《瞬間看地球》Stranger's Blog

今日行程：

豐田汽車南海和歌山市駅前店 → 和歌山電鉄貴志川線貴志駅 → 黑潮市場 → 白浜 Tore Tore (とれとれ市場南紀白浜) → 三段壁 → 千疊敷 → 円月島 → 豐田汽車和歌山店 → 大阪松阪牛燒肉

今日車程：11


今日係我極期待嘅一日，其中一個原因，梗係因為自駕遊啦！

而屎塔期待嘅，自然係貓站長 Tama~

誇張啲講句，冇 Tama 就未必有今次関西之旅，因為我知屎塔好想嚟探吓佢，所以先決定嚟関西~

今日行程非常緊湊，湊到預咗有兩個景點去唔到~

原本冇諗過自駕遊，但景點與景點之間有一定距離，交通又非常唔方便，反正手上嘅國際車牌仲有效，所以決定自駕，否則要犠牲嘅景點一定唔止兩個~

話明行程夠湊，我又好變態地安排朝早 0630 出門口，屎塔誓死跟隨~ =P

第一站係「豐田汽車南海和歌山市駅前店」

和歌山有四間豐田分店，有兩間離天萬丈遠，不在考慮之中~

淨返兩間，一間近南海電鉄和歌山市駅，一間近 JR 和歌山駅，都係果句，我哋搭南海電鉄唔駛錢，梗係搭南海電鉄過嚟和歌山，順理成章，就約好喺南海電鉄和歌山市駅攞車~

酒店 → 豐田汽車南海和歌山市駅前店

大阪地鉄：　心齋橋 →→→ 難波

南海電鉄：　難波 →→→ 和歌山市

到咗南海電鉄難波駅，時間比原定早咗，計劃中希望搭到 0720 班車，而家早咗就有幾班車可以揀~

0713 普通

0717 サザン (Ltd. Exp.)

