《瞬間看地球》Stranger's Blog

今日行程：

Day 08：大興善寺 → 秋月城跡 → 光明禪寺 → 猫カフェ NYAON → 日產租車

今日第一站係「大興善寺」
九州紅葉名所頭十位~

嚟到大興善寺，外圍自由參觀，而內部則有限時間~
我哋就行咗外圍先，反正內部未夠鐘開放~

大興善寺對開環境~

大興善寺呢度，真係幾幽靜，而且環境仲非常好~

行到差唔多，又差唔多夠鐘，就去入口處等吓~
工作人員見我哋等緊，仲提早開門俾我哋入去先，真係唔好意思，我哋都冇諗過會咁......

呢度嘅楓葉，應該係成個旅程見得最多嘅地方，而且呢度唔係過咗見頃時期，係仲有好多都未開~

呢度好大，不過我哋見楓葉唔多，而且有部份係櫻花樹嚟，就唔打算行晒~
臨走時，又喺外圍行咗陣~

下一站係「秋月城跡」
同樣係九州紅葉名所頭十位~

去到秋月城跡街口，有個人著晒反光衣，手持紅棒，路面又鬼咁多人，我相信唔俾入，費事入咗去要倒車出嚟，就係附近搵個停車場泊車~
泊好車走去票機度買泊車票，手頭上兩張一千円紙都嘔返出嚟，又冇其他可用散紙，附近又冇人，咁冇計啦，陣間先算~

泊好車，走返去頭先嗰個街口，見到有唔少車駛咗入去......
頂，原來入得！
重遇嗰位反光衣大叔，原來佢只係喺地盤出入口指揮出入嘅車輛......
算啦，都行到嚟呢度，冇理由走返去攞車揸過嚟~

秋月城跡兩旁，全是光禿禿嘅樹，唔知點解，我哋直覺覺得係櫻花嚟~
如果真係櫻花，見頃時，呢度應該好靚~


再行入啲，就見到呢度幾處歷史遺跡~
瓦坂~


長屋門~


黑門~


都係啦，冇乜楓葉，不過呢度都幾靚嘅~

上面有間中學~

回程特意買咗串雞肉串，咁就可以打散張一千円紙~
呢串雞肉串，又鞋又乾，但味道就幾唔錯，我哋特登連埋肥嘅部份食，咁就好食啲~


返去攞車時，俾埋停車場費就開車走~

下一站係「光明禪寺」
亦都係九州紅葉名所頭十位~

光明禪寺門口對外一攝~


光明禪寺嘅非收費區~

去到光明禪寺俾入場費時，發覺冇散紙......
俾錢形式係自助形式，如果我放低張紙幣，再拎走餘額呢？呢個動作實在係面斥不雅~
我打算同嚟緊嘅人夾埋一齊俾，唯有係咁~

我拎住張紙幣，等緊人嚟，突然有人走埋嚟，伸手示意我俾張紙幣佢，我見佢喺入面出嚟，似係工作人員卦，就遞俾佢~
佢喺隔籬張檯，拉開個櫃桶，幫我兌換咗一千円硬幣，再示我自己將入場費放落錢兜~

入咗場，有咩睇呢？
原來係睇一個不能進入嘅庭園~
咩意思呢？意思就係，遊人只能喺僅有開放嘅房入面去觀賞呢個庭園~
呢個庭園真係靚！成個氣氛好有禪意，好正！

除咗呢度，其他地方都係不開放嘅~

其實較早前去完大興善寺同秋月城跡，我同屎塔講，不如唔好去光明禪寺啦，我估都係冇咩紅葉，早啲去下一站仲好~
不過屎塔話計劃咗嚟咪嚟埋囉，反正本身都有預時間嚟~
多謝屎塔嘅堅持，我先睇到呢個咁靚嘅庭園~

