2016.09.18 德國 (Frankfurt am Main、Mainz、Heidelberg) (歐洲第三天) @ 《瞬間看地球》Stranger's Blog

今日行程：
Frankfurt am Main (法蘭克福)、Mainz (美茵茲)、Heidelberg (海德堡)

Frankfurt am Main (法蘭克福)
Römerberg (羅馬廣場)
Eiserner Steg (鐵橋)
SixT 租車

Mainz (美茵茲)
Altstadt (舊城區)
Stephanskirche (聖史蒂芬教堂)
Der Hohe Dom St. Martin zu Mainz (聖馬丁主教座堂)

Heidelberg (海德堡)
Heiliggeistkirche (聖靈教堂)
Jesuitenkirche (耶穌會教堂)
Alte Universität Heidelberg (舊海德堡大學)
- Studentenkarzer (學生監獄)
- Universitätsmuseum (大學博物館)
- Alte Aula (舊演講廳)
Philosophenweg (哲學家之路)
Alte Brücke (老橋)
Altstadt (舊城區)

今日 Frankfurt 呢度落雨，仲要唔細~
我哋行過去火車站度食早餐，又係同一個地方，一個 food court 咁嘅地方，之前已經食過兩次~
胃口麻麻，買咗一個雞卷 (Wrap Crispy Chicken)，又幾好食喎~

想走嗰時，隔籬檯有位女士問我哋可唔可以幫佢睇住啲嘢，佢想去洗手間咁話~
佢一個人拎住咁多嘢又真係幾唔方便嘅，就幫你睇一陣啦~

今日第一站「Römerberg (羅馬廣場)」

要搭 U-bahn 過去，落到月台先醒起未買飛......

到咗站又唔記得撳開門掣，兩條友完全係未瞓醒狀態~ XDDD

嚟到 Römerberg，繼續落緊雨，冇辦法喇，只好將件雨褸套落個篋度，人就擔遮~

大部份熱門旅遊景點，唔駛諗都一定多人，不過我哋唔怕早出門口，咁就可以避開人潮~

呢刻 Römerberg 呢度只有幾個人(幾分鐘後就已經有一個大陸旅行團嚟到)，係就係有啲冷清，不過如果要喺冷清同熱鬧之間揀，我哋會毫不保留咁揀冷清~

下一站「Eiserner Steg (鐵橋)」

Eiserner Steg 距 Römerberg 雖不遠，但都有啲唔想去，始終落緊雨拖住個篋，不過最終都係去咗~

喺呢頭見到啲架空嘅管狀物，上網查吓，原來係抽取地下水後，用作運輸嘅管道~

附近隨影~

回程經過 Römerberg，呢刻廣場嘅人數，比起今朝見到嗰團大陸團嘅人數，多出以十倍計，咁多人喺個廣場度，其實都幾掃興~

下一站「SixT 租車」

之前做過功課，如果喺火車站攞車，會貴好多，為咗慳錢，唯有揀間遠少少嘅，行......四個字到啦，其實搭鐵路都得嘅，但搭鐵路都係要行，倒不如一開始就行，又唔駛拎住個篋上上落落~
不過呢，拖住個篋，又落緊雨，行四個字都幾甘......

今次租棍波，又係慳錢囉，指定自動波貴好多！
不過租棍波呢，佢都有個「要求自動波」嘅選項，即係，佢知道你想要自動波，但唔保証俾到你~
咁搏一搏啦，搏唔到咪棍波，反正我都成日揸棍波車，只係怕左軚棍波比較難適應啫，如果係右軚就完全冇問題~
要知道喺完全陌生嘅路面上駕駛，仲有可能好唔一樣嘅駕駛規則同文化，要顧嘅嘢其實好多，顧少一樣就一樣啦~

到咗 SixT，得一個職員，佢協助緊另一個客，唯有等吓，都等咗幾個字，終於輪到我哋~
問我哋攞咗國際車牌，望咗一陣，又帶點猶豫咁問我哋攞埋香港個車牌~
喺亞洲地方租車都租過幾多次，通常都有好充份及詳細嘅講解~
今次第一次喺歐洲地方租車，異常地簡潔，俾份嘢你簽，都係啲責任呀，保險呀，同意書等等~
今次我只係買咗最基本嘅保險，因為佢啲保險真係好貴，唔係好買得落手......
我知道，咁係好冒險，但我睇過條文，佢嘅最高自負額雖高，但我對自己係有少少信心，最壞都係賠自負額，覺得搏得過~
簽完文件就俾條車匙我哋，指手劃腳咁教我哋點去停車場攞車~
去到停車場，要自己根據車牌搵返部車，停車場呢邊完全冇工作人員......
咁，車身有冇花嗰啲呢？唔駛開車前睇睇，大家有個共識咩？真係奇怪！
不過咁，我哋望過又真係幾新淨，車身冇乜花痕~

我 book 嘅係 BMW 1 系(或同級)及手動波箱，當然有選返要求自動波箱~
最終佢俾咗部 Mercedes Benz A180 Auto 我哋，都好呀，棍波價錢，但俾部自動波我哋，有賺~

喺停車場收唔到 GPS 訊號，只好駛出停車場後才設定~
咁出停車場後轉邊個方向呢？只好是但轉一邊啦~
行咗幾個圈先搵到位停......

