今日行程:
Day 04:安尼公主花園 → Alpaca Coffee 草泥馬咖啡 → 新社莊園 → 百菇莊 → 宮原眼科 → 這裡有貓輕食屋 → 中華夜市 → 心驛商旅
今朝起身,自必然會浸多次溫泉先離開~
離開房間,又周圍影吓相~
之後去食早餐,發現只係剩返五分鐘,嗱嗱聲去攞嘢食,好快咁食咗個早餐~
都係啲好簡單嘅中西式早餐~
今日第一站係「安尼公主花園」
坦白講,都係冇咩地方想去,所以就攝呢個落去~
原本第一站係「新社莊園」嘅,因為怕多人,所以安排第一站去,點知揸車時途經「安尼公主花園」,既然途經,不如去咗先啦,反正我估呢個都唔會留好耐~
安尼公主花園呢度地方唔大,一眼望晒~
最令人可惜嘅係,明顯園方已經冇心做,成個園區擺設殘殘舊舊,佈滿塵埃,仲有好大隻蜘蛛喺當眼地方,絕對大過一個成年男人嘅手掌!好離譜!
園區內唔好話遊人,連職員都冇乜幾個,咁我都明嘅,呢度明顯收入唔會多,點請到咁多人吖~
想話買吓雪糕食都唔得,因為個檔口冇人,唔通自己整咩~
園區內嘅餐廳,我好懷疑以而家嘅經營環境,仲有冇坐滿嘅情況~
呢啲木製衣服板,好重好重,我作為一個成年男人,都要用幾大嘅氣力先搬得郁,呢碌木掛到咁多塊,真係勁!
跟住佢做,真係幾香~
同隻貓玩咗陣,現場好曬,幫佢擋吓太陽先~
之後想話行吓區內唯一商店,但大門緊閉,原來要走去餐廳搵人開門~
咁我就過去搵人啦,最後等咗起碼十分鐘先有人嚟~
買咗少少嘢,到我哋離開,個職員就鎖門離開,其實咁樣真係做少好多生意~
附近仲有一著名景點「白冷圳 - 2號虹吸管」,不過對我哋嚟講就冇多大興趣,影過相就算~
下一站係「Alpaca Coffee 草泥馬咖啡」
貓 cafe 去得多,草泥馬 cafe?好似幾新鮮,一於去探過究竟!
一路去,越行越入,真係對個 GPS 抱有懷疑,不過唔跟佢,仲可以點吖~
GPS 其實都算幾可靠,最後都去得到,而地點又真係幾偏離大路~
現場係一個開揚大露台,喺店口有幾隻草泥馬,時而觀景,時而親親草泥馬,好不寫意~
不過呢度個大嬸面口黑到呢,佢係對個個都係咁,咁就算啦,唔係針對我哋就得~
飲品冇咩特別,賣相幾好~
景觀唔係話好靚,不過勝在夠開揚,都幾舒服~
重點就梗係草泥馬啦,喺呢度可以餵佢哋食嘢,免費的,幾得意~
不過有隻好惡,佢為咗擺位食嘢,會向另一隻細嘅噴口水,又會咬佢耳仔~
我哋唯有分頭餵,一個餵惡嗰隻,另一個就餵其他幾隻~
我哋餵吓草泥馬,又返位飲吓嘢觀吓景咁,來來回回都消磨咗好一段時間~
下一站係「新社莊園」
台中好興呢啲主題園區,見呢個好似幾靚,貪佢有點歐陸風情,就去行吓~
園區都幾大,唔會話俾啲相呃咗,初步印象幾好~
園區內有餐廳有精品店,亦有小食店同有間賣酒嘅店舖,配套都幾足~
喺度都係純影相,冇咩好做~
下一站係「百菇莊」
本來冇諗住去嘅,不過見有少少時間,知道又喺附近,不如就去食杯香菇雪糕啦~
今次食呢杯好似好過上次喺日月潭食嗰杯,香啲~
食完雪糕,又入去參觀吓個菇莊,入面有好幾種菇,環境濕氣好重,其實都冇咩好睇~
下一站係「宮原眼科」
初時睇到呢個景點嘅名覺得好奇怪,眼科都係一個景點?
原來入面係賣啲包裝得好靚嘅食品,同埋有間餐廳嘅~
睇人相見內部幾靚咁,所以就嚟參觀吓~
入到台中市中心,搵車位成為咗一個煩惱~
平時自駕去嗰啲地方,一係可以隨便泊,一係有專屬停車場,根本唔需要諗泊車問題~
嚟到市中心,睇住個 GPS,睇吓邊度有停車場,一係太遠,一係去到都唔見有停車場~
兜吓兜吓,又好彩喎,喺宮原眼科側邊,見到個露天停車場,唔駛諗啦,又近又有位,幾錢都泊呀,都係停一個鐘到姐,收得你幾多吖~
埋到去見到 NT$40/h,平!
泊好車就行過去宮原眼科,內部真係幾特別,不過賣嘅嘢唔平呀,睇吓就算~
跟住走去買雪糕,好多人排隊,點完要咩味,仲要揀多兩款嘢鋪喺面~
外觀就非常吸引喇,食就都幾好食,唔錯!
不過如果一人食一杯就覺得多咗啲,好彩我哋只係買咗一杯~
下一站係「這裡有貓輕食屋」
嚟台灣,點都要去一去貓 Cafe 嘅~
去到附近,又要諗吓泊車泊邊喇,我做功課時見過有啲街邊停車格嘅,嚟到兜咗一陣就見到,仲有空位~
唔知今次又駛唔駛俾錢呢?
之前泊過幾次呢啲停車格都冇收到發票,所以我係未有過泊呢啲位嘅繳費經驗嘅~
貓 Cafe,間間都一樣,呢間都唔例外~
我哋仲特意點咗個貓湯丸,嗯......實物同相有啲分別,相靚啲......而且味道一般~
留咗喺度差唔多兩個鐘,夠皮囉~
下一站係「中華夜市」
其實呢,頭先喺貓 Cafe 先食咗嘢,本身唔預佢份量咁足,諗住都係細份嘢,所以先安排貓 Cafe 後去夜市,反正夜市食多食少可以自己控制~
我哋曾考慮過不如唔去,又唔肚餓又費事搵位泊車,不過傾吓傾吓都係去,唔知係為食定想去行吓嘞~
攞車時,發現車頭俾人攝咗紙,即係要俾停車費喇,行住先,見到七仔就去交咗佢~
我叫屎塔幫我設定個 GPS,如常地,好快就設定好~
咁我就跟住嚟行啦,行行吓,我發現咗樣嘢,GPS 顯示我哋距離目的地有成 194 KM!
原來屎塔設定咗去台北嘅中華夜市......
好彩我發現得早,否則行行吓上埋高速公路都似!
見到七仔,停埋一邊,繳費好容易,俾張發票佢,掃瞄一吓,話你知幾錢,俾咗錢就完事~
去到~~~~~~台中~~~~~~嘅中華夜市,雖然見到好多車停埋一邊,不過我又真係搵唔到一個唔阻人嘅位可以泊~
想話搵停車場,行咗陣都唔見有,算吧,反正仲飽飽地,放棄,直接去旅館~
下一站係「心驛商旅」
呢間係一間汽車旅館,即係專為駕駛人仕而設嘅旅館~
我印象中好似第一次住呢類汽車旅館,去到嘅時候,車都唔駛落,搞完手續,就指示我哋向前駛~
去到我哋間房,直接停部車入車房,仲可以落閘,行上一層就係我哋間房~
人同車都有房,感覺幾新鮮~
留言列表