今日行程:
Day 04:天空之道 → 草千里 → 阿蘇火山博物館 → 旅の駅 → 白川水源 → 用作公園 → 原尻瀑布 → 岡城阯 → 九州らうめん (宿:豊後大野市)
今日嘅早餐係酒店包埋嘅~
食早餐時,發現在場嘅大部份人都唔似日本人,再留心啲聽佢哋講嘢,原來係香港人,跟住仲有個領隊走埋嚟講嘢,手持 EGL 旗幟~
旅行團入住呢間酒店真係好正常同埋好理想~
因為附近真係冇咩酒店,想喺附近落腳只有呢間選擇,而且出奇地呢間酒店真係唔貴,仲可以浸溫泉,又包早餐,真係旅行團首選!
至於早餐,都係普通西式早餐,冇乜特別嘅~
食早餐嘅地方,對開就係高爾夫球場,環境幽美~
今日第一站係「天空之道」
呢個地方,要配合雲海,先顯得佢特別之處,因為從某啲角度睇,條路會喺凌空消失,配合雲海,就好似天空之道咁,因而得名~
途中見到有個地方可以停車,就停低睇吓風景~
打算離開之際,屎塔走到司機位,開埋門,仲坐埋入去!
佢揀喺呢度揸都好嘅,呢度冇乜車,危險度相對冇咁高,佢又唔會無啦啦指落山嘅~
幸好最後都安全到達目的地~
嚟到通往天空之道嘅小路入口,發現道路因近日天雨關係已經封閉(今日冇落雨),正喺我哋猶豫之際,有部的士駛到嚟停咗喺我哋前面,司機同兩個乘客一齊落車,毫無疑慮咁自然地跨過鐵鍊,嗯,就跟佢哋尾行入去吧~
嚟到我一早定好位嘅地點,點睇都冇人哋啲相咁啱位,硬係爭啲咁,但無論我喺附近點試,始終都係最初嗰點最好~
呢度其實真係幾危險,前面係山坡,護欄好矮,無論人行車行都絕對冇足夠嘅保護,所以我一嚟到已經腳仔軟,越係腳軟就越係危險,我都唔敢行到咁出,睇住屎塔拎住部相機係咁左右就位,真係怕
佢跌鬼咗落去,我唯有走埋去拉住佢,行太前就提吓佢咁~
嗰三個人嚟到唔夠兩分鐘已經走咗,淨返我哋喺度,影影吓相,突然傳來嘈雜嘅引擎聲,望清楚啲,前方山腰處有部車上緊嚟,我同屎塔二話不說,速逃!
可惜,始終都係唔夠部車快,我哋只好裝作若無其事繼續慢慢向出口方向行......
上緊嚟嗰部車,原來係部耕作用車,呢部車都行得,咁條路就應該冇咩危險性嘅~
我哋繼續若無其事咁向前行,而部車同我哋亦一樣,完全若無其事咁經過我哋身邊向前行~ XDDD
兩條粉腸自己嚇自己~ XDDD
返到去出入口處,嘩,已經泊咗成四五部車喺度,莫非前幾日嘅大雨令到大家都嚟唔到,餓咗幾日?
下一站係「草千里」
草千里係阿蘇火山區嘅一片大草原,仲可以玩騎馬~
離開天空之道去草千里時,對面線斷斷續續都有軍車出現,好大部,有啲仲拖住武器,浩浩蕩蕩,粗略估計都有幾十部~
途中經過 Aso Farm Land,屎塔本來話想喺度住一晚,因為呢度啲屋幾特別,全部都係圓型一個一個咁,喺夢幻區域,每間屋都有唔同造型,有熊本熊、草莓、西瓜、足球等等~
不過行程編排上唔係好就得到,加上住一晚又好貴,所以最後都冇安排到~
咁啱經過,就入嚟睇吓~
原來如果唔係住客,就要俾入場費先可以入,屎塔話唔入,就喺外面影吓相,其實係乜都睇唔到......
行咗一段路,開始繞住阿蘇火山不斷向上爬,沿途見到好多次有牌寫住同一樣嘅告示,由於係日文字,我哋當然係唔識睇,只係識睇「草千里」「止」
究竟係話條路到草千里止,還是禁止進入草千里呢?
