《瞬間看地球》Stranger's Blog

今日主要景點：

Venice

Piazza San Marco (聖馬可廣場)

Ponte dei Sospiri (嘆息之橋)

Loggetta Campanile San Marco (大鐘樓)

Basilica di San Marco (聖馬可大教堂)

Basilica di Santa Maria della Salute (教堂)

Chiesa di San Giorgio Maggiore (教堂)

Burano (外島)

Murano (外島)

今日住呢間酒店包早餐，食埋先出去玩~

款式唔多，主要係麵包夾火腿同芝士咁，同埋有啲奶呀，可以落啲穀物咁~

 
今日第一站係 Piazza San Marco (聖馬可廣場) 及 Ponte dei Sospiri (嘆息之橋)

由酒店行過去，幾分鐘就到，今日天色都幾差，好多煙霞，成個天都係灰朦朦咁，不過唔落雨已經算好彩啦~

其實而家都近九點，廣場都係冇咩人，對於我哋嚟講，其實咁樣仲好，好過成個廣場都係人~

 
有人自己嚟影婚紗相~
 
Palazzo Ducale (總督宮)

 
Ponte dei Sospiri (嘆息之橋)
 
對岸 San Giorgio Maggiore

如果今日有時間，我希望可以過到去圖中嘅鐘樓，望返過嚟~
 
嚟咗意大利幾日，都未見過來自香港嘅旅行團，喺我哋遊覽緊聖馬可廣場嘅時候，終於都見到，見到佢哋嘅時候，個個都急步半跑半行咁，可能係排隊入教堂~

遊完廣場，就要決定入教堂先定上鐘樓先~

教堂只有好少人排緊隊，不過未開門，好唔好趁少人排定隊呢？

鐘樓就仲少人排隊，基本上只係等 lift 而已，又已經開咗，只要 lift 到，隨時都可以上去~

最後都係決定上鐘樓先~

下一站係 Loggetta Campanile San Marco (大鐘樓)

上鐘樓，只可以搭 lift，不設步行~

上到上面，已經有十多二十人，好彩選擇上嚟先，否則人多起嚟，想欣賞吓風景都難~

 
對岸 San Giorgio Maggiore
 
Basilica di Santa Maria della Salute (安康聖母教堂)
 
廣場已經放滿餐廳嘅檯椅~
 
下一站係 Basilica di San Marco (聖馬可大教堂)

喺鐘樓落返地面，已經見到一條長龍，條龍係排入教堂嘅，我哋就走去龍尾諗住排隊，不過龍尾有幾十人聚集緊，聽緊導遊講解~

幾十人係圍住個導遊，即係最近條隊嘅人係背住條隊，我都唔知當唔當佢哋排緊隊好，做衰人都係咁話，排喺佢哋前面~

隔咗一陣，個導遊終於都講完佢要講嘅嘢，叫啲人排隊，本來都冇咩嘢，條隊好慢好慢咁郁緊，有幾個人似係一家三口(兩大一小)，係都要排喺我哋前面嘅隔離，我又唔覺得佢哋有意圖攝入嚟，但就係要排得前過我哋依附住條隊，真係好鬼討厭~ .\!!/.

入呢間教堂係唔可以帶袋入去嘅，寄存個袋亦要喺第二度搞，不過我見好多人有袋喺身都冇俾人叫去第二度，一於跟到底~

排到差唔多到入口，知道了，原來細袋俾拎入去，比較大啲嘅就唔得喇~

註：教堂內禁止攝影

 
遊完教堂，見時間尚早，決定去埋另外兩間想去嘅教堂~

下一站係 Basilica di Santa Maria della Salute (教堂)

呢間教堂比另一間收得早啲，收 1200，就嚟咗呢間先~

呢間教堂喺對岸，要搭水上巴士過去~

  
行完教堂，見到附近有座建築物有遊人不停出出入入，我哋又係去睇吓~

不過入面冇咩睇......

