《瞬間看地球》Stranger's Blog

今日冇咩好重要嘅景點，主要係閒逛 Lauterbrunnen、Bern，如果有時間就去埋 Thun 同埋 Spiez~

一早醒咗，睇見出面落緊雨，個人都冇咩心機~ =(
 
我哋坐咗出去露台食早餐，食噚晚喺超市買嘅格仔餅，好甜，但都算食得落口~
 
食食吓又見到噚晚個對香港男女，佢哋喺隔幾間房嘅露台，個男嘅問我哋今日仲上唔上少女峰，我話今日上唔到喇，聽日下午可能 OK，再睇情況~

佢話本來都係諗住今日上去，不過睇情況都係上唔到~

我哋話今日會去 Bern，回程有時間就或者去 Thun 同埋 Spiez，佢話都唯有係咁~

佢仲話諗住喺呢度住多日，可惜冇房~

我就同佢講話我哋住三晚就係怕今日未必上到，咁聽日上都唔駛顧住啲行李~

不過其實佢哋住唔到多晚都唔係咁大影響嘅，畢竟由 Interlaken 上少女峰都係好方便嘅事情~

可能我哋兩個都冇咩 mood，搞吓搞吓都搞到 0830 先出門口，足足比預期遲咗一個鐘~

不過遲出門口有遲出門口嘅好，因為到我哋出門口嘅時候已經停咗雨，好！=D

 
見到間教堂，走入去睇吓~

呢間教堂好簡潔~

 
唔知係咪蝸牛呢，不過冇殼嘅~
 
經過墓園，見到碑前種咗啲鮮花~

 
Staubbachfälle (瀑布)
 
見到有條路(下圖右邊)可以行上去山丘，我哋就跟住行上去，睇吓有咩睇~

 
從山丘望落去，真係好靚好靚！
 
上到去有條隊道~

開放時間係 0800~2000

 
過咗條隧道就見到有啲金屬樓梯~
 
上晒啲樓梯就到一啲凹凸不平、巖巖巉巉嘅岩石路~
 
呢啲路其實都幾危險，主要因為佢好濕滑，稍為唔小心就好易會跣低，喺呢啲凹凸不平嘅岩石面跌低真係可大可小~

我哋都極為小心咁扶實啲欄杆咁行上去~

條路嘅盡頭~
 
瀑布嘅水傾瀉而下~
 
由呢度望返出去~

 
由於重心關係，其實落去仲危險~
 
其實成條路，好多類似蝸牛嘅東西，我哋無論上或者落都好小心，唔想傷害到佢哋~
 
落到底嘅時候，有位女士問我哋呢條路係咪可以上到去睇瀑布，我哋話係，但我哋見佢得一個人，刻意提醒佢上面好跣，有啲危險~

我哋離開咗再望返轉頭，見到佢都係掉頭離開，可能都係怕一個人危險，打消念頭~

我哋繼續行，行吓又停吓影吓相~

跟住又有人走埋嚟問嘢，原來又係頭先果位女士，佢問我點去 Trümmelbachfälle (洞穴瀑布)，我話俾知我哋唔打算去，所以都唔係好清楚，淨係知道火車站果邊有巴士去~

原來佢唔係一個人，佢哋總共有六個人，除咗一個男人，仲有一老三嫩，唔怪得唔上去啦~

其他 Lauterbrunnen 風景~

 
我哋都算好好彩，出門口到而家都冇落過雨~

行夠就搭火車去 Bern~

搭落去 Interlaken Ost 呢程車，啲坐位同噚晚嚟嘅時候唔同，好似舒服啲咁~

原來......我哋坐咗 1st class......XDDD

經查票員話俾我哋知先醒覺......

好彩冇罰我哋錢......

唔知點解啲山水係灰色嘅呢~
 
沿途風景~

 
Bern 嘅火車站~

 
雖然有舊大黑雲，不過呢刻冇落雨~

 
嚟到 Bern，首要搵嘢食先，途經見到 Coop City~
 
見到有雞髀賣，嘩，真係唔駛諗，咬返隻先！

頂，又係鬼咁鹹嘅，唔通瑞士嘅嘢一般都係偏鹹嘅？@@
 
另外買咗個通粉，唔知咩汁，味近咖哩，不過係怪咖哩味......

除咗怪，仲有鹹，又係太鹹！.\!!/.
 
我哋係求其搵個地方坐低就食，食食吓落雨，嗱嗱聲走人去避雨，不過好彩都只係過雲雨~

食完嘢又停咗雨就繼續行~

Käfigturm (獄塔)

 
塔底有度門，我哋見可以開，所以就行咗上去~

不過其實都冇咩睇~

 
Zytgloggeturm (鐘塔)

根據書所講，每逢整點前五分鐘，鐘旁嘅公仔會郁，類似跳舞咁啦，不過我哋夾唔啱時間，睇吓回程時有冇緣睇到啦~

 
Einsteinhaus (愛因斯坦故居/博物館)

不過我哋冇入~
 
途經一間教堂 - Christkatholische Kirche St. Peter und Paul

 
Bärenpark (熊公園)

 
跟住就上 Rosengarten (玫瑰園)，要行一條幾長嘅斜路，不過望出去個景都幾好呀~

 
Rosengarten (玫瑰園)

