《瞬間看地球》Stranger's Blog

今日行程：
Schwangau (施萬高)、Steingaden (史坦加登)、Rottenbuch (羅滕布)、Ettal (埃塔爾)、Garmisch-Partenkirchen (加爾米施-帕滕基興)

一早起身，都幾凍，又大霧，今朝要去嘅地方喺山上面，如果保持住咁大霧就慘喇~

早餐旅館包埋，一貫德式早餐，好食~

今日第一站係 Marienbrücke (瑪莉恩橋)、Schloss Neuschwanstein (新天鵝堡)、Schloss Hohenschwangau (舊天鵝堡) 及 Alpsee (阿爾卑斯湖)

食完早餐開車都仲係咁大霧~

 

不過到咗停車場就好啲，啲霧都散咗好多~
以為自己都夠早嚟，不過嚟到停車場，已經泊滿咗差唔多一半~
停車場就喺 Schloss Hohenschwangau (舊天鵝堡)下面~

 

泊好車，想搵個人問吓點俾錢，不過又唔似有工作人員~
迷茫咗一陣，見有人揸住塊板對住啲車，似係工作人員，於是走去問吓佢~
佢好敷衍咁求其指一指前面話問前面嗰個，但實情係前面一個人都冇，莫非有啲嘢只有佢先見到......
我見現場有人同我一樣迷茫，跟住我醒起，之前都有人講過太早嚟係冇人收錢~
咁我唔理啦，都泊咗咁多車喺度，可能離開嗰時先俾都得~
而家最緊要走去買飛先~

而家 08:20，人唔算太多，起碼出面冇龍先，不過入面就擠滿人了~

 

參觀 Schloss Neuschwanstein，係要跟導覽團先可以進入，唔係話買咗飛就可以自出自入咁~
最後我哋預約到 09:20 呢團嘅飛，時間上比想像中遲，不過還可以吧~

根據網上面睇返嚟嘅資料，好多人都覺得唔需要刻意花錢入內參觀，佢哋覺得都係一貫睇開嗰啲皇宮咁，並沒有太特別~
本來我都放棄咗，只參觀外觀就算，不過後來決定會買 14 天嘅 Pass，而呢個 Pass 係包埋進入 Schloss Neuschwanstein，咁又真係冇理由唔入去親身探個究竟喎~

上去 Schloss Neuschwanstein，可以搭巴士，亦可以乘馬車~

 

我選擇咗搭巴士上~
去到巴士站，已經有相當人數，細看之下，應該係同一團嘅旅客嚟~
由於人數眾多，呢刻估計唔到，我哋上唔上到嚟緊嗰班車~

排隊搭巴士時，見有人喺停車場，攝紙仔在車上，敏感嘅我，以為被開罰單，要知道喺歐洲被開罰單可以好貴，繳款亦麻煩~
於是我就行過去了解吓~
了解過後，原來只係普通繳費單，離開時繳款便可~

返到巴士站，等咗一陣就有巴士，幸好我哋勉強上到~

 

好快就落車，霧已經散得七七八八，天氣非常好~

Marienbrücke (瑪莉恩橋)

 

到 Marienbrücke，不為橋本身，只為能一睹 Schloss Neuschwanstein 全貎~
不過太陽仲未照射到城堡，就只有這樣~

跟住就步行到 Schloss Neuschwanstein~
沿途風景~

可以望返過去 Marienbrücke~

 

Schloss Neuschwanstein 外圍~

差唔多時間就可以進入城堡~
城堡內禁止攝影，以下城堡內相片均來自官網~

Guided tour 提供嘅 audio guide 幾好，好多時都係自己對應位置，自動播放當前位置嘅資訊，係有時停咗唔郁先要自己按號碼~
總括嚟講係相當不錯的~

喺入面睇片先知道，原來成座城堡，有啲構想係冇起到~

去到一處戶外地方，可以睇吓風景~

個人感覺啦，我覺得要俾錢都值得入嚟~

見咁好太陽，就再行返去 Marienbrücke 睇吓~
有太陽就梗係靚好多啦~

我哋落山會坐馬車，不過要坐馬車，又要行返上去 Schloss Neuschwanstein 嗰邊......

其實我都唔太清楚喺邊度搭馬車，指示唔算清晰，都係估估吓~
不過要搵都唔算太難嘅~

 

之前做功課，都知道啲馬成日放屁，所以我哋盡量都避免坐最前排~
我哋選擇坐倒座，我都唔知點解會咁揀，屁嘅氣味，唔係坐倒座就可以避開的......

