今日行程:
【Zermatt】 → 「偽」冰河列車 → 【Chur】Altstadt(Old Town) → Christkindlimarkt Chur(Christmas Market Chur) → Ristorante La Meridiana(Dinner) → Hotel Franziskaner(Accommodation)
今日第一站:「偽」冰河列車
冰河列車(Glacier Express) 係瑞士三大景觀列車之一,直通車由 Zermatt → Chur 都唔駛轉車~
不過我哋到嘅呢日,Glacier Express 暫停行駛,所以我哋就搭唔到~
但就可以刻意安排乘搭普通列車,行駛返同 Glacier Express 同一樣嘅路線,我自己稱之為「偽」冰河列車~
要成就呢條路線,就要搭四段火車(即係轉三次車),路線如下:
Zermatt → Visp
Visp → Andermatt
Andermatt → Disentis/Mustér
Disentis/Mustér → Chur
冰河列車行駛時間約為八小時,而「偽」冰河列車行駛時間因應乘搭時間影響轉車等候時間不同而會有所不同,約六至八小時不等~
冰河列車為直通車,但行駛時間比「偽」冰河列車需時長,係因為冰河列車係景觀列車,行駛速度會比較慢~
我計劃中,今日係搭 09:37 由 Zermatt 開出嘅火車,為嘅,係俾兩次機會(昨今兩日)睇金黃 Matterhorn~
由於噚日已經成功睇到,亦絕對唔會再睇,所以今日可以搭早啲嘅火車離開,咁就可以早啲到達 Chur~
再講,今日天氣好差,一早就落緊雪,想睇都冇得睇~
而嚟緊幾日天氣都唔好,噚晚或今日先到埗嘅,唉......
準備好出門,為咗可以搭早啲嘅火車走,我同屎塔分頭行事,我去超市買午餐,屎塔搞 check-out~
我就成功完成咗我嘅工作,屎塔就乜都冇做過,皆因過咗八點(接待處開八點)都冇人喺度~
同場有另一個女仔喺度等,佢都係 check-out 完就搭火車走~
大家都覺得咁等法唔係辦法,我哋用紙寫低留言,放下鎖匙就離開~
原本諗住搭 08:37 嘅車走,去到火車站,有班 08:13 嘅車就開,一樣經 Visp,咁梗係搭早啲呢班~
上咗車再查吓啲轉車時間,妖,無論搭 08:13 定 08:37 嘅車,喺 Visp 都係要等到 10:08 先有啱嘅車走~
即係我哋有成 46 分鐘喺 Visp~
喺我做功課時,對 Visp 呢個站特別有印象~
喺某個瑞士旅遊谷,近幾個月嚟,所有人分享被偷財物嘅事發地,只有一單並非發生喺 Visp 火車站~
嗰單係發生喺 Spiez 火車站,其他全部都係發生喺 Visp 火車站~
而小偷個樣(共有三人),亦俾人影低咗分享喺谷~
亦有唔止一個受害人報過警同通知火車站職員~
但係呢三個小偷到我出發前仍然有人見到佢哋喺火車站搵食......
我只係印象深刻,驚就真係冇驚過~
我個人嚟講都算謹慎,想成功偷到我嘢唔係容易~
屎塔出發前買咗個秘密貼身小包,每次佢自己要攞嘢都好困難,俾人成功偷到嘢嘅機會係零呀~
偷真係唔怕,明搶或者打劫就冇計~
話需如此,始終不宜久留,但我哋有成 46 分鐘喺 Visp......
不過係咪因為避開小偷都好,有成 46 分鐘,梗係離開火車站出去行吓~
出咗火車站,發覺 Visp 冇咩好睇冇咩好行,最後走咗去行超市~
我哋喺超市買咗條圍脖俾 Maggie~
Maggie 係我哋喺英國嘅舊同事,佢因為腳傷被迫退休~
(後記:Maggie 收到圍脖好開心,睇得出佢真係開心,唔係扮的)
呢趟「偽」冰河列車,我哋用咗差唔多七小時完成~
不過由於今日天色比較差,影相反光都真係幾嚴重~
其實普通列車係可以開窗嘅,不過咁嘅天氣,保持住開窗係絕對唔可能,除非得我哋兩個啫~
遇有靚景先開窗都係唔可行,一來靚景有時係突然出現,開得窗嚟都冇咗;二來搭七個鐘車,影親相都開一次又閂一次窗?我唔知其他人啦,我自己一定唔會咁做~ XDDD
再講,我哋影相主要係為留個記錄,作個紀念,有影到就好~
網上有說 Andermatt 至 Chur 係精華,對我嚟講就唔係~
我會話 Visp 至 Andermatt 嘅後半段至 Andermatt 至 Chur 嘅前半段係精華~
經歷呢段精華,就好似喺戲院睇緊一套好好睇嘅電影,連洗手間都唔會去~
而近 Chur 前半小時就開始冇咩睇~
左右都有靚景,我個人覺得坐右邊遇到靚景嘅時間較多~
「偽」冰河列車隨影~
下一站:Chur
Chur 據說是瑞士最古老城市,公元前 4500 年已經有人在這居住,甚至有說找到公元前 11000 前人類嘅活動遺蹟~
