2012.06.05 瑞士 (Interlaken、Junfraujoch、Grindelwald) (歐洲第十一天) @ 《瞬間看地球》Stranger's Blog

今日主要係上少女峰，同埋閒逛 Interlaken 及 Grindelwald~

最初嘅計劃係一早上少女峰，落 Grindelwald，再落 Interlaken 先返 Lauterbrunne 嘅旅館，諗住咁樣就最順路~

不過睇天氣預測，早上係 mostly cloudy，下午係 mostly sunny，冇理由咁傻仲朝早走上去咖~

亦因為少女峰嘅天氣預測，我哋估計 Grindelwald 下午嘅天氣可能都會好啲，其實兩個地方嘅天氣可能根本就唔關事，唔理咁多，呢個係唯一可以拎嚟推斷嘅因素，我決定先落 Interlaken，再上少女峰，最後先去 Grindelwald~

一出門口，見到隻貓，一隻瑞士山區貓，你真係夠晒幸福~

今日天氣明顯比噚日好，個天都光啲，真係人都醒神啲呀！

今日做咗兩個錯嘅決定~

由於要上少女峰嘅關係，我哋都帶咗羽絨嚟歐洲，自然今日都預咗孭足一日~

(死蠢當時唔醒起可以放喺火車站嘅儲物櫃)

因為陣間會上少女峰嘅關係，我哋落去 Interlaken 時買咗來回 Lauterbrunen 嘅車飛~

第一個錯嘅決定，就係拎埋羽絨落 Interlaken！

陣間都返上嚟 Lauterbrunnen 轉車啦，旅館又近，拎埋落去托咩，應該返返上嚟先拎啦！

不過呢個都錯有錯著，因為如果返返上嚟先拎，應該會錯過咗一班車，咁就比較嘥時間，呢個決定其實錯唔晒~

第二個錯嘅決定，Interlaken → Lauterbrunne 坐過唔止一次，點解我唔選擇經 Grindelwald 上少女峰，坐吓 Interlaken → Grindelwald 呢段火車呢？

呢兩樣嘢，都係事後先醒起，如果當時醒起的話，我願意放棄回程上 Lauterbrunnen 嘅車飛~

搭火車時先食早餐，早餐係噚晚喺超市買，味道可以~

落到 Interlaken，見到有間 Coop，裡面有間餐廳，走去望吓啲營業時間，收 1830，我哋應該無緣光顧了~

火車站 Interlaken Ost~

呢個景，如果冇咗間教堂，仲以為去咗日本~

經過兩間非常簡潔嘅教堂~

其中一間教堂設有自動門，其實真係有咁嘅需要咩？

Casino Kursaal~

撞正今年第一日嘅墟期~

行咗一個圈，不過興趣不大~

意外地，呢度嘅免費洗手間非常污糟......

水上樂園？

要小心啲行，否則好易跌落去......

其他 Interlaken 風景~

散步於 Interlaken 真係幾舒服，不過我就覺得風景未到好靚好靚咁啦~

去到火車站，見到有少女峰 live cam，唉，成個畫面都係灰色嘅，咁仲上唔上好呀？

不過我哋只係考慮咗幾秒，天氣預測話下午 mostly suuny，而家開始上去，上到去都過下午一點，決定上去！

走到 counter 買飛時，話佢知要買飛由 Lauterbrunnen 至 Jungfraujoch，唔知點解佢有啲猶豫，又同隔離果個交談似係換取意見，跟住就係咁用部電腦~

搞咗一輪，佢同我哋講「via grindelwald would be more easier」，我真係覺得有啲奇怪，我做咗咁耐功課，從來都冇人提過邊度上會易啲~

不過我哋都唔駛諗咁多，我哋已經買咗上 Lauterbrunnen 嘅回程車票，而我又相信經 Lauterbrunnen 上唔會有幾難，我 show 埋張回程車票俾佢睇，佢都仲仍然問多我一句係咪確定經由 Lauterbrunnen 上，我唯有毫不猶豫咁話俾佢聽，係！

