今日行程：
Day 05：登別 Marine Park Nixe → 伊達時代村 → 熊樂園 → 福庵 → 極樂通商店街 → 味之大王
今日嘅行程同原來嘅編排有少少出入，原本 1000~1300 係去海洋館，並且由於巴士班次非常奇怪並且非常疏落，所以跟住係要搭的士往伊達時代村，至 1600 先離開。
結果......
今日 0530 就要起身，咁早起身係因為要趕車，趕 0834 由札幌去登別班 JR 列車。
早餐 0700 開始，我要確保 0700 搞掂晒梳洗嘅事情，落到去食早餐。希望有機會 0800 就到 JR 站！咁早到當然係因為唔熟路同唔熟 JR 嘅月台環境，我哋係絕對唔可以錯過呢班車，否則成個行程都會嚴重受阻。
結果我哋都遲過 0700 落到去食早餐！因為大家都知道今早比較趕，所以都冇點細味個早餐。其實咪又係前日食過嘅早餐，同一間酒店嘛，就算唔趕，一樣唔能夠細味，有食慾放到落口都算係咁......
食完早餐都 0740，嗱嗱聲 check-out 搭地鐵過 JR 站。好彩日本 check-out 係好快嘅，否則就麻煩喇~
0805 就到 JR 站，時間上絕對鬆動，我哋搵到個月台，仲有大把時間，放心晒~
上到月台等車嘅時候，我哋都覺得今日明顯凍咗好多。
等車嘅時候，見到逆線果部車嘅車底全部都係半雪半冰嘅物體，我同屎塔講：你睇吓(我指住車底)，呢班車好可能喺登別果度嚟咖，可能登別落緊雪呀！
(其實我都唔知點解講到咁肯定班車係由登別嚟嘅~XDDD)
我哋期望遇到落雪之心又再出現！
札幌去登別，我哋選擇咗 0834 呢班車，預計 0940 就會到登別。
乘車劵為 2100 日元，再加特急劵為 2460 日元，總共係 4560 日元一個，好貴！
架列車嘅車名係：北斗6號特急列車
列車好早就到，我哋當然係上車先，坐咗喺車等開車嘅時候，屎塔叫我買支嘢飲，我離開車廂，見到出面落緊雪！天呀，又係有頂咖，點解要咁玩我？
返入車我就即刻話俾屎塔知落緊雪~
沿途都間中見到落雪，相信我哋今日親身遇到落雪嘅機會好大~ =D
0940 準時到達，落咗車，完全冇指示，我哋就靠估咁過對面嘅逆線月台，估計出入口就喺果邊。結果係冇估錯！
嘩！呢個 JR 登別站真係細得可憐，可能只有一千多呎！@@
我哋首先就將行李寄存喺 locker，因為今日我哋去玩完先返酒店。
搞掂就步行去 Marine Park Nixe，即係海洋館。
出咗 JR 站，如同進入仙境，進入眼簾嘅顏色，超過一半都係白色嘅，完全見唔到陸地，全部都係雪！真係好靚！札幌同小樽都冇咁靚！其實始終環境唔同，就算札幌同小樽都係鋪滿雪，都唔可以同登別比，始終登別係鄉村地方~
步行約五分鐘就到海洋館入口，1000 啱啱好到。呢個入口真係普通到呢......@@
入場就梗係要買飛啦，不過我哋唔止要買海洋館嘅飛，而係一次過買三個遊玩地方嘅飛，叫做 Theme Park Ticket。
Theme Park Ticket 分兩種，一種係包兩個地方，一種係包三個地方。
包兩個地方要 3000 日元一個。
包三個地方要 4300 日元一個。
包括：
1. 海洋館 (2300 日元一個)
2. 伊達時代村 (3500 日元一個)
3. 熊牧場 (2520 日元一個)
我嘅計劃係喺兩日裡面遊晒三個地方，此劵有效期為三日，所以我哋就買咗包三樣嘅 Theme Park Ticket 兩張。
入到去，經過有個湖面，好似係由流動緊去到結成冰咁。
我哋遊咗個主館先，一入去就見到個圓柱體水族館，老實講，同海洋公園完全冇得比！
一路行，一路都有好多海洋生物睇，其中我摸過海蔘同海星~
跟住我哋兩個都摸過魔鬼魚，啲魔鬼魚好似同我哋玩咁，特登走埋嚟，當接觸到佢嘅時候，佢嘅兩邊鰭就會係咁郁，好似好有性咁~
仲摸過一種史前生物：鱟(又名馬蹄蟹)
有人扮雞泡魚~XDDD
究竟啲魚仔係鯊魚嘅食糧定係朋友呢？@@
水母，又係同海洋公園冇得比！
睇完就行返出去，準備睇企鵝巡遊。1100 就會開始，喺中間個廣場度，劃咗一條路線，當然係欄住嘅，巡遊歷時大約十分鐘。
出到去，行咗一陣，點解有啲嘢飄吓飄吓咁嘅？咦？係咪雪嚟咖？又冇乜風喎，唔似係吹起咗嘅雪，仲越越密~
落雪呀！真係落雪呀！！！正呀，我哋終於都等到喇！我哋梗係好開心啦！之後間段都有落雪，一啲都唔嫌麻煩，好好玩~
不過溶雪就真係煩死喇，又濕又跣......
