今日行程：
Day 03：北海道廳舊本廳舍 → 札幌市時計台 → 札幌電視塔 → 大通公園 → 豐田租車 → JR 小樽站 → 小樽運河工藝館 → 海鳴樓 → 小樽運河 → 日本銀行小樽支店 → 旭壽司 → 小樽石之藏 → 小樽浪漫館 → 北のアイスクリーム屋さん → 手宮線會場 → 小樽運河 → Rainbow Cruiser
經過頭兩日嘅體驗，我對我倆所做嘅功課，已經充滿信心。
今日 0630 就要起身，早餐係食最普通嘅 buffet 早餐，當中不乏日式食品。
如果唔係肚餓，真係難以提起食慾......
好彩嘅係，有新鮮嘅三文魚子，一粒一粒咁放入口，好好味。
早餐過後，落到酒店大堂，見到窗外有個叮噹公仔，但變咗雪人。
跟住走到街上，做咗一件相信好多人見到積雪都會做過一次嘅無聊事......
跟住我哋就搭地鐵往 JR 札幌站，主要係去買 Sapporo Romantic Passport。
去到 Ticket Office 問一問，果位小姐完全表達唔到佢想講嘅嘢，佢唯有去第二部電腦，print 咗一份資料，話俾我知，唔係喺佢度買，要去第二度買，佢手指指咁，我都唔難為佢嘞，扮晒明咁離開咗。
再過第二度寫住旅客唔知乜鬼咁嘅地方再問，又唔係喺佢哋度買，不過呢位小姐就比較能夠表達到可以去邊度買，我哋就根據佢所講嘅方向去搵。
最後都搵得到，發現原來 JR 札幌站都幾大吓......
買到喇！
用處有三：
1. 上藻岩山睇夜景要搭吊車，來回車費為 1100 日元
2. 有個商場叫 Norbesa，頂樓有座摩天輪，名叫 Noria，乘坐費為 600 日元
3. 札幌市電車一日車票，由於當地冇出售淨電車一日票(只有淨地鐵或地鐵+電車一日票)，所以冇原價。(電車費為均一價每程 170 日元)
買呢個 passport 只需 1500 日元一個，淨係 1+2 都 1700 日元，所以絕對有著數！
1+2 可以三個月內有效，而 3 則要指定日期，我哋遊札幌主要喺 20/2，所以電車票只在 20/2 有效。
買完 passport，跟住就遊覽吓附近有特式及出名嘅建築物。
一出 JR 站就根據地圖搵第一個景點，點解搵嚟搵去，地圖同實景都唔同嘅？ @@
原來我出錯咗出口，應該出南面，我出咗北面~=P
咁我哋就行返轉頭啦，終於搵到第一個想到嘅地方，北海道廳舊本廳舍。其實冇乜點解要去，只係叫做到此一遊，親眼見過咁嗟。
我哋都冇入到去，因為實在冇咁多時間，亦唔覺得有咩咁吸引入去了解佢嘅歷史。(往後都有類似只為到此一遊，影吓相嘅景點。)
跟住就去札幌市時計台、札幌電視塔、大通公園。
每年札幌市嘅雪祭都會喺大通公園舉行，一座座冰雕都會放喺呢個長達 1.5 公里嘅公園，夜晚加埋燈光效果尤其吸引。
其實出發前我哋都知道剛剛過咗雪祭嘅日子，但仍抱住未必即時拆毀嘅心態去睇睇，點知，莫講話冰雕，啲雪多到就連行嘅路都冇，一座一座嘅雪山堆滿公園，我哋都只係踏足一吓，叫做嚟過就算。
跟住落嚟，就要向豐田租車公司進發！好緊張，實在唔知自己可唔可以應付得嚟......
陌生嘅環境、陌生嘅 GPS、陌生嘅路面、陌生嘅汽車......
要一次過面對，真係一個好大嘅挑戰！不過我深信，只要揸慢少少(當然唔能夠太慢)，應該冇咩問題！
我哋要由大通公園步行至電車すすきの站，乘搭電車到山鼻9条站落車，再行過去豐田。
到咗豐田，見到門口有部 Vitz，我哋都喺度諗，會唔會就係呢部呢？因為我哋 Book 咗 1100，去到嘅時候係 1110。
入到去，只需出示早前喺網上預約租車嘅收據就得。
果位小姐不停咁同我講日文，其實佢都知我唔識聽，但佢都好不自覺係咁講......
