今日主要景點:
Florence
Piazzale Michelangelo (米高安哲羅廣場)
Ponte Vecchio (維奇歐橋)
Venice
Ponte di Rialto (雷雅托橋)
Taverna San Trovaso
今日早餐仍然係果舊甜到爆炸嘅 Tiramisu,咁難食都食足三日,係因為實在唔想成舊蛋糕就咁掉咗去,不過今日晏少少就會離開 Florence,我哋係絕對唔會帶埋佢過去嘅,食剩嘅要掉都冇辦法,盡晒力咖喇~
今日第一站係 Chiesa di Santa Croce (教堂)
今日未夠七點就出門口,又係為咗避開人潮,當然唔係避開呢間教堂嘅人潮,嚟呢間教堂,純粹因為去下一個景點嘅時候,勉強叫做經過,所以都過嚟行吓,我哋深知咁早嚟到係入唔到入面嘅,不過都冇辦法,到嚟欣賞吓外表都好~
由旅館行過嚟都只係幾分鐘步程,嚟到教堂前嘅廣場,非常冷清,儘管廣場附近間中都有一兩個人經過,但我哋感覺呢個世界就好似只剩下我哋兩個咁,自由自在~
下一站係 Piazzale Michelangelo (米高安哲羅廣場)
嚟呢個廣場嘅最佳時機,應該係黃昏,不過我哋第一次嚟歐洲,為安全計,唔想太夜返旅館,待有過經驗,下次先再因應經驗去玩,再加上而家夜晚九點鐘都仲係光嘅,去廿幾日旅行,實在唔能夠太夜返到旅館玩到咁盡,所以都冇安排黃昏先嚟~
我哋選擇咗步行約半小時上山,清晨時份咁樣慢慢行上山,真係心曠神怡,舒服非常~
沿途風景~
行上山時見到有工人喺度清理緊雜草,可能我哋阻住佢做嘢,啲面口唔多好~
山腳望出去~
其實都要行幾多級樓梯,嚟到山腰,仲有唔知幾多級等住我哋~
山腰望出去~
我哋以為自己都好早,不過行緊上去嘅時候就見到已經有人落山,唔知佢哋幾點上嚟嘅呢?@@
到咗廣場,冇咩人~
廣場本身就冇咩吸引,最主要都係上嚟睇佛市全景,順便睇吓另一個大衛像複製品~
根據資料顯示,呢個複製品係用青銅造嘅,經年累月,變成咁嘅樣~
廣場上望出去嘅風景~
圖中綠色嘅建築,立一立眼好似冧前同冧後咁~
之前喺網上面有人話八點幾就有一車車旅行團上嚟,而家係 0800,廣場上依舊冷清,我哋再 hea 多陣臨走時就見到有遊巴上咗嚟,果然係八點幾就開始有旅行團上嚟!
下一站係 Ponte Vecchio (維奇歐橋)
之前有本旅遊書提過,呢條橋朝早會有市雜,但就要早啲嚟,中午到就會收~
不過有一點幾奇怪,我睇咗咁多本書,只有一本有提過,唔理咁多,信咗冇蝕~
落山自然比上山快,未夠九點嚟到,又係冷冷清清,只見少數舖頭開緊,好彩之前都有貢入嚟行過吓~
下一站係 Palazzo Pitti
時間尚早,又未夠鐘搭車過 Venice,又週圍行吓~
睇吓地圖,見到不遠處好似有個皇宮咁上下嘅嘢,名叫 Palazzo Pitti,就行過去睇吓~
呢座嘢具體係咩嚟唔太清楚,淨係知道入內參觀要收費同埋裡面有博物館~
我哋冇入到去,淨係喺外面影吓相又 hea 吓咁~
對開空間好廣闊~
hea 夠就行返過維奇歐橋,多咗幾間舖頭開門,不過人依然唔係好多~
本來諗住喺橋中心坐低 hea 吓,不過屎塔有啲唔舒服,想搵個洗手間解決~
於是我哋周圍搵,見到有個洗手間嘅標誌,跟住佢個指示,搵咗成二十分鐘都搵唔到!最後決定返旅館,搞掂就拎埋行李 check-out 走人~
返旅館途中影咗張咁嘅相,幾得意~ =)
下一站係 Chiesa di Ognissanti (教堂)
check-out 完,距預約好嘅火車班次仲有個幾鐘時間(最遲十點要 check-out),我雖然拖住個重篋,但都唔會放棄周圍行吓嘅機會~
我哋沿河邊行落去教堂,呢個時份嘅河邊景色比前日睇到嘅靚好多,又影咗啲相~
到咗教堂,我哋知道有啲教堂係唔俾拖篋入去,就算俾我都唔會咁做,我哋決定輪流入去參觀~
呢間教堂入面都真係幾靚,又有意外收鑊!
