《瞬間看地球》Stranger's Blog

今日主要景點：

Florence

Battistero di San Giovanni (聖喬凡尼洗禮堂)

Cupola della Basilica di Santa Maria del Fiore (聖母百花大教堂圓頂)

Campanile di Giotto (喬托的鐘樓)

Basilica di Santa Maria del Fiore (聖母百花大教堂)

Nerbone (餐廳)

Piazza della Signoria (領主廣場)

Galleria degli Uffizi (烏菲茲美術館)

噚晚買咗個 Tiramisu 做今日早餐，拆開咗原來係一整個蛋糕嚟~

味道方面，同挪咋糖放入口冇咩大分別，甜到爆炸！唔係誇張，我仲隱約食到一啲結晶嘅顆粒，我估佢係未溶嘅糖，啲糖多到溶唔晒，可以想像到係幾甜！一人食咗幾口就已經頂唔順！ ~_~!!! 
 
打算出門口時，發生咗短暫被困事件！

我哋想離開旅館嘅時候發現大門係鎖住，而且係要有鎖匙先可以開到，接待處又冇人喺度，我哋走埋去接待處個位，不敢亂翻，只係用眼去搜索吓會唔會有鎖匙或者開門掣之類嘅嘢，結果係冇嘅~

我哋醒起一件事，噚晚 check-in 時，職員話過仲有兩條鎖匙，夜啲俾我哋，最後都冇俾到，我哋都冇咩為意，諗住聽朝再問佢攞，就算問唔到都冇所謂，因為今晚都係同噚日咁上下時間返，到時撳鐘都一樣姐，但我哋真係冇諗過連離開都要鎖匙！

搜索無果後，我哋將焦點放喺其他住客身上，希望有住客離開就可以出到去~

不過而家係七點幾，有冇人咁早離開絕對係一個大問號......

等呀等，等呀等，五分鐘後有動靜，最近果間房有位西方女子拉緊個篋出嚟，掂！

佢拉咗個篋出走廊，就打開咗個篋，坐埋喺地下執嘢，由於環境關係，佢係見唔到我哋嘅，我哋都只係裝吓裝吓先見到佢~

我哋冇即時要求協助，第一，希望等佢離開時先一齊出去，費時打擾佢；第二，佢個樣幾苦惱吓，又入房又出返嚟，似係唔見咗嘢，喺呢啲情況下，最好唔好搞人啦~

等吓等吓，又過咗五分鐘，唔理喇，再咁等落去唔知要等到幾時，主動出擊！

接待處同走廊之間有一度門，為免嚇親佢，我哋固意製造一啲聲音先推開門，可能佢實在太苦惱嘅關係，竟然連望都冇望過我哋，我哋只好唐突哋開聲問佢，仲解釋埋我哋冇鎖匙嘅原因，佢當時係坐喺地下，冷冷地向上指一指，我哋就見到有度門，原來有度側門喺度，而且唔駛用鎖匙開，頂，浪費咗我人生十分鐘！

今日第一站係 Battistero di San Giovanni (聖喬凡尼洗禮堂)

由旅館行過嚟都只係五分鐘，未夠八點就嚟到，好冷清，圍住聖喬凡尼洗禮堂嘅唔同地方都有車停泊，一般都係送貨嘅車，我哋圍住行嘅時候要好小心，因為隨時有車駛過~

我冇打算入去入面參觀，淨係喺外圍影吓相~

 
教堂及鐘樓外影~

 
下一站係 Cupola della Basilica di Santa Maria del Fiore (聖母百花大教堂圓頂)

影夠相就走去排隊上教堂圓頂，去到排隊時係 0820，已經有廿幾人排緊隊，等咗十分鐘就可以上去，全程樓梯~
 
上到中層~

 
唔通呢句英文仲有第二個解釋？
 
繼續上~
 
上到圓頂內部，有塊高身透明膠作為圍板，又係好安全，不過都幾阻礙景觀~

抬高啲部相機再 zoom 吓就可以避開塊膠板，個天花好靚~
 
畫到中央啲人好似坐喺欄杆頂咁~
  
繼續上，半爬半行~
 
今日天色一般，周圍都係朦朦地，不過唔落雨已經好好~

   
睇夠就原路返落去，不過一路落都遇到好多上嚟嘅人，就喺下圖呢啲咁嘅環境下，同一時間有上有落，上落嘅人都要盡量將個人縮埋一舊先過得到~
 
下一站係 Campanile di Giotto (喬托的鐘樓)

