今日主要景點:
Pisa
Torre di Pisa (比薩斜塔)
Cattedrale di Pisa (比薩大教堂)
Battistero di San Giovanni (聖喬凡尼洗禮堂)
Florence
Galleria dell'Accademia (學院畫廊)
Ristorante Le Fonticine (噴泉餐廳)
一早起身,又係食果個勁甜 Tiramisu 做早餐,今次雪凍先食,感覺冇咁甜~
今日第一站係 Torre di Pisa (比薩斜塔)
去 Pisa,最方便就係搭火車,不過呢程火車飛我哋會到現場先買~
去到火車站,見到某個位有人排緊隊,就走過去睇吓~
喺果檔嘢度見到 train ticket 呢個字,即刻排埋一份啦~
排都只係排咗幾分鐘,再話俾對方知你想去邊,幾多人去,俾錢,咁就搞掂~
呢種火車係 regionale 車種,車飛上係冇時間嘅,上車前要去部打飛嘅機度打飛先可以上車,否則捉到會俾人罰錢!
一個鐘多啲就到 Pisa~
由 Pisa Centrale 去比薩斜塔,可以搭巴士,亦可以步行~
步行亦只需 20~30 分鐘,所以我哋揀咗步行~
Pisa Centrale~
Mini 都唔夠形容,要 super mini 先夠~ XDDD
沿途風景~
圖中背向鏡頭嘅篋男,喺火車站附近就已經問我哋去斜塔嘅方向,佢一直行,一路都冇望返轉頭,勇往直前,結果同我哋一樣,行錯路~ =P
無啦啦去咗個市雜,呢度有好多芝士賣,仲有啲類似羊髀咁嘅嘢~
個篋男入到嚟就掉頭走,我哋就圍住呢個市場行咗圈,其實都冇咩興趣,又睇吓地圖,行返出去都唔係好搵到點行先好~
我哋開始周圍望,希望抬頭可以望到斜塔嘅蹤影,結果真係望到!
進入大直路喇~
呢度似出口多過入口,又或者咁講,似後門多過前門,唔見有咩人由呢度入~
而家大約係 0930,嚟到呢度已經成個公園都係人~
部相機影到個斜塔變蕉形~ @@
行埋啲去睇,又好似真係幾斜喎~
終於親眼見到傳說中嘅比薩斜塔,陣間我哋仲可以去到塔頂,心情真係有少少興奮! =D
不過上去塔頂,真係幾貴,EUR17 一個人,又只限 20 分鐘,我唔識衡量值唔值得,我淨係知嚟到但唔上塔頂,我一定會覺得係一種遺憾~
初時睇旅遊書講到斜塔嘅資料時,話一定要預約先可以上塔頂,後來又有人話唔駛,去到先買都得,不過對我嚟講都冇關係,為咗避免浪費時間去排隊,只要可以網上預訂嘅景點,我都盡量會訂咗先~
我知道經網上預約上塔頂,要到現場換票先可以上,我拎啲預約文件出嚟,赫然發現佢寫住要喺預約時間前三十分鐘到嚟換票,但我而家距預約時間只有十分鐘!
聽日朝早就過去威尼斯,如果今日真係上唔到,想聽日嚟都唔得!如果最後真係上唔到,我真係會好痛恨我自己! >_<
發現咗呢樣嘢嘅時候,我即刻跑去 ticket office,個心已經急到死咁滯,跑到去仲要排隊!雖然只係得幾個人,但唔知點解好似等咗好耐都未到我咁~
好喇好喇,到我喇到我喇,對方望一望,又按一按電腦,佢本來目無表情,突然皺一皺眉,喂大佬,喺呢個時候皺眉,你係咪想我心臟病發呀!
直至睇到佢喺部打印機度拎咗張飛出嚟遞俾我,感覺直情係死過翻生咁!
去攞飛時就知道,上塔頂唔係一定要預約,嚟到先買都得,但就未必可以買到即時咁解姐~
Ticket Office
拎咗飛就梗係行去排隊先,排到我哋入喇,個職員睇完飛就截住我哋,身體語言加單字英文示意我哋唔可以拎埋隨身袋上去,天呀!得果 20 分鐘,包埋行上去同遊覽,已經覺得唔多夠喉,而家仲要花時間搞啲咁嘅嘢!
我同屎塔即刻跑過去 ticket office 隔離嘅行李寄存處,嗱嗱聲都冇諗有冇啲咩重要嘢要跟身,唔好放 locker,是鬼旦乜鬼都放晒入去,順便塞埋件外套入去~
左邊為行李寄存處~
GoGoGo!又跑返返去斜塔!
上斜塔嘅樓梯~
上斜塔同上一般鐘樓或者教堂圓頂唔同,由於佢係斜嘅,又係圍圈咁樣上,一邊行得好輕鬆,一邊又行得好辛苦,幾得意~
啲樓梯都俾人行到扁晒......
