《瞬間看地球》Stranger's Blog

今日行程：

Day 02：水社碼頭 → 孔雀園 → 慈恩塔 → 玄光碼頭(阿婆蛋) → 搭船到水社碼頭 → 搭船到伊達邵碼頭 → 伊達邵瑪蓋旦 → 搭船到玄光碼頭 → 車埕火車站 → 集集鎮武昌宮 → 集集軍史公園 → 集集火車站 → 妖怪村 → 杉林溪大飯店

民宿有包早餐，08:30 落到樓下食早餐，已經坐咗好多人，而且已經食到尾聲，睇樣似係台灣人多，唔通台灣人都習慣早起嘅？

早餐就冇得揀嘅，一隻隻碟放晒喺度，等佢將啲食物放好上碟就自己攞一碟咁~
早餐冇咩特別，都係啲火腿蛋呀咁，不過有樣嘢又幾有心，碟上有四片生果，係四片唔同嘅生果，看似普通，但又確實少見~
 

飲品有四款，係邊四款就唔記得，都係啲普通飲品，令人不解嘅係，飲品前方係冇名牌嘅，佢見我哋過嚟就逐一話俾我哋聽係咩嚟~
嗯......見一個講一次，其實係咪有啲多餘？整個牌寫住咪仲好~
不過人哋有人哋嘅諗法啦~

較早前有朋友去完日月潭，佢話就咁喺售票處賣嘅一日船票係 NT$350，但幫襯民宿買就只需 NT$100~
其實噚晚民宿老闆都有問過屎塔，不過當時我去咗泊車，屎塔唔清楚行程，所以聽過就算~

食完早餐就向老闆詢問船票事宜，一如預期之內，NT$100 位，其實 NT$100 位又唔算話好好好平，只係 NT$350 位就實在係好好好貴啦！

本來我個行程係揸車去孔雀園先，晏啲先返嚟行吓水社碼頭一帶，不過而家個停車場要收費，而而家部車又可以泊到中午 12:00，我係咪應該唔好郁車住呢？
我試調咗幾次行程，都冇咩結論，其實當中最大問題係，而家啲舖頭未開齊，否則可以行吓街先，行完就唔駛再返嚟水社碼頭~
其實呢，我心裡面都決定晏啲再返嚟就再俾錢泊車，都係有限錢，最緊要就自己行程~
不過屎塔話，都係想行吓街，唔係想行舖頭，未開都冇所謂，所以最後都係行吓街先~

附近有間精品店，幾值得行吓~
 

附近街道~
 

行到去旅遊中心，上咗二樓，屎塔望吓周圍環境，半猶豫半肯定咁話今次係同我第三次嚟日月潭~
而我非常肯定我今次係第二次嚟日月潭，屎塔，你唔係同我嚟嗰次係同邊個嚟咖？

重回似曾相識嘅碼頭，唔同嘅係，上次好大雨，今次就好好天~
不過都係周圍行吓，冇咩特別~

 

行夠就返去攞車~
上次泊嘅時候就冇呢啲閘嘅~
 

上次嚟嘅時候，全個場都可以泊，今次就唔同，有一行(兩排)放晒和運租車公司嘅車，有一半都係電動車~
 

下一站係「孔雀園」
根據 GOOGLE MAPS 嘅資料，由水社碼頭過孔雀園唔駛十分鐘，所以我本身計劃晏啲返嚟先行吓街，咁都唔算唔順路~
我刻意講起呢啲嘢，係因為孔雀園嘅地點同 GOOGLE MAPS 有出入~

過去孔雀園時經過日月潭嘅湖邊，我已經覺得唔對路(因為我所睇到嘅係唔會經過)，最奇嘅係經過埋文武廟！
我知文武廟喺邊，所以一見到文武廟就大感驚訝，完全唔係嗰個方向！
但係我對 GPS 又幾有信心，路上亦見到孔雀園嘅路牌，咁我相信一係 GOOGLE 出錯，一係孔雀園搬咗~
雖然成個孔雀園搬嘅機會又真係少啲，不過......唔好諗咁多啦，冇理由路牌都係錯嘅~

