今日行程:
Day 07:大關嶺羊群牧場 → 旌善鐵道自行車(九切里火車站) → 阿烏拉吉火車站 → Sky Walk → 春川 → 優味雞排
今日嘅早餐係酒店包埋,噚晚招待我哋 check-in 嗰位女仕,一早已經身處用餐嘅地方,希望噚晚唔算太夜到,要佢比平時遲休息......
由噚晚到而家,未見過有第二位職員,唔通佢一個人打理晒成間酒店?(咁呢間酒店又的確唔係大嘅~)
早餐食品唔算特別,都係啲韓式家常食物,不過感覺豐富,而且味道非常不錯,感覺滿足~
今日第一站係「大關嶺羊群牧場」
據講一大片山頭,都是羊,就好似台灣嘅清境咁~
買咗入場券,拾級而上,一路上一路上,喂,冇羊嘅?
直至上到山頂,已經可以望透整個山頭嘅東南西北,喂,除咗羊棚,一隻羊都冇!有冇搞錯!
唔怪得啲人都集中喺羊棚度,大佬,我要行山駛鬼嚟呢度俾錢行!
唉,笨已搵!
冇計啦,唯有行落羊棚,餵羊嘅同時慰藉吓被搵笨嘅心靈創傷~
一張入場券包一兜糧,算你啦,唔駛再俾錢買!
下一站係「旌善鐵道自行車」
喺韓國,有幾個地方都以踩鐵道自行車,不過我就貪旌善夠遠,順道去埋 Sky Walk,所以就揀咗呢個~
去玩旌善鐵道自行車,首先要去「九切里站」,再踏鐵道自行車過「阿烏拉吉站」,再搭接駁火車返九切里站,人就上火車,而火車會勾埋啲自行車一齊返九切里站~
到咗九切里站,第一時間去售票處,睇吓之前嘅電郵預留四人車有冇用~
我哋去到,將我哋要講嘅嘢話俾職員知,我哋都未講完,佢已經讀咗屎塔個名出嚟,GOOD!俾埋錢等夠鐘就可以玩,正!
仲有成個鐘先有得玩,呢個時候最好就去食嘢~
呢度食肆唔多,只得三兩間,我哋唔係揀去邊間食,而係減咗啲唔想食嘅,最後淨返間 cafe,見佢有窩夫,勉強接受啦~
喺等緊嘅時候,David 係咁自言自語投訴部相機,話影啲相好朦,但又搵唔到原因~
屎塔問佢攞咗部相機嚟睇,相機入面嘅 setting 冇問題,一時間都唔知點解,後來屎塔發現,原來支鏡對焦嗰個掣,由自動教咗去手動,唔怪得啦~
都等咗一段幾耐嘅時間,終於有得食!
不過呢,原先我哋以為等咁耐,可能因為要焗嘢嘅關係,但係不論上到檯嘅食物或者係飲品(我飲熱朱古力),都只係暖~
而且味道一般,失望~
九切里站隨影~
好嘞,差唔多要上車喇,我哋呢就想坐最尾嗰卡,因為可以踏慢少少都唔怕阻住人~
不過埋到去,最尾嗰卡已經俾人坐咗,冇計 lu~
等到開車先發現,就算坐到最尾一卡都冇用,因為佢有兩條路軌,兩行都有人坐,離開個站就會二收一,我哋嗰行行先,第二行就會跟隨我哋嗰行嘅後面,即係點都唔會係最後啦~
四人座,屎塔同 David 坐前面,我坐後面~
呢個組合望落奇怪,不過原因好簡單,方便佢哋影相而已~
而我,就要負責喺適當時候減速,同埋,喺唔適當時候都減速~ XDDD
佢兩個唔知我拉咗少少手掣,踩到冇晒力~ XDDD
最後被發現,俾人鬧到狗血淋頭~ XDDD
雖然四個位都可以踩,不過坐三個人,兩個踩都可以應付到,係起步吃力啲啫~
沿途風光明媚,不過又比我期望嘅普通~
一直踩一直踩就到咗「阿烏拉吉火車站」
等咗十分鐘到,就可以上接駁火車返九切里~