可能由於心急關係(限時嘛),上斜塔係特別辛苦~
上到中層,塔中心有塊玻璃~
欄邊有圍網,不過圍住塔芯有幾級樓梯,只要行上樓梯頂,水平視線就會高過圍網~
上面有個鐘~
上頂層嘅樓梯~
呢幾級中間凹得仲犀利~
上到頂層,我真正腳軟了~
一向有少少畏高嘅我,之前上果啲圓頂呀鐘樓呀都驚驚地,但都叫做有牆身靠背,有返啲安全感,上到嚟呢度係冇高身牆,只有及腰嘅矮圍欄,仲要係斜嘅,我真係腳都軟晒......@@
自然,我每一步都唔會大步,每一步都扶得好穩先可以提步,喺呢個時候,有人叫我幫佢影相,我冇理由話俾佢知,我而家驚到失禁咁滯,冇咁嘅閒情幫你影相咖!唯有頂硬上啦......
塔頂外望~
塔頂本來就唔多人,行咗一陣之後,就只剩下我哋兩個,睇睇時間,其實都差唔多,雖然唔多似有人趕,不過都係自動自覺把啦~ =)
下一站係 Cattedrale di Pisa (比薩大教堂)
去下一站前,攞返啲隨身物品先~
入到去,個職員問我哋啲嘢放咗喺邊格,吓?我哋真係冇留意,因為放邊格唔係我哋決定嘅,係由佢編排嘅,佢又 scan 過張飛,諗住有晒記錄,我哋冇諗過原來係要記住嘅,況且,放嘢果時好衝忙,咁冇記住都冇計,唯有同佢講唔知~
佢攞住張飛又再 scan 過,即刻就知喺邊格,我估計,口頭問你只係簡單嘅保安程序,講得出就相信冇問題,不過講唔出都開,仲算唔算係保安措施呢?(不過都係我估姐,可能根本就唔係保安原因~)
入大教堂係要收費嘅,自然又係走返去 ticket office 啦,觀察咗一陣,入教堂就 EUR2,入埋洗禮堂或者墓園就 EUR5,我哋見喺 Florence 冇入到洗禮堂,所以就決定入洗禮堂~
行埋去買飛時遇著個態度非常差嘅職員,不過話之佢啦,唔會點影響到我哋嘅~
買完飛就入教堂先~
教堂就冇咩特別,但我仍然深感興趣,再參觀多一百個教堂都仍然覺得興奮~ =P
下一站係 Battistero di San Giovanni (聖喬凡尼洗禮堂)
由於我哋冇宗教信仰,亦從未入過洗禮堂,真係估唔到洗禮堂係咁......簡潔......@@
一入到嚟就有啲後悔,揀墓園可能興趣大啲~
不過入到嚟又有少少突發事情,突然間有位女士行出嚟(下面第一幅圖),一路行一路"shu",示意寂靜,當現場靜晒嘅時候,佢就開始發出"呀"音,類似唱聖詩咁,但只發出單音~
由於現場空曠並呈圓形,每一吓聲音都有迴響,待迴響消失,果位女士又再重覆著發聲,如是者約五次便告結束及離開~
成個過程好嚴肅同好有神聖嘅感覺~ =)
經歷完呢種情況,決定入嚟又變得好似係好正確嘅選擇咁~ =P
同樣係兩主菜加一支有氣水~
Roastbeef con Patate Fritte
牛肉乾得嚟有肉汁,味道不錯~
Pennette Gamberetti e Zucchini
啲蝦好好食,係細隻啲姐,個汁都唔錯~
食飽飽就行去火車站,照返嚟嘅時候咁買火車飛同打飛就可以搭返車返 Florence~
搭火車嘅時候,遇到一件好小嘅事~
坐坐吓火車,有個女人走埋嚟放低咗張紙喺細檯面就走開咗~
張紙有意文(我估)同英文,英文內容大意係無錢,希望我哋俾啲錢佢~
我做功課時記得有人講過,呢啲情況,咩都唔好理,當唔識英文就得~
我決定照做~
過咗一陣,個女人走埋嚟攤大手板,我擰頭回應,佢就有少少發脾氣咁攞返張紙走咗~
實在太突然,真係俾佢嚇一嚇~ @@
下一站係 Galleria dell'Accademia (學院畫廊)
嚟學院畫廊,最最最主要就係睇大衛像嘅真跡~
由火車站到學院畫廊,只需步行便可,不過門面都幾唔起眼,見到有人排隊先知道到咗~
我哋喺網上面預約咗 1615,去到嘅時候係 1530,俾張預約文件個職員睇,佢就好順手咁喺袋拎咗兩張飛出嚟俾我哋,拉開埋拉帶示意我哋入去~
我睇返張飛嘅時間,係 1400 嘅飛,好似好兒戲咁~ @@
咁多本書都只係講大衛像真跡,都冇提過其他作品,我都唔知邊啲係比較著名嘅作品,只列出我自己比較喜歡嘅展品~
註:館內禁止攝影,以下所有關於學院畫廊的圖片,均來自維基百科及官方網頁
【Tribuna del David】
David - Michelangelo Buonarroti
Incoronazione della Vergine (Coronation of the Virgin) - Alessandro Allori
