《瞬間看地球》Stranger's Blog

 今日行程：
【秋田県】田沢湖 → かしわ家食堂(午餐) → 秋田內陸線八景〈比立內橋樑〉 → 秋田內陸線八景〈大又川橋樑〉→ 阿仁合駅 → 内陸線資料館 → ふれあいショップ ひまわり → 秋田內陸線八景〈荒瀬川橋樑〉 → 秋田內陸線八景〈森吉山眺望〉 → 北秋田市コンベンションホール四季美館 → 秋田比内や 大館本店(晚餐)《住宿：とわだこ賑山亭》


今日先去田沢湖，沿途都係積雪，呢邊明顯係凍啲~
本來見到雪都有啲開心，唔再係噚日咁，只有雨~
但行到中途就落雨，時大時細~
再近啲田沢湖就開始落雪，仲要唔細~

沿途隨影~

圍繞住田沢湖，我有幾個地方想去，而家去田沢湖白浜展望台先~
去呢個展望台，車可以泊喺春山第一駐車場，呢度有洗手間，可惜冬季唔開放~
但就有指示話可以去春山第二駐車場~

沢湖白浜展望台
田沢湖嘅冬景，如果天色好及湖面平靜，湛藍色嘅湖面，舖滿白雪嘅山峰，相當漂亮~
唔係今日咁囉，陰鬱嘅天色及波濤洶湧嘅湖面，相當唔漂亮呀~

御座石神社

御座石神社の鳥居
建於湖邊嘅鳥居，別有一番意景~

鳥居隔籬有個觀景台，不過積雪好深，而且都知道風景同之前嗰個唔會有咩分別，就冇行過去~


漢槎宮(浮木神社)

田沢湖 たつこ像

遊覽完田沢湖就去食嘢~
かしわ家食堂
非常家庭式嘅一間餐廳~
似係父母加個女咁樣經營~


鍋焼きうどん(冬のみ)
上檯時仲係滾緊(唔係有火煲住)，夠晒熱~
個烏冬幾好食，湯底好香，反而雞肉就冇乜特別~


カツ丼(鹿児島県產黑豚)
蛋汁好好味，豬肉都幾有肉味~


睇睇時間，有啲趕，嗱嗱聲埋單走人~

秋田縣裡面，有一條火車線叫秋田內陸線，其中有八個地方被選為鐵道攝影點，稱秋田內陸線八景~
我哋知道，一定唔可能影到人哋咁靚，天時、技術、器材，後兩者我哋冇，天時呢，以今日嚟講都係冇~
不過都想去試吓，留個記念~
要夾火車時間去影相，一日之內係冇可能影得晒八景，我揀咗當中四景，時間上係夾得到~
不過而家有啲趕，唔知趕唔趕到去第一個地方~

沿途隨影~

第一景叫〈比立內橋樑〉
嚟到現場，早到咗成差唔多十分鐘~
不過其實個環境都唔係咁理想，真係高手先可以影得好~

喺條橋度有兩個位~
一個近景冇咁多樹，比較開揚，但有幾條電線橫跨，所以啲人話要扒喺地下影嚟避開電線~


一個比較容易避開電線，但近景遠景都唔好，好唔理想~
(後記：只有冬天先會有呢個疑慮，因為其他季節，呢個位會俾樹葉遮住晒，諗都唔駛諗~)


其實後者基本上都唔駛諗，一定係前者~
就喺呢個時候，我哋聽到火車聲，頂！火車到喇！但我哋喺後者呢個位，同埋部火車行得勁快......
屎塔夠手快，影到架火車囉......咁我都唔差，睇到架火車~


好失敗，不過又冇咩咁重要，都係一笑置之~

而家就去第二景〈大又川橋樑〉
今次呢個好影好多，又近又開揚~
之前都有聽講過部火車喺條橋上面會行得慢啲，但真係估唔到，係慢成咁，成件事好似慢動作咁~


距離第三景，時間上有超過一個鐘，所以我就安排咗去阿仁合駅/内陸線資料館/ふれあいショップ ひまわり行吓，全部都喺阿仁合駅範圍~

阿仁合駅

内陸線資料館

ふれあいショップ ひまわり

阿仁合駅對開有幅好靚嘅地圖~


時間仲有啲早，不過都冇乜嘢好做，就早啲過去第三景~

第三景叫〈荒瀬川橋樑〉
我最鍾意呢個，但非常可惜，行人路積雪及腰，根本冇可能行到入去，放棄~
我而家知道點解，網路上非常少〈荒瀬川橋樑〉嘅冬景相~


網絡圖片~


本來第四景係未必趕得切，而家唔駛等第三景，可以早啲過去~
沿途大雪非常~

第四景叫〈森吉山眺望〉
影呢個景，有三個地點可以影，其中一個似係人哋私人地方，就無謂入去~
我哋揀咗條小路，雖然因為積雪關係，唔可以行得好入，但都 OK，反正我哋都係貪得意，又唔係專業~
同埋今日天氣差，係眺望唔到森吉山的......
火車車速唔算慢，但冇第一景咁快~