跟住就要霸定個好位睇企鵝，我哋揀咗個位都唔錯，可以望住企鵝行過嚟，企鵝亦會喺我哋身後個地方停留，會有工作人員講解關於企鵝嘅事情，呢個位可以稱得上黃金位置！
嚟喇嚟喇，一拐一拐咁，好得意，仲有隻跌低咗，佢哋又好嘢喎，唔駛扶淨係靠對腳已經可以企返起身！@@
睇完企鵝，分別睇過海豚同海獅，都冇咩特別。最後睇埋陸族館，用手摸過啲大龜~
跟住又諗住去玩摩天輪，唔知點解冇開，都唔緊要啦，之前都唔知有摩天輪嘅，所以唔算有咩損失。睇睇時間，原本諗住玩到 1300，而家只係 1140。原本諗住 1300 搭的士去伊達時代村，而家咁早，有機會坐到巴士喎！即刻拎本書出嚟睇吓啲班次，咦，1200 有車去伊達時代村喎！正！
我哋就此離開海洋館，行返去 JR 站到等巴士。
第一次喺北海道搭巴士，心情又開始緊張起嚟......
做功課時，知道有樣嘢叫「整理劵」，作用係俾司機知道你喺邊個站上車，咁就唔需要下下俾全費，只需俾分段收費，呢個設計放喺日本認真唔錯。香港？唔得啦，肯定大把人尾二個站先攞飛！@@
車到喇，係單層嘅，中間上車，前門落車方式。
中間上車處有部機，有張劵伸咗出嚟，一人攞一張，我哋當然都有攞啦。
好嘞，攞住張飛咁又點呢？冇理由落車先知幾錢咖，咁咪有排落？@@
哦~~~
原來司機位上方有個顯示屏，有晒號碼，一至幾十咁啦。我哋張整理劵係有號碼嘅，好理所當然，自己對號入座啦~
但係唔係個個上車搭到總站咖，咁中途落又俾幾錢呢？
呢套系統係咁嘅，部車一路行，號碼不會變，但價錢會變，當你落車前(即過咗尾二個站)，就根據返你張整理劵嘅號碼，對返個顯示屏，咁就會知道要俾幾錢，落車時，錢同整理劵一齊放入錢箱就得。整理劵係雙面嘅，司機一定睇到。
坐低咗，中門一閂，整理劵部機就會即時封口。
其實我早就知要幾錢，因為做功課時有提及過，結果我預備嘅錢同顯示屏係吻合嘅，180 日元一個。
到站落車，一片白茫茫，滿地都係雪。一落車，就見到看似江戶時代咁嘅入口，果然係時代村！就喺呢個時候，我哋發現落緊大雪 ，大家心情都好興奮！！！
我同屎塔都覺得江戶時代嘅感覺，再加上大雪，呢種情懷，實在唔能夠用言語形容，個感覺實在太好喇！
我心中不禁即時有段音樂奏起，就係......