呢度有好多種玫瑰，不過我哋興趣不大，都冇咩點行，喺度休息咗一陣就落山~

 
條護城河好靚呀~

 
又經過一間教堂 - Nydeggkirche

呢間教堂喺 Bern 嘅河套位置好容易見到佢嘅尖頂，無意中又俾我哋經過~

不過裡面舉行緊婚禮，為免打擾，唔入去啦~
 
行到嚟 Bern 嘅大教堂 - Münster of Bern

見到塔上面有維修工程，可能冇得上去囉~

 
大門口又有維修工程~

 
入到教堂見到原來都可以上去塔頂，我哋上咗去先~

見慣見熟嘅迴旋樓梯~

 
上到嚟塔頂，比我想像仲要高，腳軟嘅感覺再次出現~

 
行咗一圈，原來仲有得上！

景觀當然都唔會好唔同~

  
最高果層真係好高~ @@
 
教堂內部~

 
行埋橋過對岸嘅 Helvetiaplatz (廣場)

其實廣場冇咩特別，純粹為行吓過對岸又行返過嚟而已~

 
Bundeshaus (Federal Palace)

 
Bundeshaus 對開有個噴水......佢又冇池喎，總之就係噴水裝置啦，幾個細路玩得好開心~

 
有人捉緊棋~
 
喺 Bern 度，一共見到十一個噴泉~
 
其他 Bern 風景~

  
行夠就落去超市睇吓有啲咩買可以作為晚餐之用~

結果就買咗即食麵同罐頭~

講起即食麵，出發之前，屋企人強烈建議我帶啲杯麵過嚟，不過我就冇咁做到~

事關我覺得，我一定要食當地嘅嘢，幾普通冇所謂，除非當地啲嘢我係冇可能食得落口嘅姐，否則，我唔會錯過食當地嘢嘅機會，就算只係一包即食麵，我都要食當地買嘅~

買完嘢就搭火車落 Thun，不過去到自助售票機度買唔到，可能係我哋唔識用啦，唯有去 ticket office 買，不過有好多人等緊，要攞飛仔等叫號~
 
等咗十五分鐘先到我哋，我哋同佢講經 Thun 同 Spiez 去 Interlaken Ost ，佢好有心咁同我哋講，可以喺 Thun 同 Spiez 落車行陣再上車都可以用返呢張飛，又印咗啲火車班次俾我哋，服務好好呀~

買完飛再睇火車班次，二十五分鐘後先有車，相信我哋等叫號嘅時候已經錯過咗一班車啦~

屎塔頭先喺超市買咗包我一啲興趣都冇嘅嘢嚟食，坐火車時就拆嚟食吓~

嘩，我哋食完都變咗另類嘅變臉大師，真係甜到面容扭曲，完全冇可能食到第二舊，我仲見到對面果位女士笑我哋添呀~

呢包嘢嘅下場......唉~
 
到咗 Thun 喇，我哋知道都冇咩時間遊覽，我哋決定去湖邊先，返轉頭有時間先睇吓行唔行入城~

呢度啲湖水非常碧綠，真係勁靚呀~
 
咪游咁快啦衰鬼~
 
我哋就係行呢條木棧前往 Thunersee，點知行咗幾步就落大雨，唯有折返右邊紅色建築物避雨~
 
避咗一陣雨，雨勢細咗好多，繼續行~

我哋諗住個方向啱，就由紅色建築物度向前行，再落雨都有得避吓，行咗十分鐘到就發覺唔對路，好似要越過路軌先可以行返去我哋想去嘅地方，唯有返轉頭行返條木棧，來回就咁冇咗二十分鐘......

連埋避雨同走回頭路，足足用咗大半個鐘先去到 Thunersee 邊~

 
冇時間行去城堡果邊，唯有講聲拜拜喇~ =(
 
連 Thun 都唔夠時間行，Spiez，後會有期啦~ =(

其他 Thun 嘅風景~

 
喺火車站等車時，我哋走咗去行火車站內嘅便利店行吓~

諗住買雪條食，不過就俾人鬧......

事源係我哋跌咗個硬幣喺個雪糕櫃下面，咁梗係諗住搵吓睇吓會唔會跌咗喺下面啲雪條度啦~

跟住有個大嬸走埋嚟話我哋，佢話條條都一樣，唔駛摷下面果啲，個櫃打開咁耐啲雪條會溶咖！

其實我哋都知我哋係抵鬧，但都唯有硬住頭皮話俾佢知我哋跌咗錢喺個櫃入面，佢二話不說就拎起咗成個籃，我哋好容易就攞返個硬幣~

我哋梗係又 thank you 又 sorry 啦，個大嬸聽到我哋咁講先有返啲笑容~

我仲見到收銀果位少女喺度偷笑，不過感覺上係善意嘅~
 
火車遲咗十幾分鐘，到咗 Interlaken Ost 嘅時候係遲咗 9 分鐘到站，我以為會錯過咗上 Lauterbrunnen 果班車，要等好耐先有車再上去，點知上 Lauterbrunnen 果班車等埋呢班遲咗嘅車先開，正！

返到旅館就煮咗個麵，加埋罐頭就係今晚嘅晚餐，兩樣嘢都係預期嘅味道同質感，不過係喺瑞士買嘅，對於我個人嚟講，意義上大有不同~