《瞬間看地球》Stranger's Blog

今日冇咩好重要嘅景點，主要係閒逛 Luzern~

講起瑞士，最希望係可以上到少女峰~

其實呢一兩日我都有留意少女峰嘅天氣，不過情況實在不容樂觀，未來幾日嘅天氣預測都係好差，唯有見步行步~

今朝一早就要搭車過瑞士嘅 Zug，再喺 Zug 買車飛過 Luzern，預訂咗 0710 嘅火車，六點鬆啲要離開旅館~

一早起身諗住去刷牙洗面，一開門就見到有個男人淨係著住條內褲喺度行，我知道冇咩大不了，但其實我個人唔係好鍾意咁樣，再講，成間旅館，仲會有其他女仔咖嘛，點可以咁樣咖~

今次搭嘅火車，可能因為跨境關係，係要有飛揸手先得，就係我哋第一日嚟到意大利，喺機場換票機度換嘅飛，車票上面有晒列車班次嘅資料，唔需要再去打票機到打飛~

火車開咗無耐就有位女職員查飛，佢睇完張飛就提我哋喺「卡啦蘇」要轉車~

吓？乜要轉車咖咩？佢見我哋有啲錯愕，仲補充多句，second stop 要轉車~

咁「卡啦蘇」即係咩站呢？我哋請佢串一次俾我哋聽，原來係 Chiasso~

我一直都以為唔駛轉車，所以我抱有少少懷疑態度，但係我心底裡其實係信佢嘅，我相信佢唔會無啦啦玩我哋嘅~

隔咗一陣，有個男職員又嚟查飛！駛唔駛查得咁密呀~ @@

頭先果個女嘅又話要轉車，而家又有個男嘅又查飛，我突然間有個想法，唔通頭先果個女嘅係假嘅？

於是我哋問多次個男嘅，係咪要轉車，喺邊度轉，個男嘅答案同個女嘅一樣，我爭啲想問埋佢點解要查兩次飛~ LOL

個男嘅又話俾我哋知喺同一個月台轉車，真係多得佢哋兩個，如果唔係都唔知會搭咗去邊~

我哋等到第二個站準備落車，但個站又唔係 Chiasso，諗住問吓個女嘅，佢見我哋有所行動，我哋未開口佢就已經同我哋講下一個站轉車~

下個站就真係 Chiasso 喇，我哋拎埋行李落車，其實都有啲迷茫，究竟係落咗車企定定等定係點呢？唔理喇，個個落咗車都向前行，我哋又跟住行，見步行步~

行行吓又見返個女嘅，佢見到我哋，向前方指一指，示意我哋行上前面，上前面果架車~

呢個女嘅，全程都係非常 cool 嘅樣子，但其實佢係好 helpful 嘅，真係多謝佢~ =)

步行過前面部火車時，經過啲好似係警察咁嘅人，見到佢哋截咗兩個好似係印度人嘅人埋一邊檢查行李，好彩冇查到我哋，因為我哋個篋，打開咗係好難合返埋，要借助一啲工具同地方先搞得掂~

上咗車就食早餐，早餐只係噚晚喺超市買嘅餅乾~

部車開咗無耐就有人上嚟查証件，都查咗好多人吓，又係冇查我哋兩個~

嚟緊嘅車程仲有差唔多三個鐘，天氣時好時壞，其實我哋上網睇過，都知道嚟緊幾日嘅天氣唔多好，希望都好似 Venice 咁，現實同預測有出入就好啦~

唔知係咪因為天色昏暗關係，多數喺火車影嘅相都反光得好利害，咁就唯有貼幾張冇反得咁勁嘅~

 
到咗 Zug，第一件事買兩張 Half-Fare Card 先~

買呢張卡係要出示護照嘅，跟住再用呢張卡買火車飛去 Luzern~

由於我兌得太多 CHF10 紙幣，我覺得火車站一般都唔會太介意我俾太多散紙，於是我就趁呢次機會用咗佢~

不過為表禮貌，我都問咗佢介唔介意先拎一疊十蚊紙出嚟~

沿途去 Luzern 嘅時候，都係時晴時雨，不過，到近 Luzern 時，竟然見到太陽伯伯出嚟散步！

牛群~
 
Luzern 幾好天~
 
到咗 Luzern，第一件事就去處理行李先~

由於我哋唔會喺 Luzern 過夜，行李就要放低喺火車站嘅儲物櫃度~
 
雖然話係閒逛 Luzern，不過我都有記低有邊啲地方想去嘅~

火車站~

 
KKL

 
啲水非常清~
 
唔知佢搵咩呢~
 
單車......
 
爭食中......
 
Kapellbrücke (木橋)

  
Altstadtplatze (舊城區)

唔知銷情如何呢...... ~_~!
 
行到差唔多，要搵地方食晏喇~

喺舊城區行咗一圈都搵唔到啱食嘅地方，於是我哋就行返出木橋果邊，因為果度沿住湖邊都係食肆~

我哋都知道瑞士消費會比意大利高，但睇睇啲價錢，心中仍然不禁要講聲好貴呀~ @@

貴都要食咖啦，求其揀咗間可以坐湖邊嘅坐低~

 
例牌兩主菜一有汽水~

Spaghetti Carbonara

都係有煙肉有蛋黃咁，不過同 Milan 食過果碟爭好遠~

差在實在太鹹，學金剛話齋，真係食到腎臟病呀！
 
Pizza Napoli

見佢用 Napoli 嚟做名，試吓佢啦，唉，奶晒嘢！

Pizza 本身冇咩特別，最奶嘢係佢上面一條條果啲魚，同鹹魚味冇咩分別，真係鹹到唔想食~

大嗱嗱成二百蚊港紙呀，唔通真係唔食咩~ T.T
 
呢餐食咗成 EUR50，真係勁貴，不過又要咁諗，一路食，一路有靚景，仲要喺湖邊，又有天鵝陪我哋食，梗係收貴啲啦~

食完嘢就繼續行~

有嘢欄住，防止啲天鵝走入市中心~
 
Hofkirche (教堂)

    
估唔到喺瑞士見到佢......
 