睇完教堂就行過去火車站準備搭火車過 Venice~
講到 Venice,不得不提天氣預測~
對 Venice 嘅天氣預測如下:
今天:Rain
明天:Shower
後天:T-storm
我哋會今日到 Venice,後日離開,天氣預測一日比一日大雨,天呀,點解要咁對我哋呀~!!!
不過又唔到我哋控制,煮到埋嚟就食啦~ =(
去到火車站,喺顯示牌度搵到我哋要搭嘅火車班次,不過未有月台資料~
經過 Rome → Florence 嘅火車經驗,我哋要早少少上火車搵地方放篋,我哋個篋唔係細果種,唔可能好似細篋咁左攝右攝~
我哋見到有啲月台已經有車停咗喺度,有啲就冇,正路已經有車果啲應該唔係,否則顯示牌應該都有顯示,我哋走近啲冇車嘅月台,等到顯示牌有顯示就行過去相應嘅月台~
上到火車發現行李存放嘅地方喺車卡嘅另一邊,真係激鬼死人!行到過去,行李架下層已經冇晒位,只好出行力的個篋上上層~
喺意大利火車網訂車飛時,只能夠揀窗邊位或者走廊位,咁我哋梗係揀窗邊位,但揀窗邊位就兩個都俾晒窗邊位(唔排除係我唔識揀平排一齊坐),即係對座,其實平排好對座好,我哋都咩所謂~突然提到呢樣嘢,就梗係有啲事發生啦,不過都係一件小事~
我哋對返編號搵位時,發現其中一個窗口位有位外藉中年女士(下稱女人)坐咗,我哋正想俾佢睇我哋張飛嘅座位編號,佢就出聲先~
佢話想同老公坐埋一齊,咁我哋又可以坐埋一齊咁話~
佢講嘢嘅時候,同我哋發現佢嘅時候嘅姿態係一樣,軟軟的攤在座位上,咁樣顯示佢冇諗過我哋會介意(實質我哋唔介意)而讓返個位哋~
同埋佢用嘅措詞,純綷係表達佢嘅想法,佢唔係詢問我哋介唔介意,就好似佢已經決定咗,只係通知我哋一聲咁解~
我哋覺得佢相當冇禮貌,不過我都唔係啲鬥氣嘅人,本身係唔介意讓坐就係唔介意,唔會咁小器因為佢唔夠誠懇而同佢鬥氣唔俾佢~
我哋坐低咗之後就見到佢老公埋嚟坐,我哋訂嘅火車班次係 1125,準時開車~
由於上面嘅事件發生得實在太突然,以至有啲嘢我哋都冇留意,一開車就知奶嘢!
個女人真係衰,佢佔人座位又冇禮貌,仲要我哋兩個都坐倒頭車!
四條友都坐定定,唔通仲同佢講要掉返坐咩,唉,算我哋唔好彩~
唔好彩嘅事仲未完,成程車兩個鐘多啲,個女人成日伸隻腳過嚟頂住晒,為咗捍衛我哋嘅腳部空間,我同屎塔見佢有時有少少縮,我哋都會搶佔返我哋應有嘅空間~
呢個女人其實都真係幾麻煩,不停吩咐佢老公拎呢樣拎果樣,佢兩個又因為體型嘅關係,其實都郁動得唔係咁方便,有啲嘢又放咗上上面行李架,真係難為佢老公~
佢老公個人就冇乜嘢,都係「尊重」老婆果種,個女人坐埋邊,佢要去洗手間,老公起身讓佢,個女人叫佢坐過對面近走廊果個位(窗邊位有人),咁陣間唔駛又要起身讓佢咁話,老公就沒好氣咁講咗句:「I don't care」
其實有咩關係喎,你返返嚟坐,你老公都係要起身坐返返嚟你隔離咖啦!
