2015.03.29 加平、首爾 (韓國第八天)－《瞬間看地球》Stranger's Blog

今日行程：

Day 08：南怡島 → 貓頭鷹博物館 → KT(租車公司) → Thanks Nature Cafe → 特麗愛 3D 美術館 → TOMS CAT → CatsLiving → 清溪廣場 → 農門家

今朝一心諗住早餐去 Isaac 食，不過去到嘅時候未開門，只好揀第二間~
途經 Lotteria，又係未開，不過呢間嘢門口貼咗張早餐相，供應時間係 4am~11am，但你間嘢開 10am......，係咪玩嘢......

附近仲有 KFC，又係未開，基本上成條街都冇咩舖頭係開咗嘅，而家八點鐘，都唔係早得好緊要啫~

咁冇計啦，唯有搵間便利店買啲嘢食吓啦~
咁啱入咗間便利店，有檯有凳，可以堂食，哈，正！

今日第一站係「南怡島」
鍾意睇韓劇嘅人，對南怡島一定唔會陌生，因為有好幾套受歡迎嘅韓劇都喺南怡島取過景~
我哋就純粹因為個島而嚟，而非韓劇~

對於去南怡島，可以話有點期待，但又有點害怕，因為我哋嘅入島方式唔係搭船，係利用 Zip Wire！
成個人由 Zip Wire 嘅塔頂一吓飛出去，下面係河流，對於我嚟講係極大膽嘅嘗試~

嚟到碼頭(亦係 Zip Wire 嘅所在地)，已經有好多旅遊巴到咗，私家車亦唔少~
不過絕大部份嘅人都係搭船，玩 Zip Wire 嘅只佔好少部份~

去到 Zip Wire 售票處，先知道原來有分兩條路線~
一條去另一個島，再坐船去南怡島，距離較短，但較斜，滑行速度快啲~
一條直去南怡島，距離較長，但較平，滑行速度慢啲~
經過商討後，決定玩直去南怡島嗰條~

搭 lift 上塔頂嗰時，唔知點解部 lift 唔識停，上極都仲有，我內心係非常希望佢即刻停，大佬，唔駛上到咁高吓嘛......
出咗 lift，就排排企，聽講解，聽吓有啲咩要遵守，有啲咩要照做~

之後，睇住一個一個咁飛出去，我開始緊張，而另外兩位就顯得輕鬆~
每次飛兩個出去，自然，我同屎塔會一齊飛，飛之前，要上高台，面前就係凌空嘅地方，只要踏前一步都粉身碎骨......

控制員同地面溝通好之後，我聽到 three......two.......我知道呢一刻終於都嚟到，我極力控制住唔好合上眼，唔好錯過呢一刻，反正都嚟到呢刻，驚同唔驚都係咁，冇嘢可以做，試著享受吧~
度閘開咗，面前就係南怡島，下面就係條河，一出去嗰吓係下墮，成件事好似跳樓咁，呢吓係最驚嘅，不過好快就由下墮變成下滑，感覺有嘢牽繫住，唔係 free fall，再之後就係滑翔，到咗滑翔階段，其實已經完全唔驚，可以盡情享受~
不過原來玩 Zip Wire，有啲嘢係要控制嘅，就係重心~
重心唔可以向前呢個當然係一定嘅，但原來重心控制得唔好，成個人會側晒，會由開始側到終點~
沿途我都有留意屎塔，佢好似拍咗丸咁，完全將佢痴Q線嘅基因釋放咗出嚟，進入完全瘋癲狀態，希望佢著陸後可以回復正常......

我倆安全著陸，經過呢次，我突然發現，我可能會夠膽玩 Sky Walk 嗰個 Zip Wire~
水就是這樣吹的，而家講乜都得啦~ XDDD

著陸點~

講返屎塔，世事往往事與願違，佢著陸之後，並沒有即時回復正常，佢竟然，竟然會買工作人員為佢影嘅相！我諗佢真係痴Q咗線！
認識佢咁耐，佢係從來都唔會買類似嘅嘢嘅，因為佢知道最終只會變成垃圾(後記：的確已變成垃圾......)

買完相就喺度等 David 飛過嚟，而且亦一如所料，有買到相......

搞掂晒之後，就諗住租單車，環島遊咁啦，周圍望都唔見有出租單車嘅舖頭，好唔容易先搵到水牌睇吓，完來出租單車嘅舖頭係島嘅中心......