0720 急行

見到普通車就梗係唔搭啦，爭七分鐘一定等急行~

咁サザン呢？呢種車從未喺做功課時見過，我見佢有啲係指定席，有啲係自由席，唔係好敢坐，免得誤會底下坐咗霸王車~

但係我又好想搭呢班車，因為我有理由相信呢班係三班之中最快到達目的地嘅，於是我走去問工作人員，得到嘅答案係，用 pass 坐指定席要補錢，坐自由席就唔需要~

咁就正啦！自由席果幾卡車大把位，一於搭呢班！
 
落咗車好容易就搵到豐田~
 
個職員知道係外国人，即時緊張起嚟，明顯見到佢做緊嘅嘢未必係自己想做嘅，情況真係有少少滑稽，不過我哋當然唔會笑佢，我哋好有耐性咁等佢完成佢想完成嘅嘢~

跟住就到解釋條款，佢就講明日本人不說(我諗佢係想講不懂)英語，所以搵英文版嘅條款俾我哋睇~

今日行程咁緊湊，我梗係想早啲搞掂就出發，不過佢反轉間店都搵唔到英文版條款，淨係睇住佢搵都搵咗十分鐘~

我哋兩個冇嘢做企住等佢搵成十分鐘，感覺上真係等咗好耐好耐，我真係想同佢講，算把啦~

一來我對日本人有信心，二來我對日本豐田有信心，三來我都喺日本豐田租過車，其實冇問題嘅~

不過我相信日本人做嘢唔會咁求其，我話唔駛睇佢都未必肯~

最後佢搵到喇，其實都係啲廢話嚟，睇完都唔記得佢講咩~

好嘞，驗晒車搞埋啲文件，佢又叫我哋等一陣，話換過部車俾我哋~

點呀大佬，呢部咪呢部囉，玩幾個鐘姐，又唔係同你買~

有啲人就係咁，以小人之心度君子之腹，了解咗件事先埋怨人都未遲啦！

人哋換得部車俾你梗係有原因啦，唔通貪得意咩~

了解過後，原來佢見之前果部好多花痕覺得唔好意思，呢部啱啱洗完車，寧願俾部靚仔啲嘅我哋~

好彩我一直表現禮貌同有耐性，不至於失禮人前，人哋打從心底俾最好嘅嘢你，你仲嫌人哋阻住你，真係要檢討吓！

驗車時發現仲有驚喜，就係呢部車分分鐘係新車嚟！我就算唔係第一個租客，頂多都係第二個，因為呢部車只係行咗 161 KM！

就係因為呢位阿哥用心待客，俾最好嘅嘢客人，令我哋今日嘅旅程錦上添花，真係多謝你！

 
下一站係「和歌山電鉄貴志川線貴志駅」

貓站長 Tama 就係喺呢個站上班，屎塔前上司無耐前去完返嚟，搞到屎塔都心思思，就陪你去啦~

離開豐田前，梗係要設定返個 GPS 帶我哋到目的地~

由於用 GPS 去設定其中一個鉄路站為目的地係非常方便及容易嘅事情，我事前完全冇諗過有啲咩資料要準備~

不過我哋搞咗好耐，都搵唔到貴志駅，要勞煩之前果個哥哥幫手，佢初時嘅搵法同我哋一樣，從鉄路網絡著手，不過睇佢表情就知佢都搵唔到~

佢左按右按，試圖從唔同路線去搵個站出嚟，最終都係搵唔到，唯有出返主頁，從文字搵起，鍵入貴志駅嘅日文(我估)，搞咗一輪篤嚟篤去，完全唔明螢幕上嘅日文係咩意思，仍然見佢一籌莫展，我真係有啲擔心~

好彩，佢搞多兩搞終於都搵到，真係估唔到一個鉄路站都可以咁難搵~ @@

搞掂晒，出發！

由豐田到貴志駅，車程約大半小時~

一踏油門，興奮嘅心情可以話係打通任督二脈，亢奮非常！

一路由大路去到支路，再走入小路，再鑽入雙線雙程又窄又多彎嘅鄉交路，我哋就知道距離目的地不遠了~

 
去到一個位，GPS 顯示一個倒 V u-turn(如下圖)，我哋而家係由右邊藍色線向左下方向行駛~
 
我實在唔係好相信佢嘅指示，冇理佢，諗住刻意行錯向前行唔轉灣，等佢重新俾過條路線我~

佢重新俾過條路線係要我向返後行，即係我哋真係過咗籠，我哋唯有沿來時條路行返轉頭，經過路口時好留意有冇其他路，又真係唔覺有，只好繼續向前行~

過咗呢個十字路口，又話我哋行錯路，再指返我哋向後行，天呀，我哋係咪要去搵法師開埋第三隻眼先見到咖~ @@

唔理咁多，跟佢轉右，轉完先再算！

唔知係咪真係開咗眼，我哋轉緊右時就見到轉右後嘅右邊真係有條小路，雖不算好明顯，但如果話仔細睇都睇唔到就肯定對眼有問題~ XDDD

呢條小路入去時都夠兩架車過，但行行吓就越嚟越窄，已經窄到唔容許來回車輛同一時間過，亦冇避車處嘅地方，我將車速收慢，條路有少少彎，睇唔到盡頭，有啲緊張，怕有對頭車~

不過原來條路好短，只有大約百五米，過咗最窄路段就已經見到貴志站~
 
站前地方唔係好大，而家首要解決泊車問題~

呢度完全搵唔到一個可以泊低又唔阻人嘅位，眼見前面有間舖頭未開，就泊喺佢門口，入去影完相先再諗辦法~

泊完車，屎塔一支箭就衝咗入去個站度，而我就梗係有啲掛心，咁樣泊低部車始終唔係咁好，我對腳就步向車站，但思維同目光都係掃描緊四圍環境，睇吓有冇個更好嘅位可以泊，可謂上半身同下半身做緊完全唔同嘅事情~

離遠見到有對男女喺間舖頭前面執緊嘢上車，我走埋去問個男嘅呢度附近邊度可以泊車，個男嘅竟然完全無視我嘅存在走開咗，反而企得較遠果位女士就走埋嚟，我又重覆一次，指住部車，問佢可以泊邊~

果位女士向大街方向指咗一指，明顯係話要返出大街先有位泊車，我聽到呢個答案都幾失望，因為我入嚟時，大街附近完全唔覺有停車場，我亦相信我唔可能從呢位女士口中得知出咗去點搵停車場~

我準備問佢大約喺邊個方向之際，佢做咗一個拉長嘅手勢問：long？我答佢一至兩個鐘，佢面帶非常有善嘅微笑，帶領我向前走，走到車旁一個住宅前空地，示意我泊喺空地上的車子旁~

