今日主要景點:
Paris
Sacré Coeur (聖心堂)
Conciergerie (古監獄)
Sainte-Chapelle (聖禮拜堂)
Notre-Dame (聖母院)
今日早餐係食呢啲蛋糕仔,噚晚喺超市買嘅,蛋糕本身蛋嘅香味唔夠重,個底係一整塊朱古力,好甜,勉強可以啦~
今日第一站係 Sacré Coeur (聖心堂)
做功課時,關於 Sacré Coeur,最被熱烈討論嘅係手繩黨,我特意安排早一點到達,希望手繩黨人數少啲~
由酒店去 Sacré Coeur,搭 metro 就可以~
出咗 metro,要向上山方向行,經過一條窄街,時間尚早,冇咩人~
過咗條窄街就會見到 Sacré Coeur~
由呢度上 Sacré Coeur,可以搭纜車、可以步行~
但其實 Sacré Coeur 唔係真係好高,咁都整部纜車,可能原意係方便老弱人士吧~
要避開手繩黨,搭纜車係其中一種方法,唔想俾錢,可以走去纜車左邊,有條樓梯可以直上到去 Sacré Coeur~
經呢兩個方法一樣會遇到手繩黨,不過由於條路比較闊嘅關係,要避開佢哋係非常容易~
不過,我揀咗由正面行上去,除咗因為我想由正面上去之外,仲因為我見唔係好多手繩黨,相信冇咩問題~
樓梯分兩邊,頂部分別都有兩個手繩黨擋路,我哋從右邊行上去,我哋都有晒心理準備,唔可以俾佢套到條繩落手度~
臨近行到埋去,我哋行路嘅左邊,我做單擋,屎塔好合拍咁從我左邊閃過,而我就走唔甩,俾手繩黨擋個正著,無路可走~
佢同我講嘢,不過我完全冇聽到,我作勢向右邊閃,佢即時作出反應向佢嘅左邊欄路,唔俾我走~
我作勢閃右其實係假身,見佢封我位我即刻向左閃,成功越過佢,佢身邊嘅同黨仲指住佢嚟笑~ =P
其實我覺得佢哋都冇咩惡意,只係想氹到人買佢條手繩而已~
過咗呢兩個人,一路上都見唔到有手繩黨~
據說 Sacré Coeur 位於 Paris 市內的最高點,喺呢度可以俯瞰 Paris 南邊嘅景色~
唔......其實景色冇咩特別......
諗住先上教堂頂,去到見到話 0900 先開,售票處就 0930 先開,即係話,0900~0930 呢段時間,只可以喺售票機度買飛~
不過部機只接受信用卡,反正而家又未夠 0900,所以就去參觀教堂先~
教堂內部係禁止攝影的,所以冇相可貼了~
參觀完教堂,再去返上教堂頂嘅售票處,而家係 0930,售票處未見有人,只好繼續等~
原本冇諗住參觀地下室,不過我哋見加多 EUR2 就可以參觀埋,所以就打算兩邊都去晒~
等咗 10 分鐘,覺得唔係好對路,於是我走入去堂搵個人問吓~
佢同我講 0950 就會有人,咁我又走返去等,等到 0945 就有人出現,不過佢喺個位度搞咗 5 分鐘,真係 0950 先買到飛~
我哋選擇落地下室先,貪佢一開門仲未有遊人~
下一站係 Place du Tertre (畫家廣場)
由教堂行過去,只係幾分鐘步程~
顧名思義,呢個廣場,聚滿畫家~
個廣場好細好細,約有數十名畫家喺度擺檔,遊人都幾多,現場幾熱鬧~
可能對有啲人嚟講,佢哋未必算係高手,但對於我哋嚟講,個個都係高手~
現場有部小火車~
離開廣場落返山腳,我哋取道纜車旁嘅樓梯落,費事同果班手繩黨打交道~
經過今朝果條窄街,啲舖頭當然已經開晒~
我哋都有走入啲舖頭度睇吓嘢,買吓手信,睇咗幾間,間間都差唔多,睇夠諗住走人,唉,又落雨,仲要幾大吓~
唯有走入啲舖頭度繼續睇~
睇多兩間,佢又停咗喇喎,好彩只係過雲雨,希望唔好再落啦~
行行吓,見到有間舖頭有 Macaroon 賣~
記得喺香港食過嘅 Macaroon,冇咩杏仁味,得個甜味,覺得唔好食,咁當然,可能只係我食埋啲低質素嘅先係咁啦~
最後買咗一盒嚟試吓,承惠 EUR7
舖頭門口有座朱古力鐵塔~
下一站係 Pont Neuf (新橋)
呢條橋係 River Seine 上最古舊嘅橋,有超過四百年歷史,但就偏偏叫做新橋~
由 Sacré Coeur 呢頭去 Pont Neuf,我揀咗搭巴士,因為搭 metro 反而唔方便,又要轉車又兜遠路~
中途見到有電動車叉緊電,唔知市內係咪好多地方都有,如果係都幾正!