好嘞，根據過往使用 GPS 嘅經驗，通常都唔太難用嘅，應該好快搞掂~
撳呀撳，篤呀篤，點都轉唔返英文，搞咗好耐先可以將個 GPS 設定返去 SixT~

返到去，同佢說明原因，佢撳兩吓已經轉返去英文，我哋都睇唔到佢撳過啲咩，可能始終係德文，佢撳完我哋都記唔住啦~

好嘞，真係出發喇，轉返英文，好容易就搵到輸入 GPS 座標嘅地方~
輸入完再睇返佢標示嘅地方，咦？有幾條街嘅偏差嘅？唔通個座標嘅格式唔啱？
啲座標數字我喺 Google Maps 度搵出嚟嘅，可能部車唔係用同一個格式~
好彩，我都早有準備，我下載咗個轉座標格式嘅 app，而家只需要轉幾種格式，睇吓邊種啱就得~

試晒咁多種，冇邊一個係絕對準確，咁冇計啦，已經比預期遲咗，就揀個最接近嘅先，過咗 Mainz 先再算~

下一站
「Mainz Altstadt (舊城區)」
「Stephanskirche (聖史蒂芬教堂)」
「Der Hohe Dom St. Martin zu Mainz (美茵茲聖馬丁主教座堂)」

過去 Maniz 嘅時候，經過高速公路，途中好多改路路段，路變得好窄，左邊有兩尺高圍板(用作來回線分隔)，與右邊車道又貼，揸得快一係撞圍板一係撞右邊部車~
不過有部份車都行得唔慢，我跟住後面，精神上極度集中先跟得到又唔會碰及左右物件~
其實我可以選擇行慢線，不過慢線都係啲大車同慢嘅私家車，兩線相差嘅速度實在太多，我真係唔係好想行得咁慢，唯有跟住啲快車，自己小心啲~

行行吓，發現導航話仲有四百幾公里，仲有三四個鐘先到~
奇嘞，明明全程只需四十分鐘，我都行咗差唔多一半啦，應該仲有二十分鐘就到~
睇返 Offline Map，方向啱，亦真係行咗一半，真奇怪，唔理啦，跟路牌行，再用手機 check 住個方向行住先~

過咗改路嘅路段，真正處於德國無限速路段~
喺香港揸車，真係快極有限，喺呢度可以合法盡踩，梗係要試吓！

一去到大直路就係咁俾壓力油門，隨住速度錶慢慢上升，我全身肌肉嘅繃緊程度亦一同上升~
一路上一路上，直至有微彎先至收油，呢段路我最高上到 185km/h~
我自己從來未上過呢個速度，部車幾飄，但還可以，感覺上仲可以再上少少~

去到目標嘅路邊停車場，等咗一陣就有位，不過就好猶豫駛唔駛俾錢~
現場問咗人，佢話希望唔駛，因為星期日，佢自己就唔會俾錢，希望冇問題咁話~
當地人都唔知咁得意？

望吓人哋車頭，埋牆呢排車(我泊咗入埋牆呢邊)，架架都有張 Al1 牌喺車頭，中間嗰啲車就冇，咁我相信真係唔泊得，諗住去埋洗手間就褪返出嚟~

去完洗手間出返嚟就見到有個女人同屎塔講緊嘢，佢就係同屎塔講我哋唔可以泊呢度，咁我就即刻 say sorry 同埋即刻開車離開嗰格俾返人泊~

中間有幾排車位，車頭都冇特定嘅牌或者 label，我相信呢啲就可以泊嘅，不過呢刻冇位~
冇位就周圍再兜吓，附近都有唔少停車位，只係全部爆滿，咁冇計啦，就去返最初嚟到嗰個停車場等，因為呢個場最多停車位~

等咗一陣，終於等到有位，泊好就走去票機睇吓收費時間~
雖然係德文睇唔明，不過大概都知佢嘅收費時間，亦相信收費時間以外係免費~
今日星期日，應該就係免費嘅，同埋我見隔籬車車頭都冇放停車收據~

先前攞車時喺停車場比較暗，冇影相，而家泊咗室外地方就可以補影返~

我原先計劃係經舊城區去 Stephanskirche，再行過去 Der Hohe Dom St. Martin zu Mainz 就返去攞車離開 Mainz~
不過冇目的咁行行吓舊城區就到咗 Der Hohe Dom St. Martin zu Mainz，以我做功課時嘅記錄，係冇咁早開，但見而家開咗就入去參觀咗先~
不過入到去見到做緊彌撒，咁都係離開，唔好阻住人~
行行吓就行到 Stephanskirche，參觀完就諗住搵嘢食，唔再返去 Der Hohe Dom St. Martin zu Mainz，因為內部其實冇咩特別，係外觀幾靚，但外觀都參觀過了~
但係搵嘢食嘅時候，又經過 Der Hohe Dom St. Martin zu Mainz，既然係咁，就入去參觀吓~

舊城區隨影~