《瞬間看地球》Stranger's Blog

今日行程：
Köln (科隆)、Wuppertal (烏帕塔爾)

Köln (科隆)
Dom zu Köln (科隆大教堂)
Altstadt (舊城區)

Wuppertal (烏帕塔爾)
Schwebebahn (懸吊單軌列車)

今早天氣非常清涼，不過睇嚟有啲機會落雨~

今日第一站係「Dom zu Köln (科隆大教堂)」
去 Köln，搭火車就最方便，我喺出發前已經喺網上面買好火車飛~

呢間酒店會住兩晚，所以咩行李都唔使拎~
沿途行去火車站，感覺上條街比噚晚更為污糟，可能係因為日頭睇得更清楚嘅緣故啦~
 

去到火車站，諗住是旦買啲嘢食吓~
行行吓見到中間有條樓梯，好奇心驅使下，就走上去睇吓，上去望返落嚟望吓個火車站都好吖~
嘩，條樓梯污糟到呢~~~
勁多垃圾，地面好似幾年冇清潔過咁~
 

上到去平台，仲見到有個疑似流浪漢瑟縮一角，不過佢背向我哋同埋相信瞓緊覺~
為著禮貌又好，安全又好，立即離開！

行吓行吓，就行到去麥記，入去睇吓有咩食啦~
嘩，入咗麥記好似入咗個捕鼠設備咁，地板黐立立，入去行咗個圈冇咩啱，由於地板黐立立嘅關係，「烈烈」聲咁行返出嚟~

之後決定喺某店買個卷同牛角包當早餐~
排隊嘅時候，有個好污糟嘅阿伯近距離咁圍住我哋係咁望，我即刻拉屎塔走開~
我哋走開咗，個阿伯就向另一邊行咗去，我哋又再次返去排隊買嘢食~
 

我哋班火車，上車位置係三號月台，不過三號月台就裝修緊~
 

望吓月台資訊板，改咗去十八號，幾遠吓......
 

去到十八號月台，諗諗吓，都係拎將電子票出嚟睇吓，究竟係咪唔使再換票~
就喺我哋研究緊嘅時候，有位小姐好友善咁問：Can I help you?
入咗德國境內時間其實好短，但完全唔覺得好似其他人咁講，德國人木口木面冇乜笑容，我哋覺得身邊嘅人都正正常常冇乜嘢咁~
嗰位小姐睇完我哋張電子票，話唔使換飛，就咁上車就得，佢仲話車廂 A 係頭等，B、C 係普通，真係唔該晒！

見未夠鐘開車，就搵個位坐低食吓嘢先~
個卷同牛角包都幾好食~

周圍望吓時，見到有個位劃咗做吸煙區，只係地下有黃線劃咗一個細小嘅區域，咁都幾好，唔使全個車站都有人食煙~

班車遲咗幾分鐘先到，呢樣又真係有啲奇怪，網上間中都聽到人講德國鐵路時間比日本更準時，噚晚嘅 S-Bahn 到今朝嘅 ICE，一樣係遲咗幾分鐘~
係，只係搭咗兩程就判人死判就梗係唔啱，但至少搭兩程，兩程都遲，係 100% 遲，好難令我哋相信德國鐵路嘅準時性......

Frankfurt(Main)Hbf 火車站隨影~

開咗車無耐就有人查飛，查完飛蓋咗個印，搞掂，可以安心休息吓~

車程約一個小時，到咗 Köln，一出火車站就到 Dom zu Köln (科隆大教堂)
由於時間仲係早，教堂同廣場都唔算太多人~

開始遊覽前，去個洗手間先~
喺火車站見到有個收費洗手間，個名叫「McClean」，唔知同 McDonald's 有冇關係呢？
 

Köln Hbf
 

Dom zu Köln (科隆大教堂)

教堂另一邊~

原來上塔頂就係喺教堂嘅另一邊上，趁冇咩人，上咗塔頂先~
由地面上塔頂，只有一條垂直嘅螺旋型樓梯，一路轉一路上，都幾辛苦~
 

上到中層，見到有個鐘，就行過去睇吓~
呢度有個職員喺度，有間細少嘅工作室，唔清楚係用作保安還是協助旅客~
嗰位職員話俾我哋知，仲有兩分鐘，個鐘就會響，咁我哋梗係等埋先啦，雖然唔知等嚟做乜，響咁又點？ XDDD

就喺我哋等嘅過程入面，漸漸已經忘記咗個鐘會響，到響嘅時候，四條友(啱啱有一對旅客上咗嚟)個心臟強烈地泵咗一吓血，大家都嚇到死咁滯~ XDDD
當中啱啱上嚟嘅一位女士直情嚇到跳起......

