今日主要景點:
Milan
Chiesa di Santa Maria delle Grazie (教堂)
Duomo Cattedrale (米蘭大教堂)
晨早六點鐘,俾窗外一啲聲音嘈瞓,係一啲類似大提琴嘅琴音,持續咗大約一個小時~
雖然啲聲搞到我醒咗再瞓唔返,但係又幾好聽,瞓唔返都冇咩所謂~
今日食完早餐就搭水上巴士去火車站,再搭 0950 嘅火車去 Milan~
前兩日都搭咗好幾程水上巴士,今次係最後一程,俾我哋遇上查票員查飛~
呢程巴士都滿座咁滯,連企位都唔多,查票員唔係每個人都查,不過,我眼見都查咗好多人,仲好似有人被查到冇買飛~
其實我一啲都唔肯定係咪有人冇買飛俾人捉,一來雙方都唔係講英文,二來現場實在太多人,我根本都睇唔清楚,只係見到有個查票員同其中一個人講咗好耐,睇個款唔似係朋友相遇,個查票員仲喺袋中拎咗啲嘢出嚟,又係咁寫~
我所見嘅就係咁多,又見唔到有金錢交收,所以都唔係好肯定~
我同屎塔分開坐,都分得好開吓,佢張 Travel Cards 喺我度,因為人太多,我又未能即時行到過去身邊,不過都唔怕嘅,查到先算~
到最後都冇查我哋兩個~
上咗火車,都係盡快安置好行李先,今次行李存放位置唔係喺車卡頭,又唔係喺車卡尾,原來喺中間......
放好行李,就搵返自己個位,發現俾人坐咗,不過周圍都係空位,坐第二度都係一樣姐~
火車到咗下一個站 - Mestre,好多人上車,有一個男人望一望我哋,個樣有啲疑惑,其實我哋都意會到係咩事,我咪問佢我哋係咪坐咗佢個位,佢話係,咁我哋梗係即刻起身俾返個位人~
自然,我哋就禮貌地同坐咗我哋個位果個人講,個位係我哋嘅,佢呆咗一陣冇出聲(佢嘅表情已經話俾我哋知佢唔係一個友善嘅人),我哋再同佢講 103 & 105 係我哋嘅,佢竟然話睇唔到邊度有編號,屎塔即刻指住個編號俾佢睇,嘩,佢塊面即刻燶晒,再發脾氣般執拾返檯面嘅嘢,坐前一個位,再大力拋返低佢手上嘅嘢~
你鍾意發脾氣就發到夠,話之你~
到咗 Milan,個火車站 - Milano Centrale 都幾靚~
感覺上,Milano Centrale 比 Roma Termini 雜,門外有好多露宿者,仲見到有人向住火車站嘅外牆小便......@@
火車站門外有單車可供取用 (唔知租定借)
嚟到 Milan,第一時間去旅館先,我刻意訂一間近火車站嘅旅館,方便明早一早要趕車走人~
訂呢間旅館時,館主喺 email 提過到埗後打俾佢,佢會嚟火車站接我哋,不過我哋並冇咁做~
一來又近又易行,我好有信心我唔會行錯,無謂麻煩人啦;二來到咗打俾你,又要等你嚟,都唔知等幾耐~
途經一間幾特別嘅教堂~
好啦,搵到啱嘅地點,有 14 個門牌,但係冇一個係我哋訂果間旅館嘅名,咁就唯有打俾館主~
接通咗,我哋話已經到咗樓下,但唔知按邊個門鈴先啱,對方講咗句令人震驚嘅說話,原來佢哋搬咗!
出發前我仲上過去佢哋個網址,地址冇變,嚟咗意大利一星期,冇收過 email 更冇收過電話通知佢哋搬咗~
再講,搬喎,唔會係聽日搬但一星期前都唔知下化?
聽到咁已經嬲嬲哋,佢仲好怪我哋到咗火車站唔打俾佢!
真係火都嚟,不過出門在外,真係忍一時風平浪靜,實在冇理由開佢波,咁我哋同佢講,既然係咁,我哋企喺你舊址等,你過嚟接我哋啦(反正佢去火車站都肯,我哋提出呢個要求,好合理吖),佢竟然唔肯,咁你唔肯我哋都冇計~
問明地址就去搵,頂佢個掣,舊址 22 號,佢話搬咗去 26 號,但條街只得 24 號,搵嚟搵去都搵唔到,好彩喺第二條街見到個中國男人,走埋去睇吓係咪佢啦,原來真係佢,不過佢又唔係喺新址等我哋,見面後仲要行,不過就唔係行好遠~
條友真係古古怪怪,我一直都好有戒心,不過從佢行為同眼神,又真係冇咩古怪,一貫賴皮人嘅模樣,一路行仲一路怨,好話其他旅客到火車站都唔打俾佢,又話有次搞到要報警,因為啲旅客喺舊址係咁亂按人哋門鈴,戶主不勝其煩所以報警,根本就係你自己一手做成!
