《瞬間看地球》Stranger's Blog

今日行程：

Day 03：杉林溪 → 猴探井天空之橋 → 寶島時代村 → 圓滿教堂 → 僑園大飯店 → 伊豆日式露天溫泉

清涼嘅清晨，真係特別醒神，非常舒服~

望望窗外環境，原來十分不錯，可惜視角較窄，睇唔到幾多~

 

梳洗好後就執埋啲行李拎上車，再去大堂嗰邊食個早餐先~
大堂嗰邊風景都幾好呀~

 

早餐係飯店包埋嘅，其實都預期會係一般西式或中式早餐~
入到去望兩望，估錯咗一半！
中式就係中式喇，不過係齋類嘅中式早餐，除雞蛋外，全部都係齋菜~
儘管我哋都唔係食肉獸，但只係食齋嘅話，又略嫌真係齋得滯~
不過都冇計，唔通唔食咩~

 

食完之後，對齋菜真係完全改觀，呢餐早餐認真唔錯，清淡得嚟味道十分不錯！

今日第一站：杉林溪
杉林溪，係某台灣討論區嘅版友介紹我去嘅，佢貼咗兩三張相，我睇到都覺得幾靚，就決定去~

食完早餐，就揸返車去入口嗰邊嘅停車場，途經杉林溪茶坊，落車影吓相~

 

差唔多到目的地，見到好多龍友，佢哋全部都係 STAND-BY 狀態，唔知想影咩呢？
 

泊好車，再開始向計劃好要行嘅「青龍步道」進發，我哋嘅目的地係「青龍瀑布」
一路行過去，非常清靜，沿途只係見到一對五十多歲嘅夫婦~

 

呢度啲垃圾桶幾過癮，初時都冇為意係垃圾桶嚟，直至見到......
   

行到一半，見到前面有工程封咗路，唔可以再行落去~
 

不過我哋見到附近有第二條路，就走落去睇睇~
過咗橋再向前行，唔係行咗好遠已經到盡頭，呢度係「石井磯」
即係話，我哋今日去唔到青龍瀑布，只係去到青龍瀑布嘅背脊~

 

喺石井磯休息咗一陣，就回程~
據討論區嘅人講，佢嗰幾張相係喺青龍步道附近影嘅，唔知會唔會就咁啱喺封路範圍入面......

我哋回程唔經沿路返，行吓河嘅另一邊~
行吓行吓，個畫面咁熟嘅，係喇，就係論區嗰張相嘅環境喇！
不過唔知點解，好似睇相靚啲，不過當然啦，呢度都係非常值得嚟嘅，我真係唔排除將來會再嚟，花一整天慢慢行~

 

行完呢邊，就去攞車，再揸到成個園嘅中心位置，等巴士~
因為我哋而家要去嘅部份，一般車係唔入得嘅，只可以搭園區嘅巴士~
不過搭呢程巴士係要俾錢嘅，印象中一個人來回票要成 NT$80，都幾貴~

等咗成三四個字，終於有車，車程好短，好快就到~
 

我哋而家去呢度，喺官網睇係冇俾名佢嘅，只可以話近松瀧岩嗰邊嘅瀑布~
呢邊都好靚，同先前嘅好唔同，係另一種風光，直情係世外桃源，可惜範圍較細~

 

由呢度過返對面巴士站，可以行返原路，可以行呢度，不過行呢度有啲危險，我哋決定行呢度，非常小心咁行~
 

巴士站邊有個叫「根源」嘅地方~

 

之後屎塔話想去埋園區中間部份嘅「玻璃花坊」，冇問題，想去就去~
不過如果喺度搭巴士過去，用咗張回程票，再搭返出停車場係咪要再買票呢，如果要，又去邊度買呢？
嗯......我哋決定行過去玻璃花坊，應該唔係太遠~

沿途風景~

 

行到落玻璃花坊，我就覺得冇咩好睇，而且應該叫做「爛玻璃花坊」
 

屎塔就好似好感興趣，所以我就走咗出去馬路，睇住巴士到就通知屎塔，因為錯過咗一班都等幾耐~

 

