2016.09.16 德國 (Frankfurt am Main) (歐洲第一天) @ 《瞬間看地球》Stranger's Blog

今日係飛機日，全日都用喺咗搭飛機，冇行程~

兩程飛機時間如下：

EK0387 HKG(0750) → DXB(1155) 8HR05MIN
EK0047 DXB(1440) → FRA(1925) 6HR45MIN

我打算 0530 前就要到機場，約咗的士司機 0430，佢 0410 已經打俾我話到咗......
個司機屬於健談型，傾到佢知我有車牌，就係咁教我揸車，其實真係有啲煩厭，但係又唔好意思叫佢收聲~
不過咁，佢講嘅所有嘢都係正確嘅，而且佢都揸得幾好~

到咗櫃檯，地勤同我哋講，而家入境德國要喺護照度簽名，唔知係咪新措施呢~

我哋一如以往咁揀咗窗口位，近走廊仲有一個位，係一個外表比較冷酷嘅外籍男人~
個男人一上機就瞓，直至派早餐佢先醒一醒，佢要咗一份又繼續瞓，直至空姐埋嚟收嘢佢都冇食，繼續瞓~

我哋已經盡量少飲水，費事麻煩人，但人始終係有去洗手間嘅需要，個男人真係好瞓得，我同屎塔不停祈求個男人醒吓~
都唔知等咗幾耐，個男人醒咗一醒，轉姿勢，我即刻把握時機開聲話要去洗手間~
我梗係又 excuse me 又 sorry 又 thank you 咁啦，不過個男人一粒聲都冇出過，只係讓咗我哋出去~

過咗幾個鐘，又有餐食，個男人又係只攞不吃，繼續瞓，一直瞓到落機......

喺 Dubai 轉機時間有幾個鐘，行過吓 Duty Free，不過興趣唔係好大，都係喺候機位置等上機算~

第二程機搭 A380，我哋第一次搭 A380，都真係幾大部~
今次好啲，隔籬個男人瞓吓醒吓，同埋佢都會去洗手間，算係冇咁麻煩到人啦~

去到德國入境時，對方問咗我哋幾條問題，其中一條，我自己記錯咗日期，同屎塔回答嘅唔一樣，不過對方只係笑一笑，順利入境~

由機場去酒店，要搭 S-Bahn，一出馬路，見到有部穿梭巴士去 T1~
噢！我完全冇為意我哋係喺 T2 落機，見到部穿梭巴士先醒起！
由於我完全冇為呢部份做過功課，唯有膽粗粗上車，我覺得應該唔會錯~

好容易就搵到 S-Bahn，不過睇啲月台指示，都只係估估吓，其中一個寫住 Frankfurt City，最似係呢個喇，就佢啦~
落到月台，喺售票機買飛時，發現佢唔收 €20 紙幣，我又冇其他散紙，唯有上返去睇吓有冇票務中心~

喺票務中心買完飛，時間係 2034，我知道有班車係 2032，下一班係 2047，咁唔使咁趕跑落去啦~
落到月台係 2035，有班車埋緊站，係 S8 線，係我哋要搭嗰部，嗱嗱聲走去屎塔度攞埋啲行李上車~
又話德國鐵路好準時嘅？

到咗 Frankfurt am Main 嘅中央火車站，步行過去酒店就得~
由火車站行去酒店，越行越靜，但總算離大街不遠~
原以為會一步一驚心，但實情係，越行越放心，一啲令人擔心嘅感覺都冇~

前文提過，Frankfurt am Main 呢兩晚，本來係住 airbnb，被取消之後，短時間內要預訂住宿，又要唔太貴，選擇自然少~
呢間酒店有點殘舊，走廊有陣怪味，間房間隔又奇怪~
不過佢又勝在夠晒大，佢嘅空間足夠分做兩間房，總共有四張床，分開兩邊房放，搞到我哋仲要諗吓瞓邊邊~ XDDD

放低晒嘢就出街食嘢~
原先講好咗如非必要，唔會走近主要火車站，不過走著走著，就行到去火車站......
是旦啦，我哋都已經攰到爆，唔想再周圍走，嗱嗱聲食完走人~

我哋入咗一個類似 food court 咁嘅地方，有幾間食店~
見到有 couscous 食，睇 MasterChef 就見得多，真係未食過，好想試吓~
叫咗兩個咖哩，一個配 couscous，一個配 rice~
咖哩普普通通，couscous 我就覺得麻麻，屎塔覺得幾得意~
rice 呢，乾但唔係硬，怪怪的~
加錢加配咗 veggie，其中有一部份係生嘅芽菜，真係幾難食~
成兜嘢就係唔好食，有啲惡啃，為著填飽個肚，夾硬食夠就算~