話佢個網仲係舊地址喎,佢又話只係未改,我哋唔提,都唔知佢幾時先會改,蠱蠱惑惑咁~
嘿,點知好戲在後頭!
上到去,佢話我哋冇確認,所以冇預留我哋想要嘅房俾我哋!
咁我就要由頭講一次成件事係點嘅~
一開始用 email 問佢嘢,問完之後,我哋確認埋幾時入住同要求含私浴私廁房間,果時距到埗日約兩三個月~
佢確認冇問題,仲叫我哋出發前再確認一次~
好啦,等到出發前兩星期同佢再確認一次,佢又話出發前一兩日再確認一次~
好,我真係出發前一日再同佢確認~
咁我做準備功夫,唔可能去到最一日先做,即係我第三次確認前已經 print 晒 confirmation,因為 email 內有晒我哋嘅要求,佢亦確認當日有房的,咁諗住有晒確認資料,冇問題啦~
再講,佢都有記錄,要查佢都查到,佢唔肯查我都仲有 email 可以俾佢睇,覺得冇咩問題~
第三次確認後,佢有回覆確認,咁就萬無一失啦~
去到俾晒啲 printout 佢睇,佢話我哋出發前冇確認,淨睇 printout 的確係,咁我話我哋出發前有確認,你都有回覆確認,佢條粉皮就摸吓個頭面有難色咁,又唔肯 check email,一味話冇含私浴房俾我哋,大家都僵持咗一陣~
咁我哋明白,冇就係冇,堅持都冇用,冇理由叫住緊果啲人走咖,只好屈就住喺不含私浴私廁嘅房間~
最火係佢啲態度,一句道歉都冇,連覺得唔好意思都冇,仲話唔接受就不如幫我哋搵第二間,我得半日喺米蘭,如果同佢鬥氣,大家都係輸家,我哋會輸得比佢更慘,只好無奈接受!=(
今日第一站係 Chiesa di Santa Maria delle Grazie (教堂)
Settle down 之後,準備出去玩,館主教我哋點去火車站最快,點去 metro 又最快咁,唉,算做係咁二加返少少分啦~
去呢間教堂,主要唔係參觀個教堂,係睇名畫 The Last Supper (最後的晚餐) 嘅真跡~
參觀呢幅畫,必需預約,入場限時 15 分鐘,每節只容許 25 人~
講起預約,真係要頒咗獎俾自己~
成件事要由三月初講起......
當時知道三月初就可以預訂 2/6 嘅門票,我已經成日上個網度望住,可惜都係錯過咗最佳時機~
當我見到可以預訂 2/6 嘅時候,係已經開賣咗一日,並且當日(2/6)已經冇門票可供預訂,係成個六月都有,只有呢一日冇晒~
或者當日根本冇得預約,又或者真係咁啱俾人喺一日之內訂晒,我唔知道,但睇個網又冇提過呢日冇得預訂~
或多或少,我都有怪責自己點解冇一開售就上去訂飛~
其實,睇唔到係咪真係咁大件事?又絕對唔係,但係一生人裡面,今次好可能係最近呢幅舉世知名嘅名畫嘅時候,梗係想趁呢次機會去欣賞吓~
其實現今科技發達,好多時根本唔需要到現場去睇,喺網上睇可能仲清楚過到現場,但意義又唔同呢~
我知道喺網上預訂唔係唯一嘅途徑,仲可以打電話,又可以經其他公司包埋導賞員咁去訂票~
先講打電話預訂,我買咗張電話卡,打第一次,唔通,再打又唔通,日又打夜又打,足足打咗一個星期,都係唔通!
其間我分別試過用自己同屎塔電話打,一樣係唔通!
初時都以為係線路繁忙,咁我又試吓喺對方凌晨時份打,又係唔通!
為咗驗證我打嘅方法係啱嘅,我試過打過去 Milan 其中一間酒店,接得通,證明我冇用錯方法去打長途!
我又試過偷雞用公司長途戶口打過去,通喎!不過一通我就收咗線,話明偷雞嘛......