最後屎塔睇完，巴士都仲未到，之後都等咗幾耐吓先有巴士，班次都幾疏吓~

坐完巴士就揸車走，回程仍然見到班龍友~
 

下一站係「猴探井天空之橋」
所謂天空之橋，只係兩座山頭之間嘅吊橋，見未行過，就去行吓~

離開衫林溪，行返噚晚摸黑入嚟嘅路，完全係另一個世界，路程亦好似短好多咁，梗係啦，唔駛好似噚晚咁龜速前進~
落山時有部車唔知做乜鬼，喺我後面係咁扒頭，本來都冇咩咁奇，喺台灣見怪不怪，奇就奇在佢扒過咗我頭之後，行咗一小段路，停埋一邊，等我過咗就入返隊，就喺我後面，之後都冇扒過頭......

去到猴探井天空之橋附近，發現咗啲奇怪事情~
我見到有個牌寫住「天空停車場」，冇人，亦冇話要收費，不過入面一架車都冇，我預計自己都唔會留好耐，所以唔理咁多，都係泊咗入去~
喺呢個停車場行過去天空之橋，有四五個大大小小嘅收費停車場，都有車停，但其實我泊呢個行去天空之橋都係兩分鐘到，真係為咗慳一兩分鐘步程而去泊收費停車場？
(其實有啲收費嘅，距我泊嘅呢個只有十秒不到步程......)
其實我都有啲驚，點會咁奇怪，係咪唔應該泊嗰度呢？不過都泊低咗又離開咗，唔諗咁多喇~

本來計劃好喺呢度食少少嘢，我諗住實有啲台式小食，點知冇，只係有啲生果檔，咁冇計啦，唔食嘢住~
行到去入口，買咗飛就入去，有間麵檔，不過呢刻冇咩胃口食麵~

行落去就係天空之橋，同一時間限 150 人喺橋上面~
條橋比想像中定，冇話有太大搖晃，可能唔係太大風~
走在橋上，冇咩感想，可能風景唔算好靚~

 

過咗條橋，其實仲有啲步道，不過我哋唔打算行，只係諗住行吓條橋~
回程有告示牌寫住如果要行返轉頭，要蓋印於手上先得，不過喺我哋視線範圍內都唔見有工作人員，結果我哋冇理到，就咁行返過去~

就係咁，就結束咗呢個景點，到此一遊~

下一站係「寶島時代村」
我知道屎塔對舊時嘅台灣有興趣，所以特意安排咗呢個景點~
當我俾咗個官網佢睇之後，佢立時興奮起嚟，其實佢都唔知係咪痴線嘅......

到咗寶島時代村，買飛時見到有雙十節優惠，只要係十月份生日都有折，咁啱屎塔係十月生日嘅，我嗱嗱聲走出去拖佢入嚟，俾本護照個職員睇，咁就平咗 NT$50~

入場前見到個由人扮嘅公仔，都幾得意，屎塔又顯得好有興趣，可能病發......
雖然我對呢啲懷舊嘅台灣佈置興趣唔大，不過都唔會話覺得好悶，慢慢行吓都幾好~

 

頭先喺天空之橋冇食到嘢，就喺呢度食啦~
不過味道就真係普通咗啲~

 

食完嘢繼續行~

 

最感興趣就係呢個展館~

 

睇完離開時又遇返嗰個公仔，佢唔知喺度做咩呢？
 

最後我哋仲同佢合照~

下一站係「圓滿教堂」
其實我都可能痴痴地，去到邊都鍾意去教堂，但我又冇去過香港嘅教堂咖喎......
其實去圓滿教堂，都唔完全因為個教堂嘅，睇相見到個環境都唔錯，咪去吓囉，同埋上面有得騎馬，我見平平地，咪去試吓~

不過去到現場，售票處冇人，連燈都冇開，只係見到對開有幾個人喺度做緊啲小工程，唔計呢幾個人，視線範圍內係一個人都冇，連大閘都閂埋~
我哋行去售票處再仔細睇吓，原來園區正在維修中，暫停開放~
我出發前一星期內先上過佢個網頁，都冇提過，豈有此理！
 