鐘樓同教堂位置相鄰，可以想像到風景唔會有咩大變化，小變化係上鐘樓就可以望到成個教堂圓頂，同埋可以從高處望吓聖喬凡尼洗禮堂~

鐘樓分好幾層，實際數目冇記低，由於樓梯都係一貫嘅窄又暗，不停轉，行吓行吓，都唔知自己上咗幾高，淨係記得上完一層，未到，再上多層，都係未到......

鐘樓嘅樓梯~
 
鐘樓中層內外~

 
鐘樓頂層有鋼線覆蓋，鋼線編排為正方形，每格空間約五吋乘五吋，由欄邊至鐘樓中心呈倒 U 型完全覆蓋，真係想喺鐘樓跳落去都係唔可能嘅事~ =P
 
呢個角度望過去圓頂又真係幾靚~

    
睇夠望夠就原路返返落地下，呢刻嘅遊人數量已經多咗好多，亦見唔到再有車喺聖喬凡尼洗禮堂附近行駛，唯一見到嘅車係馬車~
 
下一站係 Basilica di Santa Maria del Fiore (聖母百花大教堂)

這座大教堂，外表美得讓人窒息，內部卻意外地簡約，但是簡約，也可以很美的~ =)

 
教堂內有路可進入地下室，不過要收費的，沒有進入~
 
在地下室旁有一小商店，有一樣貨品我覺得幾有趣，還情不自禁地笑了出來~

教堂圓頂雨傘~
 
離開教堂，時間比原定的早，打開旅遊書，附近有皮具市場，還有教堂，就過去走走~

下一站係 Basilica di San Lorenzo 及皮具市場

照住地圖，好容易就行到過嚟，我哋首先想參觀教堂，不過要收費，還是算吧，總不能所有需付費教堂都入內參觀~

 
唔入教堂，就到皮具市場，市場唔係好大，不過皮具氣味濃烈，相信瞇埋眼走過都知道已經到咗皮具市場~

喺度買咗少少嘢作為手信，不過就冇買嘢俾自己，冇咩啱~
 
見到雪糕店，整返兩杯先~

一杯淨紅梅，好好食！

一杯朱古力 + 芝士蛋糕，朱古力味夠濃，好食，芝士蛋糕就好一般~
 
下一站 Nerbone

Nerbone 係喺網上面備受推薦嘅一間食店，主要推薦牛肚包，其實間嘢仲有其他嘢食，不過一係冇咩點提，一係就話普通，所以我哋嚟呢度主要都係食牛肚包，同埋都想試吓牛肉包~

Nerbone 身處於一間類似綜合市場咁嘅地方，呢個地方叫 Mercato Centrale，由皮具市場行過嚟都好近~
 
行咗一圈，終於搵到 Nerbone~
 
Nerbone 對開有地方俾人坐低食嘢，不過我哋嚟嘅時候滿晒座，屎塔就去等位，我就去買嘢食~
 
現場有兩條隊，初時都唔知點樣買，細看之下，有人俾完錢繼續排，有人俾完錢就排第二條，咁就唔好理住，總之排隊俾錢先~

好嘞，俾完錢想問吓我應該排邊條隊，不過啲職員實在太忙，找完錢我都未揸穩佢已經問緊後面要乜嘢，費時阻住個地球轉，跟住排先算~

疑團未解開，排咗一陣諗住問吓其他職員，但係個個都好忙咁，完全冇人理我，結果，理我嘅，係另一位顧客~

佢問我有咩幫到我，我就問佢，我買 sandwich 應該排邊條隊，佢再問我買咩 sandwich，我直覺覺得，買牛肚包應該係有條獨立嘅隊，即係另一條隊~

同佢講完，佢真係指我去另一條隊，真係唔該晒~

排另一條隊，唔知點解，排咗成十分鐘都冇郁過，再好耐性都實在按奈不住，左望又望，有人做緊嘢咖喎，但條隊就係唔郁，個個都係咁排，除咗繼續等都冇咩可以做啦......

