2015.11.23 長崎、佐賀、武雄、諫早、鳥栖 (日本第七天) @ 《瞬間看地球》Stranger's Blog

今日行程：

Day 07：原爆落下中心地碑 → 長崎原爆資料館 → 御船山樂園 → 祐徳稲荷神社 → 東与賀海岸シチメンソウ群生地 → 長崎 APA Hotel → 回転寿司鬼へい(諫早店) (宿：鳥栖)

今日第一站係「原爆落下中心地碑」
1945年(昭和20年)8月9日早上11時02分長崎原爆嘅位置~

原爆落下中心地碑位於原爆公園，其實公園呢度就冇咩特別嘢參觀，主要都係個碑，不過就係想嚟行吓~

喺公園見到附近有個防空壕跡，又諗住行去睇吓~
不過搵咗好耐都搵唔到，由地下上埋平和公園，再行返落嚟，都搵唔到~

本來就冇諗住行平和公園嘅，不過都上到嚟，就行吓~

由平和公園落返原爆公園嘅途中，見到有貓，就玩咗一陣，就喺呢度，我發現防空壕跡嘅位置喇~
據說當時有個女仔就係匿喺呢度，死裡逃生~
其實我就覺得有點不可思義嘅，呢個位距離原爆點約只有一百米，咁都可以生存落嚟？

原爆公園附近隨影~

下一站係「長崎原爆資料館」
顧名思義，可以喺度睇到好多長崎原爆嘅資料~

關於呢度所參觀到嘅，冇咩特別嘢記述，只係有啲相片，有啲故事，實在令人揪心~

館外有個觀景台~

下一站係「御船山樂園」
一個喺九州很出名嘅賞花樂園，包括楓葉~

嚟到御船山樂園，同前兩日一樣，最近嘅停車場爆晒，不過今日就破記錄喇，要去到第四個停車場先有位！
當然，又係要搭穿梭巴士啦~

喺御船山樂園嘅入園處，其實都已經望到楓葉唔多，不過呢度應該都幾靚嘅，都照入去行吓~

行到一半，就買咗啲小食食吓，服務我哋嘅，係一位中國人，大家就傾咗幾句~

之後繼續行~

行完之後就搭返穿梭巴士返停車場~
我上咗車之後，唔見屎塔上車，就望一望佢喺邊，跟住就聽到屎塔以非常慌亂嘅語氣話：死喇死喇
咁慌亂咁講死喇死喇，真係唔似佢，我即時已經感到事態嚴重~
佢接道：我電話喺唔喺你度呀？
我搵完一輪，冇......
我叫佢即刻諗吓對上一次用電話係幾時，佢諗咗陣，話今日都冇用過話，咁，唔通"又"係漏咗喺酒店？
(按："又"，上次喺北海道試過一次)
我哋決定打電話去長崎 APA Hotel 問吓~
經過一輪極為困難嘅溝通之後，確認部電話真係漏咗喺酒店，屎塔直到呢刻先算係平靜落嚟~
屎塔喺慌亂中釋懷又帶點歉意嘅心情下，咩都冇諗，打算立刻就去攞電話~
我待佢呼吸稍為靜下來嘅時候，再同佢講，既然都確認咗電話喺酒店，其實晚一點先返去攞都唔遲，我哋應該好好利用仲有日光嘅時間，去遊覽其他地方~
屎塔都同意~

下一站係「祐徳稲荷神社」
一間建在懸崖上嘅神社，有點像京都嘅清水寺，雖宏偉度遠不及清水寺，但都幾靚嘅~

泊好車之後，先去搵嘢食~
行經一條商店街，主要係賣手信嘅~

呢度都有幾間食肆，我哋見到若松屋，咦，今晚去唔到食柳川嘅若松屋，唔通可以喺度食到？
(按：由於今晚要返長崎攞電話，就去唔到原先預計會去嘅柳川若松屋食鰻魚飯~)
睇吓 MENU，我哋十分確定，此若松屋不同彼若松屋，而且本身亦冇咩引力，作罷~

其實選擇真係唔多，就求其揀咗間可以接受嘅，名叫「家督屋」
我哋喺家督屋門外睇緊食咩好嘅時候，有個阿叔指住鯉魚刺身嘅模型，直豎拇指，向我哋推介~
我唔知日本人係咪食慣鯉魚刺身，但我哋就肯定唔會食......

