今日行程：
Day 01：格上租車機場站 → 潭暉時尚風華旅店
第一次搭香港快運，都有晒心理準備，預咗要去較遠嘅登機閘口，知道機上冇免費飲品及食品，自帶嘅只能繼續帶，不能拎出嚟享用~
呢啲都係小事，最希望唔好 delay，唔好要格上嘅職員等我哋就好~
去到閘口，非常多人，大部份人都係遊客(講國語同普通話)，幸運地，都搵到兩個叉電位幫電話叉吓電~
時間差唔多，冇任何形式嘅告示話會 delay，我就 send 個 email 俾格上，將個情況話佢知，等佢有個預算~
到最後都係冇 delay，GOOD！
好快就到達台中機場~
咦？咁嘅？今次係我第三次嚟台中機場，不過今次個環境係我未見過嘅！
唔知係翻新過，定係搬咗航廈，新咗好多，地方亦大咗，行李輸送帶亦由以前只有一條變成而家有兩條，足足多咗一倍！ XDDD
唔單只係咁，等行李嘅時候，仲有緝毒犬周圍嗅，不過成效似乎唔大，因為佢都有反應過四五次，次次檢查完都係冇嘢搵到......
拎完行李，就要搵 ATM，由於現場環境同上兩次嚟係唔同，所以都真係要周圍睇吓先知 ATM 喺邊~
搵到喇，入卡，入密碼，等，然後被拒絕......
再試，入卡，入密碼，等，然後再被拒絕......
天呀，發生咩事呀！
後面有幾個人排緊隊，我唔想霸住部機係咁試，我走到龍尾，想話排隊再試吓~
喺呢啲時候，難免會將我僅有嘅偵探細胞叫醒，哼，養胞千日，用在一時，我好快就諗到點解喇！
相信係因為我未開通海外提款功能！
唉，點算呢？我印象中好似可以電話即時開通嘅，唔理咁多，打個電話去銀行先！
此時，我叫咗屎塔去格上搞手續先，起碼俾對方知道我哋已經到咗~
好彩，真係可以喺電話即時開通，之後戰戰兢兢咁再試，得咗！
雖然嘥咗少少電話費，不過經過今次，我相信印象會好深刻，下次應該唔會唔記得啦~
我急步過去會合屎塔，話埋俾佢知我成功撳到錢，大家都鬆口氣~
好快就搞掂租車手續，對方想幫我哋設定到第一站嘅 GPS 資料，當佢知道我哋要去日月潭時，佢有少少愕然，係少少，唔係好多，睇得出佢抑制住自己嘅感覺~
我明嘅，夜麻麻仲要走兩個幾鐘路，其中一部份仲係沿湖嘅連續 S 形彎路，唔擔心就假嘅，但又唔可以作出干涉，唯有叫我哋小心啲~
我租車一向都係揀最平嘅嚟租，做腳姐，唔駛咁高享受嘅~
不過今次唔同，我好慷慨咁俾多幾十蚊港幣一日去租部新款啲嘅車~
我當然唔係貪款，只係貪車齡新，如果係舊款新車，我一樣冇所謂~
部車的確仲有新車嘅味道，不過都行咗近萬公里，唔算少呀~
睇睇啲油，未必夠去到日月潭，中途入一入油比較穩陣~
好快就上到高速公路，但我預期唔會有中途休息站，即係話，唔會有油站~
GPS 顯示要行幾十公里先到分支路，幾十公里，夠油嘅，離開高速公路先再搵油站~
幾十公里過後，終於到分支，點知又係幾十公里嘅高速公路，呢吓我開始有少少擔心，不過其實我幾有信心啲油捱到呢幾十公里嘅~
完咗呢幾十公里，真係落橋喇，呢頭係我第三次嚟，我同屎塔都記得附近有油站嘅~
不過咁，依照先前幾十再幾十公里嘅表現，要捱到去日月潭，相信都冇問題，咁又梗係冇理由經過油站都唔入油啦，只係冇咩危機姐~
轉個彎，行多幾百米就見到有油站，咁就更加安心啦~
再前去民宿嘅路上，見到便利店，就停一停買啲嘢食，因為今晚嘅晚餐，其實未有著落......
去到水社碼頭附近嘅停車場，亦係我上次嚟呢度泊嘅同一個停車場，不過今次有啲唔同......
上次係免費嘅，而家要收費，而且假期逐個鐘無上限收費，泊過夜喎，條數咪好襟計！
都係問問民宿老闆穩陣啲~
問過民宿老闆後，都係要泊呢個收費停車場，不過就可以收平啲，NT$180，可以一直泊到聽日中午十二點~
算係咁啦！
我哋喺民宿門口落咗行李先，民宿老闆話我哋自己揸車，好利害~
上次喺墾丁又係咁，今次又係咁，其實我相信非常多港人會喺台灣自駕遊，都應該見慣晒，有咩咁稀奇？
不過我不得不承認，喺台灣揸車，比喺香港揸車要小心好多！
搞掂晒啲嘢就上房休息，瞓落床時，有種奇怪嘅感覺，從未試過去旅行，由到埗到瞓覺，咩行程都冇，感覺怪怪的~
留言列表
