《瞬間看地球》Stranger's Blog

今日行程：

Day 03：金鱗湖 → 閒逛由布院 → B-Speak → 九重夢大吊橋 → 九醉溪展望所 → 鍋瀑布 → 大觀峰 → Joyfull (宿：阿蘇)

今日天氣終於好返啲，冇落雨！

今日第一站係「金鱗湖」
由於夕陽時份，湖裡面嘅魚因太陽照射角度而形成片片金鱗，因而得名~
可惜我安排唔到黃昏時間嚟，不過唔緊要，金鱗湖仲有另一樣特別景象，就係晨霧~
據講湖裡不斷有溫泉水流出，喺秋冬嘅清晨時份，湖面會泛起一團團蒸氣，形成晨霧嘅景象~

途中見到座咁嘅嘢，屎塔話回頭望過唔係太陽能板，唔知咩嚟嘅呢？


嚟到金鱗湖，我哋見到有少少紅葉，本來個湖都已經算幾靚，再加上呢少少嘅紅葉，真係好靚~
我哋圍住個湖慢慢行咗一圈，咁早又冇咩人，勁舒服呀！

今日唔係好凍，只可以話有啲清涼，本來我哋覺得未必夠條件形成晨霧，打定輸數，不過嚟到又見到少少~


下一站係「由布院」
去得金鱗湖，實會喺附近行吓嘅~

話就話閒逛由布院，其實當中有三個地方係計劃好會去嘅~
一係 Dr. Kiss Fish，二係貓頭鷹園，三係 B-Speak

我哋趁時間尚早，去咗 Dr. Kiss Fish 先~
其實我個人嚟講係有啲抗拒，不過陪吓屎塔都可以嘅~

隔籬就係貓頭鷹園~
貓頭鷹園喺個市雜入面，當然都係趁冇咩人，行咗貓頭鷹園先~
近距離接觸甚至撫摸貓頭鷹，呢啲機會真係唔係咁容易有~
啲貓頭鷹真係好正，好有型又戇居居咁，好得意~

呢隻好似拳頭咁大咋，好得意！


園入面仲有兔仔~


跟住就係真正嘅閒逛由布院~

一路行到落 B-Speak，就去買卷蛋食~

屎塔之前嚟過食過一次，佢話超好食，仲話未食過咁好食嘅卷蛋~
嗯，咁真係要試吓~
據聞呢度啲卷蛋好好賣，分片裝同整卷嘅，片裝呢，假期通常一早就賣晒，卷裝喺片裝賣晒之後，都好快會售罄，所以真係要早啲嚟買~
我哋呢，出發前已經預訂咗一整卷，兩個人食，應該食得晒嘅~

我哋嚟到嘅時候，散件已經賣晒，而家只係朝早 11 點到，不過呢，我成日都覺得呢啲只係做生意嘅手法......
整卷呢，我見仲有二十條到，我估都好快會賣晒~

卷蛋到手，不過喺邊度食好呢？都係返車食好啲~
我哋回程時行返去部車度，見到有嘢想食就買啲嚟食~

豐後牛炸餅，其實入面係免治咗嘅牛肉，係咪極上嘅豐後牛，普通人如我根本分唔出，味道還可以吧~

蛋卷皮+重奶味雪糕，好好食！

煙肉卷，幾好食~

拳頭咁大嘅丸子，冇買嚟食，因為應該會食得好輪盡~ =P


返到車，頭痛緊點樣將整件嘢分開，屎塔突然醒起有把瑞士刀喺袋，細就細把啲，好過冇啦~

嘩，原來真係好好食，超有蛋香味，又夠鬆軟，cream 又夠奶油香，好正！
我同意屎塔講過，未食過咁好食嘅卷蛋，唔怪得咁好賣啦！

不過兩個人食一條卷蛋都幾飽，哈哈~

下一站係「九重夢大吊橋」
九重夢大吊橋係賞紅葉嘅超熱點，成個山谷都係紅葉(如果有......)，應該好正！

途中見到呢個地方，本來想停低欣賞吓影吓相，不過一路都冇地方可以俾我停車，後面又成串車，冇計啦，就咁影~


差唔多到，見有地方可以停車，就落車行吓~
好明顯係冇乜紅葉嘅，其實都有晒心理準備，當行吓條橋囉~


嚟到喇，真係要接受現實，只有少少紅葉水尾，天色又咁差，真係只有一聲嘆喟，唉~

臨走時先開始有陽光......


