《瞬間看地球》Stranger's Blog

有意去德國，已經係兩年前嘅事，係屎塔提出嘅~
德國，從來都唔係頭幾位想去嘅國家，唔知道點解屎塔想去，其實連佢自己都唔知~
不過都冇問題，始終係歐洲國家，都一定啱我哋去見識吓嘅~

德國，有咩名勝呢？我知，新天鵝堡！仲有......國王湖！仲有......柏林圍牆！嗯......只係講得出咁多......
其實德國係咪冇咩睇？不如加埋奧捷匈啦！
做吓功課先！

睇吓睇吓，原來德國本身都好多值得遊覽嘅地方，真係孤陋寡聞！
咁究竟純德國定少少德加奧捷匈好呢？
又睇過吓資料，最後決定德奧便算~

今年一月，見到 Emirates 機票二人加埋唔使萬二蚊，要喺 Dubai 轉機，時間唔算話好靚，不過睇返直航嗰啲時間都唔係好得幾多，所以就買咗 Emirates，16/9 去，1/10 返~

由三月去完日本四國返嚟，就好努力咁做功課~
初時都諗住試吓喺德國自駕，諗住揸幾日，但由於我哋主要遊覽南德，搭車的話，實在太唔方便，亦浪費時間，有啲地方，唔揸車的話根本唔會大費周章咁搭車去~
最後決定，除咗頭兩日同最後一日，其他時間都係自駕遊~

睇咗好多資料，主要得知三件事：
其一，一般嚟講，只可以揀邊一級嘅車，冇得指定租邊一款車，租車公司到時按情況再配置~
屎塔話想租 BMW，我見 BMW 1-series 個價都唔太貴，所以就決定租「BMW 1-series 或同級」

其二，指定租自動波係貴過棍波相當多！以我租 13 日車為例，自動波係貴過棍波千幾蚊港幣！
右軚棍波，或者左軚自動波我都冇問題，左軚棍波就真係未試過，爭成千幾蚊，所以最後決定租棍波，搏佢升級自動波，就算冇升級，我覺得都冇大問題嘅~

其三，攞車嘅地方如果係啲主要火車站或者機場般嘅主要地方，又係會貴一截，交車嘅地方就冇呢個問題~
由於相差嘅金額都差唔多成千蚊港幣，我當然會避開喺 Frankfurt am Main 嘅中央火車站攞車~

本來想去埋 Berlin，不過我哋主要遊覽南德，咁樣一上 Berlin，太浪費時間同車錢(如果上 Berlin，我應該係搭火車算)，唯有等下次有機會再去~

喺八月份，德國總共發生咗四次恐襲，我哋曾經都有一絲猶豫，仲去唔去？
但其實睇返，我哋好少停留喺大城市(雖然有啲恐襲係發生喺小城市)，咁，撞啱地點，撞啱時間，機會又有幾大？會唔會比起喺香港遇到各種意外嘅機會細？
雖然冇得咁樣去評估，但我哋都覺得事態唔係好嚴重，所以都係決定照去~

一年一度嘅世界盛事，德國啤酒節，原來咁啱就喺我哋遊覽德國呢兩個星期舉行，咁，究竟係好事定唔好事呢？
講得「原來咁啱」，即係本身冇留意，其實亦可以話係冇興趣~
我同屎塔都唔飲啤酒嘅，亦對於呢類超多人嘅盛事有啲抗拒，有時熱鬧嘅氣氛係幾好，但太熱鬧就真係咪搞~
本來都諗住朝聖一吓嘅，不過八月發生過恐襲，啤酒節可以話係非常高危，於是就決定唔去啤酒節~

德國嘅住宿，比想像中貴，相信極有可能同撞正啤酒節有關，唉，又唔係為咗去啤酒節(而家仲要避開佢添)，卻要因為啤酒節付出高昂嘅住宿費，真係夠晒戇居！
其他城市嘅貴，都可以接受，München 嘅貴，係貴幾倍！
唔近火車站嘅，過千蚊港幣住低級酒店或旅館，近火車站嘅，成二千蚊港幣！(十一月份同一間酒店只需五百多港幣)
我本來個行程係諗住住兩晚嘅，見到咁嘅價，真係縮一縮，我連一晚都唔想住喺度！
我真係有諗過租多一日車，最後一日一早交車，短暫停留 München，當晚搭飛機走人！反正 München 冇乜太多地方我哋想去~
呢個諗法唯持咗唔係好耐，因為其實都係行唔通，作罷~
咁唯有萬般不願意咁住一晚~
其實呢一晚，如果決定再遲啲，真係想住近啲火車站都冇，周圍都冇晒房，只剩下青年旅館嘅床位，床位，唔去到冇晒辦法，我真係唔會揀......
至於呢間酒店，淨係睇相睇評價，真係僅僅合格，所謂合格，係喺冇得揀嘅情況底下，說服自己覺得合格而已......
優點係幾近中央火車站，近火車站嘅所謂酒店，就算唔講價錢，真係得一兩間仲有房，咁俾人揀剩嘅，梗係好極有限啦！