咁始終都等到佢郁嘅，不過整包果個男人唔知做乜鬼，態度係我嚟意大利幾日見過最差嘅，係極之唔願做果隻，面又黑，就算我唔識聽意大利話，從佢語氣都感覺到佢講嘢態度勁差，啲用具又以隨手半拋半放嘅動作放回，佢手上仲揸住把刀，陣間排到我真係唔好刺激佢，要溫柔啲同佢講嘢，冤有頭債有主，唔好搞我呀~

其實排緊隊時，我已留意到每個人行到去都要講俾佢知要咩嘢，我望一望張單，只係列出價錢同 sandwich，真係冇寫明要咩，輪到我嘅時候，我同佢講要一個牛肚包，一個牛肉包，不過，佢完全聽唔明我講咩，黑面嘅佢變得更加黑，死啦，佢會唔會劈我咖~ o_O!

咁啱佢有同事行過，幫手翻譯，總算解決咗，不過......

佢喺個載有熱水嘅器皿度拉咗兩條牛肚出嚟，一拉出嚟就即時切碎晒，我心知不妙，一個包實在包唔晒咁多牛肚，佢應該係整緊兩個牛肚包俾我，唉，算啦，切碎晒，唔通話唔要咩，灘凍晒又唔知下幾多個先有人叫牛肚包，唯有要晒佢啦，就係咁，無緣試到佢嘅牛肉包，不過咁，當安慰自己都係話，從網上睇到啲人對牛肉包嘅評語都只係一般，試唔到應該唔覺可惜嘅~

喺檯面有兩種醬汁，佢對每位顧客都會問要邊種，而我睇到所有人都要晒兩種，我未排到都已經決定要晒兩種，跟隨大眾口味，不過，佢整完我果兩個包，望都冇望過我就同我落晒兩種醬汁，可能佢覺得同我溝通唔到，都費時問......

前後花咗成四五個字先買咗兩個包，真係好食至好......

牛肚包叫 Panino con lampredotto (Beef stomatch sandwich)
 
PS. 牛肉包叫 Panino con bollito (Beef sandwich)

食食吓嘢，見到兩個人好面善，我認得喇！係羅馬住宿嘅宿友，來自中國北方嘅一對夫婦，真係蹺！個男嘅排緊隊，個女嘅一臉迷茫一路行一路望，我同屎塔向個女嘅揮手打招呼，個女嘅都認得我哋~ =)

個女嘅問我哋呢度有咩好食，哈，奇怪，識嚟呢度但又唔知有咩出名？於是我就將我所做嘅功課俾咗佢，仲教埋佢點買點排同點叫，佢好開心咁就走埋佢丈夫身邊，拎住張紙係咁講，佢丈夫都好有禮貌咁同我哋打招呼~

講返個包先，網上面有人形容一生人一定要試一次，話超好食咁話，唔......雖然我都覺得幾好食，但就未去到咁強烈嘅感覺，牛肚好香，爽淋兼備，包皮索咗啲肉汁會更好味，而家諗返起都好想再食~

下一站係 Piazza di Santa Maria Novella 及 Basilica di Santa Maria Novella

離開咗 Nerbone，時間尚早，睇地圖知道附近有間教堂，於是就走過去行吓，呢間教堂就係 Basilica di Santa Maria Novella~

其實呢間教堂即係噚日一出火車站見到果間教堂(圖在昨日遊記已貼)，不過噚日就見到背面，今日就係正面，但前後兩面係完全唔同~

嚟到教堂，發現要收費才可進入，所以都係冇入到，喺廣場行咗一陣~

 
今日天氣好好，沿住河邊步行去下一站，真係賞心樂事~ =D

 
途經 Ponte Vecchio (維奇歐橋)