咁樣踩吓都幾好玩嘅,尤其嚟到旌善咁偏遠嘅地方,都係一次不錯嘅體驗~
下一站係「Sky Walk」
Sky Walk 就係嗰種凸出於懸崖,地面為透明玻璃嘅 U 型觀景台~
呢個位於江原道嘅 Sky Walk,可以盡覽 180 度轉彎河流嘅奇特景觀~
上車 set 個 GPS 去 Sky Walk,不過又係點都搵唔到個目的地,唯有喺地圖上就咁搵~
喺地圖上搵到一個地方叫「Sky Wobeu」,而地形又非常吻合,我哋好有信心就係呢度,就用佢嚟做定位~
差唔多到嘅時候,要上兩段好斜嘅斜路,係斜到二波都上唔到,要焗推去一波上~
呢度嘅 Sky Walk,可以話係 mini 版,印象中去過嘅相類似設施,呢個真係最細,好似 Q 版咁~
景觀方面,由於圍欄高(當然啦),所以景觀係打咗少少折扣~
再加上呢個時間對正太陽,非常刺眼,無論現場睇定影相都唔係好理想~
其實想睇呢個 U 形河流,係唔需要俾錢出去 Sky Walk,因為 Sky Walk 隔離,有條木梯,上到最高點有個觀景台,景色差唔多,唔駛錢的~
喺呢個觀景台,睇壯觀嘅風景固然係正,但係右方不遠處,有一樣嘢都好吸引,就係 Zip Wire~
呢個 Zip Wire,真係超癲,究竟要有幾多嘅勇氣先夠膽去玩?
落點係接近圖中停車場嘅位置~
離開 Sky Walk,我哋打算去搵吓 Sky Walk 嘅落點,睇地形似係喺「阿拉里村」附近~
走嗰時,自然要落返嗰條勁斜嘅路,用一波落都太快,要 brake 住落,感覺有啲驚險~
去到阿拉里村停車場,唔多覺見到 Sky Walk 嘅落點,可能唔係呢邊......
下一站係「春川」
今晚住喺春川~
過去幾日,GPS 都出現過幾次唔如意嘅狀況,不過都唔及今次,令到我哋手足無措~
同樣,用任何手上嘅資料都 search 唔到目的地,通常發生呢啲狀況,都可以喺地圖搵,再指定地圖上某一點作為目的地~
今次竟然行唔通,GPS 顯示 route not exist!
天呀,難度春川係一個離島?冇陸路到嘅?當然係唔可能!
我哋試吓喺區內搵啲地方作為目的地,一樣係唔得,咁唯有將範圍擴大,直至試到得為止~
咁當然,最後都實搵到,不過都真係離目的地幾遠,唔理咁多,去到先算~
去到目的地,再次重覆輸入真正目的地嘅資料,一樣係 route not exist,咁唯有出最後一招,offline maps + 人肉導航!
多得屎塔準確嘅帶領,最終都去到今晚喺春川嘅住宿點~
下一站係「優味雞排」
我哋喺春川得一餐正餐,就試吓春川嘅辣炒雞排~
卸下行裝,由酒店行過去,只需六分鐘,又係屎塔做嘅好事~
行到去,見到大裝修,封晒門,正要失望之際,原來,裝修緊嘅舖頭隔離先係優味雞排~
除咗必點嘅辣炒雞排,仲點咗冷麵,聽人講話好食嘛~
辣炒雞排十分不錯,好惹味,食唔停口!
冷麵都好食,不過唔算有咩驚喜~
可惜吖,我嘅力不從心症又發作,竟然忘記咗一樣好重要嘅嘢,就係加飯落去炒!
據講係指定動作,而且非常惹味!
唉,我哋三個已經食飽飽,飽飽飽飽,實在唔可能再食,緣慳一啖......
食飽飽就步行返酒店,完結今日行程~