我真係唔敢相信，佢竟然叫我泊部車入私家地方！我即時諗到嘅係，呢度係佢屋企~

我當然冇問題，我非常感激嘅態度去多謝佢，佢嘅友善態度同日本卡通片入面非常慈祥嘅婆婆係完全一樣嘅~

今次真係幸運非常，又新車又有私家位泊~
 
山長水遠嚟到，終於見到傳說中嘅 Tama，不過佢仲未起身，我喺影相嘅時候唔小心輕輕碰到塊玻璃，Tama 就係咁俾我整醒咗~

可能長期有遊客到來，佢對陌生人都見怪不怪~

 
站內環境~

 
Tama 嘅對面係博物館連 Cafe~

 
我見屎塔好似有排都未影夠，我自己走咗去小商店先~

快速咁行咗一個圈，醒起 pass 唔包貴志川線，但我又唔覺有售票處，所以就直接問咗商店嘅女職員~

不過個女職員表達唔到，一味拎住張貴志川線 pass 出嚟，由於我只塔兩程，逐程俾會平啲，根本唔需要買 pass~

個女嘅就叫咗個男人過嚟，話係佢爸爸，佢爸爸好少少，知道我唔需要買 pass，但仍然表達唔到點買單程飛~

於是個女仔就帶我過去 Cafe 果邊，問果邊啲人，結果係上車時向車長購票便可~

不過問完之後我又諗到其他嘢~

我原先嘅計劃係嚟影相先，再搭 Tama 列車兩三個站，再坐返返嚟總站，攞車走人~

不過問完之後，我改轉主意了~

我初時嚟到車站，見到有部火車已經喺月台，不過唔係 Tama 列車，我冇理佢，而家諗諗吓，我打算坐 Tama 列車幾個站，只係為爭取時間影相姐，如果佢早到又可以上車，影夠相就落車，根本就唔需要坐幾個站~

我將我嘅想法同屎塔講，屎塔都認為冇問題，咁就掂晒，可以為今日咁湊嘅行程舒緩少少少少時間~

見部 Tama 列車未到，我同屎塔就過返去小商店睇吓有咩嘢買，最後就買咗少少手信~

出咗小商店，見到有好多小朋友排緊隊，非常有秩序咁企晒喺度等，我估佢哋可能係搭 Yama 列車嘅~

我哋再返返月台等咗幾分鐘就見到 Tama 列車駛緊入站，正！時間啱啱好！

嗱嗱聲跳上去瘋狂影相~

部列車真係好靚！

 
影完相先發現，成班小朋友只係喺月台觀賞，冇上到車，部車走咗佢哋就返返去站出面排隊，好乖~
 
雖然同主角都冇咩交流，不過我哋都好開心，貓就係咁咖啦~

除咗主角，呢度嘅環境都令我哋覺得好舒服，又有部咁靚嘅 Tama 列車，又遇上咁好嘅嬸嬸，相當愜意~

下一站係「黑潮市場」

黑潮市場即係漁市場，係去和歌山嘅必到大景點，我哋都好期待可以食到超新鮮嘅魚生！

現場仲有「金鎗魚解体」表演，不過我哋未必撞啱時間睇得到，睇吓好唔好彩啦~

去攞車時發現，有部車頂住出入口，車上又冇人，我只好走埋去個嬸嬸度求助~

不過去到間商店又唔見人，我又唔想喺呢度咁寧靜又寄人籬下嘅情況響號示意，咁做實在太冇禮貌~

呢個時候，我只好返返埋部車度，希望頂住出入口部車嘅司機睇到有人，會意會到我哋要出車~

等咗一陣，我又走返去間商店度碰碰運氣，今次俾我見得返果位嬸嬸，我向部車指一指，佢立時明白，走咗去隔離舖搵咗個男人出嚟~

個男人本身喺度食緊麵，我感到非常唔好意思，我用盡我能夠同佢溝通嘅方法去表達我嘅歉意，對方面無表情，但又看不到不滿，完全看不透佢諗緊乜嘢~

到佢倒咗車，我開車時同佢面對面有眼神交流，我再遞手同點頭示意，終於都見到佢以微笑回應，咁樣我都覺得舒服啲~

由貴志駅到黑潮市場，車程約大半小時~
 

我哋早知道黑潮市場喺一個主題樂園裡面，嚟到附近，見到樂園停車場，諗住泊入去，但又見到只有日泊，冇理由照泊咖，我哋選擇相信黑潮市場會有自己專屬嘅停車場，所以我哋喺附近兜吓探索吓先~