本來冇計劃去文武廟嘅，覺得呢啲廟好似間間都差唔多咁，不過頭先經過之後，又心思思想去睇吓，反正近嘛，想睇，咪去睇囉，遊覽完孔雀園就去~

照住 GPS 去到孔雀園，園區比想像中細，可以話係一眼見晒~
孔雀數量唔多，亦唔見有人哋啲相咁正，隨時都見到孔雀開屏，現場係一隻開屏嘅孔雀都冇~
逗留咗唔係好耐就離開~

 

下一站係「慈恩塔」
離開時，一味睇住自己嘅行程，完全唔記得返轉頭去文武廟，直衝計劃好嘅慈恩塔~
 

到咗慈恩塔，剩返三個車位，其中兩個係電動車優先，咁我當然就泊喺唯一一個非電動車嘅車位啦~
 

嚟到慈因塔入口，地面顯示離慈恩塔仲有 570 公尺，570 公尺唔算好長，不過 570 公尺向上嘅梯級，對一般人嚟講，有點吃力吧~
出奇地，屎塔似乎好能夠應付到呢種環境，冇話氣來氣喘咁，有點出乎意料之外~
而我，我已經好多年冇搭過公司部 lift，一般上落都係行樓梯，所以行樓梯對我嚟講就冇咩問題嘞~
沿途地面都有標示距離慈因塔仲有幾多公尺，好讓遊人心中有數，仲要行幾耐~
 

步道中途嘅風景~
 

上到去慈恩塔，塔本身就冇咩特別，單一座塔，有點孤單~
 

不過我哋上嚟唔係為咗一睹呢座塔，係為咗上塔頂，欣賞日月潭~
未上到頂，聽到震耳欲聾嘅敲鐘聲，原來塔頂有個大鐘~
隔咗唔係好耐，又響過，奇嘞，隔咁短時間又響嘅，唔通唔係因應時間而響嘅？
向上望吓，敲鐘嘅係個細路仔，哦，明喇，個鐘係任人敲嘅~

 

究竟呢張相入面有幾多個四邊形呢？@@
 

上到塔頂，向外望嘅風景都算幾好~

 

慈恩塔呢度人唔多，塔上面就更加少人，好難想像呢度係日月潭嘅其中一個著名景點~

下一站係「玄光碼頭」
離開慈恩塔，就過去玄光碼頭行吓，去得玄光碼頭，當然要試埋聞名已久嘅阿婆茶葉蛋啦！

去到玄光碼頭，停車場滿晒，不過好好彩，咁啱有部車離開，正！
本來呢，就冇諗住去玄光寺嘅，不過原來呢個碼頭冇咩嘢行，反正又好近，所以就過埋去睇吓~
 

玄光寺呢度真係爆多人，簡直係寸步難行！
有好多人排隊影石~
 

從玄光寺望向日月潭~

 

行咗個圈，又唔見阿婆茶葉蛋，就行去第二度再搵吓~
碼頭唔大，唔喺呢邊就實喺嗰邊啦，好容易就搵到~
 

阿婆茶葉蛋嘅呢一邊，擠擁程度更甚~
早已聽聞買阿婆茶葉蛋要排長龍先買到，所以見到人潮都不感驚訝~
不過，唔知點解唔係好搵到邊條係人龍，睇真啲，原來根本就冇人龍！
啲人根本就唔係排緊隊，咁仲好啦，唔駛排~

我走去買咗兩隻茶葉蛋，著實帶點期待~
 

食咗一啖，好食係好食，但係......真係好食到街知巷聞，要慕名而來咩？
未到囉~~~

下一站係遊船河
所謂遊船河，只係由玄光碼頭搭船去水社碼頭，再搭船去伊達邵碼頭而已~

我哋都未搭過呢度嘅船，真係有啲迷茫，知道有唔同公司唔同航線唔同時間唔同號碼嘅碼頭，我哋去到售票處出示返張一日票，問明碼頭號碼就行過去~

行到過去得一架船，架船成條龍咁，我哋都好猶豫究竟係咪呢架~
船上面有個人喺度食緊煙，佢望吓我哋又冇理我哋，我哋又費事阻住佢扯煙，就等吓~
都等咗一段時間，現場係完全冇變化，無耐有人目標好清晰咁行到嚟直接就上咗條龍船，於是我哋又跟住佢哋上~
一上咗條船，我就深信我哋上錯咗船，因為入面係有好幾張弧形大梳化，著實唔似係普通用作最基本交通工具嘅船~
但我哋都想確認一下問吓人，得到嘅答案係，呢隻係包船嚟~
 