由於本身行程同酒店都定好晒，而家住少一晚 München，即係尾二嗰日行程要再諗諗~
要搵地方去就實搵到嘅，不過就唔係好順路囉，冇計啦，冇理由為咗呢一日郁過晒所有嘢，唔順路就唔順路，其實都冇所謂嘅~

今次屎塔試吓租 airbnb，係我哋第一次租 airbnb，不過第一次租就已經有不愉快經驗~
我哋喺 Frankfurt am Main 租咗間 airbnb，連租兩晚，計埋稅都唔使一千港幣~
不過喺八月中，收到電郵通知，因為私人理由，要取消我哋嘅預訂！
唉，淨返一個月，啲住宿肯定貴晒啦！
最後租咗間普通酒店，兩晚要成二千蚊港幣！
仲要因為地點唔同，要將行程稍作修改嚟遷就，真係黑仔！
我一聽到呢個消息，真係有啲嬲，但係諗深一層，我相信佢都真係冇辦法先取消我哋個預訂嘅，運氣嘅嘢，冇計嘅~

計劃好嘅行程如下：
Day 01：Frankfurt am Main (宿 Frankfurt am Main)
Day 02：Köln、Wuppertal、Frankfurt am Main (宿 Frankfurt am Main)
Day 03：Frankfurt am Main、Mainz、Heidelberg (宿 Heidelberg)
Day 04：Heidelberg、Würzburg、Bamburg (宿 Bamburg)
Day 05：Rothenburg ob der Tauber、Stuttgart (宿 Stuttgart)
Day 06：ULM、Füssen (宿 Füssen)
Day 07：Hohenschwangau、Steingaden、Rottenbuch、Garmisch-Partenkirchen (宿 Garmisch-Partenkirchen)
Day 08：Garmisch-Partenkirchen、Mittenwald、Ramsau (宿 Ramsau)
Day 09：Ramsau、Königssee (宿 Königssee)
Day 10：Königssee、Berchtesgaden  (宿 Berchtesgaden)
Day 11：Berchtesgaden、Gosau、Hallstatt (宿 Hallstatt)
Day 12：Hallstatt、Obertraun (宿 Hallstatt)
Day 13：St. Wolfgang im Salzkammergut、St. Gilgen (宿 St. Wolfgang im Salzkammergut)
Day 14：Salzburg、Anif、Oberammergau (宿 Oberammergau)
Day 15：Oberammergau、Landsberg am Lech、München (宿 München)
Day 16：München (宿 Aeroplane)


出發！





●●●●●●●●●●題外話●●●●●●●●●●
喺日本四國同德奧呢兩次旅行之間，喺我身上都發生咗幾多事~

三月尾，我左眼唔知做乜鬼(好彩唔係見到......)，成日都有少許腫脹感，但照鏡對比左右眼係完全冇分別，睇嘢又冇問題，對生活完全冇影響，睇過幾個醫生試過幾種藥都完全冇幫助~
檢查過眼角膜表層又冇問題，唯有等遲吓睇眼科，睇吓我左眼做乜鬼~

四月頭，右臂痛，而且係慢慢嚴重，又奇怪，只有一兩個動作痛，對生活又係冇咩大影響，睇普通科食藥又係冇用，最後去咗睇骨科~
照過 x-ray，醫生話只係小問題，做十次物理治療好大機會好返~
聽到骨科嘅專科醫生咁講，放心晒啦~
做咗幾次物理治療，感覺上只係好返少少，仲可能只係心理作用，做十次真係會好？我覺得冇可能囉~
好嘞，真係做咗十次，係有好咗，少少囉，再返去覆診~
睇完，醫生又改口風，話退化，可做手術改善，不過只維持約十年，之後再痛要再做手術~
呢個醫生真係麻麻地，態度又輕浮~
「你可以唔理佢咖，到頂唔順先做手術囉，你鍾意而家安排做又得，再唔係照磁力共振再睇清楚啲囉，一係做多幾次物理治療先，睇吓點~」
我明白有好多決定係病人自己決定，但病人係好需要一個有專業知識嘅醫生去俾意見~
佢只係客觀咁話俾我知，有咩選擇，但完全冇俾意見~
尤其嗰句「再唔係照磁力共振再睇清楚啲囉」，即係醫生你現階段冇把握判斷到我病情係點，但又可以有做手術嘅選擇，呢個係咩邏輯？
睇咗兩次，兩次說法唔一樣，當然係好正常，醫生唔係神仙，有啲嘢係要試，但你都未有十足把握診斷到我病情就話可以做手術去改善，係咪兒戲咗啲？
我唔係醫生，但一開始話「做十次物理治療好大機會好返」，到最後唔係，嚟到呢一步，係咪就應該叫我做磁力共振睇清楚啲再作判斷？
不過由於要 claim 保險，費事轉醫生，結果係我自己選擇做磁力共振，而唔係醫生建議~
磁力共振報告顯示，我係「滑囊發炎」，係可以痊癒，要繼續做物理治療~
我聽到呢度真係又嬲又絕望......
原來醫生一直嘅判斷係錯誤，錯唔緊要，我清楚醫生唔係神仙，但如果我喺未照磁力共振之前就信你，我咪白白開錯刀做錯手術？
繼續做物理治療，有用咩？唯有希望物理治療師喺知道我真正病情底下有針對性嘅治療啦~
物理治療師話，滑囊發炎，正常情況係絕對可以完全好返，唉，聽住先啦，雖然個物理治療師係幾好嘅，但我真係冇咩信心~
物理治療嘅內容，同之前差唔多，係針灸嘅落針位好似有啲唔同~
經過多次嘅物理治療，只係好返少少，又係停滯不前~
之後物理治療師俾咗條拉力帶我，叫我喺屋企做幾組動作~
做咗三個星期後，又好返啲，繼續做，又再好返啲，最後我物理治療都冇去做，因為好明顯再做都係冇意思，嘥車錢嘥時間~
不過做拉力運動，都冇令我完全痊癒，由最痛到而家，好咗 95% 啦，跟住都係點做都冇用~
不過點都好，反正而家都冇乜嘢，冇任何一個特定動作會覺得痛，只係間中會有輕微抽住嘅感覺，其實冇乜大不了，當好返~