好似舊式嘅日本古時卡通片嘅「咚咚咚咚......嗚~~~ 」XDDD
我哋完全陶醉於呢場大雪裡面。
由於太陶醉嘅關係，我差啲就自顧自咁走咗入去，完全忘記咗要俾飛售票員......@@
俾完飛，可以入場喇。一入到去係一條食街同小賣店，我哋行咗一陣小賣店，又搞吓人哋啲嘢就出咗嚟睇吓陣間食咩。
結果睇睇吓就走埋入去食添，唔駛陣間......XDDD
我哋揀咗一間嘢食蕎麥麵嘅，一碗係蝦天婦羅，一碗係......唔知道。@@
店入面冇乜客，其實就連遊人都好少，又點會有人入去食嘢吖~
啲嘢係即叫即整嘅，所以等咗好耐。啲嘢好熱同時隻蝦亦好新鮮~
食完就開始真正遊吓呢個時代村~
行過忍者資料館，都係啲武器咁啦，飛標都有好多款。
跟住都係周圍睇吓，影吓相。
跟住就行到去忍者怪迷路。
入到去，好鬼多門 ，大部份門都係可以左右郁嘅，真係好似一個迷宮咁。
其中去到一處，地板係會傾斜嘅，真係好難先企得穩！話就話迷宮 ，其實只係營造出嚟嘅迷宮，係唔會迷路嘅。
玩完呢刻，睇睇時間，1300，我同屎塔講：今日兩個節目都用少咗好多時間，陣間可以去埋熊牧場喎！睇埋巴士時間，正！仲可以搭巴士唔駛捱貴的士！1440 有巴士！
就係咁，諗住聽日先去嘅熊牧場，可以今日去埋，實在太好！因為本來聽日要去地獄谷、大湯沼同熊牧場，但 1142 要搭車走人，時間上非常趕！遊地獄谷同大湯沼時間上係唔可以縮短嘅，所以一定要犧牲遊熊牧場嘅時間。而家可以今日去埋，簡直係一石二鳥！一舉兩得！一箭雙鵰！一...... (下省數萬字)
跟住就去到千貓寺，係好似玩鬼屋咁，一路行一路有嘢嚇你，但全部都係機關，好生硬，冇人嘅，當感應到有人行過，機關就會出現，配合聲音效果，都嚇得吓人，全部都係以貓為主，係妖貓。
村入面有好幾個地方都有劇做嘅，但我哋嘅時間唔算十分充裕，亦唔係個個劇都有興趣，所以我哋只係揀咗忍者劇場睇，1330 有一場。
眼見差唔多開場，所以我哋就入場睇嘢先。
入到去坐咗一陣，全場只有四名觀眾(計埋我哋......)。工作人員開始將所有燈光逐一熄滅，我同屎塔互相都睇唔到對方。
劇場開始，大約係講徒弟拜師嘅過程，又打咗幾吓，當然係師傅嬴啦！
跟住，就有個人揸住卷唔知乜嘢，收藏咗喺某一牆腳入面。之後有幾路人嚟搵，又經過幾場打鬥，都有好幾場忍身後，就喺我哋估佢唔到嘅地方飛出嚟。
呢套劇一開場時，悶到想瞓，但去到中段就開始精采。睇完都覺得好值得睇。
完場後，有一個儀式(可以唔做)，就係用紙(入場時有俾我哋)包住一個硬幣，再掉過去表演者度，呢個儀式係由古時傳落嚟嘅，小冊子有介紹並且提示只需用小額面值嘅硬幣就得，我同屎塔各放咗一個 10 日元入去。
完場後，表演者仲主動叫我哋影相。
睇完劇，就去到玩怪妖屋，其實同千貓寺差唔多，都係啲生硬機關嚇吓你咁，不過今次唔係貓，係妖怪。
屎塔好大膽，竟然夠膽伸隻手入去......@@
玩完睇吓時間，1410，我哋就慢慢行返出巴士站。
去到巴士站，有間屋仔可以坐入去等車。屋係長方型嘅，兩邊各有一排過嘅長椅，中間有個煙灰缸，好簡陋嘅木屋仔。
入面係冇人嘅，都正常啦，我哋行出嚟果陣真係遊客影都冇隻！@@
等咗一陣，有三個人入咗嚟，講廣東話嘅，從佢哋嘅言語當中，相信係父母同女兒嘅關係。亦都知道佢哋冇乜計劃，只係邊遊邊諗。個女話有個睇熊嘅熊牧場，問父母去唔去，個阿爸話冇興趣，要返酒店浸溫泉......@@
我心諗，溫泉大把時間浸啦，一場嚟到都唔去睇吓?? ?我唔知果兩母女點諗啦，我就覺得有啲可惜囉......