走返出嚟，我哋去咗另一邊碼頭問人，嗰個人打量咗我一眼，唔係好想答我咁指一指去我原先所在嘅碼頭~
既然係咁，即係原先個碼頭實啱，只係船未到而已~
繼續乾等，咁始終都等到有船埋岸嘅，今次終於都啱喇！
 

碼頭風景~

 

船程十多分鐘，司機一路揸船一路講解日月潭嘅事情~
遊湖本身有點沉悶，還好司機講嘢又幾風趣~
「你知道日月潭底最多是甚麼嗎？是手機！」
「錯過了今天的尾班船不用怕，我一定會來接你的，明天吧！」

 

到咗水社碼頭，我以為等一陣就會開船到伊達邵碼頭，原來嚟到水社碼頭，可以話係總站，本身呢隻船唔會開住，要搭第二架船~
落咗船就行前去搭另一架船，只係等咗幾分鐘就開~
同樣都係十幾分鐘就到伊達邵碼頭~

 

山邊好似俾人剃咗頭嘅係去九族文化村嘅纜車~
 

伊達邵碼頭呢邊非常熱鬧，勁多人~
我知道伊達邵呢邊可以行吓街，而且我仲諗住喺呢邊食晏~
由於船程班次關係，留喺伊達邵嘅時間唔算充裕，我決定去食嘢先，有時間剩先行吓街~

下一站係「伊達邵瑪蓋旦」
我計劃好到伊達邵瑪蓋旦食晏，由碼頭行去伊達邵瑪蓋旦不到十分鐘步程~
一直諗伊達邵瑪蓋旦會有濃厚嘅民族風，我真係諗得太多，餐廳環境與一般餐廳無異，只係內裡放置咗一啲民族擺設，反而同成個環境格格不入~

 

嚟到嘅時候，餐廳裡面可以話係滿座，職員們亦實在有點忙碌，基本上都唔係好得閒理我哋~
幸好近門位置有一張二人檯，剛好有人離座，不過呢張二人檯，明顯係夾硬加落去嘅，不過都冇所謂啦，反正呢度完全唔係食環境~

食物種類算幾多，而且好多名稱都幾有民族風，見到佢嘅二人套餐都幾豐富，網上面嘅評語都還可以，所以就叫咗呢個「邵族勇士餐」
落單點菜，侍應竟然唔明白我哋想叫啲咩，大佬，成個餐牌指住俾你睇我哋要咩套餐，你都咁猶豫做乜鬼？
結果佢扮晒明咁行開咗，阿疑似老闆娘目睹成個過程，同個侍應傾咗兩句，阿疑似老闆娘就走埋嚟指住餐牌個套餐問我哋係咪要呢個~
佢冇指錯呀，咪就係揭開餐牌，套餐嗰一版，最底下寫住「邵族勇士餐」二人份呢一個套餐~
我相信呢個套餐幾多人點，因為我上網睇過嘅網誌，十居其九都係點呢個，就算今日第一日返工，都冇理由唔識~
我當然唔係怪佢啦，純粹覺得奇怪而已~

點完菜，成間餐廳已經冇咩客，好明顯，剛才嘅客人係旅行團嘅團友啦，否則點會全部一齊離座吖~
嚟到呢刻，我有啲後悔揀咗呢間餐廳，環境唔得，亦都因為偏見，硬係覺得旅行團包得團去幫襯嘅餐廳，會好商業化，會將貨就價~
不過咁，我都係蠢咖喇，叫得套餐，根本就唔應該有太大期望~

食物好快就上晒檯，以價錢同份量嚟講，真係超值，兩個正常食量嘅人都未必食得晒！
啲餸菜算係幾有特式，除此之外，都冇咩評語~

食完嘢仲有啲時間，就行吓市雜，可能我真係冇咩行街癮，覺得個市雜冇咩嘢睇，唔單只我，其實屎塔都覺得係~

 