而家先朝早十點，其實我哋都算早嚟吖，不過嚟到呢度，已經好多人，成島都係人，我諗再晏啲嚟真係針都插唔入~

行到去租單車嘅地方，原來有電動車、四人車、二人車同單車，真係咩選擇都有~
我哋有考慮過租電動車，不過屎塔嫌貴，亦危險，始終島上有好多位係可以一飛衝......落河，所以都係打消念頭~

由於呢度真係勁多人，而且而家咁早，相信短時間內，嚟嘅人會多過走嘅人，即係島上面會越嚟越多人，四人車似乎唔係咁合適~

三條友一人一架單車？嗯......如果我同屎塔踩二人單車，David 自己一架又點呢？
就咁話啦，反正未踩過二人單車~

二人單車到手，奶嘢，完全搞唔掂~ XDDD
一對號稱史上最冇默契嘅夫妻，點可能搞得掂呢部車~ XDDD
超難控制，超冇平衡，點解人哋踩得咁輕鬆，我踩單車技術真係咁不濟？一定係俾人拖累！

踩咗一陣，我終於知點解咁難踩！
部車到手後我都冇理過啲波段，原來個波段喺超高波，就好似私家車用六波起步，行到都算係咁~ XDDD
我將佢調教一吓，嘩，脫胎換骨，順晒！
不過順晒還順晒，其實都唔係幾好踩，下次都係咪搞~

呢個時候嘅南怡島，冇櫻花，冇楓葉，冇銀杏，冇雪，係全年最唔吸引嘅時份，冇計啦，要就 David 啲假，唯有將就吓~

行完就搭返船過對岸碼頭~

下一站係「貓頭鷹博物館」
屎塔對貓頭鷹情有獨鍾，知道首爾有貓頭鷹博物館，盡量都會將佢放入行程~
不過如果搭車去貓頭鷹博物館都幾吊腳，左就右就，終於俾我就到，返首爾交車前去一去，fit 晒！

去到附近，唔知咩事，超多人，超多人即係超多車，唔單只私家車多，仲有好多旅遊巴，今日一定係有啲嘢~
原本諗住泊街邊嘅收費停車位，不過咁嘅環境，點可能有位吖~
咁我見收費位對面都泊滿車，又咁啱俾我見到有車走，唯有有樣學樣，泊咗嗰個位~
其實我見有好幾部車，車頭都攝咗紙仔，不過全韓文字，唔知咩嚟，收費單？告票？
唔理喇，附近完全搵唔到位停，都冇計~

貓頭鷹博物館門口~

貓頭鷹博物館好細，燈光昏暗~
館內只有一位老伯，態度和善~
入場包一杯飲品，都係啲普通飲品，冇特別的~

展品方面，以貓頭鷹為主題嚟講，算係非常多~
種類包羅萬有，吊燈、皮革、手飾、地毯等等，非常豐富~
可惜館內只有一角准許攝影，唔知點解有咁嘅規矩~

老伯准許我哋影杯墊~

街外車多人多，非常熱鬧，但喺大街轉角嘅呢間博物館，就人影都冇隻，加上昏暗嘅燈光，一位老伯，感覺孤單~

返返車，幸好車頭沒有被攝紙仔~

下一站係「KT(租車公司)」
今日下午同聽日都喺首爾，唔揸車喇，搭鐵路仲方便~

還車時，佢話我哋早咗交車(我本身預鬆咗，費事遲交車要罰錢)，退返 7200 韓圜~
咁又幾好喎，真係意外收鑊~
不過手續上就要取消之前嘅交易，從新做過~

搞完晒手續，我就同佢講咗我衝閘嘅事~
由於溝通有啲唔太順利，要解釋一件少少複雜嘅事，實在係有啲困難，都花咗唔少時間~
最後佢都明白發生咩事，仲根據張閘飛上面嘅電話打咗過去，經過一輪相當時間嘅溝通，終於，佢話俾我知已經冇問題~
好囉！放下心頭大石，仲諗住要罰錢添！
罰錢固然係憂慮之一，呢啲嘢可以罰好多錢，但更重要嘅係會唔會背上啲咩大責任，例如刑事罪行~
每個國家嘅法例都唔一樣，喺香港衝閘，唔係好大嘅一件事，但喺第二個國家就未必一樣~
不過呢次事件其實好難避免，我唔敢講我唔會再犯......

下一站係「Thanks Nature Cafe」
綿羊 cafe，又幾特別，就去睇吓~

我哋今晚嘅住宿，同之前攞車前一晚嘅一樣，所以而家還咗車，行一分鐘到就可以 check-in 咗先，放低行李先再出去~

去到 cafe，原來只係喺 cafe 門外有個圍欄欄住兩隻羊仔，同我自己嘅想像，有啲出入~

飲品食物還不錯~

其中有一小碗，內有三件雪白嘅東西，唔知咩嚟，我分咗一件俾 David，佢咬咗一口之後，話唔知咩嚟，只係知道咬唔開，好似碗布咁~
其實喺我夾俾佢嘅時候，都覺得質感有啲怪怪地，實實地，又有啲彈性，汁液冇因為擠壓(夾)佢時而溢出，而且雪白非常~

不過當 David 話咬唔開嘅時候，我知道係咩嚟喇，佢其實係一塊抹手布...... XDDDDDDDDDDDDDDDDDDDD
當 David 話好似食緊碗布而仲未知道佢真係一塊布嘅時候，我同屎塔笑到想衝出門口，費時影響到其他顧客，但係我哋實在笑到郁唔到，全身肌肉都唔受控制，只有不停嘅抽搐~XDDDDDDDDDDDDDDDDDDDD

XDDDDDDDDDDDDDDDDDDDDDDDDDDDDDDDDDDDDDDDD

真係差點命喪首爾~ XDDDDDDDDDDDDDDDDDDDD

睇唔出係一塊布真係唔出奇，因為佢真係整得幾唔似一塊布，而且係同啲食物一齊上檯，不過咬咗一口，覺得似碗布，都仲未有懷疑就......

