《瞬間看地球》Stranger's Blog

今日行程：

Day 05：月眉天馬牧場 → 格上租車機場站

今早起身梳洗時，突然聽到啲怪響聲，我哋估計係早餐到咗，於是我就落去車房睇吓~
落到去，真係見到兩份早餐放咗喺度，同埋見到中間有個紅外線感應器~
未試過，都幾有趣~
 

兩份早餐拎到上去，先發現成間房係冇位可以同時放到兩份早餐同時又方便食嘅~
咁冇計喇，唯有將兩份早餐放喺梳化，最多食得小心啲~
台灣早餐，一般都唔會太差，呢次都唔例外~

今日第一站係「月眉天馬牧場」
去呢個牧場，最主要都係因為草泥馬，聞說有一定數量，正！

揸車去到附近，封咗路，唯有靠睇地圖，再估吓可以喺邊度入~
行行吓就見到指示，順利到達~

入咗場已經見到草泥馬，不過我哋發現，呢度比想像中大同多嘢睇，所以我哋決定睇咗其他嘢先，最尾先睇草泥馬~

 

行行吓到咗河馬餵食環節，個伯伯餵餵吓叫屎塔餵，嘩，一生人有幾何有機會親手餵河馬？屎塔梗係話好啦！
不過都幾核突，河馬一張開口，我哋人類就梗係覺得好污糟啦，屎塔小心翼翼咁餵，好彩都冇整污糟自己~

 

餵完之後，我哋繼續觀察，阿伯伯叫我哋退後少少，原因係河馬食完嘢會反雛，呢個時候有機會會噴嘢喎~

喺度仲可以親手餵象龜，體驗呢，就冇話好特別，點及得餵河馬咁特別，不過可以咁樣零距離接觸佢哋，都唔錯~
 

最後梗係要親親草泥馬啦~
嘩，原來呢度真係有好多草泥馬，一堆堆咁，好正呀！
仲可以走過去零距離接觸，真係第一次！
佢哋都幾唔鍾意人哋摸佢，一係走開，一係反抗~
唔知點解要將佢哋啲毛剃到隻隻唔同圖案......

 

玩到最後，有抱抱草泥馬 BB 嘅環節，其實如果要抱 B，時間上係遲過我原定要走嘅時間，不過機會難逢，我覺得雖然有少少趕，但都可以嘅~
去到我哋排第一，正確嚟講係未有人排~
有工作人員行過嚟喇，不過佢話 BB 暫時未可以俾人抱，只可以抱佢出嚟俾大家睇吓咋~

 

睇咗一陣，真係要走喇~

下一站係「格上租車機場站」
第一次喺機場站還車，去到都唔知應該點做，又見唔到格上嘅人~
咁冇嘅，我哋有兩個人，見到多人停車嘅位咪停埋一份，屎塔走去格上嘅櫃檯叫人嚟處理吓囉~

屎塔同個職員一齊行過嚟，交收過程順利，唯獨是個職員向我收取 NT$92 高速公路費~
吓？我今次係第三次喺台中自駕，前兩次我一樣有行高速公路，不過前兩次都冇話要咁樣費~
我見佢有晒文件，又唔係收得多，就照俾，俾完我就再問佢，之前都唔駛嘅，點解今次要~
對方解釋，係上年某月開始嘅規則嚟，我計吓，咁就合理喇，我前兩次都係上年某月之前嘅~

嚟到呢刻，我哋咩手信都冇買過，諗住喺機場作最後衝刺，不過機場得一間手信舖，仲好鬼細，貨品種類又少，唉，點都要買啲咖~

就咁就完結咗五日嘅旅程，五天，真係太短喇，唔係好夠喉，下次玩要耐啲！