買嘅唔得,自己嘅唔得,公司嘅又唔用得,最後問咗個有長途戶口嘅朋友試吓~
哈,一打就通,成功咗一半啦!點知一路都係電話錄音,係咁等係咁等都冇人接......
過咗半個鐘,終於都有人接!不過,聽電話嘅人係唔識聽英文嘅,我哋睇返電話按鍵嘅顯示,肯定冇按錯,相信係條線痴鬼咗去意文果邊啦!
我哋都打咗成個鐘,都係冇人聽,算吧,盡咗力唔得就算,無謂勉強~
而經其他公司呢,喺網上面搵到好幾間公司都有做,由幾十歐到百幾歐都有~
睇一幅畫要幾十歐我已經好難接受,仲有啲要百幾歐,就算我好有錢都唔會咁用啦!
呢個途徑直情可以唔駛諗~
我仲未放棄咖!距離六月仲有差唔多三個月,我留意到有啲日子賣晒之後又有返,我就日日上去個網度睇,一得閒就睇,一記得又睇,希望我想去果日都會突然有返~
屋企電腦、公司電腦、手提電話,全部將呢個網做晒首頁,日日係咁 check 住,終於有一日見到 2/6 有門票出售!
一 click 入去,只有 1130 有門票出售,唉,我 book 咗班火車 1225 先到 Milan,冇用啦~
空歡喜一場,又繼續日日如是係咁 check check check,兩個多月後,嘿嘿,終於俾我買到!
雖然唔係我心目中嘅時間,話之佢啦,Milan 冇咩景點想去,行程點掉都得!
呢云真係鐵柱都磨成針呀!LOL
由旅館去呢間教堂,我哋選擇咗搭 metro~
好多人都話 metro 危險,所以本身諗住搭電車,不過時間比 metro 用多一倍,又冇 metro 咁易搵資料,所以都係決定搭 metro~
其實年終咁多人去,喺網上面睇到出事嘅只係好少數,我相信只要自己警覺性高啲,應該冇問題~
由橫街一轉出嚟望右就見到火車站,好近~
個 metro 站好鬼暗~ @@
落到 metro 站先醒起,唔記得喺火車站買 Milan 嘅一日交通,落到嚟又搵唔到售票處,只好去售票機度買~
第一次喺歐洲搭 metro,個站又暗成咁,又冇咩人,個心有啲不安,有啲心緒不寧,唔係好想停下腳步,想盡快離開~
篤咗幾嘢,可能個心真係有啲急,冇咩點專心睇,唔係好識用,見到附近有個著住制服嘅人,相信係職員,就走去問吓佢~
佢好爽手咁走過嚟幫我哋買,兩張一日票加埋係 EUR9,我拎咗張 EUR20 嘅紙幣出嚟,佢耍手又擰頭,再指住個螢幕上 9.95 嘅標示,由於佢用嘅係意文版面,我當然唔明佢做咩~
之後佢拎咗佢個銀包出嚟,用兩張 EUR10 紙幣同我打散佢,再示意我入錢落部機度,禮成!
(事後我諗返起,好似有人提過太大面額嘅紙幣,部機係唔接受定找唔到咁多,9.95 可能就係每次找續嘅限額......卦......)
拎完兩張飛,又問我哋去邊,又教我哋搭,好彩遇到好人~
搭 metro,就算要轉車,對於都市人嚟講,都係冇咩難度嘅事情,好容易就去到我哋想去嘅站~
其實由入閘到出埋站都冇乜嘢,好安心,一直都係自己嚇自己~
跟住地圖行 5 分鐘就到~
拎張預約文件出嚟換飛,再坐埋一邊等夠鐘~
到夠鐘喇,查一查飛,之後一共經過四度門,每經過一度門,要等之前果度門閂咗先開另一度門,保安好似好森嚴咁~
註:畫室內禁止攝影,以下相關相片來自維基百科
L'Ultima Cena (The Last Supper) - Leonardo da Vinci
畫室內另一邊仲有一幅畫~
Crocifissione (Crucifixion) - Donato Montorfano
睇完畫,諗住搵啲嘢食吓,不過附近都真係唔覺有食肆,唯有去下一站先搵嘢食~
附近環境~
停車位劃到上行人路......
