《瞬間看地球》Stranger's Blog

二人來回機票連稅：HKD $2786 (不及上年低，不過做人唔好咁貪心，呢個價已經抵到爛！)
車揸足六日(連安心保)：JPY $19782 (趕不及 40 天割引嘅優惠，呢個價係 30 天割引，一樣勁抵！)
晚酒店：JPY $52200
二人總駛費(唔計租車、酒店)：約 JPY $80000

二人玩足八日，唔駛 HKD $20000，租足六日車、食石垣牛、食阿咕豬、搭船過座間味(二人來回已經近 HKD $1000)，其實唔計呢啲比較高價嘅消費，沖繩嘅駛費絕對唔貴，真真正正成為我心目中嘅旅遊天堂！

沖繩嘅駕駛環境非常舒服，遇過嘅人，99% 嘅駕駛態度都好好，好禮讓！

儘管龜速舞晒龍頭都好(唔係我......)，唔會有人催促、逆線扒頭，一架跟一架慢慢行，好正！
佢哋好似冇咩快線慢線嘅概念，行得慢死行快線都冇人會覺得有問題，可能當地人真係冇呢種概念的~
佢哋又比較少切線，行開果條就果條，唔會話見到邊條少車就過去果條咁~
佢哋俾人讓會表現得好感激，一路點頭一路入線，之後仲會著兩吓死火燈或輕按兩吓 horn 以表謝意~

租咗部三菱 Mirage，999cc，力水真係差，不過出奇地慳油！一升行成差唔多 19 km，好利害！
最鬼煩係佢個 ECO mode，一踩停部車就自動熄匙，塞車或小路出大路果時真係多得佢唔少，好彩可以關嘅姐，不過每次撻匙都要手動關，成日都唔記得......

今次最北去咗辺戸岬；最南去咗喜屋武岬；都叫做環島咁滯，全個旅程行咗 973 km，夠晒過癮！
其間都行咗好多唔係好敢前進嘅路，可幸最後都有驚無險！

沖繩嘅洗手間真係超乾淨，係無論餐廳嘅，定係去到偏遠冇咩人到嘅地方都一樣咁乾淨，真係好嘢！

今次用嘅 GPS，我全程用自己製造出嚟嘅 MAPCODE 去導航，準到不得了！99% 都去到想去嘅地方！
點解有電話唔用呢？因為有少部份地方真係搵唔到電話號碼，就算有都只係負責管理嘅地方，並非真正想要到嘅目的地，所以就自製 MAPCODE~
同埋都有少少想法想挑戰吓個 MAPCODE 係咪咁準！
值得一提嘅係，今次沖繩自駕，喺 google map 睇嘅車程時間，同現實有較大出入，一定要比 google map 所顯示嘅時間預多啲，相差可以有 30% 咁多！
我去辺戸岬就係一個例子，google map 話要一個鐘，但 GPS 話要個半鐘！

呢八日，天色多數都差，有陽光嘅時候好短，下次都唔知揀咩時份去好，春天怕梅雨季，秋天夏天冇得觀鯨，冬天天色又差......
下次再算！
沖繩，會再見的！

PS. 返到香港喺街見到啲車，咁大部嘅......