行完市雜，步向碼頭之際，屎塔發現個自拍神器有部份零件唔見咗，於是我哋就分頭去搵，不過結果都係搵唔返......
不過都係好小事，屎塔都冇話好唔開心~

遊覽完伊達邵，就搭船返去玄光碼頭攞車~
搭呢程船同之前嗰兩程有啲唔同，今次睇完張一日票，就蓋咗個印喺隻手度，就好似啲主題樂園咁，代表今日可以自由乘搭~
咁點解之前嗰兩程都冇蓋到印嘅呢？

下一站係「車埕火車站」
上咗車，想話 SET 返個 GPS 去下一站，不過見到有人等緊我哋個車位，就想盡快郁車，俾個車位人先~
就係咁，我哋就喺未 SET 好 GPS 嘅情況下開車，亦因為後面有車跟住，我又唔能夠停低部車，去到路口都係是旦行住先，等屎塔搞個 GPS~
一直以為就算行錯路都冇問題，最多咪搵路返轉頭，所以都冇放上心繼續向前行~
SET 好 GPS 後，佢係咁講「如果可以嘅話，請掉頭。」
咁我就留意吓啦，點知一直行一直行都冇位俾我掉頭，最後都唔知自己行咗去邊，淨係知我一直遠離緊 GPS 想我行嘅路線~

直到我遇到一處可以掉頭嘅位，已經係圍住日月潭行咗半個圈，由於一路都非常多車，車速好慢，所以喺呢度真係嘥咗好多時間！
多車所以慢，當然係定律，但最離譜嘅係，有啲對頭車騎住中間分隔線行，佢遇到對頭車都冇縮返入自己行車線，每部車遇到佢都煞車再扭軚閃避，有咩辦法唔慢！
都唔明啲人點解要咁揸車，係咪精神有問題？

終於都到車埕火車站，嘩，非常多車，唔好話停車場，就連街邊兩旁都擺晒車，完全冇位泊車！
我哋只好向前行，睇睇前面點情況~

一路行一路行就上咗半山，沿途見過一次私人停車場，NT$100/次，不過我覺得位置唔太好，所以冇諗住泊~
再上再上，又見到私人停車場，NT$100/次，呢次地點唔錯，而且唔想再揀，再揀真係俾錢都冇得泊~
 

決定好就扭入去，剩返一個打斜嘅集角位，我好有衝動學台灣人咁用頭入，就咁一嘢隊入去就搞掂~
不過現場環境狹窄，嗰個所謂嘅車位更加唔係正式車位，如果用頭入，走嘅時候稍為有車泊得唔好，我都真係未必走到~
為安全計，就算麻煩的我都決定掉頭用尾入~
泊好車，拎定 NT$100 出嚟，不過個阿叔唔見咗，咁就攞車時先俾啦~

停車場出嚟，轉右落一條小斜路，左邊已經係個小湖，右邊係火車站，好方便，我諗下面免費嗰啲車位都應該冇咁方便~
車埕呢度都幾多人，我哋首先行吓個火車站先，車站個木造屋頂好特別，真係可以當係一件藝術品咁去欣賞~
 

跟住游走動線去行咗個圈，冇咩特別嘢睇~

 

唯一係上咗一層，去到接近屋頂位置有條橋，叫做居高臨下咁睇吓嘢~

 

行行吓就行到去車軌嗰邊，呢邊風景真係不得了，直情係甚麼「茶是故鄉濃」呀，「酒是故鄉醇」呀，「鹽是故鄉鹹」呀咁，好靚好舒服，喺度野餐真係一流！

 

期間屎塔係咁摷個手袋，好似唔見咗嘢咁，細問之下，原來係唔見咗把遮~
把遮呢，就唔係鑲咗鑽嘅，一啲都唔值錢，係怕要用嘅時候冇得用姐~

喺度都逗留咗相當嘅時間，真係唔係好捨得走，不過冇計啦，總有離別嘅時候~
再嚟就行埋小湖嗰邊，可恨呢邊爭咁啲陽光，否則個畫面會更靚~

 

最後食咗杯玫瑰味嘅雪糕就離開~

 

車埕雜影~

 