我自己都幾鍾意呢張~


完成秋田內陸線四景，距晚餐時間又有點早，所以就安排咗去北秋田市コンベンションホール四季美館行吓~
普通手信店，都買咗少少嘢~


時間仍然太早，查吓 google map，決定去 Aeon 行吓~
中途見到藥妝店，入咗去買返之前 tax free 入咗袋唔用得但又想用嘅嘢~

俾錢時，今次我哋主動要求 tax free，該位女士就帶我哋到第二個櫃檯搞，可能費事阻住正常櫃檯吧~
該位女士似係唔識搞，要請教同事~
兩位女士一齊搞我哋嘅 tax free，到最後入袋時，佢哋都唔係好識點封口，結果要拎過第二個袋嚟用~
我睇佢哋都好努力嘗試同埋都嘗試得好開心，一路搞一路笑，其實我哋見到佢哋咁樣，我哋都覺得好歡樂~
之後佢哋問我哋係咪韓國人，我哋話我哋係香港人，佢又問我哋係咪嚟滑雪~

行完藥妝店，比預先計劃好嘅時間仲要遲，當然唔會再去 Aeon，直接去食晚餐~

餐廳隔籬有個收費停車場，一入去，就令我想起多年前進入佐敦德興街嘅黑洞停車場~
不過其實比起黑洞停車場，呢個又唔算係啲咩，只係個格局有啲似，但就冇咁窄~
泊好車走去攞飛時，佢話食完飯簽個名，就可以有一個鐘免費~

餐廳名叫秋田比内や 大館本店，主打比內地鷄親子丼及米棒鍋~


就叫主打呢兩樣嚟試吓~

比内地鶏親子丼
個蛋汁勁香，好好味，反而出名嘅比內地鷄肉就好似冇乜特別，可能我唔識食啦~


きりたんぽ鍋
個米棒味道偏淡，但食落又幾鍾意~
湯底又有份香甜，相當不錯~


食到一半，睇睇時間，不好了~
今日行程本來好鬆動，就係因為太鬆動，有點不太在意，結果搞到而家比預期晏咗好多都唔知~
今晚間旅館最遲 check-in 時間係 21:00，時間上真係有點趕，不過如果一切順利，應該冇問題嘅~
嗱嗱聲食埋走人~

之前喺香港買電話卡，問咗好幾間都冇可以打電話嘅卡，全部只有數據，所以都冇得預先打電話俾對方~

車泊咗個半鐘，免一個鐘的話，應該要俾多一個鐘~
不過埋到去俾完飛，佢話 OK 了，又會咁嘅~
是旦啦，又趕時間又溝通唔到，佢收我兩個鐘我都會照俾，更何況唔駛錢~

行經便利店，我覺得趕得切嘅，所以就去咗便利店買宵夜~
都真係用咗幾分鐘就出返嚟繼續上路~

一路行，離開咗市區原來要行山路~
雪越落越大，沿路一架車都冇，全程山路都冇街燈，當然冇人除雪~
路面尚有好多車輛行過嘅痕跡，照跟返啲痕跡去行都冇乜大問題，係雪地抓地力真係好差，經常跣胎，但小心啲的話，還好~

直至去到路上乜嘢痕跡都冇晒，明顯感覺到積雪越嚟越厚，無一刻係有足夠抓著力，我就知道我哋而家面對住好大問題，可以話生死攸關~
現場漆黑一片，四野無人，雪越積越厚，再係咁落去，四驅加雪胎都幫唔到手，要履帶車先應付到~
不過至少部車而家係滿油，真的被困都唔怕凍死~

時間緊迫，唔止因為 check-in 問題，更因為要同風雪競賽，我要喺積雪深到再行唔到之前離開山區~
但我又實在唔能夠開得太快，連直路都冇足夠抓著力，更惶論有無數彎角嘅山路，仲有大雪關係，只有超低嘅能見度~