行到過對面，冇咩睇，就行返過嚟，攞車走人~

下一站係「九醉溪展望所」
同樣係紅葉名所~

其實去完九重夢大吊橋，本身諗住唔去九醉溪嘅，因為相距只係不到十分鐘車程，個環境唔會有咩大變化，其實係已經決定唔去~
點知去下一個地方時，途中經過，就落車睇睇囉~

下一站係「鍋瀑布」
睇人哋影啲相覺得好靚，所以就嚟行吓~

嚟到泊好車，仲要向下行一段路先到~

鍋瀑布係一個我幾期待嘅景點，終於可以親眼目睹呢個咁靚嘅瀑布~

呢個瀑布，係可以喺佢下面嘅後面穿過去，不過條路幾跣，要好小心行~
穿過後面嘅時候，有非常大量嘅水霧打埋嚟，濕晒！

過到對面，有對男女想我哋幫佢影相，相信係台灣人嚟~
之後佢哋就禮尚往來，幫我哋影~

之後我哋又穿返過對面，行咗去附近影相~
跟住聽到有人叫咗一聲，原來個台灣男人喺好跣嗰度跣低咗，對方見我想行過去幫手，就說沒事沒事~
就係呢度，鋪咗嘢都係好跣~


呢度仲有個展望台，不過展望到啲咩呢？

呢幾日難得一見嘅藍天白雲~


屎塔話好鍾意呢個鍋瀑布，好多謝我帶佢嚟~

下一站係「大觀峰」
可以遙望阿蘇山嘅觀景點~

其實如果想遙望阿蘇山，「城山展望所」好似比較好啲，不過由鍋瀑布至到酒店中間嘅景點嚟講，城山展望所非常唔順路，所以我就決定去大觀峰就算~

途中一攝，好綠，望落好舒服~

差唔多到嘅時候，我被眼前所見到嘅風景震懾！
附近嘅山頭一片金黃，係因為夕陽照射在山頭上嘅芒草(我估係芒草)嘅結果~
原來日落係可以咁靚，咁壯麗，我冇乜墨水，真係唔知可以再用啲咩形容詞，比壯麗更壯麗，總之就好鬼正，心情好激動！

可惜，我哋嚟遲咗幾十步，大陽落山落得好快，本來可以睇到遍地黃金，而家連遍山頭黃金都睇唔到~

屎塔都不禁發問：你見過咁靚嘅黃昏未吖？
當然呢個發問，係不求回覆嘅，因為大家都知道，眼前嘅絕美黃昏景象，係我哋從未見過嘅~

追趕住太陽落山嘅速度去周圍影相，影完先發現，原來仲可以行去另一邊嘅山峰，嗰邊仲有機會睇到黃金一片片~
不過，再次可惜，又嚟遲一大步，離遠仲見到嘅黃金，行到中途已經冇咗，太陽落山落得好快，行到盡頭時已經乜都冇~


喺盡頭呢度，有幾個龍友，相信佢哋早一個鐘已經嚟到，真係好相問佢哋攞啲相睇吓！

其實我嚟之前係唔知道呢個山頭有啲咁正嘅嘢睇，仲一直覺得因為唔順路，退而求其次先嚟呢個大觀峰......

而家只係五點半，山頭呢度已經係全黑，又冇嘢做，唯有早啲去搵嘢食~

今日嘅晚餐我冇特別安排食邊間，諗住睇到咩想食就食~
睇吓地圖，睇吓邊啲地方會比較旺啲，最後決定去阿蘇駅附近睇吓~

去到附近，發現阿蘇駅係冇嘢食嘅，之後就走去道之駅睇吓，點知都係冇嘢食~
唉，真係煩，唯有周圍再兜吓~
兜吓兜吓，最後搵到間叫 Joyfull 嘅餐廳，係一間好普通嘅餐廳，日式西式都有，掂！


點咗個南蠻雞，唔錯，夠脆夠嫩，味道亦不錯~


肥牛煲，鹹咗啲，都OK~


食完就揸車返酒店，完結今日行程~