四月中，凌晨兩點幾，電話響起，對方話佢係警察~
有警察打嚟已經唔係好嘢，仲要喺半夜，真係幾驚嚇~
佢問：請問係咪 XX XXXX 車主，你部車頭先著咗火，消防已經救熄，麻煩出一出嚟
吓？燒咗？
我同屎塔嗱嗱聲出去睇吓咩事啦~
據消防所講，現場六部車平排，中間部貨車最先起火，由於風勢問題，波及埋右邊三部車，其中一部車就係我嗰部，而左邊兩部只係有啲部件被熱力影響，熔咗~
半夜起火，正路都唔係自燃啦，消防都話起火原因有可疑~
唉，真係無茫之災~
有啲嘢真係好邪，都唔知縱火者有心定無意，消防只係話部貨車起火原因有可疑，而其他車只係因風向而受波及，偏偏呢四部車當中，唔計我嗰部，另外兩部私家車同貨車係同一個車主！即係只有我一個無辜受牽連！
部車新買返嚟行咗十三年，我自己一手一腳揸足十三年，行咗二十萬公里，從來冇撞過，機器狀態如新，感覺上行多十年都冇問題，一部好車，就咁就冇咗......
而我只係買咗三保，當然冇得賠~
如果要向貨車車主索償，問過保險公司(由於只買三保，唔會係經自己保險公司索償，佢冇理由要呃我)，要証明真係有人縱火，並且目標要係部貨車，先可以向貨車車主索償，簡單啲講，即係冇任何方法得到賠償......
部車仲要喺二月用咗一萬蚊換胎、更換壞掉嘅 HID 頭燈、驗車，嘥晒！
最心痛真係唔係部車值幾錢，係由新車至而家足足十三年，仲可能有另一個十三年都唔出奇，真係好心痛！
事後仲要使錢清理現場，問咗好多間先搵到一間肯做，真係黑仔~
事後間中都收到警察打嚟問嘢，其實我心裡面好清楚，呢啲九成九都唔會破到案......

六月中，上司走埋嚟，放低咗份嘢俾我同隔籬位同事，知咩事啦，裁員！
我就相信我嘅直屬上司只係做通知嘅啫，揀人唔係佢揀嘅，不過就算係佢揀，我都唔會嬲，公司要佢揀，其實點都要交人，明嘅~
喺呢間公司工作咗十八年，睇住佢成為市場數一數二，到今時今日成為夕陽行業(其實公司已經轉型成功，只係我部門係冇得轉型，只有萎縮，變成夕陽行業)
逃避過多次裁員嘅我，今日終於成為被裁一員，百感交雜~
由於早就買咗九月去德國嘅機票，所以而家實在不適宜搵工住，幸好，我一直有做開兼職，呢幾個月，就返多啲兼職頂住先，去完旅行返嚟先再算~
又燒車又裁員，其實當中都算有一樣好彩嘢係關係到呢兩件事嘅~
喺裁員前兩星期，諗住買部二手車，睇中咗部，睇埋車，傾緊價錢，車主咁啱要去旅行，我就叫佢去完旅行返嚟先再傾啦~
就喺被裁之後嘅兩小時，車主同意我開嘅價錢~
其實我呢份工可以揸車返工我先會再買車，否則買返嚟擺多過揸我就唔係好想，咁既然份工都冇埋，就梗係唔買車啦~
如果，車主唔係去旅行，我可能前一個星期已經做好買賣手續~
再如果，其實車主已經返咗嚟兩日，如果佢一返嚟通知我，我都有機會前一日出去同佢搞手續~
如果買咗車先俾人炒，養住佢又冇用，又冇理由即刻轉售，真係等於跌低咗俾人踩多幾腳咁~
呢件事算係幾好彩，好似冥冥中有晒安排咁，不過賣家遇到我就唔好彩喇，冇計啦，世事嘅嘢往往係意想不到~
希望去完旅行返嚟有好事發生啦~