行到去巴士站,有兩個人企喺個巴士站牌度,隱約聽到佢話仲有半小時先有車,去食嘢先咁話~
冇理由咖喎!我查過啲車都 OK 密先選擇搭巴士,要等半個鐘我冇可能咁揀~
佢哋講完就行咗去,我好心急即刻上前睇吓個牌講咩,上面 min 果度寫住個 5 字,我會理解為 5 分鐘後有車~
而佢哋覺得要等半小時,可能以為 05 分先有車,因為而家係 35 分......
呢個巴士站牌真係正,有晒地圖顯示成條巴士線點行,好容易就知道邊個站落最適合自己,另外仲可以知道下兩班車仲有幾耐到,雖然都唔係咩新鮮事,但至少香港冇嘛,不過香港咁多高樓大廈,啲 GPS 邊有咁準確吖~
超準時,真係 5 分鐘有車!
搭 Paris 市內嘅巴士,用 ticket t+ 就得,上咗車要打飛~
我哋喺車上面開咗盒 Macaroon 嚟食,感覺同香港嘅好唔同,有好明顯嘅杏仁味,不過比香港嘅更甜,七種味入面,我自己覺得蛋味最好食~
雖然巴士上面有報站系統,不過我發現啲站報錯咗,可能個司機撳慢咗,不過都唔緊要,就算落錯站都冇所謂,去到附近就得啦~
落咗車,巴士站附近嘅環境~
下一站 Conciergerie (古監獄)
行過 Pont Neuf 步行入 Île de la Cité (西堤島),好容易就搵到 Conciergerie~
Pass 包埋,唔需要再購票~
當年 Marie Antoinette 被囚禁嘅情況,全時間有守衛看守~
下一站係 Palais de Justice (最高法院)
其實都冇咩話想睇啲咩,反正嚟開呢頭,就去望兩眼~
行經見到個入口,不過只係俾職員進入,公眾人士就要去左邊入口~
跟住指示向左行,見到另一個入口,諗住入去啦,有個著住制服嘅人截住我哋,問我哋去邊~
佢似係講英文,但真係聽唔明佢講咩,又指返我哋過右邊~
我哋來回睇咗三次,兩個入口中間仲有兩個通道,不過係俾車行,一出一入,我真係唔覺得係可以俾人就咁行入去~
明明頭先果個就係,我哋又走返過去,又有人問我哋去邊,今次溝通到喇,原來佢想問我哋係咪去 Sainte-Chapelle (聖禮拜堂),如果係就排錯隊~
當佢知道我哋係想去 Palais de Justice,就俾我哋過~
入 Palais de Justice 係免費嘅,不過就要做咗安檢先可以入去~
隔離就係 Sainte-Chapelle (聖禮拜堂),好多人排緊隊~
隊尾有個牌,就走埋去睇吓個牌講咩,原來 1430 先開,有 pass 都一樣要排隊,因為要做安檢~
仲有一個鐘,我決定去食飯先~
見到斜對面有間普通嘢,是是旦旦就走咗入去~
諗住坐低先睇吓食咩,點知俾人叫返出嚟!雖然佢又唔係好惡,但就唔多友善咁~
佢話要買咗嘢食先可以坐入去,原來係我哋唔識規距,真係唔好意思~
求其揀咗啲嘢食就坐低,間嘢勁細,通道又窄,有人出入我都要郁身借開俾人過~
其實叫嘢食嘅時候唔知叫嘅係咩,食落都一樣唔知係咩,好似飲油咁,一口都係油,勁肥膩,但食物本身係冇乜味,好難食!