最後我哋點咗肉烏冬同蕃茄飯，非常普通嘅食品~
肉烏冬，鳥冬質感非常好，牛肉雖有點肥，但好有牛肉味，不錯~

蕃茄飯，未食過咁香咁濃蕃茄味嘅蕃茄飯(其實我都唔係成日食蕃茄飯嘅......)，飯粒質地好好，當中有啲雞肉，我覺得畫龍點睛係裡面有少許軟骨，美味！

食完飯就行吓商店街，點都要買啲手信嘅~
行經一家手信店，店家遞咗兩杯飲料俾我哋，梅味嘅，幾好飲，就打算買兩盒~
店家拎咗兩盒，入埋袋，喺計數機度撳咗個銀碼，遞到我哋面前，明顯想我哋俾錢先~
其實我哋仲睇緊其他嘢，正路梗係想最後一次過先俾錢，不過既然佢都做到咁樣，就俾錢先~
俾完錢，佢就遞返入好袋嘅兩盒嘢俾我哋~
我哋繼續揀，睇中兩盒嘢，拎埋上手，佢又重施故技，唉，咪嘞，買埋呢兩盒去第二間算，我真係覺得有點趕客......
行咗第二間又買咗少少嘢，之後就向祐徳稲荷神社進發~

神社前係一個鯉魚池，條條都有靚又大條，有啲遊人正在餵緊佢哋食嘢，不過佢哋好多時都未能第一時間食到，食物就跌入魚池，身旁嘅鯉魚就一擁而上爭住食~

祐徳稲荷神社，外觀上係幾靚幾特別的~

我哋唔知佢啲樁柱係用咩做，三百幾年歷史嘅神社，估計都係用木造卦，不過近睇又唔似係木~

行經另一邊樓梯，打算離開神社時，見到呢邊原來興建緊一條現代化嘅電梯~
嗯，三百幾年嘅神社內建一條現代化電梯？
不過佢原意係為咗方便行動唔方便嘅善信，呢個理由，夠充份了吧~

落到地下，見到側面有個日本庭園，原本都想行吓，不過發現入面冇咩楓葉，都係算吧~

返到停車場，發現咗一樣有趣(少見多怪吧)嘅事，前方嘅神社，係俾人揸架車入去祈福的！
不過影相時部車走咗，等咗陣都冇車入去，冇計~

神社附近隨影~

睇睇時間，仲有時間去多一個地方先返長崎攞電話，GO GO GO！

下一站係「東与賀海岸シチメンソウ群生地」
遍地紅葉，唔係講枯咗嘅葉掉落地下，係佢本身個生長狀態，睇相就好靚，所以就嚟睇吓~

嚟到目的地，嘩，咁多車嘅！
個停車場已經好大，但啲車仍然泊到上晒路邊都唔夠泊，我哋又鬼咁好彩，就喺停車場入口有個車位~

見到咁多車，梗係以為群生地呢度勁多人，但行到埋去又唔係喎~

據某網站嘅介紹，呢度嘅見頃時期為十一月上旬至中旬，今日係 23/11，係咁嘅樣......

據現場嘅介紹，見頃時間係十月下旬至十一月，見頃時係咁嘅樣......

呢度對開係一片濕地，有好多蟹仔同彈塗魚~

望向遠處，見好似有啲地方行吓，就行過去睇睇~
原來呢度有個小型遊樂場，唔怪得泊滿車但群生地又唔見有太多人，原來去晒呢度~

呢度都幾正，帶小朋友嚟真係夠晒開心~
不過有一樣設施令我哋注足觀賞咗好耐，呢條瀡滑梯嘅設計真係有啲危險，我哋覺得真係非常極之完全唔合適俾小朋友玩~
我哋睇咗好多個小朋友玩，真係幕幕驚心，順住滑落嚟都有可能撞傷背部甚至尾龍骨，如果瀡(其實係跌)落嚟時，鞋踭啜一啜條梯，導致重心向前，後果實在係不勘設想！
有啲仲要係兩個小朋友一齊瀡......

呢條呢，又想點，一瀡就撞落池底......

下一站係「長崎 APA Hotel」
返去攞返部手提電話......

喺返去長崎嘅呢段路，遇上暴雨，不過多數車都仍然踩住百二三咁去，其實都幾癲~

行咗差唔多兩個鐘，終於都到酒店，好順利咁攞返部電話，安心晒~

下一站係「回転寿司鬼へい(諫早店)」
旅遊書介紹嘅平靚正寿司店~

由呢度揸返酒店，都會途經諫早市嘅外圍，於是我就決定去呢間寿市店食晚餐~

坐低揀緊嘢食，喺入面整緊寿司嘅大叔推介咗一款寿司俾我哋，全日文字，唔知係咩嚟，冇所謂，照叫~
現場有啲海報宣傳，都有呢位大叔嘅後生版出現，有理由相信佢係呢度嘅老闆~

寿司嚟喇~
佢推介嗰碟，分三種辣度，我哋叫咗 1 辣，即係最少辣嘅~
好味！冇介紹錯，不過辣度唔夠，如果再辣啲會更好食~

海膽寿司，我哋只係叫咗一碟，但佢前前後後嚟咗三碟......
嚟第二碟時，我哋抱住溝通困難(大叔推介寿司時「傾過」幾句......)，既然整咗，唔好浪費，要埋佢~
嚟第三碟時，要埋佢，不過決定如果再嚟第四碟就真係要出聲~
食咗三碟海膽，絕對唔嫌多，好好食！

拖羅寿司，油脂香味四溢，食完真係要合上眼回味，正到不得了！

其他全部都唔錯，我哋仲叫多次佢推介嗰款寿司，今次叫 2 辣，大叔都笑笑口~