結果我哋嘅想法係正確嘅！唔單止搵到個時租停車場，頭一小時仲係免費嘅！

只要知道無料=免費，唔難明白呢塊牌想表示啲咩~
 
黑潮市場好暗，同埋比想像中細得多，不過入面放滿壽司同魚生，誇張啲講句，就連行一個圈先決定都等唔切，就想喺第一檔度即度買嚟食！

 
檔檔賣嘅嘢都唔同，但每檔有賣壽司魚生嘅，睇落都非常新鮮，好有吸引力~

 
行行吓，有人走埋嚟同我哋講嘢，其實都冇咩咁特別，不過奇就奇在，佢講嘅係國語！

我要即時進入大腦語言區 → 設定 → 語言 → 國語，先可以回過神來進行溝通~

佢係呢度嘅工作人員，可能專責招待中港台人士，傾咗兩句，又有另一位工作人員走過嚟，當佢哋知道我哋來自香港嘅時候，第二位工作人員就開始用廣東話同我哋交談，不過佢嘅廣東話就唔算好好，有時都唔係好表達到，所以講講吓都係交返俾第一位工作人員用國語同我們傾~

其實都冇咩特別嘢傾，都係介紹吓啲特產咁，不過我哋嚟呢度唔係想買特產，係邊參觀邊搵新鮮壽司同魚生！

不過佢哋都幫咗我哋好大忙，佢話咗俾我哋知大約一小時後就有解体表演，好讓我哋計劃吓行程；佢又話俾我哋知消費滿一定金額，可獲第二小時免費泊車~

既然係咁，而家就買嘢食，食完周圍行吓，到差唔多時間就可以睇解体表演~

本來諗住買一板海膽，不過而家有啲肚餓，想食返啲飽肚啲嘅嘢，海膽就留返下一站先買嚟食~

現場仲可以揀啲生嘅食物即刻搵人燒，不過我哋就冇咩興趣~

 
最後揀咗一盒壽司同一盒刺身~

揀壽司時，我完全冇問屎塔意見就揀咗海螺壽司，屎塔話：「我又係揀咗呢盒呀！」

屎塔，咁你都唔明，我知你鍾意食海螺，我係為你而挑選咖~

揀好咗俾埋錢，可講少少廣東話果個工作人員又話我哋知出面有地方可以坐低慢慢食~

坐低咗揭開盒刺身先知原來係刺身飯~ =P

兩盒嘢都非常新鮮，正到爆呀！

 
食完嘢就返返入去，仲上埋二樓，二樓都係賣當地特產，好細亦冇咩睇，係咁易行個圈就返落去準備睇解体~

落到去已經有好多人喺檯前等緊，不過幸好，搵到個位，前面兩位女士冇咁高嘅，勉強可以睇得清楚~

不過有時真係唔係盲目咁偏幫外人，大家都好守秩序，遲咗就企外圍，唔會攝吓攝吓，但偏偏有幾個講廣東話嘅喺度攝吓攝吓咁攝入人群中，真係討厭至極！

解体開始，我就瘋狂影相，屎塔就負責錄影，由於全程舉高手，所以影啲相都真係比較差~

(藉口......)

解体完後就即場售賣，最搶手嘅梗係魚腩位置啦~

 
睇完解体，就出去周圍影吓相~

 
下一站係「白浜 Tore Tore (とれとれ市場南紀白浜)」

Tore Tore 同樣係魚市場，同樣有解体表演，不過呢度用嘅係吞拿魚~

由和歌山揸車到白浜，大部份時間都係高速公路都需要約兩小時，都真係幾遠吓~

上到高速，穿越咗好多條隊道，多到我都數唔清~

條路同隧道都好靚，就連呢部咁低級嘅車都一樣行走得非常平穩同舒適，屎塔又再次進入夢鄉~

差唔多到第一個休息站，唔知點解我冇入到去，都好，唔駛咁早叫醒屎塔，等佢瞓耐啲~

如是者穿過一條又一條嘅隧道，又嚟到第二個休息站，我刻意將車停得柔一點，免得一下子停得突兀，驚醒睡夢中嘅屎塔~

 
泊好車後，我選擇用說話聲音弄醒屎塔，叫咗幾聲就醒咗~

去個洗手間，飲吓嘢休息咗一陣又再次上路~

今次行呢條高速要俾成二千幾円，其實由和歌山到白浜可以行免費嘅國道，條路梗係冇咁正同唔容許高速行駛，基於安全同時間，高速公路係最好嘅選擇~

一樣嘅路況，一樣嘅環境，一樣嘅舒適，好快就到達 Tore Tore，眼前一個好大嘅露天停車場，無料任泊，夠晒正！

有時唔係話貪佢唔駛錢咁計較，而係無料任泊呢種自由嘅感覺實在太正~

 
Tore Tore 比黑潮市場大得多，照佢嘅設計可分為三個區域，乾貨濕貨同飲食區~

嚟到呢度行咗一圈，感覺同黑潮市場好唔同~

呢度真係似一個街市，一個集中賣海產嘅街市，你想買鮮魚返屋企煮，嚟呢度就啱晒，全場都瀰漫住鮮魚嘅腥味，反而壽司就冇咁多選擇，起碼想買成板海膽嚟食都搵唔到，真係有啲後悔冇喺黑潮市場食個痛快！

