《瞬間看地球》Stranger's Blog

今日行程：
ULM (烏姆)、Füssen (富森)

ULM (烏姆)
Ulmer Münster (烏姆大教堂)
Ulmer Rathaus (市政府)
Stadtbibliothek Ulm (烏姆公共圖書館)
Fischerviertel (漁人小區)
Schiefes Haus
Ulmer Stadtmauer (城牆)
Donau (多瑙河)

Füssen (富森)
Kloster Sankt Mang (聖曼修道院)
Hohes Schloss (高地城堡)
Heilig-Geist Spitalkirche (聖靈醫院教堂)
Reichenstraße (富人街)

離開 Stuttgart (斯圖加特)，揸車過去 ULM (烏姆)，經過油站，買咗兩個牛角包做早餐~

今日第一站係 Ulmer Münster (烏姆大教堂)
Ulmer Münster 據說係全世界最高教堂，但其實西班牙嘅 Sagrada Família (聖家教堂)仲高過佢，不過佢可能係以人可以上到嘅塔頂嚟計~~

過去 ULM 嘅時候非常多車，行吓停吓咁，睇返時間，原來撞啱返工時間，唔怪得啦~

去到原定 ULM 嘅停車位置，發覺幾唔方便，同想去嘅地方有啲遠，決定駛近啲想去嘅地方，喺附兜吓再決定~
去到附近搵到啲一小時錶位，唔得啦，逐個鐘返嚟入錶搞唔掂，絕對唔會考慮~
之後又搵到錶位，係兩小時嘅錶位，猶豫咗陣，殺啦~

喺 ULM 呢度，明顯凍過前幾日，唔清楚係地理問題定係今日凍咗~

行過大教堂時隨影~

Ulmer Münster 側面~

行行吓就到教堂入口，咁就入咗去先，之後先去返正門望吓~

用積木砌成嘅大教堂模型~

跟住就行上塔~

好快就到中層，原來大教堂前面有個廣場有個市集~


通道僅夠一個人行過~


再上高啲~

呢度有一個非常小型嘅博物館，不過真係冇咩睇，係有十幾二十張掛畫，都係其他地方啲教堂嘅高度~

之後原來仲有得上~

呢度就真係夠晒高！

綠色多瑙河......


呢間係 Stadtbibliothek Ulm (烏姆公共圖書館)~


嚟到正門想影個全相都唔係咁容易，位置有限，唔行得太後，設備有限，影唔到太多，盡影都總算影到~


頭先就係上咗上面呢度睇風景~


正門入口~


之後想去洗手間，有兩個男人路過見到我哋好努力咁摷散銀，於是同我哋講，太散唔得，仲教我哋去唱錢機用紙幣唱面額大啲嘅硬幣~


跟住就搵地方食嘢~


叫完嘢食，差唔多要續錶，屎塔話佢去續，主要係因為佢覺得佢方向感比我好，好有信心唔會行錯路，咁我都同意嘅~

嘢食到咗一陣屎塔就返嚟，時間啱啱好~

Pork Pepper Escalope
with creamy pepper sauce and croquettes
好香嘅胡椒味，塊扒亦好食，炸薯仔手指都好食，德國嘅薯仔一般都相當不錯~

Chief Escalope
with cheesenoodles and roasted onions
塊扒好食，啲芝士麵條都唔錯~



 

下一站係 Ulmer Rathaus (市政府)
純粹參觀吓外觀~

下一站係 Stadtbibliothek Ulm (烏姆公共圖書館)
就喺 Ulmer Rathaus 隔籬~

附近有間咁嘅屋，幾得意~


 

下一站係 Fischerviertel (漁人小區)
呢個區，範圍由邊度去到邊，唔知，都係周圍行吓~
呢個漁人小區幾靜，喺到散吓步真係相當寫意~

行吓行吓就嚟到 Schiefes Haus~
呢間屋據說係因為地基受到溪水侵蝕而傾斜，但房子結溝並沒有受到影響，所以可以保存至今~
又據說係全球最斜房子，並已列入健力士紀錄大全~