我就覺得佢老公係唔想影響到人,希望阿老公係真心愛個老婆啦,否則真係有排受~
車程兩個鐘多啲,我不停留意住列車螢幕上所顯示嘅天氣報告,基本上意大利多數城市都天晴,不過 Venice 就有雨,唯有等奇蹟降臨啦~
到喇到喇,我哋真係到咗傳說中嘅威尼斯喇!
Venezia S. Lucia
嚟到 Venice 已經夠興奮,亦由於太興奮,都冇為意仲有一樣興奮嘢冇發現到,直至我哋好實在咁感覺到自己已經身處 Venice,一出火車站,喂,咁好天嘅?奇蹟真係降臨呀! =D
哈哈,真係正到不得了,嗱嗱聲走去買 48hrs Travel Cards 先!
唔知係咪太過興奮嘅關係,個天驚我頂唔順,整啲嘢俾我冷靜吓~
入到去 ticket office,見到最右邊上面寫住 Public Transport Tickets,咁我就走去最右邊買飛,同佢講完之後,佢好不肖咁用右手手指公指一指佢嘅右邊,好,冇問題,你唔得閒又或者可能我自己冇睇清楚搵錯人,咁我就走去佢隔離度睇吓~
佢隔離果個傾緊電話,我又走過隔離,隔離果兩個好忘我地傾緊偈,我同佢哋講 excuse me,佢兩個完全冇理我,好啦,咁我去最左邊(我個方向)果個,又 excuse me,點知佢黑晒面咁話:「anyone on the left but not me」
我唔理係你哋唔理我定我自己真係冇睇清楚,周圍煩住人,都真係唔駛用啲咁嘅態度囉,裡面有五個職員,四個都係咁嘅態度,欠咗你嘅咩!
好啦,又走過去右一個,佢兩個傾完喇,我又 excuse me,左邊果個又係黑面咁指我過右邊果個,吖,呢幾位小姐係咪姓李名叫露眉嘅呢?我真係想大叫你哋個名出嚟!
好嘞,又走過去右一個,我又 excuse me,佢冇望我亦冇講嘢,我就好似唔存在咁,大佬,係咪要我下跪先有人理吓我呀!我唔理啦,你隔離果個指我過嚟,我當我搵啱人咖喇,我本來可以大聲啲再講一次 excuse me,但咁又好冇禮貌,你冇禮貌唔代表我要冇禮貌~
隔咗幾秒佢先咀妙妙咁問我要咩,我講咗佢知我想點點點,佢繼續冇望我又冇講嘢,但佢有襟電腦,我就估佢係處理緊咖喇,跟住佢就指一指個螢幕,EUR60,咁我就俾錢攞埋啲飛走人,走之前我有講 thank you 咖,我係一個有禮貌嘅人,唔會好似佢哋咁!
我唔想去界定我係咪被歧視定還是佢哋對咩人都係咁,我淨係知道,你哋咁嘅態度,其實你哋自己都唔會開心,我就嚟玩嘅,我要開心冇人阻到我,對我嘅心情一啲都冇影響,最緊要買到飛~
火車站對開見到條橋,但我哋又有個重篋喺手,唯有輪流上去欣賞風景~
好嘞,第一次搭水上巴士,好似好亂咁,亂到我同屎塔大打出手咁滯~ XDDD
其實睇真啲,一啲都唔亂,好容易就搵到 1 號巴士去酒店~
一直都對拖住個篋落船會唔會好麻煩有啲擔心,其實擔心都係多餘,Venice 分分鐘遊客多過當地人,點會造啲唔方便嘅交通工具吖~
啲碼頭有晒巴士路線同向邊個方向嘅提示,仲有路線圖,好容易搭~
上船前拍一拍張 Travel Cards 就搞掂~
至於行李,一路係咁拖係咁拖就可以拖到上船,毫不費力~
原來喺船上面係唔可以孭住個背囊,可能怕重心太高會失足跌落水卦~
沿途風景~
其實而家都差唔多三點,我哋仲未食晏,放低行李就立刻出發去搵嘢食先~
出門口之前,問接待處嘅職員攞地圖先,喺 Venice 冇地圖,分分鐘酒店都返唔到!=P
個識員話有兩份,一份大一份細,拎出街用就拎份細嘅,夜晚返酒店慢慢睇就可以睇份大嘅,所以我哋就拎咗份細嘅~
話就話細,其實都真係幾夠用,主要街道名有齊,連有啲細街都有標示,只係唔係全部姐,正!