Santa Barbara - Pittore Vasariano
【Galleria dei Prigioni】
Michelangelo 未完成之作品 - Schiavo che si desta
Michelangelo 未完成之作品 - Atlante
Michelangelo 未完成之作品 - Pietà da Palestrina
Michelangelo 未完成之作品 - Schiavo Barbuto
Michelangelo 未完成之作品 - San Matteo
Michelangelo 未完成之作品 - Schiavo Giovane
【Sala del Colosso】
Assunzione della Vergine (Assumption of the Virgin) - Pietro Perugino
Santo Stefano tra i santi Jacopo e Pietro (Santo Stefano between St. James and Peter) - Domenico Ghirlandaio
Deposizione dalla croce (Deposition from the Cross) - Filippino Lippi & Pietro Perugino
Annunciazione (Annunciation) - Filippino Lippi
其間有唔少人舉機想影大衛像,多數都被管理人員制止,惟仍有少數過到骨~
同埋現場都幾嘈,管理員"shu"咗好多次都冇用,仍然係非常嘈吵!
畫廊面積唔大,一般觀賞,90 分鐘已經夠~
畫廊內有個露天小花園,我哋一出到去就忍唔住笑咗出嚟~
因為花園中央有個惡搞版大衛像~ XDDD
學院畫廊係我今日計劃裡面最後一個景點,但由於早咗嚟,又比預計用得少時間,而家比原定時間早咗好多,睇嚟要搵啲地方行吓~
下一站係 Basilica Santuario della Santissima Annunziata (教堂)
喺地圖見到有間教堂喺附近,所以行過嚟~
外面平平無奇,甚至唔覺得係一間教堂,入到去就知道,呢間係一間好靚嘅教堂!
無啦啦增遊咗一間咁靚嘅教堂,好有意外收鑊嘅感覺!
可惜嘅係,呢間教堂嘅保養似乎唔係好夠,有點殘舊~
教堂外部
下一站係 Basilica di San Marco (教堂)
見仲有時間,又行去睇多間教堂~
呢間外牆裝修緊,但仍然開放,可以入內參觀~
教堂外有個花園,叫做 Giardino di Piazza San Marco,我哋就買咗兩杯雪糕喺呢個公園度慢慢嘆~
一杯朱古加 + 雲呢拿;一杯咖啡 + 薄荷
朱古力一貫特濃朱古力味,雲呢拿好香,咖啡味亦都好香,我個人唔多好薄荷,冇意見~
下一站係 Ristorante Le Fonticine (噴泉餐廳)
嘆夠就行去計劃好今晚會去嘅餐廳~
附近街景~
行到嚟噴泉餐廳,仲有 20 分鐘先開門~
門口有個小型噴水池~
嚟呢間餐廳最主要係想試吓佛羅倫斯嘅牛扒,喺雲雲評語中,佢唔係最好果間,但唔想太貴又可以試到地道風味嘅,呢間似乎都係一個好選擇~
1900 開門,我哋係第一對顧客,坐低咗之後,叫支有氣水就係指定動作,再照人哋推介嘅嚟叫,同埋自己睇菜單揀吓~
前菜 - Antipasto Misto
蛋同矮瓜幾好食,三塊火腿都唔同味,好好食!橄欖就真係唔係咁鍾意~
仲有一樣嘢喺第二張相先見到,紅色唔知咩嚟,味似鹹味嘅加應子,非常不喜歡!
主菜 - Spaghetti ai Calamari e Vongole
呢碟嘢真係好好食,食咁多日 pasta,未食過咁鮮味嘅,好好食! =D
牛扒 - Bistecca alla Fiorentina
到牛扒喇,不過好可惜張張相都影得好差......
佢會喺你面同切開,我估佢見你兩個人就分兩份~
外層炭燒,味道好好,唔需要額外加任何調味,真係幾好食~
不過我就嫌佢內層太生,如果內層可以有少少熟就仲好~
不過整體嚟講就算非常不錯,雖算不上有咩驚喜,總算試過,起碼呢種味道自己未食過~
甜品 - Crema di Mascarpone
我唔係好食甜品都覺得幾好食~
甜品 - Creme Caramel
呢種甜品我一向唔好,不過屎塔就話幾好食~
食完呢餐,好滿足好滿足~ =)
食完飯就行返旅館,途經一個廣場~
留言列表