不過返到嚟睇返啲相，原來只有一幅被 David 咬過嘅相，已被我列為不雅，不放相了~

下一站係「特麗愛 3D 美術館」
即係 3D 錯覺之類嘅美術館~

由於之前處理衝閘事情用咗唔少時間，行程上係遲咗好多~
我同屎塔其實可以唔去呢個美術館，因為之前都去過類似嘅，所以興趣不大~

而 David 對貓有啲抗拒，所以佢係唔會去之後我哋會去嘅貓 Cafe，而會自己四圍行吓~

於是我我提議早啲兵分兩路，David 自己去美術館，我同屎塔去貓 Cafe，再約個時間地點集合返~
呢個提議簡直係驚天地泣鬼神咁完美，不過千算萬算，就係算漏咗，邊個幫 David 影相？
冇計啦，一齊去美術館啦，只好今晚夜啲先返旅館~

去到美術館，我見到個職員名牌寫住 from Hong Kong，可能係 working holiday~

唔知係咪有個旅行團嚟咗，現場所聽到嘅，起碼八成都係廣東話~

呢類美術館呢，要個人走埋去配合先有效果，所以啲相，咪就係冇效果囉~

呢度除咗美術館，仲有冰雕館~

入面有條瀡滑梯~

下一站係「TOMS CAT」
貓 Cafe 一間，屎塔期待已久嘅景點~

雖然 David 就唔會入呢間 Cafe 嘅，不過我哋都一齊行到過嚟樓下，等 David 認吓環境~
Cafe 對面係 Zara，咁就好嘞，比較易認，真係要問人都方面啲~
David 會自己四圍行吓，我哋約好咗八點鐘喺 Zara 門口等，臨分開前，叫 David 喺現場影咗幾張相，又喺手機個地圖度睇返自己嘅位置，相信冇咩問題~

跟住我同屎塔就行上去 Cafe，其實除咗玻璃外牆見到 TOMS CAFE 幾個字，喺樓下至到樓梯，都完全冇呢間 Cafe 嘅介紹或指示~
行到上唔知幾多樓，終於見到，不過門口貼住個 CLOSED 嘅字喺度~
明明係營業時間之內，再望真啲，入面成間餐廳嘅廚房咁，咁，我哋相信呢個 CLOSED 係解已結業~
其實佢係結業定關門都冇關係啦，總之而家就冇得去貓 Cafe......

我即刻跑落樓，向住 David 行嘅方向，睇吓搵唔搵到佢，搵到佢就一齊去下個景點~
不過可惜，行咗幾條街都搵唔到，連頭先行經有啲街頭小食嘅街都唔見佢~
咁冇計啦，我同屎塔自己行吓街~

行吓行吓，屎塔望到啲同貓有關嘅嘢~
原來喺條橫街度有間疑似貓 Cafe 嘅嘢，就行過去睇吓~

嘿嘿，真係貓 Cafe，Cafe 名為「CatsLiving」，真係柳暗花明又一村！

玩到差唔多八點，就過返去同 David 會合~

下一站係「清溪廣場」
清溪廣場，係首爾人喜愛嘅休憩地方，睇人哋相，環境唔錯，就走過去行吓~

今晚嘅清溪廣場，唔算熱鬧，不過如果想搵個地方好悠閒咁坐吓，又的確十分不錯~

下一站係「農門家」
喺馬場洞嚟計，相信係最多香港人食過嘅燒韓牛食市~

農門家位置有啲吊腳，出咗地鐵仲要行十至十五分鐘~
而家天已經黑晒，出咗地鐵，又冇咩人，好冷清~
不過呢樣嘢我出發前都知，所以都冇咩擔心~

終於都行到去農門家所在嘅市場，光猛非常，有返啲人氣~

行入幾個舖位已經見到農門家~

我哋叫咗個套餐，貪佢咩部位都有，仲有其他前菜~

前菜仲包括生牛肝，其實對於見識少嘅我嚟講，都幾嚇人，生牛肝喎！
除咗生牛肝，仲有生牛柏葉，同埋生牛肉沙律~
不如陣間爐都唔駛開，將啲用嚟燒嘅牛肉就咁食啦......
其實食呢啲生嘅牛內臟，真係好大風險，不過我見咁多人食過，又冇聽過出事，先敢試吓~

生牛肝，其實係有份甜味，不過心理上實在過唔到自己，有啲抗拒，試過就算~
生牛柏葉，完全冇味，而且非常難！

生牛肉沙律，還好，其實係幾唔錯，不過都係食少少算~

好嘞，到主角喇~
初上嘅係牛肉卷，佢示意要喺錫紙上面煮，好快就熟~
食落係特別有牛味嘅肥牛咁，好好食！