佢可以話完全唔識英文嘅，最後出示幾張以日英對照嘅文件，講解一吓保險嘅嘢同發生意外時應該點做，更重要嘅係，遲咗交車點計法。
好嘞，跟住就俾咗一疊嘢我，我都冇咩點睇係乜，淨係知有地圖同 GPS 嘅使用方法。
佢揭開札幌市地圖，話我哋知佢哋間舖喺地圖邊個位置，跟住又揭開北海道嘅地圖，話我哋知札幌市喺邊度，認真細心。
我哋乘機問佢小樽喺邊(因為我哋只係揸車到小樽及回程札幌)，佢又指咗俾我哋睇，跟手仲拎咗一份小樽嘅旅遊資料俾我哋，服務好好！
跟住就要俾錢，我用信用卡嘅。
一如所料，門口部車就係預備好俾我哋嘅。好嘞，仲爭一環就可以開車，就係睇吓車身有冇花，主要係佢睇，我再補充，我睇得好仔細，佢都好好耐性咁喺張紙上點出嚟，服務態度真係冇得頂！
好嘞，坐上車，果位服務員等我哋開車走，我估佢係等我哋開車嘅時候，好有禮貌咁同我哋講拜拜，但係我哋研究緊個 GPS 點用，同埋我哋都要輸入咗資料先可以開車......
佢等咗一陣就冇等~XDDD
GPS 嘅易用程度絕對喺我意料之外，勁易用又勁好用！
我早已準備好要去嘅地方嘅電話號碼，但係，我第一站要到嘅係 JR 小樽站，冇電話嘅，點好呢？
嘿嘿，原來佢可以以 JR、地鐵或者係電車站咁搵嘅，我哋就以 JR 站搵，但係佢要以乜乜線咁搵嘅(即係觀塘線定荃灣線咁，咁 JR 嘅線梗係複雜好多啦@@)，最後撞撞吓就搵到小樽站！
好！要開車喇！一開車就跟住個 GPS 行，真係好正！完全唔駛顧慮唔識路嘅問題！
一般繁忙嘅街道都冇乜積雪，所以開頭都唔係好擔心。但由於路旁堆滿積雪，令到一啲路口明明係來回線，我都唔係好敢轉入去。因為睇落完全唔似係來回線，以為得一條線並且係唔可以進入嘅，但基於我相信 GPS，我就以一個探路嘅速度扭入去(當然我衡量過當時環境係安全嘅)，哈，原來真係來回線，我對 GPS 嘅信心又加強咗！
跟住入咗一條橫街，滿地都係雪(但只係好薄)，前方又一架車都冇，我就試一試大力踩 brake 嘅感覺，都唔係咁難停姐，初步掌握到雪地駕駛嘅感覺係點嘅。
好嘞，GPS 首次令我出現誤會！
我哋發現 GPS 嘅 signal 係有啲 delay 嘅。有兩盞好近嘅燈位，第二盞燈位後要轉左，點知我哋到咗第二盞燈位後，GPS 嘅 signal 仲喺第一盞燈位，結果我哋過咗第二盞燈都冇轉到......
跟住 GPS 就再重新俾過一條路我哋，但係佢要我喺距離一米到嘅街坊彎轉右，根本冇可能，路面環境唔許可俾我重煞或急速扭軚，我哋只好繼續直去，等佢再俾過條新路我哋。當然，好快就有新路行。
GPS 帶我哋行返對頭線入返本來錯過咗嘅入口。
GPS 指示我哋過咗個燈位就要右轉，轉超過 120 度，領航員指示我，過咗呢個燈位就即刻轉右，我知道我要把握呢次機會，轉好呢個彎！
好，嚟喇，去到燈位係綠燈，就連俾我停低準備嘅機會都冇，成地都係間斷咁有雪，冇雪嘅地方都係濕嘅，我要喺呢個急彎中不斷踏進雪同水，死就死啦！
咦！大鑊！點解係對頭線嚟咖！！！屎塔係咁嗌：「喂喂喂！」最後好彩冇事！真係好好彩，完全冇車，否則後果不堪設想！@@
但係點解會咁呢？原來係咁嘅......
我的確係要右轉，但係我條線係喺一個大柱躉之後嘅右轉，呢個大柱躉距離燈位起碼有足足三十米！！！唔熟路嘅，真係好易轉錯......