咁冇計啦，咁剩返啲時間做咩好呢？又唔可以跳去下個景點，因為下個景點係去食自助餐晚餐，未有咁早有得食啦~
打開我自己做嘅功課，附近冇地方去，去食自助餐嘅路線沿途亦冇地方去~
諗住兜遠少少，去東海大學行個圈，其實又唔夠時間，算數，直接去食飯嘅地方，泊低部車周圍行吓~

下一站係「僑園大飯店」
今次 plan 行程時，忽發奇想，想試吓喺台灣食自助餐，於是就開始做吓資料搜集~
我發現台灣嘅自助餐文化唔算太大眾化，選擇唔多，以台中為例，大多數都係啲超平價嘅自助餐，嗯......唔係我想要嘅嘢啦~
咁比較正式嘅自助餐，都有幾間揀吓嘅，最後我揀咗僑園大飯店裡面嘅「海鮮百匯」
雖則評價數量唔多，但眼見嘅都係正面嘅，所以就揀咗呢間~

去僑園大飯店嘅途中經過 921 地震教育園區，我哋見到啲損毀咗嘅建築物，應該係一間學校，於是就停車睇吓~
本來諗住入去睇吓，可惜已經過咗開放時間，無緣，只能喺外面偷窺一吓~

 

由於交通擠塞同埋行咗幾個圈先搵到個停車場入口，泊好車上到去，自助晚餐已經差唔多開始~
晚餐時間由五時至九時，有成四個鐘，其實我自己就三個鐘乜都夠~
入場前要先到櫃檯俾錢先，之後就有人帶位，等夠鐘就可以開始~

 

坐低咗，見到檯面有三隻木夾，係好耐以前用嚟晾衫嗰種木夾，唔知有咩用途，但我估食食吓就會知，冇特別問人~
 

不過都難免亂估一通，我哋諗緊會唔會一檯只限三隻生蠔，如果係就真係少咗啲，雖則無限食都唔食得多，但二人有三隻係點計出嚟嘅呢？三人又有幾多隻呢？
其實呢個想法唔係好成立，唔諗喇，去出行個圈睇吓有咩食先~
食物種類都幾多，多過我喺香港食過嘅，好似幾好咁~

 

開始可以攞嘢食，一切正常，冇咩特別，只係唔覺有生蠔，亦唔見有人食~
我個人嚟講冇生蠔係冇所謂，食物種類豐富同質素比一般為高較為重要~

大約過咗一個鐘，我見到有人食緊生蠔，但我又真係唔覺邊度有得攞，於是就問吓啲職員，一問之下，解決咗我兩個疑問！
一是生蠔，二是木夾，個木夾同生蠔真係有關係的~

呢度有啲嘢係即叫即整，咁熱食就可能叫先煮啦，生蠔呢啲就可能叫先開~
運作方法係，只要將個木夾放喺你想要嘅食物牌前面嘅碟仔度，個木夾上面有檯號嘅，等一陣就會有人送到上你張檯度~
啲食物牌就喺放食物嘅檯度，個牌寫明係咩食物，一個木夾代表一份，送食物嚟嘅時候就會連埋個木夾俾返我哋，即係想食咩都係冇限嘅~
 

問題又嚟喇，二人有三隻木夾係點計出嚟嘅呢？三人又有幾多隻呢？四人......(下省唔知幾多字......)