其實今日心情都好矛盾咖，明知見到紅葉機會唔高，究竟我哋係咪應該死咗條心，唔去呢啲紅葉名所，搵其他地方去，定還是，希望去埋呢幾度，爭取見到紅葉嘅機會？
其實真係冇一定答案，所以最簡單，跟原本計劃行，咩都唔好諗~

下一站係「猫カフェ NYAON」
貓 Cafe 一間~

猫カフェ NYAON


呢間貓 Cafe 同去過嘅有少少唔同，去過嘅貓 Cafe 係冇特別劃分一個空間俾貓嘅~
而呢度，入咗門口，有幾張檯，如果要同貓接觸，係要去隔籬嘅房，啲貓就喺晒入面~
喺咁嘅情況，帶埋啲袋入去又好似唔係幾好，但佢又冇位俾人放袋......
我哋見呢區真係搵個人睇吓都冇，Cafe 計埋我哋亦只得三個人，就將個袋放喺凳，再推埋檯底，應該都冇問題嘅~

呢間 Cafe 嘅收費，應該都係我去過最貴嘅一間~
想同貓貓玩，每人 1000 円一個鐘，而且唔包飲品，真係純玩貓~
咁入到嚟，冇理由真係純玩貓，起碼都叫杯嘢飲吓啦~

想餵貓，就另加 100 円，就有一兜，不過兜入面只係俾好少，我諗都有 50 粒乾糧卦~
啲貓見到啲糧，全部癲晒咁，超猴擒，乾糧咋喎，唔通你哋今日未食過嘢？

而且啲貓唔算打理得好好，咁又唔係差，只係相對其他貓 Cafe 嚟講，佢真係唔算好囉~

其中有一隻貓性格有啲奇怪，佢好痴人，但唔摸得，一摸就嘈，再摸就發脾氣，再唔聽就一嘢咬落嚟~
佢痴人到無論你喺咩狀態，佢都想走上嚟瞓，而且只要有貓靠近佢，佢都會兇佢哋~

呢度都有十幾隻貓，不過唔知點解，硬係冇其他貓 Cafe 嗰種氣氛~

貓 Cafe 係今次旅程最後一個景點，之後就返去日產租車度還車~

租車時唔知佢有冇加到 KEP，還車時就知喇，係有嘅~

回程搭飛機時有少少事情發生~
架機係 3 + 3 咁嘅座位，我哋嘅座位編號係 A 同 B，即係窗邊同中間位~
當我哋行到埋去嘅時候，三個位都有人坐咗(A女，B女，C男，B 同 C 係識嘅，疑似係兩公婆，當係先)，咁我哋就梗係問吓佢哋有冇機會坐錯位啦~
A 冇反應，不過都算，因為佢望住窗外，冇為意唔出奇，B 同 C 互相對望咗一眼，當冇事發生，冇理我哋~
咁我哋進一步，拎埋張登機証出嚟，再問一次，B 同 C 今次直情當聽唔到~
身後空姐出手喇，C男即刻話，我係坐呢度，冇坐錯~
第一時間話自己冇錯先，即係話俾人知個老婆先係坐錯，老婆錯晒，你仲係咪男人嚟？
睇你兩公婆嘅反應，肯肯定一早已經知坐咗人哋個位啦，扮晒嘢瀨死唔走仲第一時間話自己冇錯~
最後發現原來老婆係坐 D 位，唔想同老公隔住條走廊就霸人哋個位~
到 A 嘞，到呢刻佢仍然係冇反應，完全冇望過過嚟，空姐再大聲啲同佢講，佢終於都有反應嘞~
空姐問佢坐邊，再問佢攞登機証睇，哈，佢睇都唔睇(登機証)就起身，去咗第二度坐，即係本身唔係亂坐就係特登霸住個窗口位坐，咁都有嘅~

到咗香港，等篋等咗超過半個鐘，冇計啦，貪平搭廉航，食得鹹魚抵得渴~

今次旅程真係超失望，冇盛開嘅紅葉睇，連似樣啲嘅都冇，運氣嘅嘢，唔嚟就係唔嚟......