簡單嚟講，要買嚟自己煮嘅，Tore Tore 大把選擇，包搵到好嘢；想買嚟即場食嘅，黑潮市場夠你一日三餐食極唔厭，要幾新鮮有幾新鮮~

 
我哋行咗唔係好耐就見到有條大魚放咗喺度，檯邊又有"解体"嘅字眼，好明顯呢度就係陣間解体嘅表演場地~
 
我走埋去問個職員幾點開始表演，佢話十分鐘，咁我哋就決定喺度等~

我哋都算好彩，黑潮網頁就有講明幾點有表演，只係我嘅行程未必夾到啱時間，而 Tore Tore 呢度就係不定時，除非你喺度成日啦，否則真係唔一定睇到，我哋認真好彩，兩邊都睇得到~

十分鐘過去後，仲未開始，我哋繼續等，等多一陣，個職員同我哋講就快開始，咁都好，好過係咁等唔知等到幾時~

果然係就快開始，只係等多幾分鐘就開始~

一樣係我影相屎塔攝影，不過今次好啲，位置唔錯，隻手冇咁攰~

不過我影影吓要換記憶卡，尾段就只有屎塔嘅短片~

其實解体方法大同小異，都係咁上下~ 

 
睇完表演，時間方面有啲緊張，嗱嗱聲買咗兩盒壽司再坐埋一邊搞掂佢~

雖然時間緊迫，但我哋都唔會求其快快趣咁食，仍然係慢慢品嘗咁正嘅美食~

好食固然係好食，但感覺上真係唔及黑潮果邊咁新鮮咁好食~

 
下一站係「三段壁」

三段壁係白浜名勝之一，不過我上網睇過嘅評語都係可到可不到，沒甚麼特別~

但係話晒係名勝，梗係想喺某個時空在當地存在過，所以我計劃如果時間上做得到，都會到此一遊~

今早講過有兩個景點預咗去唔到，三段壁就係其中一個~

離開 Tore Tore 時，我不停盤算時間上是否容許我哋到三段壁一遊，同屎塔商量過後，雖然時間上真係比較緊，但只要一切順利，仍然係可以嘅~

步向取車途中，我問屎塔有冇興趣揸一轉，屎塔諗咗一陣，我未等佢回覆就俾咗條車匙佢~

坦白講，屎塔手車係完全冇問題，我只係對佢個人冇信心，佢份人成Q日發白日夢，要佢專心一意做同一件事，好似會攞佢命咁~

不過一齊去旅行，共同嘅回憶同經歷係非常珍貴，縱使我有啲擔心，仍然希望佢可以擁有呢一少段嘅經歷~

由 Tore Tore 去三段壁，車程約十五分鐘~

一路上，我都好留意路面同屎塔，盡量將出事機會減到最低，睇住佢戇居居咁嘅樣，都咪話唔驚~

有驚無險咁嚟到三段壁泊車位~

 
泊完車就俾人截停我哋，再俾咗張嘢我哋睇~

泊一泊要 500 円！貴係貴咗啲，不過都冇計啦，唔通為果少少錢，一場嚟到都唔睇咩~
 
嚟到現場，實在真係冇咩特別，但我仍然覺得係值得到此一遊~

 
下一站係「千疊敷」

千疊敷同三段壁一樣，被評為可到可不到嘅白浜名勝~

亦係今日預咗去唔到嘅另一個景點~

我同屎塔做功課時，就俾呢兩個地方搞到亂晒籠，都唔知三係段壁定係疊敷，到最後我哋索性將兩者合而為一，稱之為「三疊敷」 XDDD

由三段壁到千疊敷，只需十分鐘車程，一於去埋~

屎塔覺得試過便夠，所以部車就由我揸返~

不過由於千疊敷附近都冇咩地方可以俾我搵到個電話號碼作為定位之用，所以呢程係靠睇路牌搵路去，冇用 GPS，不過白浜呢度只有一條大路，只要方向冇錯，唔難搵到嘅~

非常順利就搵到千疊敷，一個廣場般嘅平地，可任意停泊~

 
下一站係「円月島」

円月島可以話係白浜嘅代表，島中心因長期受海水侵蝕而形成一個洞，只要找對角度，就可以睇到日落中嘅太陽由洞嘅上方跌落被侵蝕嘅洞中~

因為呢個場景，就值得我帶屎塔嚟捕捉呢一刻~

今日行程咁緊張，全因為我要喺 1630 前趕到去円月島，親眼目到咁神聖嘅一刻~

由千疊敷到円月島，車程只需十分鐘~

不過到咗目的地都仲要預時間搵啱角度先可以影到咁有趣嘅一幕~

其實之前都 search 過邊度係最佳地點，不過結果真係眾說紛紜，個個答案都唔同，其實會唔會係唔同時間有唔同角度呢？

行駛途中，轉咗個大彎，出現喺眼前嘅就係円月島，成個人都興奮起嚟，我都實在唔知點解，總之就係好興奮！
 
直至到咗 GPS 所指嘅目的地，我哋都冇停落嚟，因為就現場嚟睇，肯定唔會係影相嘅最佳地點，我哋繼續行，行到見到有人聚集嘅地方，又見到路邊有好幾部車泊低咗，我就知道係時候搵個位泊好部車，再步行去搜索吓~