而家仲改建成酒店添~


喺 Schiefes Haus 呢度發生咗件小事~
喺我哋參觀緊 Schiefes Haus 嘅時候，有個好高大嘅女人，一定過二百磅，衝埋嚟撞開屎塔，屎塔被撞後再撞向我~
我被屎塔撞嗰吓，有晒心理準備都企唔穩，向後褪咗兩步，可以想像到個女人撞埋屎塔度個度力係好大~
屎塔就冇乜事，只係覺得個女人好離譜，做乜咁大地方又冇乜人都可以咁樣撞埋嚟~
其後個女人直衝咗入間舖，我都跟住想入去同佢理論吓，點知佢一入舖頭就俾人趕返出嚟，睇個款，佢應該係常客，並且可能精神有啲問題~
如果佢真係精神有問題，都係少惹為妙......
坐喺舖外面，一位嘆緊咖啡嘅大叔，氣定神閒，佢望住我，用右手嘅食指，指住自己太陽穴打圈~
我領會到嘅意思當然係話嗰個女人精神有問題啦，原來呢個手勢係國際手勢嚟，哈哈，一件令人憤怒嘅事，最終以有趣結尾~

下一站係 Ulmer Stadtmauer (城牆) 及 Donau (多瑙河)
行行吓就到咗城牆上面~

下面就係 Donauwiese Ulm (州立公園)~


喺城牆上面，我同好多人都一樣，左望望右望望，係咁裝吓裝吓，其實大家都搵緊邊度可以落到下面......
原來要行到百幾二百米外嘅 Metzgerturm (屠夫塔)先有得落~


喺下面望返上去都幾靚~

對開就係 Donau (多瑙河)，綠色多瑙河......

行行吓有個單車人停咗喺我哋隔籬，問我哋係唔係中國人，跟住就係咁同我哋講國語，又話非常開心可以喺度遇到中國人~
跟住又送咗啲傳單同書仔俾我哋，都係中文嚟，原來佢係傳教嘅，仲邀請我哋過幾日去佢哋嘅集會~
其實......莫講話我哋轉頭就離開 ULM，就算我哋過幾日仲喺 ULM 都唔會去......

行夠就返去攞車，再揸車過 Füssen (富森)~
Füssen 位置非常近 Austria，而在 Austria 高速公路上行駛係需要購買 Vignette (高速公路路費)並貼於檔風玻璃上才算合法~
為免喺誤進 Austria 但又冇 Vignette 嘅狀態下被檢控，行到一半路程，就去油站買 Vignette，再貼返喺檔風玻璃度，咁就可以安心上路了~
我買嘅係 10 日 Vignette，下圖就係 Vignette，下面嗰行數字係月份，今日係 9 月 21 日，所以 9 月同 21 號都被貼上標貼，再計返十日內有效~


去到 Füssen，我先去酒店 check-in，為嘅係泊低部車先，再行去我今日想去嘅地方~

下一站係 Kloster Sankt Mang (聖曼修道院)
由酒店行去 Kloster Sankt Mang 都要三四個字，而且呢度仲凍過 ULM，不過沿途風景優美，好值得慢慢行吓~

Kloster Sankt Mang (聖曼修道院)
有啲係畫上去嘅圖案嚟，遠睇以為係建築嘅一部份~

下一站係 Hohes Schloss (高地城堡)
Hohes Schloss 呢度，畫上去嘅圖案更豐富，直情可以以假亂真，好正！

下一站係 Heilig-Geist Spitalkirche (聖靈醫院教堂)
純粹參觀外觀，好似係不開放的~


 

下一站係 Reichenstraße (富人街)
Reichenstraße 係呢度比較熱鬧嘅街道，順便睇吓食咩~

喺 Reichenstraße 發生咗件小事~
有個送貨嘅人，疊高咗嘅貨正在倒下，我即刻上前幫佢扶住~
跟住嘅發展，真係出乎我意料之外！
嗰個送貨嘅人，拎走咗最頂嗰件貨行開咗，乜嘢都冇講，只剩下我一個扶住啲貨......
主要係乜嘢都冇講......好似我同佢係拍檔咁......
我扶咗成分鐘先見佢返嚟，跟住佢示意我同佢一齊推部車仔入前面嗰條巷......
我見前面條巷其實好開揚，亦唔需要走到好入，我覺得冇咩危險，咁就幫人幫到底啦~
前面成個過程係一句唔該都冇，到最後到達目的地佢先微笑講咗句唔該，算你啦~

行完 Reichenstraße，再行咗出大街~

立體畫？


最後都係走返入 Reichenstraße 求其食~


Potato Soup with Bred-croutons
湯幾好~


Small Mixed Salad
沙律，都係咁啦~


Noodles with Salmon, Olive, Cherry Tomato
意粉麻麻地......


Grilled Sausage with French Fries
條腸幾好食！薯條係一貫嘅好食！


食完嘢就行返酒店~