 
附近風景~

 
跟住就走過去呢邊最尖端位，即係下圖紅箭咀位置~
 
呢個位有個冇著衫嘅公仔，同埋有個有著衫嘅警察(唔知係保安定警察，當佢係警察先)喺度~

安排個警察喺度做咩呢？正路梗係以為係唔俾啲人企咁開，避免發生意外，點知原來係唔俾人靠近個公仔，真係估佢唔到~ @@

 
下一站係 Chiesa di San Giorgio Maggiore (教堂)

呢個教堂位於 San Giorgio Maggiore 島，水上巴士嚟講，只有 2 號可到，其實都幾唔方便，我喺 Salute 過去，就要搭返過 San Marco 再轉返 2 號船先過到去~

呢間教堂外表唔算特別，不過佢有鐘樓，可以俾人上去參觀風景，所以吸引咗我過去~
 
嚟到先上鐘樓，又係只可以搭 lift，不設步行~

 
廣場果邊而家已經多好多人~
 
突然間，全部人都叫咗出嚟，因為大家都被突如其來嘅事情嚇咗一跳！

鐘樓上有幾十人喺度，突然，「噹」一聲巨響，大家都俾呢一聲嚇親而叫咗出嚟！

原來十二點喇，就喺頭頂不遠處嘅大鐘響起，呢啲鐘聲通常好遠都聽到，我哋而家就喺佢隔離，唔嚇死已經算偷笑！~_~!!!

個鐘都響咗好耐，大家都唔係好頂得順，紛紛掩耳保護~
 
喺鐘樓果邊嘅地下見到呢個銅像，睇果樣就似係飽歷風霜，唔知以前係咪放喺教堂頂嘅呢？
 
教堂內部~

 
睇完教堂，就喺外面沿海嘅樓梯坐底休息吓~

喺呢一刻，成個 Venice 都係灰色，一副風雨欲來嘅樣子~
 
休息夠就去食嘢，本來好順理成章咁會返返 San Marco 果邊是旦搵嘢食，不過諗諗吓，反正都係求其食，不如去啲未去過嘅地方行吓搵吓嘢食~

正如我之前講過，水上巴士嚟講，只有 2 號先會經呢個島，我要離開，有兩個方向，一係搭去 San Marco，一係搭去 Zitelle，我哋決定搭去 Zitelle~

到咗 Zitelle，感覺好好，因為呢邊人唔多，好舒服~
 
我哋見到有間餐廳，啲座位就喺海邊，好似好正咁，行近啲睇睇，嘩，都幾貴，唔諗啦~

再行落啲，又見間餐廳，啲座位又係喺海邊，間餐廳明顯係好普通嘅餐廳，咁就啱嘞，睇埋價錢，掂，就呢間啦！
 
例牌兩個主菜一支有氣水~

Pizza Funghi

個餅底又薄又脆，幾好食~
 
Risotto Frutti di Mare

呢個比起噚日食果個好得多，飯粒冇咁硬，其實話冇咁實比較貼切，味道又好好多，都幾好~
 
一邊 hea，一邊食嘢，一邊喺冇咩遊客嘅環境欣賞灰色嘅 Venice，一邊睇住啲海鷗遊嚟遊去，非常寫意~

 
我哋嚟嘅時候都仲有陽光，但坐落之後，天色開始暗，直情暗到好似啲漫畫咁，黑暗將要掩蓋大地咁款，真係以為暴風雨要來臨~

我哋都喺度安慰自己，本來噚日同今日都應該落雨，而家已經賺咗一日(昨午 + 今早)冇落雨~

果然係天有不測之風雲，黑暗過後又光返少少，好！=D

又見到郵輪~
 
之前喺 San Giorgio Maggiore 嘅鐘樓見到 Zitelle 呢邊有兩間比較起眼嘅教堂，諗住反正過到嚟，就走去睇睇~

可惜，一間好似已經變咗酒店~
 
另一間要收費，冇入~
 
附近風景~

 
行完呢邊就返返過 San Marco 果邊~

返到過去，想搵個洗手間去吓，見到地面有指示，就跟住佢行~

行行吓見到「威尼斯斜鐘」=P
 
唉，搵咗幾個字都搵唔到，把心一橫，返酒店去，反正只係行一個巴士站嘅距離，當行吓街~

途經兩間教堂，一間收費，不入；一間未開，冇得入

 
途經一間好有誠意嘅餐廳，菜牌上竟然有齊中文、日文、韓文字！=O

雖然啲字佢唔係用寫嘅方式，我只會話佢係用畫嘅方法去寫字，但真係好有誠意，又夠綽頭！
 
從另一邊望向嘆息橋~
 
下一站係 Burano

Burano 距離主島有好一段距離，出發之前，搵到資料係可以由 San Marco 直接搭水上巴士到 Burano，我哋不停係咁搵，連水上巴士站都行咗三個，都搵唔到~