我哋知道今日係上唔到阿蘇火山的,所以如果話條路到草千里止,我哋都預咗,但就唔清楚會唔會連草千里都去唔到~
不過我哋之前連能見度得二十米都照上山頂,呢刻又點會唔繼續勇往直前吖~ =P
途中經過「米塚下園地」,又停低睇吓,睇吓係咪可以見到米塚~
凸起嗰個就係米塚~
一路上一路上,雖然成路公路都好靚,但由於呢度好高,視野亦極為開揚,沿途車輛寥寥可數,感覺好似驅車登上一座無人高峰咁,刺激中帶點膽怯~
就算今日上唔到阿蘇火山,淨係行呢條公路都真係絕對值得刻意嚟走一趟!
去到草千里喇,好彩條路係去到草千里止,咁我哋就可以去草千里行吓~
嚟到草千里呢度,見到已經有好多人同車,奇怪點解沿路上都唔多見有車上落呢?我諗可能仲有第二條路嚟卦~
草千里呢度,唔止有千里草原,仲有小湖同小山峰~
雖然呢個時份絕對沒有綠草如茵,但呢度嘅環境仍然令人心曠神怡~
我哋走到小山峰上,遠眺阿蘇火山嘅雄壯,而且仲係活躍中嘅阿蘇火山,一浸浸咁冒煙,時多時少~
小山峰呢度仲有個人著住件印有「火山監視員」嘅衫,不時以望遠鏡觀察火山口嘅情況~
下一站係「阿蘇火山博物館」
顧名思義,一切有關阿蘇火山嘅事情都可以喺入面搵到~
註:博物館內禁止攝影
阿蘇火山博物館~
阿蘇火山口係咁樣嘅~
嚟到博物館,有個 show 差唔多開始,就去睇 show 先~
入到個影院,show 仲未開始,見到有五個大屏幕,我哋見到咁嘅情況,費時睇得咁辛苦,所以坐到最後,不過就算坐到最後,都係唔可以一眼睇得晒五個大屏幕,一定要擰吓頭先睇得晒~
好嘞,個 show 開始嘞,我同屎塔即刻笑到死咁滯~ XDDD
原來五個屏幕都係同一個畫面,只係字幕分中英韓,另兩個係冇字幕,絕對唔存在睇唔晒嘅情況~ XDDD
我哋真係諗得太多,你估而家睇 4DX 超級影院咩~ XDDD
個 show 主要都係講火山嘅由來同近年嘅演變,冇咩特別的~
至於博物館其他部份,都係想像到嘅事物,地形呀,地質呀,火山岩呀,爆發紀錄呀,同其他火山比較呀咁~
行完博物館,就喺隔離嘅「旅の駅」食啲嘢~
叫咗個雞肉丼同牛肉丼,味道不錯,最正係熱辣辣,正!
上咗高一點嘅位置欣賞吓風景~
仲見到米塚嘅頂部~
回程沿途風光~
下一站係「白川水源」
日本百水之一,而且可直接飲用,據說甘醇可口~
去到白川水源停車場,見到「身障者」同「関係車輌」專用,照字面我當然唔應該泊,但同場又見到「白川水源駐車場」嘅牌,咁即係點呀?
咁啱有位女仕開車,我就走埋去問佢,我係遊客,可唔可以泊喺度~
對方用流利嘅英語同肯定嘅語氣話可以,佢揸嘅車係高身 SUV 車,唔似係租嘅車,佢又只係一個人,我推斷佢係日本人嚟,於是我就信佢,泊部車喺度~
白川水源入場處,有啲舖頭售賣大大細細唔同容量嘅水樽,供遊人入去白川水源自由取水之用~
我哋亦見到有人自備水樽,好努力咁裝滿好幾個大水樽~
講返個白川水源,真係清到不能再清,我哋冇打算試吓佢係咪真係咁甘醇,以免水土不服嘛~
呢度係咁有水湧出,唔通呢度就係個泉源?
呢度仲有足湯,不過係乾嘅......
其實呢度都幾悶,基本上就係睇吓啲水有幾清而已......
下一站係「用作公園」
一個紅葉(如果有......)加小湖嘅公園,相信應該好靚~
本來下一站應該係「原尻瀑布」,咁樣會比較順路,不過呢啲時候,天色黑得好快,睇紅葉,有陽光同冇陽光可以差好遠,所以我就跳過原尻瀑布,去用作公園先~
去用作公園嘅呢段路,真係辛苦,全程都又窄又多彎,要非常集中咁去駕駛,稍為分心都好易出事~
不過初段就好好行,風景仲好靚~
到咗用作公園,門口有個牌,告示幾時會有晚燈睇,我見 28/11 都有晚燈,今日只係 20/11,唔通呢度啲紅葉,唔似其他地方咁,可能仲未落晒喎!