既然兩旁泊晒車,又冇咗一截,相信係廢咗嘅電車路~
呢座建築物好靚~
下一站係 Duomo Cattedrale (米蘭大教堂)
搭 metro 過大教堂,幾個站就到~
行出個站就已經係大教堂對開嘅廣場,自然,一上到去就見到大教堂~
不過我哋都唔理住,搵咗嘢食先~
就喺廣場嘅一邊路旁,有間餐廳,正面咁面對住大教堂,就呢間啦~
職員規定啲座位要咁樣向,兩個人要肩並肩,否則佢冇位行咁話~
例牌啦,兩主菜加一有氣水~
Spaghetti alla Carbonara
有煙肉,有蛋黃,啲蛋黃味好香,幾好味~
Margherita
其實唔知咩嚟,都係喺 menu 睇樣叫,淨係知有蕃茄,不過現實個樣同 menu 個樣係唔同嘅,但又未到唔可能係同一樣嘢咁啦~
熱食 OK,凍咗就好一般~
食完嘢就真正去參觀吓個大教堂~
行去教堂嘅途中,有啲人遞啲白鴿食物俾我哋,我哋唔理佢都係咁隊埋嚟,我哋知一接就要俾錢,係咁耍手係咁行,佢就係咁 no no no 繼續隊埋嚟,我哋係唔會中計咖!要俾就俾啲白鴿,俾我哋做咩,我哋又唔食嘅!
去到門前見到有兩條隊,好似都係排入去嘅,是旦排一條,人雖然多,但都唔駛排好耐~
呢個教堂真係好靚好特別~
睇完教堂,準備上去教堂頂,不過就唔知邊度上,於是就走過去問教堂門口負責安檢嘅人~
佢嘅回覆實在俾我有種情天霹靂嘅感覺!
佢話今明兩日都唔可以上去!
真係好難令人接受嘅一句說話!
唉,冇得上都冇計啦,雖然我對 Milan 嘅市景冇咩大興趣,但我對教堂頂本身幾有興趣,真係有少少遺憾~ =(
下一站係 Castello Sforzesco (城堡)
Milan 淨返 Galleria Vittorio Emanuele II 想去,呢個地方用唔到幾多時間,上唔到教堂頂,有時間多出嚟,於是我又打開本旅遊書睇吓有咩地方可以去吓~
地圖上有處地方比較起眼,係一個城堡,叫 Castello Sforzesco,旅遊書話 1630 後免費,1730 閂門,我決定去咗城堡先,返轉頭先行吓 Galleria Vittorio Emanuele II~
去城堡,搭 metro 就到~
入到城堡漫無目的咁行~
行到攰就喺公園休息咗一陣,又打開本旅遊書,裡面提到,城堡內有一件著名嘅藏品,係 Michelangelo 未完成嘅遺作,於是我哋又走去搵吓~
到搵到嘅時候係 1705,館理員唔俾我哋入,話已經閂咗,咁冇計啦~
(之後上網睇返資料,城堡本身係免費開放,博物館星期六 1630 ~ 1730 免費,但最後進入時間為 1700)
Rondanini Pietà - Michelangelo Buonarroti
註:呢件遺作嘅相係來自維基百科
城堡門外有個大噴泉~
下一站係 Galleria Vittorio Emanuele II
同樣係搭 metro 返去~
拱廊兩旁都係名店,又 Prada 又 LV,不過我哋嚟呢度,只係想欣賞吓呢條拱廊~
休息夠就搭 metro 返火車站果邊買生果同食晚飯~
過到去行咗好耐都唔見有超市,只係見到超市嘅 poster,最後我哋指住個 poster 問咗個伯伯~
點解我哋問伯伯呢,因為 poster 附近可見嘅都係露宿者,只有呢個伯伯正在遛狗~
可惜,呢個伯伯係完完全全唔識英文嘅,不過佢係極有熱誠嘅伯伯,佢一路講啲我哋聽唔明嘅語言,一路不停用佢嘅身體語言教我哋去~
最後,憑佢誇張又到位嘅姿勢,我哋就知道呢間超市喺車站嘅下層,仲要係喺 poster 嘅另一邊,係南轅北轍嘅另一邊......
佢真係好嘢,其實我哋都好嘢~ LOL
入到超市,搵到生果,不過全部都係預先包裝好,四個一包四個一包咁,我哋只係留喺 Milan 一晚,買四個真係食唔晒,我哋又絕對唔會拎埋生果走~
結果,最後買咗八個! XDDD
我哋決定今晚嘅晚餐就係食生果!
買完生果就行返旅館~
頂佢個掣,個橙酸到口腔潰瘍咁滯......
頂佢個掣,冇私浴私廁,行咗出去四次先沖到涼......
頂佢個掣,冇私浴私廁,臨瞓行咗出去三次先去到廁所......
頂佢個掣,上返呢間旅館個網,地址已經被移除,但就冇講低新地址,好神秘......
留言列表