佢態度其實幾好，真係有啲唔忍心拒絕佢，不過都冇計啦~

講講少少關於少女峰嘅資訊先~

由 Interlaken Ost 經 Lauterbrunnen 上 Jungfraujoch，分三段火車，分別係：

Interlaken Ost → Lauterbrunnen

Lauterbrunnen → Kleine Scheidegg

Kleine Scheidegg → Jungfraujoch

而最尾呢一段火車，中途有兩個站會停五分鐘，遊人可以落一落車欣賞吓風景~

呢兩個站分別為 Eigerwand 及 Eismeer

少女峰少女峰，聽就聽得多，到做功課時先知，多數遊人會上嘅，其實唔係少女峰，而係少女約峰~

少女峰 (Jungfrau) 高度為 4158 米，一般遊客乘火車到達嘅只係少女約峰 (Jungfraujoch)，高度為 3454 米~

上咗火車坐低咗，由於前幾日同後幾日少女峰天氣都差，今日下午可以話係機不可失，相信會有好多人同我哋一樣揀呢個時候上去~

由 Lauterbrunnen 至 Kleine Scheidegg 一段嘅風景~

健行人士~

上到嚟 Kleine Scheidegg，雖然都有啲雲，但天氣絕對係好好！不過雪山上同呢度會唔會唔同呢？希望繼續好天啦~

轉咗去另一部火車，坐對面有個男人問我，呢部車係咪上少女峰嘅，其實我都係第一次嚟，我都唔可以 100% 肯定係，不過月台指示同車身顯示都係上少女峰嘅，同時有一大團印度旅行團喺度，我相信佢哋唔會係上嚟健行卦，應該都係上少女峰啦，所以我答咗佢，我相信係，大家相視笑了一下~

由 Kleine Scheidegg 至 Eigerwand 一段，好多都喺山洞入面，都冇咩風景睇到~

到咗 Eigerwand，部車停咗，對面個男人一臉疑惑，佢向上指一指想問我嘢，未等佢開口，我就同佢講，部車喺呢個站會停五分鐘，你可以出去睇吓風景，再上返車~

佢即刻流露出恍然大悟嘅表情，跟住就一齊離開車廂~

見到咁嘅情景，真係心都實埋~

我好希望只係咁啱有舊雲遮住~

上返車，我主動同對面個男人講，下個站都係一樣，會停五分鐘~

到咗 Eismeer，情況實在令人鼓舞！

舊雲好似 PS 落去咁~

上到 Jungfraujoch 火車站，係一個好似山洞咁嘅嘢嚟，我哋落咗車已經感受到果股寒氣~

落咗車第一件事搵洗手間先，行咗分幾兩分鐘，我哋兩個都頂唔順，身穿短袖衫嘅我哋，身體開始發抖，想去埋個洗手間先著都唔得，要即刻著咗先~

去完洗手間出嚟，見到有部 lift，都冇理係去邊，上咗去先算~

上到去原來係觀景台~

上到嚟呢度，真真正正見到少女峰嘅風景，不過係隔住層玻璃，我哋仍然喺室內~

雖然視線範圍內見到可以出去零阻隔咁欣賞少女峰美景，不過我哋冇即刻出去，因為我哋真係要休息吓~

我哋兩個都出現輕微嘅高山反應，有少少頭暈同頭痛，雖然輕微得完全冇妨礙我哋嘅活動能力，但為免令症狀惡化，就在室內休息一下吧~

室外溫度為 -5 度~

現場高度為 3571 米~

休息咗一陣就行出去~

好幸運好幸運，天氣非常好！

現場為崖上嘅金屬架，通窿睇到下面嘅~

好似到咗地球嘅邊緣咁~

小姐，其實你凍唔凍呢？

落返去下面，有個地方有啲嘢睇吓，唔知點形容呢個地方......

穿過呢度就到咗睇冰雕嘅地方~

現場都幾跣，仲見到有個人跣低咗......

有趣！

睇完冰雕就出去另一個觀景台~

呢個觀景台嘅出入口係斜路，近門口位嘅地下都係冰，非常跣，兩旁有繩可以拉住佢上落~

不過唔知點解有人係要喺中間上......

非常壯麗嘅景色，很喜歡，很喜歡~

風係吹向左邊，但支旗嘅冰注係向右邊嘅......