心跳回復正常後，繼續上~

上到頂喇，其實就冇咩睇嘅，圍欄較密而且風景一般，不過為咗上而上，又或者為咗近距離欣賞教堂頂部建築，都係值得嘅~

回程都係行返嗰條嗰條樓梯，落比上更辛苦，仲有時要企定定讓上嚟嘅人過先~
一路落，一路心諗，到未咖，仲要行幾耐呀~
落到地面，雙腿及雙膝真係有啲發軟蹄~

入教堂之前見到有人喺廣場地下畫緊畫~
 

好可惜，出嚟之後變咗咁~
 

下一站係「Altstadt (舊城區)」
毫無目的咁喺舊城區亂行~

河邊~

入咗間教堂~

某廣場~
 

呢座建築物，外牆好多人像~
 

遇到有人結婚，唔知呢度係咪註冊結婚嘅地方呢？

行到悶悶地，搵啲嘢食吓先~
頭先行過河邊有好多餐廳，再返去睇吓先~

有間泰國嘢，都好似幾 OK，不過嚟到德國食泰國嘢？都係唔好~
經過另一間餐廳，職員非常熱情，瘋狂介紹佢哋有咩食，又有幾好食咁，我睇佢個款想介紹晒餐牌入面嘅所有食物咁，此地不宜久留，一等佢回氣就謝絕佢，速閃~

最後揀咗間唔近河邊嘅，看似都幾好咁~
 

Lasagne
略鹹，但味道還可以~
 

Rumpsteak in Champignon Rahm Sauce
牛扒淋但牛味一般~
PS. 第一眼望落去，我同屎塔都有個疑問：冇牛扒嘅？ XDDD
 

食緊嘢時見到部相信係遊覽車~
 

食完嘢就返去火車站，而家就多好多人~
 

又影多兩張 Dom zu Köln 嘅相~

下一站係 Wuppertal
去 Wuppertal，純粹為咗坐 Schwebebahn (懸吊單軌列車)~

火車飛就之前上網買定嘅，不過去到車站，對返資料，方向啱，時間都啱，但火車嘅編號唔啱~
最後我哋都照上，一切順利咁到達 Wuppertal~

Schwebebahn 個標誌幾得意~
 

Wuppertal-Vohwinkel 火車站~
 

一出站就見到 Schwebebahn~
 

呢個角度見落，好似好低咁~
 

其實都有啲距離嘅~
 

喺某個懸吊單軌車站買咗張一日票，職員仲提我哋用之前記得去票機打飛~
不過唔知點解打極都打唔到，算喇，有車到，上咗車先~

嘩，比想像中快得多，亦由於真係有啲速度，所以車身係有一定搖晃~

我哋到埗後，由中間其中一個站，搭到其一一邊嘅總站，再搭返轉頭去另一邊總站~

喺呢邊諗住去個洗手間先，不過搵嚟搵去都搵唔到，一路行到去另一個站都搵唔到~
跟住試吓搭去個大啲嘅站，都係冇，周圍行吓，又問吓人，點知問咗幾個人都唔知，乜呢度啲人唔駛去洗手間嘅咩？我已經問啲唔似遊客嘅人......
最後終於搵到公眾洗日間，不過女士嗰邊鎖咗......
再搵，見到有麥記，問咗職員話可以去，搞掂！

喺 Wuppertal，我哋冇咩特別地方想去~
之前做功課時，有人提過有個市雜，但冇講喺邊，幾時會有，上網查亦完全查唔到任何有用資料，冇計，嚟到見到就去睇吓，見唔到就算~