 
行入去湊吓熱鬧，不過冇太深入咁睇，因為計劃好後日朝先嚟~
 
本來下一站係 Galleria degli Uffizi (烏菲茲美術館)，不過未入得，只好去第二度行吓~
   
下一站係 Piazza della Signoria (領主廣場)

本來呢個廣場又係後朝先嚟，反正而家有時間又近烏菲茲美術館，就過去行吓~

Florence 有三座大衛像，一座真品，兩座複製品，其中一座複製品就在領主廣場~

 
領主廣場，放有多座雕塑，根本就係一個露天嘅美術館，如我般一個不懂藝術嘅遊客，管它是真品還是複製品，同樣看得津津有味~ =)

相信正因為咁，成個廣場都係人，想喺唔阻人嘅情況下細意欣賞，根本冇可能~

我就只睇到一半，入面呢啲就未睇~
 
見到 Palazzo Vecchio (Florence 市政大廳) 好多人出入，我哋都趁機入內參觀~

入到去只係參觀咗一少部份，其餘部份有人欄住，我冇睇清楚係要收費還是根本唔俾入，反正都唔諗住入~
 

  
下一站係 Galleria degli Uffizi (烏菲茲美術館)

時間差唔多，行返去烏菲茲美術館~

烏菲茲美術館有三個入口，網上預約咗嘅就要去入口三，最早只可以喺預約時間前十分鐘攞飛~

我哋行過去時經過其他入口，非常多人，要等兩小時一啲都唔出奇~

我哋預約咗 1500，打算睇到 1850，即係佢嘅閂門時間~

去到嘅時候有十幾人排緊隊，諗住只係換飛，應該好快，點知都等咗十五分鐘先排到去換票處，但我哋換票只係花咗二十秒唔夠，二十秒唔夠係兩張飛，之前果十幾個人，平均當你二人一組，都係換七八次飛，點解搞咗成十五分鐘呢？真係一個謎！@@

換完飛又要走去另一個入口入，排隊做安檢，不過又唔算排得耐，唔駛十分鐘已經過咗安檢~

註：館內禁止攝影，以下所有關於烏菲茲美術館的圖片，均來自維基百科

以下圖片為旅遊書提到最最最精華嘅展品：

【第二展館】

Madonna di Ognissanti (Ognissanti Madonna) - Giotto di Bondone
 
Maestà di Santa Trinita (The Madonna in Majesty) - Cimabue
 
【第三展館】

Annunciazione tra i santi Ansano e Margherita (Annunciation with St. Margaret and St. Ansanus) - Simone Martini & Lippo Memmi
 
【第五至六展館】

Adorazione dei Magi (Adoration of the Magi) - Gentile da Fabriano
 
【第七展館】

Federico da Montefeltro e la moglie Battista Sforza (Federico da Montefeltro and his wife Battista Sforza) - Piero della Francesca
 
註：圖片經本人合拼

Battaglia di San Romano (Battle of San Romano) - Paolo Uccello
 
Pala di Santa Lucia de’ Magnoli (Santa Lucia de’ Magnoli Altarpiece) - Domenico Veneziano
 
【第八展館】

Madonna col Bambino e Due Angeli (Madonna with Child and two Angels) - Filippo Lippi
 
【第十至十四展館】

Nascita di Venere (Birth of Venus) - Sandro Botticelli
 
Primavera (Allegory of Spring) - Sandro Botticelli
 
【第十五展館】

Annunciazione (Annunciation) - Leonardo da Vinci
 
【第二十五展館】

Tondo Doni (Doni Tondo) - Michelangelo Buonarroti

 
【第二十六展館】

Madonna del Cardellino (Madonna of the Goldfinch) - Raffaello Sanzio
 
【第二十八展館】

Venere di Urbino (Venus of Urbino) - Tiziano Vecellio
 
Flora - Tiziano Vecellio
 
【第四十三展館】

Bacco (Bacchus) - Caravaggio
 
行咗接近四個鐘，好好睇，係非常好睇！甚至有種錯覺會覺得好睇過梵蒂岡博物館~

點解會係錯覺？

因為呢度唔俾影相，好自然會睇得專心啲，雖然去梵蒂岡博物館都可以唔影相，但明明俾影，又點會忍得住唔影吖~

既然唔俾影相，就唔會見到人排隊等影相，又或者合照，成個氣氛係好唔同，大家都係純以欣賞心態去睇去感受，唔會一心二用~

同埋呢度雖然多人排隊入場，但唔知係唔係有人流管制呢，呢度比梵蒂岡博物館雖然細非常非常多，但絕不似梵蒂岡博物館咁擠迫，行得好舒服，太多人的話，有時真係幾掃興，心情大打折扣~