之後就搵間餐廳坐低食嘢~

去旅行，有時都想間中食好啲，不過屎塔實在對瑞士嘅食物有點抗拒，反正都係唔鍾意，寧願食平啲，唔好嘥錢，所以去咗一間叫 Restaurant Bollywood~

呢度係快餐形式咁叫嘢食，我哋求其點咗一碟有雞一碟有豬~

頂佢個肺！又係好鹹！唔好食呀！

食完想離開時，咁啱又見返前日在旅館相遇果對香港男女~

我哋本身係坐窗邊，諗住俾個位佢哋，佢哋話唔駛，因為佢哋唔係嚟食嘢，只係休息，原來個女嘅好頭痛~

道別後就離開餐廳去返火車站搭車落 Grindelwald~

去到火車站見到非常多人，我哋覺得未必可以上到嚟緊果班車，咁當然，都係照排隊咖啦~

等咗大約二十分鐘，有車嚟，最後都上到車，不過就只有企位，照上~

喺車上遇到兩件相類似嘅事，我個人覺得幾離譜~

我哋上車時見到前面個個人都係企喺通道，咁正常梗係冇位坐先會咁，完全冇為意原來仲有兩個座可以俾人坐~

點解講可以俾人坐咁奇怪呢？

先講冇咁過份(相對地)嘅一個，當時車卡上企人企到想轉身都冇位，原來有男人放咗個袋喺其中一張凳~

講真，咁嘅情況，正常人都識做拎開佢俾人坐啦~

有人指住個袋同佢講 excuse me，佢仲老大不願意咁慢動作拎開個袋，真係離譜！

另一個仲離譜，有個女人一人佔兩個位，佔用方式係打橫坐，係伸直雙腳打橫坐，仲要冇著鞋，赤腳倚傍住車箱牆邊一人佔兩位！

其實咁樣已經係離譜之極，有人同佢講 excuse me，佢望一望果個人，三秒，起碼三秒都冇意思郁開佢對腳！

但係有時未知真相實在不宜下定論，唔排除佢對腳有事，再睇吓故事發展如何~

之後佢又係老大不願意咁慢動作放返隻腳落地著鞋同坐返好，完全唔覺佢有咩病患！

離譜到咁都有！

到咗 Kleine Scheidegg ，要轉車落去 Grindelwald，搵到位坐，望一望對面嘅男女，又會咁蹺，又係果對香港男女~

聽佢哋講，可能玩滑雪兜玩得激烈得滯，導致出現比較嚴重嘅高山反應~

雖然我哋冇諗住玩，但都諗住過去睇睇，聽到佢哋咁講，而家先醒起我哋唔記得咗過去果邊睇吓......

而佢哋可能玩得太過忘形，唔知道有支瑞士國旗果個觀景台存在~

落到 Grindelwald，先去 Tourist Center 攞張地圖，再周圍行吓~

Grindelwald 真係幾靚，下次有機會再嚟要住一住呢度先得~

行完大街，打算行過遠方對岸如畫般風景嘅地方，一路沿住斜路向下走，走到只有車路而沒有行人路嘅地方，行咗約十多分鐘，望到遠處河邊只有一條僅夠一部車行過嘅車路，我哋知道再行落去，就只會去到果條車路，一旦遇上有車經過，實在係太危險，唯有折返~

本來想睇吓有冇咩其他途徑可以過到去，不過而家時間已經唔早，所以打消咗呢個念頭~

Interlaken → Jungfraujoch → Grindelwald，原來咁走法，一日係走唔晒......

對面真係好靚，有機會下次再嚟，要租車揸過去至得！

沿途見到有一群羊~

又見到兩隻草泥馬 (羊鴕)，其中一隻被剪毛了~

靚女，哄到咁埋做咩呢？

由於我哋都唔想再喺瑞士嘅餐廳度食嘢，所以只係打算喺啲便利店或者超市買啲嘢食就算~

而家 1945，超市早就閂咗，連便利店都已經喺 1930 閂咗門，行經見到有間 snack bar，見到佢個雪櫃有三舊類似包嘅物體，唔理咁多，三舊要晒！

買多排朱古力同可樂，就係今晚嘅晚餐~

去到火車站，要等半個鐘先有車，咁就喺火車站食埋嘢先啦~

果舊類似包嘅物體，係甜嘅，表面有啲沙糖，裡面有啲果仁咁上下嘅嘢，好彩唔係太甜，都入到口~

反正有時間，又影吓相~

終於等到有車嚟，上咗車，查票員同我哋講，去 Lauterbrunnen 要喺 Zweilütschinen 轉車，不過喺 Zweilütschinen 要等半個鐘先有車，或者可以跟佢落 Interlaken Ost 再搭返上 Lauterbrunnen，任君選擇咁話~

其實 Interlaken Ost → Lauterbrunnen 呢段，我哋都真係搭咗好幾次，所以我哋決定留喺 Zweilütschinen 等車~

去到 Zweilütschinen，竟然 search 到有 free wifi！