2017.03.15 浅草、谷中、品川、台場 (日本第一天)－《瞬間看地球》Stranger's Blog

今日行程：
雷門 → 仲見世通り(商店街) → 浅草寺 → 吾妻橋一帶(影 Sky Tree) → 淺草文化觀光中心 → 浅草花やしき / 花屋敷(遊樂場) → 貓町、谷中霊園 → カフェ猫衛門(午餐) → 貓町(閒逛) → 根津神社 → 観音寺築地塀 → 夕やけだんだん(夕陽階梯) → 谷中銀座(肉のサトー、肉のスズキ) → MariCar → 博多天神(晚餐) → チェックイン新橋(旅館)

落機後，出咗機場，都幾凍，仲落緊雨~
我哋首先買張 suica (西瓜卡)，再搭車去旅館寄存行李先~
之後就去「すき家」食個早餐~

今日第一站「雷門、仲見世通り(商店街)、浅草寺、吾妻橋一帶(影 Sky Tree)、淺草文化觀光中心」

時間尚早，雷門呢度人唔多~

仲見世通り商店街就未開，不過醉翁之意不在酒~

喺呢度已經見到「Sky Tree」
不過時雨時停，今日都唔知有冇機會見到頂~

由仲見世通り行到盡頭就係浅草寺~

我哋就好少會求簽嘅，屎塔唔知做乜心血來潮，話想求簽，唔係想求姻緣卦......

係咪衰呢，好日唔抽，一抽就抽中「凶」！
不過抽中凶都唔緊要，呢度有教點做~
就係將凶簽繫在架上，咁就可以將「凶」留低，唔會跟身~

睇睇時間，淺草文化觀光中心未開，就去吾妻橋一帶行個圈先~

終於有一刻係見到頂~

Well......

行返去淺草文化觀光中心，仲有十分鐘先開~
喺門口等，又落雨又凍~

我哋嚟文化中心，不為文化，只為上佢個觀景台~
不過觀景唔算好好，還可以吧~

行返落仲見世通り，經過雷門，開始多人~
好多舖頭都開咗，不過我哋都預咗冇咩啱睇，就當潮聖吓~
應承咗幫人買藥，經過藥店就入去搵吓~

下一站「浅草花やしき / 花屋敷(遊樂場)」
呢個遊樂場夠晒懷舊，勁有荔園 feel~

我哋兩個，對機動遊戲嘅興趣唔算好大，主要係想感受吓呢度嘅氣氛~

嚟到遊樂場，仲有 15 分鐘先夠鐘開門，又要喺門口吹風......

初時得我哋兩個等，後來嚟咗一個女仔~
一個女仔嚟玩咁有癮？唔通係返工嘅？

呢度要先俾入場費，場內各項遊戲仲要另外收費，不過唔係收現金，係收代用券~
呢部機就可以將血汗錢換成代用券......

收費算係偏貴，玩幾樣感受吓氣氛都 OK 嘅~

過山車就一定係膽嚟~
初時仲驚落雨會停駛，好彩係繼續運作~
喺呢個咁逼夾嘅地方玩過山車又幾過癮~ XDDD

諗住玩呢個(踩單車)可以圍住個樂園參觀吓，兩條友力水都唔多滴，踩到死吓死吓，中晒伏~ XDDD

只要有鬼屋，屎塔一定會玩~
不過入面禁止攝影的~
玩後感就普通啦，都有趣嘅~

諗住玩忍者屋，不過冇開~

之前睇過有摩天輪嘅，嚟到就唔覺有，摩天輪喎，有的話唔會睇唔到啦~
上網搵吓相，對比返個位置，一啲摩天輪嘅痕跡都冇，可能拆咗好耐~

個場好細，但能夠容納咁多遊戲，設計嗰個真係好嘢！

場內隨影~

下一站「貓町、谷中霊園」
據說呢度有好多貓咖，當然要嚟行吓啦~

不過嚟到行咗好耐，只係離遠見過兩隻貓行過，唔知係因為太凍定因為落雨，冇乜貓踪~
鴿反而有好多，不如叫鴿町仲貼切......
靈園相就唔放咁多喇~

下一站「カフェ猫衛門(午餐)」

ハーブチキングリル(雞扒)

サーモンの香草焼き(三文魚)

屎塔話兩樣都好食，我就覺得所有嘢都冇味道~

呢頭附近人都冇個，唔知點維持......