都叫做揸咗咁多年車，呢刻我要相信自己，我要喺我認為我有嘅能力範圍內盡量開快啲，我要盡快帶屎塔離開~

行行吓，個水撥開始刮唔清擋風玻璃上嘅水，仲要係啱啱好喺視線水平一大片刮唔清，真正雪上加霜~
我停咗車，落車檢查個水撥，唔落車都冇咁驚，一腳踏落啲雪度，原來已經好厚雪，而我幾乎肯定，前面嘅雪只會越嚟越厚，我一定要盡快離開山區道路~
其實我都唔知可以點樣檢查個水撥，但又唔可以咩都唔做，叫做抹過吓個水撥，但完全冇用~
我而家一係挺直條腰，試圖令水平視線高過抹唔清嘅部份，但我發現咁樣係睇唔清條路，開高燈係有幫助，但同時亦因為風雪關係，反光太利害，嚴重影響視線~
一係就烏低身，低過抹唔清嘅部份，但咁做係極之疲累，而且我目標係喺能力範圍內揸到最快，咁樣揸法係好唔方便，會大大咁影響反應~
前者睇唔清，俾你識飛都冇用，所以只能選擇後者~

超級極度專注咁行咗好一段路，面前我遇一個畫面，呢個係我成晚最驚嚇嘅畫面~
喺一彎角處，我見到啲雪多到已經好似一個山坡咁覆蓋咗另一邊行車線，意味住前面可能剩返一條行車線，如果係的話，我唔可以揸得太快，遇有對頭車係一定停唔切，雖然我都唔覺得會有對頭車~
剩返一條行車線，都仲可以行，如果雪多到連一條行車線都冇呢？我唔敢諗，我只可以繼續高度專注咁走落去，我要盡快離開山區，我要盡快帶屎塔離開山區~

幸好，只係嗰個彎角積雪多到覆蓋咗成條行車線，過咗隻彎，另一邊行車線漸漸咁出返嚟，個心叫做定返啲~

個水撥呢，我之前開到最快，希望佢可以撥返走啲水，初時真係冇用，但後來我發現係有用，不過開最快咁撥都要成十分鐘先可以撥走啲水~
(後記：返到屋企，我發現我自己部車都有咁嘅情況，原來係因為個水撥有啲冰喺上面，微微咁升高咗個水撥，所以抹唔清啲水，當啲冰溶咗之後，個水撥就正常返晒~)

當個水撥正常返之後，我又熄咗佢，因為大風大雪，其實好少雪可以停留喺擋風玻璃表面變成水，係咁撥反而阻礙視線~
不過當我熄咗佢之後，幾分鐘後再用，佢又已經回復之前撥唔清嘅狀況，自呢刻開始，到旅館之前，我就再冇熄過個水撥~

幸運地，我哋成功離開山區，返到平路嘅道路，但環境並沒有比山區好多少，只係知道唔喺山區，個心定返啲，但情況一樣惡劣~
再幸運地，我哋成功達陣，21:00 係最後 check-in 時間，我哋到達門口時間為 20:59~
我都當然知道，冇過鐘唔代表咩事都冇，最後一刻先到係好X老土嘅事，冇工作人員會鍾意咁樣~

我將車直接停到最近大門嘅位置，屎塔趕去 show up 先~
之後我就拎住行李進入旅館，見到屎塔後，佢話冇人喺度~
現場雖然燈火通明，包括商店都係，但就一個人都冇~
檯面有個鐘，屎塔話佢撳過，但都係冇人應~
我哋試過用檯面電話打電話，都係冇人聽~
喺無計可施嘅情況下，我又撳多次個鐘~
兩分鐘後，有人出現了，她極力做好表情管理，但其實佢不高興嘅心情，係表露無遺~

我當然知個問題喺我哋度，難怪對方唔高興~
我哋兩個前後道歉咗五次都有，對方面色先冇咁難睇~
我做過，亦都做緊服務性行業，但我自己真係唔會俾面色客人睇~
不過我唔會咁做，係我個人嘅做法，又唔代表其他人都要一樣~

安頓好之後，我必需檢視往後嘅行程，要避免今晚嘅事再發生~
幸好，往後嘅行程都應該唔會好似今晚咁，不過本身今日嘅行程都唔係咁緊又真嘅，看著辦吧~

睇睇鞋櫃存放嘅鞋，今晚呢間旅館，我估計埋我哋，只有五個人入住~
喺旅館入面，我見到三個女仔，我估佢哋係浸完溫泉返上房嘅，所以，好可能只有兩組人入住~
呢個時候，可能真係東北嘅淡季~

今早東北新幹線疑似因電纜問題停駛，日半前我哋先搭完......