到埗後就行去旅館先~
沿途隨影~
呢間旅館,我本身只係 book 咗一晚,但由於行程嘅改動,我需要 book 多一晚~
咁好自然,一係就咁 book 多一晚;一係取消本身嗰晚,再 book 兩晚~
由於時間關係,基本上所有旅館都貴咗,呢間都唔例外~
如果我取消再 book,就會貴咗,所以最後決定就咁 book 多晚算~
不過咁樣做就會有個風險,就係兩晚唔同房~
我哋 check-in 時,對方好似有啲緊張,好似好唔熟手咁~
所以我哋都唔打擾佢,等佢搞掂第一晚先~
最後收多咗錢(經我 book 時用嘅信用卡),我哋同佢講,佢又好似唔明咁~
當我哋俾個 booking 佢睇時,佢先明我哋講咩,又叫我哋等等~
佢手忙腳亂咗一陣,就以現金退返收多咗嘅錢俾我哋~
佢俾我哋嘅感覺係,佢知道收多咗錢,就算我哋唔問,佢都會退返錢俾我哋,佢係知道並且會做的~
只係可能溝通上比較困難,佢先冇主動同我哋講~
唔算太順利咁搞掂第一晚,我哋而家最想做嘅,係要同佢講我哋仲有第二晚,同想住埋同一間房~
無論佢想我哋而家俾埋錢定聽日再搞一次 check-out 都冇問題,主要係要俾佢知道啫~
不過真係好難講得佢明,佢叫埋第二個人嚟幫手都係溝通唔到~
搞到佢叫我哋入去佢嘅工作間,佢 show 個電腦螢幕俾我哋睇,示意我哋只係 book 咗一晚~
我哋就梗係即刻喺螢幕上指俾佢睇,第二晚都有我哋嘅 booking,佢先知我哋講咩~
最後係可以同一間房,聽日再做一次 check-in~
咁就簡單,可以聽日落嚟食早餐時搞埋~
期間有件趣事~
Chur,佢哋嘅讀音係「箍牙」,而屎塔係姓 Chu 嘅,佢叫屎塔做「屎塔箍」~XDDD
上房放低啲嘢就出去行吓舊城區~
舊城區好細,但幾靚,係好典型嘅歐式古城~
行完舊城區就去行聖誕市集 Christkindlimarkt Chur~
聖誕市集燈飾算幾靚,現場有人播聖誕歌,亦有人現場唱聖誕歌(播同唱在不同地方),好有氣氛,不過人流唔算多,多啲氣氛會更好~
而家下午五點幾,要行嘅都行晒,冇咩做不如去食晚餐,早就早咗啲,都 OK 嘅~
諗住去嗰間餐廳叫 Restaurant Drei Bünde,開 17:30~
我哋 17:3x 到,入面得兩個客,侍應話冇 book 檯冇位~
嘩,咁旺場?條街數埋唔夠五個人(包括我哋),真係冇諗過會冇位~
呢間冇位,就去原本諗住聽晚先去嗰間,嗰間其實就係住緊間旅館嘅餐廳~
不過我哋沿路都會留意其他餐廳,啱嘅就入去,冇啱嘅就返旅館餐廳~
行經一間餐廳叫 Ristorante La Meridiana,睇睇 menu,好似都啱食,就走入去~
侍應問有冇 book 檯,我哋話冇,佢就走去查電腦,都查咗起碼兩三分鐘,唔通又冇位?餐廳入面一個客都冇,而家又六點都未夠......
侍應走埋嚟帶我哋入座,沿路真係張張檯上面都有留座牌,得兩三張細檯冇咋~
真係超奇怪,條街幾乎一個人都冇,但啲餐廳又 book 滿晒咁滯......
屎塔點蘋果汁時,侍應反問問題,但佢表達唔到,佢一直用我哋聽唔明嘅語言,偶然用單字英文,但我哋完全估唔到佢問咩~
佢好落力,但我哋真係唔明,之後佢講咗句:Aye english......
我哋問佢係咪要唔要冰,佢又話唔係,經過一輪溝通,大家都放棄,總之蘋果汁啦~
Chur 本身係古城,亦係瑞士三大景觀列車之一嘅 Glacier Express(冰河列車)當中其中一個大站,同時亦係瑞士三大景觀列車之一嘅 Bernina Express(伯連納列車)嘅首/尾站~
Chur 絕對係一個旅遊城市,照計喺度做嘢嘅人會接觸好多講英文嘅人,不解~
Apple Juice 偏甜,還可以~
Hot Chocolate,同樣係俾杯奶加自己落粉,呢杯好飲過之前喺 Iseltwald 飲嗰杯~
佢仲俾咗樽水我哋,個樽成個比薩斜塔咁,幾特別~
Filetto di Cervo
Venison filet from our region with mushroom sauce, safron risotto and vegetables(170g)
鹿肉煮到接近 well done,但肉質仍然相當嫩,肉味夠濃,好食!
我冇食過覺得好食嘅義大利飯,可能自己冇去過好嘅餐廳,但呢碟義大利飯係幾好味,絕對改變咗我對 Risotto 嘅睇法~
Filetto di Merluzzo
Cod fillet with almonds, seasonal vegetables, fried potatoes
魚肉夠嫩,味道亦唔錯~
呢餐相當滿足~
留言列表