好嘞，我哋就喺對頭線 U-turn，當然，我哋已經成為附近停緊燈位啲人嘅焦點......
U-turn 後就可以出返大路再轉入兩次錯過咗嘅路口。
終於去到呢個好難搞嘅入口，呢個入口係上札樽道，係連接札幌至小樽嘅高速公路。
上到高速公路，兩旁都堆滿積雪，但路面就係冇雪嘅，自然可以行車速上限 80km/h。
其實日本人揸車都係慣性超速嘅......
行咗好一段時間，終於到收費亭，個職員問我由邊度嚟同埋去邊，跟住就話我知幾錢，成惠 800 日元！
問吓就得，真係可以咁信任人咩？@@
離開咗高速公路，一路行，終於都到達 JR 小樽站，車程在一小時之內，我都唔知泊邊好，周圍都唔似有位俾人泊嘅......
跟住我見到站嘅正前方有部車泊咗喺度，我梗係照跟啦！
泊車位左面有個牌，寫住警察唔知乜鬼咁嘅，初時我都有啲擔心，但見人哋又係咁泊，同埋我同屎塔是但一個會留喺車，再加上我哋係遊客(大X晒咩！XDDD)，我相信唔會有咩問題。
果個位有一堆雪嘅，但我諗冇問題嘅，所以就泊咗上去，空波，手掣，放 brake。(呢個係我一向停車等人時嘅習慣)
點解部車向後行嘅？@@
原來雪下面係冰嚟，形成咗一個冰嘅斜台，儘管拉咗手掣一樣向後跣！我立刻踩 brake，部車就停咗，我留意後面冇車冇人，我再次放 brake，睇吓部車會跣到去邊先停。我放 brake 後部車都冇郁過，算係解決咗停車嘅問題。
屎塔首先落車走入去 JR 站，仲影咗相，跟住就到我入去睇吓，係就係無聊啲，但係到過小樽又點可以唔去 JR 站望一望喎！
下一站就係到小樽運河工藝館，我哋就將小樽運河工藝館嘅電話號碼輸入到 GPS，立即出現小樽運河工藝館字樣，確定後，可以出發！
好輕易就去到目的地，途中要注意嘅係，積雪通常會堆喺慢線，形成慢線只剩半條，但仍然會有車行，行中線嘅要稍為靠右少少讓少少位俾慢線嘅車。
去到目的地，有個停車場係無料(免費)嘅！正！
(出發前睇地圖同做資料搜集時，都知道會有停車場同埋係免費嘅。)但係，呢個免費停車場，只招待前來嘅顧客，並非公家地方免費任泊嘅，非法停泊會被移走。咁睇完呢間嘢點算好呢(最初以為可以長泊 ......)？唔理喇，睇完呢間嘢先算。
呢間嘢主要係賣玻璃製成品，分兩層，都唔算話有咩特別，就係大量玻璃製成品咁啦，有啲都幾靚嘅。
好嘞，睇完，下一個目標係海鳴樓。
因為海鳴樓喺小樽運河工藝館隔離，我哋就諗住偷雞睇埋海鳴樓先揸部車走，其實小樽運河工藝館嘅職員係唔會發現嘅，因為室內係完全睇唔到停車場，佢哋亦唔會知道部車係邊位顧客嘅，出入口完全開放，冇人睇冇飛攞嘅。
根據地圖嘅指示，就去搵海鳴樓，搵嚟搵去都搵唔到，我哋對本旅遊書開始產生懷疑......
唔通海鳴樓執咗？附近又冇乜人......
喺搜索嘅途中遇到一男一女，我哋走埋去問佢，原來佢哋都係香港人。哈哈~！
佢哋去海貓屋食咖喱。不過佢哋都幫唔到我哋......
算啦，搵唔到都冇法~
好嘞，部車點呢？我相信好多景點都設有私人免費停車場嘅，但好多景點都唔係距離好遠，下下都揸車去就好麻煩！再加上往後嘅景點，大部份都冇記低電話號碼(本身睇資料時以為可以長泊，咁就唔需要郁車，自然唔駛用 GPS)，睇地圖自己行仲惡搞......
我哋開始有啲邪惡嘅想法，嘿嘿，就係......
先前搵海鳴樓嘅時候到過一處有好多車泊低嘅小街，又唔係停車場喎，於是我哋就......