上咗車，等開車時，有四個人想上，諗住算啦，我哋調去坐最前排，等佢哋四個人可以坐埋一齊~
望一望，最前排得三個座位，最右邊留俾車伕，最左邊有人坐咗，咁冇理由我哋搵一個坐上去，分開坐咖~
點知車伕叫我哋坐上去最前排，佢話可以坐四個人，咁就得啦，坐迫啲冇所謂呀，大家開心就最好~

我哋坐咗上去，超迫，望真啲，原來最左邊嗰個女人放咗個手袋喺佢左邊~
咁我哋就好禮貎咁用普通話/國語請佢拎起個手袋啦，佢妙妙咀咁望一望我哋，但不作理會......
佢係聽唔明普通話/國語還是聽得明但唔理我哋就唔知喇~
車伕都好無奈，佢唯有坐過少少，只係坐一半......

一路向山下行，隔一陣就有臭味，散咗之後，隔一陣又有臭味，其實心裡面都好想快啲完~
坐最前排，雖然係臭啲，但視野夠晒開揚，都係一個幾好嘅體驗嚟~

 

行到半路，要換馬，唔知點解呢~

舊堡就唔上喇，而家天氣好好，影相比起今朝好睇好多~

跟住就行落去 Alpsee (阿爾卑斯湖)~
沿途風景~

下一站 Wieskirche (威斯教堂)
Wieskirche 位於 Steingaden (史坦加登)，其實如果唔係自己揸車，真係唔會去，因為要搭車的話係幾唔方便~
雖然 Steingaden 對我嚟講冇咩地方好遊覽，不過我就幾鍾意 Wieskirche，所以刻意走過嚟遊覽吓~

沿途風景~

Wieskirche (威斯教堂)

初時以為一個唔太出名嘅小鎮嘅一間教堂唔會有好多遊客，我錯了，雖未至擠擁，但一啲都唔少人~
當中有一團係日本團嚟，呢團人，我今朝喺 Schloss Neuschwanstein 都見過佢哋~

附近風景~

喺附近搵咗間餐廳食午餐~

 

Soup with Flädle (strips of pancake)
味道好普通，但用料對於我哋嚟講好特別~

 

Hungarien beef goulash with bread dumpling
牛肉夠稔，個汁又好味，呢個幾好食~

 

Bavarian sausage-speziality with sweet mustard and bread
睇個名好似好本土特式，不過食落都係普通腸咁，冇咩特別~

 

我哋坐室外，不停俾兩隻烏蠅騷擾，超煩！

下一站 Ehem. Stiftskirche Mariä Geburt (教堂)
Ehem. Stiftskirche Mariä Geburt 位於 Rottenbuch (羅滕布)，同樣，如果唔係自己揸車，都係唔會去~
亦同樣，Rottenbuch 都冇咩特別，都係為教堂而嚟~

沿途風景~

Ehem. Stiftskirche Mariä Geburt
教堂內部，非常美麗！
真係靚到嘩嘩聲！

下一站 Benediktinerabtei Ettal (修道院)
因為時間問題，計劃行程時已經捨棄咗唔去，不過咁啱去 Garmisch-Partenkirchen (加爾米施-帕滕基興)時經過，既然咁有緣，就走入去遊覽吓~

沿途風景~

Benediktinerabtei Ettal
修道院內部，相當不錯~

修道院外街道，隨意一處路邊環境都咁寫意~

 

下一站 Garmisch-Partenkirchen (加爾米施-帕滕基興)
一個壁畫小鎮~

去 Garmisch-Partenkirchen 途中遇上兩宗交通意外~
第一單冇警察，塞吓塞吓就過咗~
第二單有警察，仲封埋路，要繞路走......

繞路走，再等 GPS 俾個新方向~
點知個 GPS 又帶我行返去塞車嗰段，咁我梗係唔跟啦，塞到尾都係去返封路位，冇意思~
唯有亂行住先~

行遠啲，終於有條新路，不過自己又唔爭氣，行錯路......
入咗條細街，又遇上封路，頂！
左兜右兜，入面成個迷宮咁，咁最終都實到到目的地嘅，只係比預期遲咗個半鐘啫......

我哋先去旅館，呢間係 Airbnb 嚟，係我哋第一間住嘅 Airbnb，希望冇伏啦~
同屋企見過面，整頓好後就開始去周圍行吓~

由於太遲嚟到嘅關係，天色已經暗落嚟，但無減呢個小鎮嘅漂亮~

德國有好多呢啲壁畫小鎮，第一次遊覽呢啲小鎮，覺得都幾靚~
未做功課前真係估唔到德國係咁靚~

晚餐繼續求其食~

 

Pizza Emiliana - with parma ham, parmesan & rucola
Parma ham 同 rucola 好夾，餅底又薄又脆，好食~

 

Calamari alla Griglia - grilled squid with rice
魷魚非常香，加少少檸檬，味道非常好~

 

食完嘢就行返旅館，完結今日行程~