搵咗足足有半個鐘，都仲係徘徊喺 San Zaccaria 附近，其實我知道搭船去 Fondamente Nove (F.TE Nove) 都有船過 Burano，不過水上巴士嘅職員有另一個答案~

我哋分別喺三個巴士站都搵職員問，三個嘅答案都係一樣，冇直接船，要搭 15 號去 Punta Sabbioni 再轉船先可以到 Burano，既然三位職員口徑一致，照跟！

好容易就搵到 15 號巴士站，睇睇時間表，頂，拍戲咩！我哋入咗閘嘅時間係 1545，上一班船嘅時間係 1544，真係吹脹！

下一班船係 1615......

足足要等半個鐘！唉，搵船加等船，白白浪費咗一個鐘！>_<

等到有船嘅時候，已經累積咗好多人，等半個鐘，勉強叫做有啲價值嘅，遲嚟嘅好多都冇位坐，要企大半個鐘~

 
落咗船就見到有指示寫住「Boarding for Burano」，本來就唔應該有咩懷疑嘅，人哋咁樣寫得冇理由老點你，不過，船上面有 99% 嘅人落船，而呢 99% 嘅人入面，又有 99% 嘅人冇跟指示牌方向行~

一係個牌係錯嘅，一係，真係冇咩人經呢度去 Burano~

見到有個疑似職員，我走埋去問吓佢，答案係，個牌係啱嘅~

喺度等上船嘅人，連埋我哋兩個，不足十人......

我諗可能多數人都係經 F.TE Nove 去 Murano，再去 Burano 卦~

我先去 Burano，係因為我哋對 Burano 嘅興趣大過 Murano，所以想早啲過嚟，有咩意料之外嘅事發生，可以唔去 Murano~

其實而家咁樣冇咗一個鐘，都可以話係意料之外嘅事，去唔去 Murano，之後再算~

等咗唔夠十分鐘，就有船過 Burano~
 
好冷清......

坐半個鐘就到~
 
睇人哋嘅遊記，每一個嘅焦點都係喺啲屋度，似乎係呢度唯一吸引人嚟到嘅原因，所以，我冇任何準備，冇諗住搵地圖，冇諗過要認路，亂行一通~

既然焦點喺啲屋度，冇咩好講，唯一想講嘅係，可惜天色昏暗，否則配合適當嘅陽光，相信會令人更陶醉~

 
屎塔話好多謝我帶佢嚟，佢好鍾意呢度咁話~

有你一句，我所做嘅功課都係值得嘅~ =)

下一站係 Murano

時間已經唔早，不過過一過 Murano 都可以嘅，反正返主島都經~

我哋知道去到嘅時候，啲舖頭一定閂晒，其實都真係唔緊要，我哋本身唔諗住參觀博物館，其實就連嚟唔到呢個島都覺得冇所謂~

沿途嘅海上風景~

荒廢咗嘅孤島，寂寞，淒清~
 
唔知係咪仲有用嘅呢？

到咗 Murano，冇咩人，梗係啦，邊有人等啲舖頭閂晒先嚟咖~

 
島上面有啲展品~

 
可能島上仲有其他展品，不過又冇咩大興趣行晒成個島，算吧，覺得夠就走~

去到巴士站，有幾條嘅巴士線都可以返 F.TE Nove，最快果班都要十五分鐘後先有，現場就只有我哋兩個，呆呆地等~

等到夠鐘，仲未有船到，我哋覺得唔係好妥，屎塔提議不如出去等(即係上船位置)，一起身，赫然發現，架船已經到咗，仲閂緊閘準備離開，原來我哋先前坐低果度係睇唔到隻船埋嚟，呢刻我哋兩個人四條腿立刻開著摩打咁，係咁跑過去~

上唔到呢班都唔知又要等幾耐，好彩對方都等埋我哋，真係好彩！

沿途風景~

都係果句，唔知係咪仲有用嘅呢？

 
呢舊嘢唔知係咪一開始已經喺海中心......
 