返去攞車時見到個阿叔，嗱嗱聲俾咗錢先，唔係陣間又唔知佢走咗去邊~

俾咗錢，上埋車，不過未走得喎，因為有部車擺咗喺通道，亦有部車打算走，不過兩車嘅司機喺度互相交談，唔知傾乜~
兩個人中間約有一米距離，其中一個嘅重心向後，唔似會傾得耐，咁我咪等吓囉~
係呀，傾就唔係傾咗好耐，不過郁車就真係郁咗好耐，要走嗰個係咁前前後後，頂鬼住晒嗰個又郁都唔郁，大家都唔當一回事，唔通呢啲就係台灣文化？
前前後後嗰個仲有一嘢倒車時撞到後面啲鐵枝鐵網，落車睇一睇又上返車繼續前前後後，好似冇事發生咁，睇場阿叔都唔當一回事，連走埋去睇吓都冇，唔通呢啲又係台灣文化？
我真的不懂~

搞完一場大龍鳳，我好慶幸我嚟嗰時用尾入，如果用頭入，而嗰條友又唔肯郁車的話，冇二十手軚都走唔到！
正想開車之際，個阿叔走埋嚟，不停發兩個音，第一個音好細聲亦好短，真係聽唔到，第二個音同樣短促，但起碼聽到近「SA」音~
我同屎塔都完全聽唔明佢講咩，佢似係連國語都唔識講嘅深山阿叔，佢見我哋聽唔明，都冇嘗試用其他方法或字眼去令我哋明白~

佢講咗太約有五次，我終於明白佢講咩！
佢係話「雨傘」！
屎塔國語一向好過我，連佢都聽唔明嘅，我竟然聽得明！
真係不得不佩服人類潛藏喺內心深處嘅潛能，喺危急關頭就會爆發一直都未被開啟嘅小宇宙，點解我咁講呢？
因為個大叔每一個「SA」音都向我噴一次口水，我實在頂唔到幾多次咁猛烈嘅生化攻擊，我必需要盡快明白佢想講咩，否則我一定俾佢嘅口水浸到客死異鄉！

當我哋知道佢講咩嘅時候，我哋不停點頭，佢就即刻急步走向不遠處，拎住把遮走過嚟，正正就係屎塔嗰把遮~
呢個大叔，俾返把遮我哋嘅時候，好開心，佢嘅笑容可以話俾充滿重真，其實都幾可愛~

下一站係「集集鎮武昌宮」
集集鎮嘅武昌宮，經歷 921 大地震之後，全宮盡毀，但沒有倒塌，被原址保留~

本來呢，下一站應該係欄河堰，喺嗰度可以睇到排洪時嘅壯觀景況，不過我哋喺車埕呢度留戀得太耐，過晒原定時間，唯有刪減呢個景點~
不過咁，當安慰自己，排洪係不定時嘅，邊有咁好彩俾你遇到吖~

去到集集鎮，GPS 帶錯路，去咗唔知邊道，不過呢，GPS 錯極都有個譜，至少我地而家喺集集鎮，睇地圖去目的地都係可以嘅~
出發前辛辛苦苦喺 OFFLINE MAPS 度記低晒啲景點，而家大派用場喇~

去到武昌宮，喺外面已經見到成座遺蹟~

 

而喺呢座遺蹟嘅前方，就係一座新嘅武昌宮，係 921 地震之後新建嘅~

 

不過我個人覺得呢座遺蹟真係有啲危險，唔敢走得太近，歪歪斜斜，已然損毀嘅武昌宮，誰敢保証佢唔會近一步下塌？
成座建築物損毀到咁嘅樣，又唔可以入到去，單憑喺外邊做勘察，真係可以確保到係安全？
不過我對呢啲嘢又唔認識，可能真係得啦，我就冇咩信心嘞，不敢走近~

下一站係「集集軍史公園」
天色開始暗，其實正確嚟講，係開始黑先真，我哋趕緊過埋去集集軍史公園~
步行過去都唔駛五分鐘，揸車過去更加係轉眼就到~

軍史公園，都想像到係點樣，做功課時其實都睇到唔少相，不過親自到來，又係另一種感覺~

 

睇睇吓，突然聽到有火車聲，我走出公園外睇吓，見到有一列疑似觀光列車駛近，我即刻叫屎塔出嚟睇吓~
我本身就唔知呢度有觀光列車(認定咗佢係)嘅，所以覺得有啲突然，又有少少有趣~
 