下一站係 Sainte-Chapelle (聖禮拜堂)
食完嘢行返去 Sainte-Chapelle 排隊,未夠 1430,條隊就梗係長過之前,而且仲長好多添~
排排吓又落雨,現場冇遮冇擋,又唔係好大雨,費事著雨衣,死頂啦~
反正藍天白雲,可能只係過雲雨嚟姐~
算係好彩啦,落咗一陣就停~
不過,停咗一陣又落呢!真係煩死人!
呢一次唔講得笑囉,成個天黑晒,越落越大~
不過我哋遇到個好人,前面個伯伯示意我哋兩個行前啲,遮埋我哋~
一把普通嘅遮遮三個人,咪盞三個都濕~
喺呢段三個人嘅關係入面,我選擇退出~ XDDD
嗱嗱聲著返件雨衣先~
個伯伯開始同我哋傾偈,咁佢主要梗係同屎塔傾啦,方便啲嘛~
佢話佢來自美國,老婆同個女去咗 shopping,佢冇咩興趣,所以就自己一個走嚟排隊~
當然都問吓我哋來自邊度,又去咗邊度玩咁啦~
雨就時大時細,等咗一個鐘有多,終於都入到去~
下一站係 Notre-Dame (聖母院)
步行去 Notre-Dame 時經過一處地方,唔知咩嚟嘅呢~
嚟到見到排晒長龍,唔理咁多,排咗先算~
一路排隊,一路影吓相咁~
其間有位好似神父嘅人,非常友善咁問:Chinese?
我話係之後佢就向我遞上兩張紙,上面係介紹院內歷史最悠久嘅部份,在十四世紀完成,就係身後嘅雕塑:耶穌復活記
離開時,近出口擠得水洩不通,原來外邊正下著大雨,我哋擠到出口就企埋一邊,希望等一陣就可以等到停雨~
由於個天光光哋,我推斷唔會落好耐,結果等咗十分鐘到就停咗雨~
出咗門口,問咗保安,知道邊度係排隊上教堂頂嘅地方就即刻走過去~
去到先知用 pass 一樣要排隊,好彩條龍唔係好長,不過去到龍尾有個職員向我哋耍手又話 no,原來已經截咗龍~
呢一吓真係幾錯愕,而家五點鐘都未夠,條龍又唔係好長,上教堂頂係閂 1830,我真係冇諗過咁早就截龍!
我淨知截咗龍有 pass 都未必有用,但係問吓又冇蝕抵嘅,梗係問吓~
我問佢係咪有 pass 都冇用?
意料之內嘅答案,NO!
就喺呢一刻,發生咗一件意料之外嘅事情~
排龍尾嘅係一對亞洲面孔嘅男女,個女嘅聽到我問係咪有 pass 都冇用,佢竟然以取笑嘅態度竊笑!我真係深感被羞辱!
呢個女仔,從佢嘅衣著同臉孔,我覺得佢似係香港人~
將心比心,如果我係排緊隊尾嘅見到咁嘅情況,我個心只會係同情!
係,有 pass 唔係大晒,但有啲嘢就係唔問唔知,我只係動用我能夠動用嘅工具、機會去爭取,有需要被恥笑嗎?
呢一刻我真係好嬲,我顧不得甚麼是男士風度,我同佢距離不足兩米,我半轉身擰頭用很不禮貌嘅表情望住佢,佢見狀即刻止住佢嘅恥笑,低下頭,五秒都不敢望我!
係,我足足惡意地瞪著她有五秒之久,希望她能汲取教訓,不要再這樣取笑別人~
今晚返酒店度一度睇吓仲有冇機會再嚟~
離開時經過 Notre-Dame 嘅側面~
跟住就去 Île Saint-Louis (聖路易島) 行吓,經過條橋,今次啲鎖比噚日見到嘅仲要密同大~
Île Saint-Louis,好普通嘅一個島仔,冇咩特別,一路行一路行,見到間教堂,梗係入去睇吓啦~
呢間教堂個名真係勁,叫做 House of God~
繼續行,一路行到尾都冇咩嘢睇,時間尚早,可以去吓啲後備景點~
下一站係 Église Saint-Eustache (教堂)
去呢間教堂,冇咩特別原因,純純因為個人喜好,同埋對開有個廣場,可以行吓休息吓,搭 metro 過去便可~
由 Île Saint-Louis 經過一條橋便可到對岸河邊,不過當我行完一條橋時,仲未到岸邊,仲有一段橋要行~
奇嘞,明明行一段就到咖喎,點解要行兩段嘅?
