《瞬間看地球》Stranger's Blog

今日主要景點：

Barcelona

Parc Güell (奎爾公園)

今日早餐仍然係 pancake，食完出門口，發現 lift 壞咗，好彩我哋只係住喺一樓，問題都不大嘅~

今日要離開 Paris，往 Barcelona 進發~

由 Paris 往 Barcelona，我選擇咗好大路嘅方法，搭 easyjet~

我買機票時加錢買咗一件行李嘅寄艙服務，限 20KG，知道 easyjet 對行李嘅限制比較嚴格，所以今朝執行李嘅時候都特別留意，希望唔會過重被罰錢~

由酒店到 CDG 機場，搭 metro 再轉 RER 就得，非常方便~

到咗機場，一路跟指示去 2B 櫃檯，不停咁行，不停咁行，行極都未到，行極都仲係指示牌~

咁當然，總會行得到，但就真係行咗好耐，好彩我預時間預得比較鬆，否則真係趕鬼死~
 
喺機場行去 2B 嘅途中，我聞到有浸好濃嘅尿味，真係有啲想嘔~

反而呢幾日搭過咁多程 metro，又唔覺有好多個站有尿味，就算有都唔係好重味，至少遠遠不及機場呢度聞到嘅味重~

去到櫃檯，將個篋放上個磅度，顯示屏顯示個篋有 21.4KG 重！弊！咁咪要罰錢！

不過最後櫃檯職員都冇理到，照俾我哋過，唔知係咪我哋嚟得早，所以執得冇咁緊~

呢樣可能執得唔緊，但係另一樣就真係嚴格執行~

就係一人只可以拎一件手提行李上機，我眼見好多人都要將啲手提行李 pack 成一件先俾過~
 
我仲見到有一位女士，手拎住嘅行李，一時間都數唔到有幾多件，左手右手都各有幾個袋拎住，一副愁爆嘅樣，真係唔知佢點算~

跟住去到安檢位，人唔太多，但就等咗好耐，原因係有一個十一二歲到嘅小朋友俾職員不停咁問嘢，又搜袋又要佢摷晒身上面所有嘢出嚟檢查~

到我哋經過佢嘅時候都仲問緊嘢，我眼見個小朋友都好合作，完全唔係串果種人，唔明點解玩到咁大，或者我哋嚟之前有事發生過啦~

終於去到候機室，我哋訂咗 1110 起飛嘅航班，而家距離起飛仲有兩個鐘，有排等......
 
機程約 1.5 小時，不設劃位，當然唔會有飛機餐啦~

引擎位置全部油上橙色，好 sharp~
 
喺 Barcelona 機場，見到一條好特別嘅電梯，可能係我孤陋寡聞，少見多怪，所以先覺得特別~

條電梯落落吓會有平路再落，但係係一條過嘅~
 
出市區前要做一件事先，就係兌換 Articket~

Articket 係類似 Paris 嘅 Museum Pass 咁，不過佢就只包 Barcelona 市內嘅七間美術館，出發前喺網上面訂咗兩張，嚟到可以喺機場兌換~

到咗旅遊中心，俾晒啲資料佢，得到嘅答案係冇得換！

佢話要出返市區先有得換，我唔係好忿氣，將 receipt 上面講明可以喺機場換，我就問吓佢點解將 receipt 上面話可以，佢話之前可以，但而家唔可以~

佢咁答我都吹佢唔脹，唯有離開~

我哋喺機場車站買咗兩張 T-10，T-10 用法即係好似 Paris 嘅 Carnets 咁，不過佢就係一張用十次~

由機場去旅館，搭火車再轉 metro 就得，可以用 T-10，都只係計一程而已~

本來間旅館好近就有 metro 站口，不過我哋出唔啱呢個出口，結果搵咗十五分鐘先搵到間旅館......

上到去 check-in 時，個女仔拎咗份地圖俾我哋，用咗五分鐘，非常清楚有條理咁將 Barcelona 呢個地方嘅旅遊點作咗一次簡單嘅介紹~

雖然我哋已經有晒自己嘅行程，而且佢講嘅，我哋大部份都會去，不過佢咁有心，我哋都好耐心咁聽佢講，並示表感謝~

今日第一站係 Parc Güell (奎爾公園)

第一次嚟 Barcelona，睇 Antoni Gaudí 嘅作品可以話係指定項目~

出發前，食啲嘢先~

由於實在太餓嘅關係，真係見到有食肆就衝入去~

我哋入咗呢間~
 
喺 display 度求其點咗兩樣嘢，不過，好難食......