等到部列車走咗，天色更暗，不過都唔緊要，又唔係要睇大自然景色，呢啲景點暗啲都冇大問題嘅~

 

下一站係「集集火車站」
本來就冇諗住嚟嘅，屎塔話橫掂都喺附近，不如去埋啦~
你點話點好啦~

其實做功課時就知道呢頭附近有停車場，不過我預計我停得唔耐，想泊近啲，就圍住火車站行咗個圈，其實周圍真係冇咩位泊到車，有啲位我係唔敢泊，怕阻住人~
好彩，經過見到有部車駛離咗個位，呢個位唔係正式嘅泊車位，只係路邊嘅空位，不過呢個位一定唔阻人，所以我就泊咗入去~

集集鎮都幾多人，尤其火車站附近
可能我唔係鐵路迷啦......，所以......

 

下一站係「妖怪村」
聽就聽人講得多，但睇過咁多資料，都好似冇咩內容，本來諗住附近有天空之橋，就借機喺妖怪村住一晚，不過之後行程有變所以先冇住度~
由於我改咗去杉林溪住一晚，去妖怪村都算順路，儘管唔知妖怪村有咩睇，都決定去探個究竟~

雖然我冇去到欄河堰，但我並冇多到時間，離開集集，比預期仲要遲，講到尾都係因為車埕太靚環境太舒服，唔捨得走~

行行吓開始進入山區，妖怪村原來喺山上面，對住暗暗嘅山路，有一種熟悉嘅感覺，就係上次上清境嗰次，希望上次上清境嘅兩樣慘痛經歷唔會再發生......

睇住 GPS，知道差唔多到，來回線兩旁都泊晒車，到我知道到咗嘅時候，基本上已經冇位泊車，不過咁，咁鬼多車，相信實等到有位嘅~
我有呢個想法嘅時候，係連車都未停定，未開始做等呢個動作，我哋真係好彩，就喺我哋前面右邊有部車，準備離開，等佢走咗，我哋就泊咗入去，仲好近妖怪村入口~

由於我唔知妖怪村係山區，冇咩準備，上到嚟只顧泊車，都唔醒起，一落車，嘩，咁鬼凍嘅！
即刻著返件外套，雖然只係薄外套褸，好過冇~
究竟，妖怪村有咩睇嘅呢？好快就有答案，答案係冇！

呢度只係掛咗好多紅色燈籠，有啲妖怪裝飾，有啲精品店，有啲遊戲攤位，其他主要係食肆~

 

而食肆方面，只係有啲好普通嘅台式食品，我哋行咗一圈，完全冇一間食肆係感興趣嘅，唉，咁都要食嘢咖......

園區中間有個台，明顯係有表演睇嘅~
而家過咗七點多少少，台上面坐晒人喺度，唔駛有偵探頭腦都知就嚟有表演~
而我知道呢個所謂園區係閂八點鐘，咁，表演好大機會七點半就開始~
台上面放咗幾個鼓，嗯，我相信都係啲我哋未必感興趣嘅表演，所以都冇話趕住去食嘢，再趕住去睇表演~

行咗一個圈，最後都真係好勉咁揀咗間食肆，主要係食麵，普普通通咁啦~

 

其實喺食麵中途已經聽到鼓聲，都知道表演已經開始，話就話冇興趣，但個表演場地只係喺咫尺之間，基於八鬼卦嘅心態，都想望兩眼嘅~
但係就唔會三扒兩撥咁去鯨吞碗麵，都係慢慢食~

跟住就買咗杯雪糕，佢係鴛鴦味嘅，一邊綠色，係綠茶味；一邊黑色，係黑炭味~
究竟，黑炭係咩味嘅呢？
先講綠茶味，味淡，還可以的，而黑炭味呢，真係唔識形容，但其實幾好食，似唔似黑炭呢，我就真係唔知喇，從來未食過黑炭......
 