Löwendenkmal (獅子紀念碑)

 
嚟咗兩分鐘，就有兩團人嚟，成個池邊都係人，氣氛唔同晒~

喺意大利咁多日，都見唔到意大利跑車 - Ferrari，喺瑞士就見到~
 
Museggmauer (城牆)

 
嚟到呢個城塔，發現係唔可以上嘅~

拎旅遊局嘅地圖出嚟睇吓，諗住去第二個城塔，但點行都去唔到~

我哋問咗一個人，佢睇完地圖都唔係好知咁，但佢又好似好想幫到我哋，佢一直係咁諗，終於都講到大約喺邊個方向~

我哋依住佢個方向行，不過行行吓就落大雨，我哋搵咗間餐廳避雨，呢間餐廳仲未開，六點先開門，我哋喺佢門外嘅檯凳坐低咗，等停雨~

坐咗十分鐘，完全冇停雨嘅跡象，仲越落越大，我哋都覺得有排落，唯有拎件雨褸出嚟著~

由於太大雨嘅關係，實在再唔想踩住對濕透咗嘅鞋週圍行，所以決定放棄搵城塔嘅念頭~

我哋經 Spreuerbrücke (木橋) 過對岸~

橋呢，就有影到相嘅，不過唔可以行出露天地方影，影咗等於冇影~
 
呢個裝置唔知將啲水導向邊度嘅呢~
 
過咗條橋，我仲有兩間教堂想睇，多得屎塔支持我冒雨搵教堂，我先可以喺離開 Luzern 前去埋呢兩間教堂~

途中見到有部旅遊小火車~

 
Franziskanerkirche (教堂)

 
Jesuitenkirche (教堂)

由於有人唱緊歌，實在不便打擾，快速舉一舉機影吓就算，冇再行入去~

呢間教堂都幾靚~

 
其他 Luzern 風景~

 
我覺得 Luzern 幾靚，但又講唔出點靚法，總之我自己都幾鍾意~

遊完 Luzern，就去火車站嘅超市買生果同埋明早嘅早餐~

呢間超市非常多人，連轉個身都可能會撞到人~

去到俾錢時，係每個 counter 都最少有十幾人排緊隊......

去完超市，我哋兵分兩路~

太太去處理行李，因為放入儲物櫃嘅時候，篋身太厚，我哋要抽返小部份嘢出嚟另外放先可以放得入儲物櫃，而家要將啲嘢放返入篋再要合得埋，要花一定功夫先做得到~

而我就去車站嘅 Burger King 買晚餐~

兩邊都掂搞晒就搭火車過 Interlaken~

由 Luzern 至 Interlaken Ost 呢程係叫做 Golden Pass 嘅觀光列車~
 
不過天氣好差，仍然落緊大雨，應該都冇咩靚景睇囉~

我喺 Burger King 求其買咗兩個包，一個雞肉，一個魚柳~

啲雞肉勁"鞋"，又完全冇味，雖然我都唔係話好鍾意食麥記，不過都仍然覺得香港嘅麥記好食好多！

魚柳就一般，可接受~

之前上網睇過，坐 Golden Pass 由 Luzern → Interlaken Ost，坐右邊，到咗 Meriingen 火車站後，列車會倒後行，如果有位，就坐過對面，咁就變咗坐左邊，有個大湖會喺左面出現，之後就會到 Interlaken Ost~

Luzern → Interlaken，靚係靚，但都係意料之內嘅靚，唔會有咩驚喜~

 
到咗 Interlaken Ost，就轉車上 Lauterbrunnen，搵啱月台上埋車，坐坐吓見到啲人全部排隊落車，我望一望門口，見到有個人係咁指住前面，我哋意識到前面果列車先啱，又跟人哋一齊行~

臨落車前見到一對香港男女有啲猶豫，相信佢哋唔知發生咩事，我哋就同佢哋講應該係前面果架先啱，一齊落車走去前面果列車度~

上到 Lauterbrunnen，仍然落緊雨，呢刻先醒覺，冇預備到落雨時要拖篋需要做嘅措施，咁冇計啦，我就將件雨褸套落個篋度，行快兩步走去旅館~

上到旅館，check-in 時俾咗一張旅館規則我哋睇，其實都冇咩特別，最主要都係講要自己鋪床鋪被，check-out 時間咁上下嘅嘢~
 
原來之前果對香港男女都係住呢間旅館~

個男嘅有少少好奇咁問我哋係咪住三晚，我哋話係，佢就話佢哋只係住一晚，之後會落 Interlaken 住兩晚~

上到房，發現被單同張被係唔同尺吋嘅，其實張床單都係，真奇怪！

仲有個枕頭，非常軟，軟到我要對摺一次先可以當正常枕頭......

呢間旅館有貼出少女峰天氣預測嘅資料，而且有分上下午~

明日全日下雨，後天早上下雨，下午陰天~

咁聽日就唔駛諗可以上少女峰了~