泊好部車，第一件事，梗係去已經有一班人聚集緊嘅地方，因為有理由相信呢個位係好位嚟~

不過，我錯喇，呢個位根本唔可能影到最靚果一幕~
 
我同屎塔前前後後都走過，都覺得未必可以影到，行得太遠，島上嘅洞會因為角度而消失，行得唔夠遠，個太陽又唔會喺個洞嘅上方~

屎塔已經打定輸數，覺得唔會有一個咁嘅角度，我同佢都一度以為要夾啱月份先會有咁嘅機會~

不過一場嚟到，我點會就此接受一個未必係真嘅理由？

我以遠方一個彎位為目標，果個目標大約有五百米遠，來回就係一公里，但係我唔理得咁多，做咗可以做嘅嘢都唔得，至少唔會後悔~

其實行咗一百米到我就知道唔對路，個太陽同個島越嚟越遠，但係條路係呈彎狀，唔排除會有轉機~

不過，我行到過晒個大彎，都睇唔到有任何機會，好失望咁行返去屎塔度~

不過我仍然未放棄，呢邊唔得，就去埋另一邊睇睇~

嘿嘿，皇天不負有心人，終於俾我搵到個對到正嘅位！呢個位仲要一個人都冇！

凡事講証據，正所謂 no photo no talk，影返張相做証先~
 
我實在忍唔住將我心底裡興奮嘅笑容放在咀邊，未走到合適範圍就高聲告知屎塔我搵到想搵嘅角度，仲即刻提供証據！ =P

我同屎塔嗱嗱聲上車，揸到近啲果個位泊低，等待神聖一刻嘅來臨~

不過今日天氣麻麻地，有啲密雲，影唔影到真係聽天由命~

太陽越低，身邊嘅人就越多，咁梗係啦，淨係你先識搵好位影相咩~

不過好可惜，未落到個洞就已經俾密雲完全遮蔽住，冇希望喇~

 
屎塔臨走前影咗張廣告硬照~ =P
 
我哋上咗車，見時間尚早，就討論吓不如返到和歌山市區搵個地方去吓，我哋揭開地圖，見到和歌山城，就和歌山城啦~

不過車都未開就見到個太陽出返嚟，兩條粉腸嗱嗱聲落車再影過~

不過都只係影多一陣咋，眼見個洞嘅下層全是密雲，相信都唔會再見到個太陽喺個洞裡面出現~

 
今次真係開車走人，行咗一百米到，我好下意識咁又望返轉頭，俾我望到個太陽又出返嚟！

我同屎塔講話返轉頭，屎塔有啲猶豫，我知佢諗咩，佢覺得可能只係曇花一現，我冇理佢，即刻掉頭，衝衝泊好部車，兩條粉腸又去返果個位~

我嘅堅持終於得到回報！

 
其中一張仲有隻船做襯托~
 
今次呢個景點取得空前成功，認叻都係咁話，我覺得我實在功不可沒！ =P

其中我發現咗一樣嘢，原來個太陽唔係垂直咁落嘅，落落吓係會側埋一邊，要一路影一路就角度先得，真係好奇妙~

下一站係「豐田汽車和歌山店」

今朝攞車果間分店收七點鐘，我未必趕得切，所以冇咁方便我都要揀呢間分店交車，貪佢收八點鐘，時間上鬆動好多~

本來下一站係和歌山城嘅，不過中途有啲事發生，導致計劃取消~

我哋懷住非常滿足嘅心情離開円月島，繼續依賴 GPS 帶領我哋到和歌山城，屎塔亦好意料之內咁瞓著咗，我一直駛到公路上第二個休息站先停車休息吓~

回程第二個休息站，其實等於去程時錯過咗嘅第一個休息站~

我哋食咗杯雪糕，又買咗啲特產做手信~

再開車時，天已經黑晒，離開休息站進入高速公路，行咗唔夠一百米已經要停車，因為前面大塞車！
 
停咗成十分鐘到可以郁吓，但只係郁少少又停吓咁，情況非常不妙~

唔去和歌山城固然冇所謂，最怕八點前交唔到車，咁就認真大問題！