好嘞，搞掂部車，下一站到傳說中嘅小樽運河。
途中見到有免費足湯，即係腳部溫泉，去到時，見到有兩個外藉人仕浸手......@@
我哋都只係做樣影相，實際上就冇浸到。
跟住一路行，一路望地圖，抬頭一望，咦？海鳴樓？！盲樁樁又俾我哋搵到海鳴樓......
(原來旅遊書將兩個景點掉轉咗，所以搵錯晒......)
咁梗係入去先啦。
海鳴樓係造同賣音樂盒嘅。
其實成個小樽，主要都係出產玻璃製成品同音樂盒，周圍都係......
為咗體驗吓當地嘅特式，我哋揀咗部份去行吓~
海鳴樓都冇咩特別，到此一遊咁啦~
下一站真係到傳說中嘅小樽運河嘞！
運河景色優美，加上有雪嘅關係，構成一幅美麗嘅圖畫。附近有小樽運河食堂。
睇返相先知原來屎塔喺日本都有朋友，真係相識滿天下！XDDD
人力車當然係為遊客而設啦~
離開運河，我哋就行去日本銀行小樽支店。
途中見到個結咗冰嘅郵筒。
銀行都好去？因為呢幢樓有成 96 年歷史，更加係小樽地標之一，所以就走去睇吓。
影影吓，背後部車嘅司機由附近大廈走咗出嚟，主動幫我哋影相，真係熱心！
影完相，就係去食晏！呢餐犀利囉~
去旭壽司店！有咩咁巴閉呢？
「旭壽司是小樽市唯一擁有魚河岸仲買權的壽司店，因此每天都可買到最新鮮的海產。」(旅遊書係咁樣介紹嘅。)
食刺身同壽司，料本身嘅新鮮程度比師傅嘅刀功更為重要吧。
睇餐牌，見到有一張相但兩碗嘢(圖右邊兩碗)，問個職員(職員係一個態度絕對麻麻嘅嬸嬸......)，同佢指手畫腳一輪，理解到係二選其一，我哋揀咗飯，即係圖右上的那碗海膽、三文魚子同唔知乜子飯。跟住再叫咗一板壽司。
等咗一陣，終於有得食，咦？點解兩碗嘅？@@
原來我哋理解錯咗，一點就有兩碗，係唔駛揀嘅......
都唔緊要啦，食多啲囉~
啲料真係好新鮮，全部嘢都好好食！件吞拿魚腩真係入口即溶，海膽又好食，正！呢餐食咗六千幾蚊日元。
跟住就去小樽浪漫館同小樽石之藏。
小樽浪漫館就賣玻璃製成品嘅。
小樽石之藏就賣水晶石嘅。
但係跟住就唔可以按照個流程繼續去，因為出發前做資料搜集時預計當地四五點就開始天黑，點知，小樽浪漫館同小樽石之藏比預期早咗完成，天色亦比預期晏咗黑，所以就喺周圍再行多陣......
又見到一隻結咗冰嘅貓，哈哈！
入過嘅舖頭多數都唔記得名稱，只係有少部份旅遊書有提及過(本身冇打算去嘅)，包括：
小樽大正硝子館
岩永時計店
以上幾間嘢，都真係冇咩特別，間間玻璃製成品嘅店舖都係果啲嘢，只係設計上係唯一嘅，因為全人手造同由唔同人設計~
水晶石都係冇咩特別......
行咗一輪，又係食嘢時間，食咩呢？就係食雪糕！
有間嘢叫北こさなだエケゑ，雪糕姐，有咩咁特別？佢特別在有好多種味道選擇。
搵搵搵，搵咗好耐都搵唔到間嘢，問人又冇人知......
後來終於搵到，嘩，難搵到呢......
佢仲教埋行幾多步~XDDD
好鬼細間，個入口仲矮過我個人！@@
我哋都係揀咗較為多人揀嘅味道，一筒兩球，比起兩筒兩球化算，反正脆筒食少個冇所謂~
我哋揀嘅，一種係海膽味；另一種係烏賊味。
海膽味就真係有海膽嘅味道，但唔算濃，要刻意細味先食得出；而烏賊味，乜味都冇，只係得雪糕嘅口感。
時間上比預計嘅晏咗好多，但我哋 2000 一定要返到酒店，因為呢日晚餐由酒店提供，喺房食，2100 係最遲收嘢時間，所以要預早一個鐘到，令到餘下嘅行程好趕(餘下嘅行程全部要在夜間到訪嘅......)。
我哋諗咗幾個方案，決定先揸車去三公里外，一個大型商場叫 Wing Bay Otaru 內的一個摩天輪叫 Rainbow Cruiser。因為步行攞車及車程需時，希望到達時天色已黑，好讓我哋喺天黑時坐上摩天輪，個景算靚少少，同埋回程完成其他景點亦可喺天黑時進行。
泊咗咁多個鐘，有冇抄牌呢......