不過又唔關我事嘅......
跟住個男人話食支煙先，我聽到已經諗住出去，咁嘅空間加一支煙，我怕我頂唔順......
好彩，個女仔叫個男人出去食，對我嚟講簡直係一大佳音！
不過咁，個男人食完走入嚟，都唔好得幾多。我都係出咗去，屎塔跟住我，我哋就係咁一路玩雪一路等車。
其實諗諗吓，好彩呢程唔係諗住搭的士，之前睇書講過巴士班次唔啱可以搭的士，但係我等咁耐，唔好話的士，車都冇一架！@@
車到喇，我哋坐好之後，見後面果幾個香港人冇攞整理劵，我哋就好好心咁話佢哋知點樣搭巴士。估唔到我哋喺日本可以教人搭巴士，真係.....XDDD
呢程就 220 日元一個。
坐咗唔係好耐就到站，我哋第一時間去搵熊牧場嘅位置。都行咗成十分鐘先去到。
去到喇，可以選乘吊座或步行上吊車站，我哋選擇上就坐吊座，落就步行，一程 200 日元一個。
其實只係坐好短路程，不過我哋都未坐過，就試一次。坐完覺得都冇咩特別，叫做試過囉，一陣就到吊車站。
上到吊車站，未上車前見到個牌......
-3 度，對我哋嚟講真係一個前所未有嘅體驗......
搭咗大約七分鐘吊車，又嚇完一輪......
一上到去行咗陣，就見到鴨仔賽跑嘅場地，不過要俾 200 日元估邊隻跑第一，我哋當然唔會咁樣浪費金錢啦！
跟住我哋就去睇熊，分一號、二號同小熊館，我哋去到一號館附近，見到有幾個人，果度唔係好大，雖然好少人，我都係選擇落一落館下面先，希望遊完下面再上去啲人會走晒，咁就淨返我同屎塔兩個人。
我哋落去之前，先去買嘢食，唔係俾我哋嘅，係用嚟餵熊食嘅。
有兩種，其實都係差唔多，100 日元一包，就買包嚟玩吓。
落到去，原來係一個地下室咁嘅地方，有幾條柱狀物打橫放嘅，原來係用嚟餵食嘅~~~
我哋即刻拆咗包嘢餵佢啦，拉開放一粒再推，就會推到俾佢食，我哋同佢嘅距離真係好近......
如是者餵咗幾粒，屎塔話要影相，點知隻熊又唔望呢邊......
我即刻拉開條嘢，隻熊以為有嘢食，就望返呢邊，我哋就好好把握呢次機會影咗相，哈哈！=D
屎塔事後讚我聰明，我想唔認都唔得啦！XDDD
跟住就上返去，嘿嘿，如我所料，冇人，正！
我同屎塔就係咁撩啲熊，佢哋好好笑咖，又拍手，又"up"頭，係咁吸引我哋注意佢，叫我哋掉俾佢食，不過佢哋好懶，唔係好肯郁，要掉準啲先得。
佢哋視力又幾好，只要掉到佢哋附近，淨係個頭郁到嘅地方佢哋就會一張口就食得到。
不過附近好多烏鴉，經常搶食，屎塔試過掉一粒俾啲熊食，喺空中俾隻烏鴉搶咗去！XDDD
所謂一號同二號，只係唔同地方，不過係痴住嘅，對遊客嚟講，完全冇關係嘅......
我哋遊埋其他地方先再返嚟玩過。
跟住我哋就去熊嘅博物館，行咗一個圈，都冇咩特別。
出返嚟就去咗觀望台，個景唔錯，望到一片白色嘅俱多樂湖，都幾靚。
睇完景就去睇小熊館，點知去到乜鬼都冇，淨係得啲籠......