明早先還車，俾多咗錢固然係唔抵，但最大問題係今晚點算？酒店喺大阪，揸部車返去？聽日呢？可唔可以喺大阪交車呢？如果唔得，又一大早走過嚟交車？咁樣做完全破壞晒我哋嘅行程~

一來一回油費連公路費，仲要加埋租車費，又唔知會唔會有遲交車罰款，仲有一整晚嘅停車費，嘩，呢條數真係噤計！@@

求神拜佛，塞一陣好喇~ >_<

不幸中之大幸係，我仲有個半鐘時間，喺度塞上 45 分鐘都仲勉強可以~

慢慢地，由郁吓停吓去到保持超低速慢行，總算見到曙光，跟住又見到個牌，寫住 4 KM 25 分~

個牌上面仲有其他字，但就唔係好明，點都好，我將佢解作車龍為 4KM，需時 25 分鐘先可以通過樽頸位~

如果我冇估錯，八點前交車絕對冇問題~
 
我哋即時喺 GPS 調教返目的地為豐田分店，不過唔知點解點 set 都失敗，試過唔同方法，試咗好多次都唔得，我索性停車熄匙再撻車，不過都係唔得！

後來我醒起，要 set 目的地，一定要喺部車完全停定嘅狀態下先可以，頭先雖然有熄過匙再撻，但因為全部車都郁緊，我只係停一停偷少少時間，所以我撻完車就即刻再郁車~

諗起呢一點，我要搵個位停低搞搞佢，不過現場都唔係咁易搵個位停，唯有見步行步~

行行吓去到匯合位，我就靠中間陰影位停低，set 好個 GPS 繼續起行，之後情況比我想像中好，唔駛 25 分鐘就通返~

落返和歌山市區，要入返油先交車，否則會被徵收高過自己入油嘅費用~

去到油站，發現係自助式入油嘅，我從來都冇試過自己入油，上次喺北海道都係有專人入油嘅，唯有問在場職員~

佢教咗我哋用現金入油，再教埋我哋冇散紙時嘅找換方法~

我先用 1000 円紙幣，入 500 円油，部機會退返 500 円代用券，再要拎呢張代用券去第二部機度換返 500 円紙幣，其實我都唔知點解要搞到咁複雜~ @@

入完 500 円發現仲未滿油，又入多 500 円，仍然係用 1000 円紙幣，今次由屎塔搞~

 
入完油繼續上路，七點幾就去到豐田，眼見得返一個窄位，就泊咗入去~
 
泊低部車就走入舖頭入面搞手續，等咗五分鐘，終於等到出面嘅職員驗完車返入嚟，我哋可以走了~

今日最後一站係「大阪松阪牛燒肉」

我哋今次嚟関西，諗住點都要食一次和牛，但做資料搜集時，唔少人都話松阪牛比和牛更好，所以我哋就鎖定咗呢間嘢~

豐田汽車和歌山店 → 大阪松阪牛燒肉

ＪＲ鉄道：　和歌山 →→→ 和歌山市

南海電鉄：　和歌山市 →→→ 難波

離開豐田後，好容易就行到去 JR 和歌山駅，我哋要搭兩個站到 JR 和歌山市駅~

由於 JR 和歌山市駅係總站，所以基本上只要方向啱，咩車都可以搭，所以我都冇做功課睇吓幾點有車~

不過去到睇吓下一班車時間，竟然係半個鐘後！真係始料不及~ @@

今次車程 PASS 唔包，我哋自己走去售票機度買飛，其實都好容易~

去到心齋橋，冇啦啦經過冇諗住去嘅法善寺~

 
跟住地址同地圖，搵極都搵唔到間嘢，我哋只好靠肉眼去搜尋，終於俾我哋搵到，不過地點同官方網頁或 google map 講嘅不符，唔理啦，同名同 logo，唔會有錯，可能搬咗未 update 資料姐~