食後感呢，可以話種類豐富，可惜味道一般，以 NT$760 + 10% 嚟講，算係抵食~
不過特別想講吓啲生蠔，味道怪怪的，唔係變壞咗嘅怪，但味道真係唔正常，唔好食嘅~
 

食完嘢，做埋泊車優惠就去攞車離開~

下一站係「伊豆日式露天溫泉」
今次安排去浸溫泉，完全係因為冇太多地方想去，忽發奇想，不如花啲時間浸吓溫泉~
睇吓資料，就算係有私人池嘅溫泉房都唔係好貴，覺得幾抵住，就咁就決定去浸溫泉~

去溫泉區嘅路，遠離市區，冇燈，冇乜車，條路又窄~
本來冇乜車係好事，不過喺呢啲無數彎接彎又冇乜燈嘅道路上，有車比冇車好！
事關我唔知道彎後係咩情況，亦唔知隻彎有幾深，變咗我每隻彎都要龜速入，咁樣揸車絕對係苦差~

行行吓，俾我見到部甲蟲，當然唔係我追到佢啦，佢喺啲支路出嚟嘅，咁就得喇，我跟住佢行，起碼可以預知啲彎有幾深，唔駛下下收到龜速咁入彎~
呢部甲蟲都幾快吓，初時我都跟到佢，當然係離遠吊住佢尾，不過佢真係越揸越快，算吧，唔跟喇，太危險~
佢嘅揸法真係玩命，莫講話成條路都非常暗，就算俾你風和日麗，都冇可能揸咁快，啲彎後面有障礙物的話，一定撞，仲要係大撞！如果有個醉酒佬行咗出馬路，唉，真係唔敢諗~
喺我吊住佢尾嘅時候，屎塔話聽到一吓碰撞嘅聲音，我就唔係好聽到，屎塔懷疑我右側鏡撞到路邊電單車，嗯......答案有待驗証......

到咗溫泉旅館，泊好車就落車望吓個右側鏡，一啲花痕都冇，嚇死我~

溫泉旅館呢度，環境都幾好，唯獨係個 wifi 太弱，弱到要走出門口嘅露天地方先收到......
打咗俾前台，佢話會搵人上嚟睇吓，不過我都不抱期望，通常呢啲係冇結果~
不過現實往往都超出預期，呢次係連人都冇出現過......

講到出門口用 wifi，喺用 wifi 呢個時候，出咗啲小意外......
房入面個半露天溫泉池，兼有按摩功能，不過呢個池嘅按摩設定同我哋試過其他嘅有啲唔同~
佢按一吓會運作五分鐘，其間係冇得閂嘅~

我開始時唔小心按咗一吓，聽到運作聲，僅此而已，所以都冇咩點為意，跟住就開水，之後就走出去用 wifi~
用用吓聽到啲奇怪聲，都冇理佢，過咗一陣，屎塔走出嚟鬧我：你入嚟睇吓你做咗啲咩好事！

當我走入去嘅時候，我同屎塔即刻大笑咗出嚟~
原來按摩功能個出氣口不停將啲水射上天花板，當然係因為我撳咗個按摩掣之後先開水......
好彩唔係好多水上到天花，又好彩天花咩電器都冇嘅，純天花~

沖涼嘅地方就喺溫泉池旁，係完全開放式，冇間隔，冇屏風，咩都冇嘅~
 

之後又發生咗一啲小意外，呢個意外就慘喇，可能補救唔返咖......
我哋唔記得除手鍊，浸完返上嚟，條手鍊變咗黑色......

後記：屎塔拎過去手鍊間公司度問過，話要 $250 一條，我哋冇即刻搞，諗清楚先~
之後決定搞，再返去，第二個人處理，係個男仔嚟(上次係女仔，態度麻麻)，服務態度非常好，自然，舒服，更意外嘅係，佢話可以試吓用簡單嘅方法處理，試吓得唔得先，呢個方法係免費嘅！
佢叫我哋坐一陣，等咗五至十分鐘，佢行返出嚟，半蹲下，再拎返條鍊出嚟，嘩！雖則唔係新嘅一樣，但至少係銀色！
佢話如果"令"身啲就要大搞，咁就真係要 $250 條~
唔駛喇，而家咁樣都幾好喇，又唔算太啞色，滿意，收貨！
更滿意係個職員，我哋呢啲一望就知係窮鬼，佢都仍然態度誠懇，仲半蹲下同我哋講嘢，搞到我哋都唔係幾好意思~
真係希望佢嘅用心會令佢帶嚟工作上嘅滿足同收入上嘅滿足~