今日行程：
München (慕尼黑)
凌晨一點，走廊好嘈，有人勁大聲講嘢又大聲笑~
相信係嗰幾個西人玩完返嚟啦~
呢啲人真係自私到無可救藥！
隨此之外，外面經常有救護車嘅響聲，又有車係咁響按，嘈到瞓吓醒吓，喺我咁需要休息嘅時候但瞓唔到真係大鑊~
好不容易捱到朝早，喉嚨好痛，亦覺得比噚晚腫，不過不幸中之大幸係冇發燒~
起身望出街，冇乜人，同普通街道沒有兩樣~
唔理咁多喇，再瞓多陣，瞓到夠先出門口~
落咗街，首先搵間藥房買啲喉糖食吓先~
今日 München (慕尼黑) 一日遊，之後夜晚就要搭飛機返香港了~
我哋先去 Marienplatz (聖母廣場)，廣場上有 Neues Rathaus (新市政廳) 及 Altes Rathaus (舊市政廳)~
過去廣場，要搭 Metro U 線，搭車之前，就買張「Airport-City-Day-Ticket (Group)」，咁樣今日我同屎塔兩個就可以任搭區內交通工具，包括埋去機場的~
未夠十點嚟到 Marienplatz，已經好多人~
Neues Rathaus (新市政廳)
Altes Rathaus (舊市政廳)
差唔多到十點，聚集嘅人越嚟越多，相信係因為十點鐘，木偶機械鐘會轉動一次~
我哋每次都會俾呢啲機械鐘吸引，但每次睇完都會覺得無聊......
今次都唔例外，一樣吸引到我哋，都諗住留低睇吓~
不過到最後，未等到就已經走咗~
原因係，滿滿嘅不安感湧上心頭，一多人聚集我就驚，同樣都係怕有恐襲事件~
因為就喺今年(2016年)，德國已經發生過多宗恐怖襲擊事件，實在唔到我唔驚~
我哋出發前都商量過係咪應該取消呢次旅行，不過又覺得，生死有命，中時間中地點嘅機率，其實就好細嘅，咁都中的話，喺香港都一樣有機會因任何事而出事，所以都係照出發，但就必需留意多啲身邊嘅人和事~
所以每逢多人嘅地方，我都會變得敏感~
我敏感到，見到有人將棒狀物掉落垃圾桶，就唔敢再靠近垃圾桶~
花槽呢啲睇唔到入面嘅地方都唔敢行近~
所以最後我就同屎塔講，不如走啦，反正我哋都唔係真係咁感興趣，屎塔爽快地說好，就係咁就走了~
附近仲有兩間教堂，本來係會去埋嘅，不過今日晏咗出門口，所以就唔去喇~
之後就行去附近嘅 Residenz Museum (王宮博物館)~
座落於 Residenz Museum 旁嘅美麗建築係 Residenztheater (王宮劇院)~
Residenz Museum 好大，好多間房，非常多嘢睇~
不過佢啲指示好差，成日行行吓都唔知點行，結果，為咗唔想有遺漏，就有機會行返去啲已經行過嘅地方，好嘥時間~
行完 Residenz Museum，就去附近嘅 Odeonsplatz (音樂廳廣場)，順路經過嘅一個廣場~
經過 Odeonsplatz 後，行多 5 至10 分鐘就到 Ägyptisches Museum (埃及藝術國家博物館)~
Ägyptisches Museum 呢邊有好幾間博物館及美術館，我就喺當中揀咗一個嚟參觀~
我揀 Ägyptisches Museum，主要係因為屎塔對埃及呢個地方嘅文化幾有興趣~
諗住沿路搵地方食吓嘢，不過一路都揀唔啱，越近博物館就越少選擇~
直至行到一間食肆都冇，又懶得返轉頭，反正唔肚餓，就唔食嘢住~
Ägyptisches Museum (埃及藝術國家博物館)
賣飛嗰個工作人員話我知學生有優惠......
可能外國人唔係太識睇樣去分辨亞洲人嘅年齡，就好似有時我都唔識睇外國人一樣~
呢度個 audio guide 幾好，行到去展品前，只要撳 PLAY 就可以聽到相關資訊，全自動感應~
當然，呢啲唔係咩新科技，只係唔係度度都係咁，有好多仲係要手動對應嘅~
呢度啲工作人員好盡責，影相唔俾開閃光燈就一定，連對焦時發出嘅暗紅燈都唔可以有，佢會要求你用手遮住~
呢個要求，我自己真係從未遇過，但我覺得為咗保護展品，呢個要求都好合理~
展品方面，都算幾多嘢睇，而且仲幾好睇~
旅程尾聲，有兩款德國牌子嘅鞋想買，睇吓喺德國會唔會多啲款同埋平啲~
同時，喺呢幾間專門店附近，有間教堂同其他建築融為一體，內部相當漂亮的~
去教堂途中，見到間土耳其烤肉店，求其買咗兩個唔知咩包，好食！
Asamkirche (阿薩姆教堂)~
München (慕尼黑) 隨影~
鞋呢，一係冇睇啱，一係就同香港價錢差唔多，咁就無謂拎啦，最後乜都冇買~
之後就搭車返旅館攞返啲行李，再搭車去機場返香港，完結今次旅程~
德國，完全想像唔到係咁靚，真係井底之蛙！
而且治安仲非常好！(恐怖襲擊就唔計啦，，唔係本土嘅治安問題)
最值得一提係駕駛文化，係我去過嘅地方嚟講最正嘅！
每一位駕駛者都冇做一啲會令人誤會嘅行為，你完全估到你附近嘅車下一步想點~
駕駛態度同技術都相當好，係普遍都相當好~
應讓就讓，唔應讓就唔讓，讓/唔讓嘅，同等緊人讓嘅都好清楚個環境，完全冇人會誤會~
仲有一樣嘢令我印象極為深刻，佢哋喺高速公路，如果要急剎，係會一路剎車一路向左偏(當然係判斷自己停得切嘅時候)，同一條線嘅車，全部都係咁做~
我估咁做係可以即時騰出空間，讓剎掣不及嘅車可以走右邊嘅空間，咁樣就可以避免意外，真正原因係咪咁樣就唔清楚~
期望將來有機會遊覽德國嘅北部~
至於病況，喺德國時仲未算好差，不過返到香港就嚴重好多，病咗兩個星期先叫好返啲......算係好好彩喇~
留言列表