兩邊總站都去過，就搭返 Schwebebahn 去 Wuppertal-Vohwinkel 火車站，晏啲會喺呢個火車站搭車走~

Schwebebahn 全段約有三份一喺市區上，另外三份二都喺河上面，據說多年前發生過列車墮河事件，不過我相信係好罕有嘅事故嚟~

搭 Schwebebahn，真係一個幾有趣嘅體驗，刻意搭火車過嚟玩吓都係值得~

想做嘅嘢都做晒，行亦行過唔少地方，又冇咩睇，仲有個幾鐘先夠鐘搭火車走人，不如再搭 Schwebebahn 遊吓車河啦

上到車站，見到兩邊月台上方嘅顯示屏都有個字閃緊，仲有「！」，覺得應該係有啲嘢~
 

不過我見兩邊月台都有唔少人等緊車，就等多陣睇吓點先~

喺等緊嘅時候，終於記得打飛，不過都冇用吖，因為我哋等咗好耐都冇車，決定唔搭喇，費事陣間上咗車又有咩事搞到趕唔切搞火車走~
就行去火車站等~

Wuppertal 隨影~

去到火車站，仲有成個鐘，搵個位坐吓~
一坐低，就拎個電話出嚟睇吓有冇人搵過我，見到有封電郵，係德國鐵路網傳嚟嘅~

之前搭嗰啲德鐵，都冇收過電郵，咁我都幾相信呢封電郵唔係一封提我搭車嘅電郵，不免有啲緊張~
一開嚟睇，話我哋班車會遲 25 分鐘先到，咁都冇問題嘅，我哋都唔趕時間~

咦？唔係喎，我哋呢返 Frankfurt am Main 係要轉車，呢程遲咗 25 分鐘，係趕唔切轉下一班車，出事！
即刻再查吓啲班次，嚟緊有班直通車，我當時冇買，我相信係因為貴好多，反正唔趕就揀轉車，我哋呢刻亦唔敢自把自為走去搭呢班直通車~
於是我哋就走去票務處問吓，我哋可以點做~

同個黑面票務員講完，佢咩都冇講，就喺我哋張 online ticket 上面蓋咗個印，再簽埋名，遞返俾我時說：OK
我同屎塔對望咗一吓，我相信佢心入面同我心入面諗嘅嘢係一樣：O 咩 K？即係點？

隔咗兩秒，個黑面票務員先至話，搭任何班次嘅車去 Frankfurt am Main 都可以~
嘩，正喎，咁咪可以搭嗰班直通車囉！真係因禍得福！早啲可以上車，車程又短啲，正！
睇返時間，比原本嗰班車仲要早到 Frankfurt am Main~

班直通車到喇，都幾多人落車，但係......完全唔見有人上車，我哋前面嗰卡車嘅車箱更加係一個人都冇，直覺就覺得呢班車嚟到呢個站就停止服務，我哋唔係好敢上車~
部車去 Frankfurt am Main，冇理由冇人上車，亦冇理由咁多人喺呢個站落車，感覺兩件事都唔係好合常理，人唔郁我哋又唔敢郁，睇吓點先~
等咗陣，部車閂門開走我哋都冇上車，睇住部車走，佢一路行，我哋一路望，原來佢之後嗰啲車卡嘅車箱入面都有人......
唉，真係好X戇X！好難接受自己咁戇X！屎塔乜你咁X戇X咖！

接受現實，收拾心情，嗱嗱聲睇吓仲有咩車可以搭~
嚟緊有三個選擇：
1. 轉一程車，比原定時間遲 7 分鐘，但係轉車時間只有 10 分鐘，個德鐵 app 仲話轉車要步行 7 分鐘~
嘩，得 3 分鐘走盞，又唔熟路，其實好易趕唔切，好唔理想......
2. 轉一程車，比原定時間遲個半鐘，雖則話唔趕時間啫，都真係唔想咁晏先返到 Frankfurt am Main~
3. 直通車，比原定時間遲兩個半鐘，雖則係直通，但遲咁多，其實點都唔會揀呢個~

最後決定博一博，揀方案 1，轉車時跑住去轉車，希望趕得切~

開咗車冇耐就查飛，不過查飛要用信用卡登記，可能要對返我當時上網買飛時用嘅嗰張信用卡啦~

好嘞，到咗轉車站，度閘一郁就衝出去，係咁衝係咁衝~
30 秒之後......到咗要轉車嘅月台了......
兩條友即刻爆笑到收唔到聲~ XDDD

又話要行 7 分鐘，其實係咪打錯咗，係要行 1 分鐘呀......

去到 Frankfurt am Main，落緊雨，都費時周圍走，就喺火車站搵嘢食~

Pasta 賣晒，求其買咗兩個包就算，反正都冇乜胃口~
味道還可以~

再買咗杯生果，就返酒店，完結今日行程~