好喇，一邊食雪糕，一邊行過去睇吓表演~
之前提過，表演未開始，台上都已經坐滿人，表演開始咗就連台下都企滿人，好難先搵到個位裝吓~

一如所料，都係打吓鼓，唱吓歌，主持人同觀眾有啲互動咁啦~
除此之外，另外有兩隻公仔人，件公仔衫都幾大件，兩隻公仔睇落都幾巨型~
兩隻公仔除咗同觀眾有啲互動之外，有時仲會跳吓舞，著住套咁嘅公仔衫跳舞，我諗都幾辛苦~
 

主持同觀眾嘅互動，有啲令人懷疑嘅地方~
疑點一：
有個大約七八歲嘅小女孩，喺互動期間，表演慾超強，動作亦純熟，毫不怯場，拍得住主持嘅表現~

疑點二：
主持問啲觀眾想聽咩歌，基本上每一次，啲觀眾講完不到十秒(有時更快)，隻歌就響起，而主持亦隻隻識唱~

呢兩個疑點，令我覺得啲被挑中發言嘅所謂觀眾，可能係媒嚟~
不過點都好，都唔關我事嘅~

到咗表演後段，竟然有啲令人驚喜嘅情節！
其實又唔算係啲咩，可能全世界只有我一個覺得驚喜~
之前講過，著住件咁巨型嘅公仔衫跳舞，都幾辛苦，嚟到表演尾段，主力由兩個公仔人跳舞，其中一隻跳得非常落力，直情係起勁咁跳，我覺得非常精彩！
喺有比較之下，另一隻就真係 HEA 咗啲，喺強勁嘅音樂環境下，啲舞姿都係好輕柔，踢腿動作完全冇力~
不過可能係因為佢飾演嘅係女仔，要跳得比較斯文啲~
我自己睇跳得好勁嗰隻公仔人睇得好開心，好欣賞佢嘅用心！

嚟到表演完結一刻，仲有煙花放，雖則我對煙花冇太大感覺，但總算係一個驚喜節目，可謂誠意十足！
 

好嘞，親身到現場探個究竟，唔怪得網路上對妖怪村嘅描述都係平平淡淡，冇咩內容，原來平平淡淡，冇咩內容就正正係對妖怪村最寫實嘅描述~

下一站係「杉林溪大飯店」
根據 GOOGLE MAPS 嘅計算，由妖怪村到杉林溪，約需 30 分鐘，不過我哋就用咗一個鐘先到~

如果我形容妖怪村喺山區，咁杉林溪就係喺深山，而我事前係唔知道嘅......(都唔知點做功課嘅......)
路程距離唔算太遠，不過沿途都係山路，車速自然慢，而呢度嘅山路，係完全冇照明設備嘅，只有部車嘅頭燈(試過停低關頭燈，立時進入全黑狀態)，車速自然係極慢~
呢度嘅山路，直情係「頭文字 D」裡面嘅秋明山咁嘅 U 形山路，一個又一個嘅 U 形山路，由於現場環境極為黑暗，每到彎前，我都要將車速減至極慢先安心進入彎路~
如果我出發前知道係咁嘅環境，唔知我仲會唔會安排夜晚先入杉林溪呢？我真係唔知道~
 

如是者，喺山路玩咗近一個鐘，終於都去到杉林溪~
入杉林溪要收入場費同泊車費，不過如果喺度住嘅就可以喺飯店退返錢~

杉林溪大飯店，分四種房型，我哋揀咗小木屋，而家先去接待處 CHECK-IN 先~
到咗接待處門口，仲未落車，見到前面有個溫度顯示牌，標示住 10 度，我心入面第一個反應以為個牌係壞嘅，不過當我推開度車門就知道，個牌係運作正常咖！
我哋兩個得件短袖衫加件薄外套，當然頂唔住 10 度嘅環境，所以我哋行動要快，盡量令曝露喺室外嘅時間減少！
 

CHECK-IN 咗，退埋入場同停車費，前台教埋我哋點去小木屋，原來要揸車再行一少段路過去~

車就泊喺屋外停車格，不過我見唔少人都泊咗喺屋嘅另一邊嘅地下，唔知係咪都可以泊，定啲人貪方便，唔理咁多，我泊咗喺停車格就算~

我哋間房喺二樓，由車上去屋嘅地下，要上廿幾級樓梯，再上二樓都係行樓梯，拎住個篋上都幾辛苦吓~
入到間房，即刻開咗個暖爐先~

間房認真唔錯，表面全部都係木，夠晒氣氛，仲要幾大吓，唔錯！
 

至於屋外環境，而家屋外漆黑一片，聽日先知，早抖！