《瞬間看地球》Stranger's Blog

本來今日夜機，冇行程，正路都冇咩好講，不過同 David 去旅行，預咗有論盡嘢發生，點知未上機就已經有論盡嘢......

喺機場，David 發現佢唔記得咗帶手機叉電器！
雖則電話喺正常情況，作用不大，不過喺緊急情況，作用就大囉~
佢話佢有尿袋，夠佢叉兩次，即係三次滿電用九日......
一直唔用就得！

再講，有少部份時間，佢係會離開我哋，分開玩，佢要用 offline maps，我唔關心佢係咪可以去到佢想去嘅地方，我只係擔心，佢冇得用 offline maps，點返嚟會合我哋~
靠記憶靠認路當然都可以，咁如果唔記得呢？

其實就都唔係冇辦法，冇叉機姐，有 USB 線，俾我幫佢叉囉，不過夜晚有咩要聯絡就唔方便，下下要身體力行咁去搵對方，再講，我鬼咁多嘢要叉，其實都唔一定有位，用萬能蘇駁上駁就咪搞，叉一陣就話姐~

唯有喺機場睇吓有冇咩配件合適，不過我就打定輸數，一來未必搵到，二來肯定唔平，係咪值得呢？

首先我哋搵到 $158 嘅 USB 叉，啱用喎，David 想俾錢咖喇，不過我拉佢埋一邊，諗清楚係咪真係買先，$158 蚊，但之後未必有用~
我唔係話幫佢決定，係俾啲時間佢自己諗清楚~
佢諗諗吓都係唔買，覺得唔值~

後嚟又搵到其他配件，仲貴，唔駛諗~

入閘前都搵唔到啱心水嘅，入咗閘先算，當然，唔會覺得入咗閘啲嘢平啲，不過都會行吓搵吓嘅~

過咗安檢，有個職員拎住隻錶行出嚟，舉高，問係邊個咗隻錶，我望一望，咁熟面口嘅，跟住屎塔已經話係佢嘅~

唉，真係俾呢兩位團友吹脹~

入咗閘，冇嘢做，就搵位叉電~
我同屎塔叉緊電時，見到 David 冇叉到，問佢做乜唔叉，佢話唔駛，叉爆電先出門口~
我問佢而家有幾多電，佢話 86%，我真係即時充晒電，佢已經冇帶叉機，仲唔趁有機會叉電時叉爆佢，就算係 96% 都要叉啦，得嗰 86%，竟然覺得唔需要......
說到此時，覺得個口腥腥地，我諗我有輕微吐血......

好啦，佢就拎條 USB 叉線出嚟，我哋即時笑爆咀~
條線係尿袋嗰條線，得嗰兩吋，佢插咗叉座後，部電話都唔知點放好~
因為叉座對上係一個小平台，係俾人叉住電話放喺檯面嘅，佢條線咁短，放又放唔到上檯，用手揸住又用唔到，因為俾個平台頂住，長期揸住又唔就手，因為條線太短，最後只好由佢條條揈~

跟住仲發現佢條線係叉唔到嘅電嘅，不過呢次唔關佢事，因為我哋齋用 USB 都叉唔到，要用插頭先叉到~
佢換過個位再叉，都要左就右就先叉到，鬼咩，咁樣吊住部電話，梗係插得唔好啦~

到最後諗車叉，其實車叉都未必行得通，一來唔會平，唔會幾十蚊有交易，機場呀；二來，去到揸車，會有 GPS，以我所知，唔係跟車有嘅，係外置嘅 GPS，咁即係要用點煙器啦，咁就冇位插車叉~

冇晒計，不過都唔係咩大件事嚟嘅，冇需要唔好成日開嚟用，需要時，我幫佢叉一陣，唯有係咁~

上機！