 
搭 lift 上到去，有位男士招待我哋，不過佢啲態度有啲奇怪，佢好有禮貌，但一啲都唔覺佢友善~ @@

今次嚟食松阪牛，預咗會食貴少少，睇完 menu，以我呢啲唔識貨又膚淺嘅人，邊識分咩係好嘢，所以我哋從價錢著手~

最貴果個餐都只係 2500 円，比我想像中平得多，最後我哋點咗一客 2000 円同一客 2500 円嘅，可以食吓唔同嘅嘢~

不過，落單時，個職員話唔可以點唔同餐，一定要點兩客一樣嘅~

咁怪嘅規矩都有嘅~ @@

交涉咗一輪，其實大家都唔係好溝通得到，佢話會幫我哋請示吓老闆~

更奇怪嘅係，佢返嚟嘅時候拎咗第二個 menu 俾我哋，我哋都冇問咁多，當冇見過第一個 menu~

不過呢個 menu 裡面嘅餐比第一個貴得多，最貴果個 8000 円~

咁就啱晒嘞，一心嚟試頂級牛肉，8000 円一個餐都喺我預算之內，最後點咗一個 8000 円同一個 5000 円~

吖~~~

個職員又話唔可以點唔同餐~!!!

真係火都嚟！不過諗深一層，溝通唔到而有所誤會，佢都唔想，不過 8000 円果個有六種頂級牛肉，而 5000 円果個有黑毛和牛同雞，我哋又真係兩個餐都想要~

所以我哋提出同一個要求，但如果佢堅持話唔得就算數，無謂強人所難~

世事真係奇怪，我哋好友善咁提出一次，佢又話可以喇~ @@

首先上檯嘅係前菜，冇咩特別~
 
再嚟就係"油"，職員教我哋燒嘢用呢舊"油"放落去燒一陣就可以，唔駛用其他油，相信係取自動物某部份~
 
跟住就係自磨山葵~
 
兩個餐嘅食物輪流上檯，每份肉都有名稱，不過當然係日文字，睇返對照表就大概知係咩部份，再強調一次，知道係咩部位唔等於知道係咪好嘢，膚淺嘅我，都係睇價位嚟判斷佢有幾頂級~

 
仲有個冷麵同麵豉湯~

冷麵一般，麵豉湯就唔識講，因為我一向都覺得麵豉湯唔好飲~ =P

 
最後到個甜品，幾好食~
 
貴價牛即係貴價牛，真係好食到不得了，越食越過癮，正到唔識形容！

不過可能我真係唔識欣賞，最貴果種我反而麻麻地，咬落口冇咩肉感，脂肪感較強，咁同平時食到嘅牛脂肪又梗係唔同，呢啲脂肪食落唔會覺得好肥膩，絕對冇抗拒嘅感覺，只不過如果多返啲肉感就正嘞~

今次食咗十種牛肉，真係十種牛肉嘅口感都唔同，估唔到連我呢啲咁唔識貨嘅人都食得出十種口感，認真過癮！

以咁嘅價錢，我又真係唔會話抵食，不過絕不後悔就已經足夠~

完結今日行程，返酒店~

行到去日本橋地鉄駅，見到出入口已經閂咗，但又睇唔明啲日文字，於是我哋走去其他出入口睇吓，點知幾個出入口都係咁，再仔細啲睇，原來已經過咗營業時間，我哋先知原來而家已接近午夜十二點！

真係快活不知時日過，一早六點半玩到十二點都未返酒店，呢兩條友真係好精力！ XDDD

既然冇地鉄搭，距離又唔係太遠，行返去啦~

途經道頓堀時，經過返我哋今次第一晚嚟日本嘅晚餐地點，原來我哋幫襯果晚已經係最後一晚營業，之後就要"裝修"，不過係真裝修定結業就不得而知，唔怪得啲職員做到咁鬼 hea 啦！

我哋仲要收工前大半個鐘先入去，極有可能係最後兩個客人！ =P
 
今晚宵夜例牌係布丁，不過明日早餐就買咗飯團~