原來我一路都行錯路,離開咗 Notre-Dame,過咗一條橋以為已經去到 Île Saint-Louis,點知其實去咗另一邊嘅對岸......
而家過返一段橋,就真係到咗 Île Saint-Louis,不過算啦,我其實都知道 Île Saint-Louis 冇咩行嘅,所以唔打算行返轉頭去為行而行~
去到教堂,發現對開廣場封咗~
原本個樣就係咁嘅~
註:圖片來自 Google Maps
而家修建中~
修建後嘅預想圖~
Église Saint-Eustache
喺教堂嘅一角,見到一啲同教堂格格不入嘅活動~
有幾個人喺教堂內織咗啲繩陣,跟住各有各咁喺上面各自活動,時而轉身,時而靜止,亦會互換位置~
我哋當然唔知佢哋做緊咩,見到有 poster,影低佢,諗住問吓今晚一齊食飯嘅朋友~
之前仲喺瑞士嘅時候,屎塔有個舊同事經 facebook 得知佢喺瑞士,個舊同事話佢而家住喺 Paris,知道屎塔都會去 Paris,所以就約埋一齊食飯~
我哋約咗喺 Hôtel de Ville (巴黎市政廳) 等~
Hôtel de Ville 係我喺 Paris 其中一個想到嘅地方,所以就掉咗今日嚟~
離開 Église Saint-Eustache,我刻意取道經 Centre Georges Pompidou (龐畢度中心) 步行至 Hôtel de Ville~
我手上嘅 Museum Pass 係包埋入 Centre Georges Pompidou 嘅,不過今次喺 Paris 嘅旅程應該冇時間參觀,但係我對佢嘅外表都幾有興趣,所以就兜一兜過嚟睇吓~
嚟到影完相就坐低等電話,等咗一陣收到電話,阿朋友而家先收工,估計要一個鐘後先到~
我呢個咁貪心嘅人,見有一個鐘頭時間,即刻揭開地圖,睇吓有冇邊啲後備景點可以去吓~
我揀咗 Place des Vosges (國王(皇家)廣場)
由呢度去 Place des Vosges,普通步速可能要行 15~20 分鐘,所以我哋都急急步咁行過去~
影完相又行返過去 Hôtel de Ville,朋友仲未到,我就喺度計劃好聽日可以再去 Sacré Coeur,上教堂頂~
等咗一陣就見到個朋友,佢話佢食過一間餐廳喺附近嘅,都 OK,我哋就跟住佢行~
不過嚟睇佢都唔係好熟呢頭,不停睇 Google Maps,都搵咗有 15 分鐘到~
呢間嘢叫 OZO
掛住傾偈,都冇記低叫過啲咩~
第一幅相,左上角果兩兜,食完都唔知咩嚟~
兩碟主菜就冇咩特別,普普通通咁~
其間我哋都有拎返張教堂相出嚟問個朋友,啲人喺啲繩上面其實係有咩意思~
朋友睇完張 poster 話,佢都唔知,佢仲話 Paris 好多行為藝術其實都唔知做咩嘅~
呢間嘢當晚非常多人,等人俾 menu,等人落單,等人上菜,等人埋單,全部都要等,坐低咗個幾鐘先有嘢食~
結果由坐低到離開用咗兩個半鐘,離開時已經超過夜晚十一點~
天又黑,又落緊雨,已經比平時難搵路,朋友都話佢唔係好熟呢頭,結果又係搵咗好耐先搵到 metro 站~
不過就去咗隔離站,本來唔駛轉車就可以搭到返酒店,而家就要轉車喇~
我哋當然唔會怪佢啦,反而好多謝佢帶我哋去啲我哋根本唔會去嘅地方~
雖然已經好夜,但我都唔覺得治安有變差嘅情況,不過我當然都會小心為上,拖實屎塔,留意身邊嘅每一個人~
返到酒店,我哋用最快嘅速度,處理好要處理嘅嘢就即刻瞓覺~
留言列表