好彩冇事！=P
開車前，我哋將 Wing Bay Otaru 嘅電話號碼輸入 GPS，順利搵到目的地，開車~
天色雖然黑得遲，但黑得好快，開車後，發覺天色已近黑齊嘅地步，於是我哋將計劃再次改變。
先遊附近嘅小樽運河(早晚都去係因為景色有著好大嘅分別)，再到手宮線會場，之後先揸車去坐摩天輪。
揸車去到運河附近，發現運河附近街邊實在冇咩地方可以泊車，於是我哋決定泊停車場。
較早前因為四圍行嘅關係，間中都見到有露天收費停車場(300 日元一小時)，所以先知有呢類停車場。
一路行，點都行唔到去心目中嘅停車場，後來就入咗一個碼頭附近，入面好黑，冇咩燈，一路入，哈，入面泊咗好多車！我哋就泊埋一份。=P
跟住行返出運河，都幾遠，又靜又黑......
到咗運河，夜晚嘅景色真係同朝早好唔同，可惜我影相好屎，其實親眼睇就好靚嘅。當晚氣溫 1.2 度！@@
遊完運河，就去手宮線會場，據聞雪祭期間，會擺放好多雪燈 ，好靚嘅，都係抱住試一試嘅心態過去睇吓。點知，連入口都俾雪封咗，更加唔駛講有雪燈睇......@@
咁唯有返去攞車啦，都好好彩，冇抄牌！=P
憑住 GPS 嘅幫助，我哋好順利就到達咗 Wing Bay Otaru，上到去，完全冇咩指示嘅，只好問吓人。
問咗個男店員，佢直情叫我哋跟住佢行，佢帶我哋去！@@
好熱心咁喎，會唔會係溝通唔到先咁做呢？(以小人之心度君子之腹~=P)
一路坐一路驚，雙腳仲軟軟哋......
終於「捱」完，又急急腳咁開車返酒店，時間上總算 keep 得到。
去到酒店只係 1940，check-in 時，佢問我俾 credit card 定俾 cash！吓？香港 book 果時咪俾晒錢囉！好彩，佢 check 咗一陣就搞返清楚。
跟住有個上咗年紀嘅伯伯，全程用英語講解成間酒店嘅晚餐、早餐、私人同公眾溫泉嘅資料，勁！
房名叫......即係 Yanagi~
晚餐準時喺 2000 送到入房，係預期中唔合胃口嘅和式晚餐。喺度做洗碗真係洗到夠晒皮！ @@
係咁食係咁食，終於食完！由於酒店房內係冇浴室嘅 ，所以我同屎塔就輪流去公家地方沖涼~
我沖完返到入嚟已經收晒嘢，仲有兩杯雪糕添。到屎塔都沖完涼，我哋一齊食雪糕，嘩！！ ！勁好味呀！！！
跟住就係浸溫泉嘅時間，我去過一次韓國，同兩次日本(唔計今次)，但我都係未浸過溫泉嘅，今次係第一次。
浸完溫泉又買雪糕食，都好好食。
每日點滴：
今日有兩個日本人主動幫我哋影相，又問我哋由邊度嚟，一個喺街，一個喺酒店，好熱心。
喺日本、喺雪地揸車，好難忘，感覺好正！不過差啲出事......@@
小樽俾我嘅感覺好特別，好有特式，但係就真係冇咩好行，間間舖頭都差唔多，條街反而仲有吸引力~
第一次浸溫泉，感覺......有少少滑滑地，但總括都係似浸喺熱水而已，肉體感覺遠不吸精神感覺嚟得滿足同新鮮，好開心！
只可惜浸溫泉時冇落雪，因為個泉係露天嘅，我哋一直都好期待上面落緊雪，下面就浸緊溫泉，一定好得意！
今日仲未感受到落雪......
留言列表