相信係呢幾個原因令我有錯覺吧~

其實喺遊覽嘅途中又遇見認識嘅人，就係羅馬緣份旅館嘅其中兩個男仔，其實我懷疑呢兩個男仔彼此都唔係好認識對方，因為佢哋住埋同一間房，但係互相又冇咩講，早晚餐都前後腳咁出嚟，連眼神都冇點交流過，嚟到呢度佢兩個都係分開行，或者佢哋只係喺網上約埋一齊嚟，貪有個人陪又或者 share 住宿呱~

其中一個男仔仲同我哋傾過偈，佢話嚟到先知唔可以影相，佢話仲等佢拎埋部手提電腦嚟，真係「氣死人」咁話~

其實影相唔係應該拎相機咩？點解要拎手提電腦...... @@

離開呢個美術館，真係意猶未盡，心情好興奮，明明都睇晒咁多件作品，仲係好唔夠喉咁，睇嚟我要沖返個凍水涼冷靜吓~ =P

下一站係 Piazza della Signoria (領主廣場)

又係領主廣場，睇埋下半部份先~

 
下一站係 Fontana del Porcellino (野豬噴泉)

睇睇地圖，野豬噴泉就喺附近，天仲好光，一於行過去睇吓隻豬~

呢個野豬噴泉有個傳說，傳說話：攞住個錢幣，摸吓個豬鼻許願，再將手中錢幣放落豬咀內，如果錢幣自然滑落下面嘅槽入面，你嘅願望就會實現~

又係同錢幣有關嘅傳說......

我哋就冇依傳說咁做，一來個個都摸過，實好污糟，二來，我哋一向都唔係好信呢啲所謂嘅傳說~

野豬個鼻都俾人摸到甩晒色~
 
附近街景~

 
跟住搵地方食晚餐~

沿住旅館方向行，一直都揀唔啱，直至距旅館三十秒步程範圍，見到間嘢普普通通好似啱心水，就坐低咗~

 
同樣係兩個主菜加一支有氣水~

Spaghetti Ragù e Porcini‧Fettunta Toscana‧Carpaccio Roast Beef con Rucola e Parmigiano

個肉醬意粉好香，沙律菜加埋佢哋個啲酸酸哋嘅汁幾好食，牛肉就一般，成碟嘢好豐富，都幾好~
 
Petto di Pollo alla Griglia con Verdure grigliate

唔知咩麵種，加埋切粒嘅烤雞胸同所謂嘅雜菜，仲有面頭嘅芝士，啲芝士香到不得了，越食越好食！
 
食完嘢就返旅館，不過，由於噚晚職員冇俾另外兩條鎖匙我哋，除咗搞到我哋今朝差啲出唔到門口，仲搞到我哋而家冇門口入~

相信第二條鎖匙就係用嚟開樓下大門，原本我哋都唔係好擔心，因為噚晚都係咁上下時間嚟都有人應嘛，不過，有時啲嘢真係幾放心都未必係如你所願~

我哋喺樓下按咗五分鐘都冇人應門，都作好最壞打算，等有人出入先可以上樓，咁我哋都唔會放棄話唔再按門鐘，隔一陣就按吓，隔一陣就按吓，終於有人應門！

上緊樓時聽到吸塵機聲，知咩事啦，佢梗係聽唔到門鐘聲啦，上到去見到佢吸緊塵，我哋就同佢講佢未俾兩條鎖匙我哋，佢如夢初醒般就走去拎兩條鎖匙俾我哋，佢都有道歉呀，不過其實都係好小事~