附近有間「貓町 Gallery」，今日係定休日，預咗佢唔開，不過就喺附近，照過去睇吓~
結果係冇開~

今次個行程，係屎塔 plan 嘅，佢 plan 咗會去「菊寿堂いせ辰谷中本店」同「あめ細工吉原」兩間商店，不過淨係行咗前者，後者話唔去~

附近隨影~

下一站「根津神社」
想去呢個神社，除咗因為想參觀吓佢嘅千本鳥居，神社本身都係幾靚嘅~

下一站「観音寺築地塀」
呢個景點比較近較早前行嘅靈園，不過唔知咩原因冇去到，而家行吓行吓就嚟咗~

下一站「夕やけだんだん(夕陽階梯)、谷中銀座(肉のサトー、肉のスズキ)」
谷中銀座呢邊，有兩個出名地方~
一個係夕陽階梯，橙紅嘅夕陽慢慢照射到階梯上，好不漂亮~
一個係肉餅，有間肉餅店嘅肉餅特別好食~

夕陽呢，就唔駛諗咖喇，除非我哋可以跳到去厚雲之上啦......
再講，有個傳聞係，夕陽嘅航道被新建嘅高樓阻擋，夕陽已經照射唔到落階梯，咁，夕陽階梯 - 夕陽，就只剩階梯......
至於條階梯係咪好靚就......各花入各眼嘞......

其實而家就仲早，未日落，不過都唔駛等啦，走人~

之後就向前行，去搵傳說中嘅肉餅店~
去到肉餅店，屎塔又話冇乜胃口，唔係好想食~
咁就繼續行吓啦~
不過行街呢，我哋都冇乜興趣，特別容易攰~
時間又唔早唔晏咁，冇咩地方好去~
諗諗吓，今日著嘅衫算係僅僅夠，而今晚嘅活動，體感溫度一定比而家低，於是我哋決定返旅館準備吓，順便休息吓，反正今晚嘅重點節目，都要啲體力嘅，返去儲吓電都好~

臨離開前，都有買到肉餅~ XDDD
屎塔話好食，我又覺得冇乜味~
「肉のサトー、肉のスズキ」

搭車返旅館時，我哋兩個都瞓著咗，直至到咗站先突然醒，好彩落得切車~
係咁咖喇，我哋一行街就特別攰~
落咗車見到藥店，又入去幫人睇吓買唔買想買嘅嘢~

下一站「MariCar」
MariCar 成個概念就係「孖寶賽車」，駕駛嘅係 Kart 仔，著 Mario 系列嘅 costume，直接揸上馬路~
揸得上馬路，就當然唔會有賽車情節，更加唔會掉蕉啦~ XDDD
MariCar 絕對係我哋今次呢個旅程嘅重頭戲，非常期待！

MariCar 喺日本有幾個據點，主要係東京、大阪同沖蠅~
而佢喺東京係有最多分店，我就揀咗去品川呢間~
仲揀埋夜晚同埋最長時間嘅 course，應該好正！

去到 MariCar，喺門口見到啲車已經好興奮~

啲工作人員(有西人有日本人)個個都好 hyper 咁，我見佢哋啲對答又好正常先唔會誤會佢哋啪咗嘢~
去到確認咗預約身份，之後就搞保險同免責聲明嘅手續~

搞完手續就揀衫，屎塔揀咗 Mario，我揀咗 Luigi，其實都冇刻意揀，主要係睇邊件啱 size 就揀邊件~
拍我哋一齊玩嘅，仲有三個外藉男士，有兩個好高大，著起套公仔衫勁搞鬼~

之後就一齊行去某處橋底，已經準備好六部車~
集合好就開始聽領隊(外藉男性)講解~
呢啲 Kart 仔同平時喺場內玩嘅有少少唔同，所以真係要留心聽~
嚟到呢刻我先知，原來屎塔從來未玩過 Kart 仔~
Kart 仔同平時揸車，喺操控上當然差天共地，不過識揸車嘅，應該都好快上手~
各人都試過車，冇問題就可以出發~

領隊行最前，我同屎塔中間，三個大隻西人就行最後，咁樣領隊就可以睇得到咁多人~
過程中，有時要一條線跟住行，有時要兩部兩部平排行，留意領隊手勢就可以~

開車後進入馬路，附近冇乜車，個感覺幾正~
再去咗啲繁忙道路，真正感覺到危險~
啲 Kart 仔車身咁矮，唔好講大車，其實同私家車平排，佢哋都未必睇到我哋~

一直行到去某個唔太繁忙嘅街道，就靠埋一邊停車，休息~
初時我都唔知呢度係邊度嚟，不過一上咗個商場就知道~
因為我見到「自由神像」，呢度係「台場」~