唯有返去玩大熊。=P
本身果包唔夠玩，又買多包，今次買第二種。
玩到夠之後就走人，走前就遊一吓喺香港成日見嘅熊出沒注意嘅商店。
如果係聽日先嚟，只可以花一小時(包來回吊車時間) ，所以本來只計劃到一二同小熊館，其他都冇時間玩。
但今日我哋都玩咗個幾兩個鐘，遊得晒成個牧場仲可以有多餘時間繼續同啲熊玩，好開心。
離開熊牧場，都係搭返吊車走，但就唔再搭吊座，改行樓梯，其實只係好少路程。
玩晒登別三大樂園，已經可以話玩咗大半個登別，登別真係好少地方，主要係溫泉區。
跟住我哋就搭返巴士落 JR 站，去 locker 攞返啲行李，330 日元一個。
去到 JR 攞返行李，又係搭返巴士返去酒店。
咁嘅路程設計看似戇居又浪費時間，但其實好值得，起碼唔駛的住咁重嘅喼周圍走，去到每一個地方又要搵 locker，嘥咗時間亦嘥咗錢，反正喺登別真係冇咩做，尤其近黃昏時間，三大樂園都已經收工，行街嘅地方亦可留待夜晚去行，因為有兩間想去嘅食肆，一間開 1800，一間開 2100......@@
咁嘅設計可以遊吓車河，亦輕鬆好多，反正呢段時間都冇咩做。
去到酒店放低晒啲嘢，發現成間房都冇床亦冇被鋪，於是就打落去大堂問吓。原來佢哋會喺黃昏時間逐間房鋪床嘅~~~
等佢鋪完床，我哋就出去食嘢行街。附近有處地方叫極樂通商店街，其實只係兩旁有啲小商店，我哋要去食嘢嘅地方就正正喺呢條街入面。
我哋嘅晚餐會分兩餐，而家食第一餐：福庵
福庵主要係食蕎麥麵，我哋點咗一個有飯，一個冇飯嘅 。冇飯嘅就多啲麵，有飯嘅就少啲麵。個麵係冷麵，好好食，啲蝦好新鮮！
由於時間尚早(相對於有間食肆 2100 先開)，我哋返酒店先，屎塔去浸溫泉，我就一向都唔會去公家地方浸溫泉嘅，所以我留喺房睇吓電視~
返酒店途中，見到所有渠都霧緊煙，相信係同上面個火山口有關，聽日我哋就去征服呢個火山！
差唔多 2100，我哋又落去食嘢，今次去挑戰味覺，食味之大王！
味之大王係登別有名食辣嘅地方，一碗普通嘅拉麵，一羹一羹辣粉咁落落去，稱之為：地獄拉麵
一羹辣粉 = 地獄一丁目
兩羹辣粉 = 地獄二丁目
如此類推~
我都幾鍾意食辣，所以我叫咗......地獄......一丁目 ！XDDD
我實在唔夠膽叫得太辣，怕頂唔順，叫少少，知道一丁目有幾辣就夠。
一丁目真係唔算辣，屎塔都食到，但我相信如果我食二丁目，會開始覺得辛苦......
牆上面貼滿上榜嘅人嘅成績，最勁果個，係地獄五十一丁目！！！好變態！@@
日期係 2 月 12 日，即係九日前咋！
食完辣嘢就行吓街，啲商店入面都幾多古靈精怪嘢睇，有啲就好悶，我哋都行咗有一個鐘，行完就返酒店。
每日點滴：
今日終於感受到落雪，仲要係成日都有落，時大時細，個感覺好正！
出發前最頭痛就係編登別嘅行程，因為三個遊玩地方都要用唔少時間，好難安排！好好彩，今日可以話好鬆動咁玩晒三個地方，聽日唔駛去熊牧場可以鬆動好多好多！
本來諗唔掂咖，要犧牲時代村唔去，好彩最後都有去，絕對值得去一去。
呢度啲巴士班次好奇怪，經時代村嘅尾班巴士係早過時代村嘅收工時間！@@
企鵝同熊對我哋嚟講都係好陌生嘅生物，至少喺香港真係冇乜機會見到，仲要咁近距離~
登別只係一個好鄉下嘅郊區，但就係呢份感覺，令到我感覺好舒服，繼小樽之後，又一處令人感動嘅北海道城鎮。
留言列表