我懷住少許期望又不相信嘅矛盾心情行入去,哼,又係遍地枯咗嘅紅葉!
呢個公園唔大,真係睇風景嘅話,主要都係湖呢邊比較靚啲,遇到紅葉盛開時,一定好靚~
下一站係「原尻瀑布」
又係一個非常靚嘅瀑布,甚至乎有「小尼亞加拉大瀑布」之稱,嗯......咁又誇咗啲......
嚟到原尻瀑布,初頭仲以為好多人喺度......
見到個瀑布喇,嘩!比起睇人啲相,現場感覺係大好多同壯觀好多!好正呀!
除咗喺上面觀賞,仲可以落去下面~
之後就行咗去瀑布頂~
瀑布頂呢邊有啲鴨,上嚟嘅時候見到啲令人擔心嘅情景~
圖中右邊係瀑布頂,水流自然係非常急,有幾隻鴨游咗過嗰邊,係咁用力游都只係僅僅維持喺原位,冇被沖落瀑布~
但咁落去唔係辦法,佢始終都會攰,點算好呢?其實我哋實在係無能為力......
幸好,經過佢哋極之努力係咁游游游,最後都游返去左邊比較平靜嘅地方~
行咗過對面,由另一角度欣賞瀑布~
之後就行條吊橋,返返去原位~
附近隨影~
原尻瀑布都幾偏遠,一般自駕遊都未必會嚟到咁遠,我哋嚟呢度,主要係因為聽日會去「稻積水中鐘乳洞」,所以先會嚟到呢頭~
下一站係「岡城阯」
一個有紅葉睇嘅城跡~
岡城阯呢,閂 1700,而我推斷而家開車過去,早嘅,1650 到,遲嘅,過晒 1700,咁,俾我哋 1650 去到又點吖?
但係唔去岡城阯,附近係完全冇地方去,唔通咁早返酒店咩,酒店附近又係冇地方去嘅,咁,咪去岡城阯,喺外面影吓相都好過完全冇地方去吖~
差唔多到嘅時候,喺條公路度,聽到啲好哀怨嘅歌聲,真係俾佢嚇一嚇,咩事呀......
去到岡城阯,儘管未到佢閂門時間,但係剩返幾分鐘,佢俾入我哋都唔入啦~
就喺附近行吓睇吓囉~
售票處準時 1700 收工,但係我見到有三位日本女仕,兩個年青嘅,一位上咗年紀嘅,向住城跡嘅方向行去,而的確,售票處閂咗,但入口處仍然保持住開放嘅狀態~
唔通,仲可以入去嘅?
唔理喇,有樣學樣,跟住佢哋入~
雖然天色已經開始轉暗,不過無啦啦可以入嚟,唔理啦~
預期一樣啦,普通嘅城跡,遍地嘅枯葉......
喺遊覽嘅中途,我哋一樣聽到山下傳嚟陣陣哀怨嘅歌聲,同之前聽到嘅一模一樣,隔一陣就會有,唔知係咩意思呢?
天色開始由暗轉黑,我哋都加快腳步,要知道成個城跡得我哋兩個(視線範圍內),仲要聽到啲咁哀怨嘅聲音,話完全唔驚就呃人嘅......
下一站係「九州らうめん」
一間好普通嘅拉麵店~
離開岡城阯,我哋去酒店 check-in 先,之後問個幫我哋 check-in 個女仔,附近有咩食,由於溝通係有啲困難,最後佢喺地圖上指一指,原來佢介紹 Joyfull 俾我哋......
無可否認,都唔鬼知你哋想食乜,介紹 Joyfull 確實係一個非常合適嘅推介,不過我哋噚晚已經食過,唔想再食 lu,唯有自己出去周圍兜吓~
自己出去周圍兜搵嘢食,即係重蹈阿蘇當晚嘅覆轍,甚是痛苦,最後,來來回回行過不知多少遍,就揀咗九州らうめん~
其實我哋都唔知叫咗啲咩,總之就一碗大麵,有幾塊豬肉,另一碗就好鬼辣~
其實兩碗都好食,只係大嗰碗實在太大碗,辣嗰碗又實在太辣,最後都係食唔晒,剩返少少~
食完嘢就返酒店,完結今日行程~
留言列表