一路向住 Ponte di Rialto (雷雅托橋) 方向行,見到嘅食肆都好貴,真係揀唔落手~ @@
後來見到有間嘢賣啲嘢未食過,又平平地,唔諗咁多喇,入去啦~
入去坐底咗諗住出去手指指叫嘢食嘅時候,見到有份 menu,打開睇睇,原來有 pasta 同有飯食,價錢又 OK,梗係叫返 pasta 或者飯啦!
我哋叫咗一個飯一個 pasta 再加支可樂~
Risotto di Mare
嚟咗意大利幾日,第一次食飯,唔係好鍾意,飯身微硬,汁嘅味本身係 OK 嘅,不過咁樣配落啲飯度食,我個人就唔係好鍾意,而且份量偏少,果然一分錢一分貨~
Tortellini panna e Prosciutto
第一次食意大利雲吞般嘅 pasta,味道一般,作為正餐,都係唔太喜歡,唉,要平就要將就吓啦~
今日餘吓嘅時間都冇點特別安排景點,都係周圍行吓,冇目的咁周圍行,同我一貫嘅習慣有啲唔同,所以有啲唔係好自在,不過遊威尼斯,亂行一通,似乎又係比較合適嘅旅遊方式~
Chiesa di San Maurizio (教堂)
Ca' d' Oro (黃金宮)
喺呢度買咗啲生果喺威尼斯呢兩晚食,由於文化唔同,我哋唔敢自己揀,唯有信佢,點知佢真係執啲爛嘅俾我哋,我哋梗係要佢換返啦,佢仲叫我哋自己揀!
小妹妹:你鍾意就抹飽佢啦,我冇眼睇!
小弟弟:好呀!
小弟弟:我擦擦擦~
繼續貼相
行到差唔多,本來想去另外兩個打算有時間就去嘅教堂,Chiesa di San Giorgio Maggiore 及 Basilica di Santa Maria della Salute,不過前者搭巴士要兜大圈先去到(當時忘了轉一程巴士就唔駛兜大圈);後者有起程去呀,不過搭錯巴士,搭咗反方向......
結果冇去到,不過咁,之後睇返資料,兩間都閂 1800,其實就算搭啱巴士又搭到最快嘅航線都係趕唔切嘅~ =P
咁算啦,直接搭巴士去計劃好今晚會到嘅地方食飯~
Taverna San Trovaso
都係有人推介,唔太貴又可以食到地道嘅墨魚麵~
仲有幾個字先開門,又喺附近周圍望吓~
差唔多夠鐘嘅時候突然嚟咗廿幾人,好彩我哋企咗喺門口,點計都係我哋嚟先,唔係話怕等,係怕冇位姐~
同樣,都係參考人哋叫過啲咩,又自己揀啲咁~
不過佢哋忙於招呼果廿幾人,好耐先有人理我哋......
例牌有嘅麵包~
Insalata Mista (insalata mista, pomodori, carote)
碟沙律勁苦,有啲抗拒,但我哋都有食晒佢~
Lasagne alla Bolognese
層次鮮明,唔會話食食吓變到一 pat pat 咁,幾好食,但唔算特別突出~
Spaghetti alle Seppie nere
好好食!又足料!係稍嫌鹹咗少少,不過真係好好食!
Tiramisu
可能我哋都唔多好甜,望落就幾好食,食落都唔係話唔好食,OK 啦~
本來諗住過 Lido 行吓,不過其實都有啲攰,唔去 lu,直接搭巴士返酒店~
呢間酒店冇 free wifi,但可以俾錢買,本來都有諗住買,不過一返到酒店休息咗陣先知道原來真係好攰,早啲瞓把啦~
對面間酒店果然係五星級,成日都見到有水上的士埋站,屎塔望完對面酒店,有個好正嘅理論:「我哋個 view 仲正過對面啦,我哋同對面望同一個 canal view,不過我哋就望住五星級酒店,對面就只係望住三星級酒店~」
咁都俾你諗到,但又真係幾有道理~ =D
留言列表