到咗 F.TE Nove，如其兜個大圈搭船返 San Marco，不如行吓，直接向西南方斜 cut 咁行去雷雅托橋先搭船仲好~

途經一啲餐廳，本來喺呢啲唔多遊人嘅橫巷食吓嘢就係最好嘅，不過我哋又未肚餓，為食而食又有點無謂，都係遲吓先~

嚟到 Venice，迷路幾乎係必然嘅，我哋個大方向係大運河，一路睇住地圖，一路行，行行吓就跟唔到地圖，係，我哋迷路了......

迷路就只好問吓當地人，經過一輪雞同鴨講，終於搵到雷雅托橋嘅巴士站~

搭巴士返返 San Marco，返酒店去埋個洗手間，順便放低部 DC 叉電就出去搵嘢食~

行吓行吓，就行到去噚日食晏果邊，我哋當然唔會去返果間嘢度食，再繼續行，就行到去一間噚日都到過，但噚日唔打算入去嘅舖頭~

點解噚日冇打算入去呢？因為唔知佢係以咩形式去叫嘢食，只係廚窗放好晒已製成嘅麵和餸菜，一格格咁放，係逐樣叫定係點樣呢？

今晚，我哋決定探過究竟，就幫襯呢間！
 
入面唔係一般餐廳嘅格局~
 
其實入面係有餐牌嘅，不過我哋都冇理，就睇廚窗果啲，以貎取食~

我拎住部電話，喺廚窗揀好要叫啲咩，我預設佢係逐樣叫，影咗幾張相，走返入去俾個店員睇，可能燈光問題，影得唔係咁清，有啲食物個樣差唔多，但用料唔一樣，睇相未能分辨~

佢用身體語言示意我走入佢個廚房，指俾佢睇，為免誤會，我再問一次，我係咪可以走入去，要知道，廚師工作嘅地方，好多時都閒人免進嘛~

呢個店員，我相信佢係店主，佢嘅態度係好真誠，又友善，俾到人一種好舒服，好親切嘅感覺~ =)

我走到入去逐樣指俾佢睇，我可以感覺到佢真係好細心聽我講，我講完，佢請我坐返埋位等一等~

成間舖頭就得佢一個人做嘢，落單、整嘢食、洗嘢、收錢，一腳踢，但我睇得出佢好俾心機做，呢間舖頭，可能就係佢嘅理想，佢嘅心血~
 
我哋點咗三樣嘢，再加支水~

Insalata di Pollo

雞肉沙律，個汁個味，唔識形容佢係咩味，我只能用好味嚟形容，很喜歡！=D
 
Lasagne di Pesce

魚肉千層麵，啲芝士香到不得了，唔可以話好有魚味，但至少喺咁香濃嘅芝士味當中食到魚味，味道非常不錯，好味！=D
 
Catalana Mazzancolle

我自己好鍾意食蝦，所以對呢碟嘢特別加分~

啲蝦好鮮味，外層果啲係蒜頭同洋蔥，又香又鮮，好味到不得了！

就咁食啲蝦已經好味到上晒腦，點埋碟邊啲醋，完全將碟蝦帶到去另一個層次，味道非常豐富有層次，真係非常好食！=D

不過，美中不足嘅係，冇挑蝦腸，不過好食到咁，我唔介意~
 
其實我哋都想試吓其它嘢，滿足食慾又好，當支持吓佢又好，不過真係有啲飽，冇計~

我哋見佢得一個人做嘢，所以就將用完嘅餐具拎到去佢檯前，我唔知當地人會唔會咁做，但至少我嘅出發點係好嘅，我相信佢會感覺到~

俾錢時佢問我啲嘢食 O 唔 OK，我就同佢講好好食，我哋都好鍾意~

佢嘅笑容既開心又滿足，而我哋都係一樣，既開心又滿足~

食完呢餐有啲感動嘅感覺，嚟咗意大利一星期，未試過食一餐咁有感覺嘅！

食完晚飯就行返酒店，完結今日嘅旅程~