 
由呢度去 Parc Güell，有兩個選擇，可以搭 metro 再向山上行十分鐘到正門；可以搭巴士直達側門，我選擇咗後者~

同 Rome、Paris 一樣，喺巴士上面要打飛，又係扣一次 T-10~
 
Parc Güell 側門

 
行入少少就到 Gaudí House Museum~

之前做功課時，見到有一種聯票係 Basílica de la Sagrada Família (聖家教堂) + Gaudí House Museum，平過分開買~

如果係咁，梗係喺 Gaudí House Museum 買啦，相信唔駛點排隊嘛~

點知嚟到 Gaudí House Museum，個職員話要買聯票要去返 Sagrada Família 果邊買，真係打個突！

我一廂情願咁以為兩邊都有得賣，唉，而家如意算盤打唔響，睇嚟去 Sagrada Família 果日要早啲去先得~

Gaudí House Museum

 
Parc Güell~

一個好有趣嘅公園，很喜歡~

見到有雪糕賣，梗係整返兩杯先啦~

不過都係意大利果啲好食啲~

 
下一站 Casa Vicens (文生之家)

Casa Vicens 都係 Antoni Gaudí 嘅作品，不過而家係有人住緊嘅，所以並不對外開放，只能到門外欣賞~

離開 Parc Güell，都係搭巴士，呢程巴士可以直達旅館，不過時間尚早，可以中途落車去參觀吓 Casa Vicens~

車到喇，巴士號碼啱，不過目的地同我做功課時睇到嘅有出入，於是我上到車就問吓司機，確定呢班車可以去到我哋要去嘅地方，咁就冇問題啦~

到差唔多到嘅時候，個司機提我就嚟落車，不過由於言語不通嘅關係，我哋誤會咗係嚟緊個站落車，到落咗車我就覺得唔妥，都唔係睇 google maps 睇到嘅環境~

望一望個司機，佢係咁用手勢示我哋返上車，又係咁講嘢同用手勢去教我哋點去~

其實我都冇話俾佢知我哋想去 Casa Vicens，可能佢知道遊客去呢頭嘅都係去 Casa Vicens~

雖然聽唔明，亦好難從佢嘅身體語言去知道實際應該點走，不過我深深咁感受到佢果份熱情，果份助人之心~

只要去到想去嘅巴士站落車，我就識去，所以接收唔到佢嘅意思都冇問題嘅~

落咗車行一分鐘就去到 Casa Vicens~

好似 LEGO 砌出嚟咁，幾得意~

 
由呢度返旅館，只係十五分鐘步程，仲要係一條直路連彎都唔駛轉，梗係行返去啦~

呢條街都幾旺，多人又多舖頭，又可以睇吓晚餐食咩好~

途經見到有間專賣生果嘅舖頭，即刻衝入去~

最後買咗橙同蕃茄仔~

 
可能今日太晏食午飯，我哋都冇咩胃口，行到見到間麥記，啱晒，唔駛即刻食，買返旅館想幾時食幾時食~

 
行到返旅館附近~
 

  
返到旅館，發現個電源轉插器插唔入個插座，因為個插座係凹入去嘅，喺接待處借咗三個先搞掂~

上網又唔係太連到線，不過都聽過好多人講，好多 hostel 都係咁，要近返接待處先連到線~

呢度嘅 wifi 有分層數，每一層都有獨立嘅 wifi port 同 password，我哋住喺三樓，不過連 search 都 search 唔到三樓果個，但就 search 到二樓同四樓果個，連線就一時時，就算連到都好弱甚至斷線~

我哋落返接待處就正常晒，再行到用餐地方及露天花園先接收到強及穩定嘅 wifi 訊號~

講返麥記果啲嘢食~

煙肉漢堡，麻麻地~

麥香雞，完全冇味~

雞翼，好似食鹽咁，勁鹹！