國際車牌，我同阿飛都有揸過車，屎塔興趣唔係話好大，剩返媽咪~
媽咪十幾年冇揸過車，所以我要小心挑選一個合適嘅路段俾佢試吓~
睇返之後嘅行程，其實真係冇咩地方可以俾媽咪揸吓~
所以，我諗而家係合適嘅時候，因為呢頭真係非常少車，風險極低並且唔會影響人~
當然，我揸返過對岸，入返大直路先交部車俾媽咪~

媽咪上咗司機位，我簡單咁講解一次部車嘅操作~
一切準備好，開車喇~
最最最緊要係要媽咪試吓停車先，佢踩迫力嘅力度略大，這當然不能怪她，畢竟係十幾年冇揸，仲要係咁陌生嘅一部車~
之後開開停停，偏左偏右呢啲其實係預期之內~
媽咪揸咗大約十分鐘，直至去到單線雙程嘅入口，就我揸返~
呢十分鐘入面，後面一直都冇車嚟，非常好，冇阻到人~
無驚亦無險，又滿足了媽咪，全部人都開心，PERFECT！

去到味劇場ちか，佢安排咗我哋坐二樓嘅一個角落，絕對係自成一角，正！

本來對呢間嘢個名冇乜太在意，嚟到呢度，我明喇~
成間嘢嘅格局，就好似四份一個圓形(扇形)咁，一樓(地下)角位係開放式廚房，扇邊弧形位係類似吧檯咁~


二樓只有扇邊弧形位，每個顧客都係向住中空位置，可望通地下成個廚房，完全係一個劇院嘅貴賓座咁~

我哋張檯就係穿過二樓嘅弧形長檯，行到盡頭嘅一個角落，地台就係座位，腳可伸展放檯下~
我哋一樣有個位置，可以俾我哋望到地下廚房嘅情況，不過就要起身先望到~


成個環境已經令人有種置身戲劇嘅感覺，好正！

講完環境，講人~
由入到嚟味劇場ちか開始，所有招待客人嘅職員，都係笑容滿面~
佢哋嘅笑容，並唔係裝出嚟嘅笑容，係好自然，好友善，全心全意去招待每一位客人咁，令人非常舒服~
我哋諗食咩諗得耐，佢哋只係隔一陣先行埋嚟睇吓叫得未，佢俾我哋感覺唔係催我哋，只係怕我哋想落單時，冇職員喺附近而有所怠慢~
佢見我哋除褸，又示意我哋可以掛喺身後嘅牆上，又喺牆上拎埋衣架俾我哋，甚至幫我哋掛埋~
之後可能佢估到我哋覺得熱，就幫我哋將個暖爐教細啲~
每一個動作都係為顧客著想，呢啲咪就係賓至如歸~

食物方面，都係一般居酒屋有嘅嘢，其實本身就好吸引嘅，不過今日較晏食午餐，大家都未有正常食晚餐嘅胃口，咁當然始終都要食嘢嘅~
經飛珊嘅努力，終於都可以落單喇，唔使麻煩職員再為我哋操心~

食物陸續送到，食物嘅賣相，絕非高級餐廳般嘅精美，但就唔知點解，就算原本唔太肚餓嘅我哋，見到就好想食，我諗係成個環境同氣氛嘅影響吧~
食物質素，簡單啲講，好食！複雜啲講，絕對係預期之外嘅好食！
(啲相影到 out 晒 focus，都唔知係邊個做嘅好事......)

我哋一邊食嘢，一邊又起身去睇吓個廚房，睇住廚師們製作我哋點咗嘅食品，好不過癮~

呢度有個滑輪裝置，係地下廚房同二樓之間嘅傳輸裝置，超方便，省時省力省意外~


我哋臨走時，有位女侍應仲問我哋使唔使揸住個滑輪裝置影吓相，大家當然係非常有興趣~
初時大家都好客氣諗住只係揸住做樣，點知嗰位女侍應仲叫我哋試吓放個盤落地下同拉返上嚟~
既然對方咁熱情，盛情難卻，當然大家(我估咋)心底裡都好高興有機會操作吓~
好彩二樓只有一台客(唔計我哋)，都冇咩阻住人做嘢嘅~

呢間嘢，真係路過都未必會想入嚟，外面就咁睇，真係未必第一時間知道係食肆......


好多謝屎塔，搵到呢個咁正嘅地方，呢度絕對係今次旅程其中一個亮點！

返酒店時，又係一段又一段嘅單線雙程彎曲山路，四周漆黑，人跡罕至，無論如何一定要安全抵達酒店，否則後果真係唔敢諗......
幸好，最後都安全抵達，心情先可以放鬆返啲~