2016.09.26 德國 (Berchtesgaden)、奧地利 (Gosau、Vorderer Gosausee、Hallstatt) (歐洲第十一天)－《瞬間看地球》Stranger's Blog

今日行程：
Berchtesgaden (貝希特斯加登)、Gosau (戈紹)、Vorderer Gosausee (前高薩湖)、Hallstatt (哈爾施塔特)

早餐旅館包埋，好簡單的，包呀火腿呀咁，不過美味~

今日第一站 Kehlsteinhaus (鷹巢別墅)
Kehlsteinhaus 係 Adolf Hitler (希特拉)嘅別墅，不過據說佢好少上嚟，唔多過十次，每次逗留唔超過 30 分鐘~

嚟到附近，跟住指示入停車場，俾埋錢先見到呢個牌~

我泊咗部車喺 P2，其實泊 P1 近好多~
不過錢都俾埋就唔郁喇，行多兩步啦~

要上 Kehlsteinhaus，就一定要搭巴士，唔可以自己揸車上~
噚日喺 Salzbergwerk 買咗 Combined-tickets 就包埋今日上 Kehlsteinhaus 嘅來回巴士~

我預計係搭 08:30 呢班車嘅，不過今朝早餐嘅提供時間比較晏，所以就晏咗嚟~
而家就搭遲一班車，08:55~

巴士車飛寫「08:55 Bus 2」，但嚟緊開 08:55 嘅巴士係「Bus 1」，咁點先，我又唔信你同時開兩班車囉......
咁就唯有上 Bus 1 問吓司機，司機話 OK，咁就照上啦~

臨開車前見有人跑住去售票處，巴士司機就好心等埋~
不過呢一等，係有後果嘅......
最後開車時間為 08:58~

司機一開車就開得好快，感覺佢有啲急，唔係單純開得快~
唔通要追返遲開咗嘅三分鐘？
好快就有答案了~

進入咗山區道路，前一段都係單線行車，初時以為上落唔同路~
行多一段路，見到前面有兩部面向我哋嘅巴士停咗喺避車處~
原來司機咁趕，係為咗夾返時間，喺呢度通過之後就到落山嘅車行~
咁相信佢哋係夾晒時間，遲咗開車，其他車就要等~
呢程車，幾乎全段都係單線雙程，所以夾啱時間係好重要~

車外風光，可以見到 Königssee (國王湖)~

落咗車之後，第一件事係要去預約落山車巴士班次，唔預約的話，就要睇運氣，睇吓幾時先有空位可以上~
本身計劃搭 10:35 呢班車離開，不過遲咗一班車上嚟，就預約返遲一班車離開，預約咗 11:00~

巴士站呢度，係一個平台，風景相當不錯~

我嘅現在地點係巴士站平台，上面就係別墅~

由巴士站上別墅，有兩個方法：
1. 搭升降機
2. 步行

Kehlsteinhaus 其中一樣著名嘅地方，就係佢部升降機，用黃銅營造金光閃閃嘅感覺，所以點都要搭一次，我哋就搭升降機上~
要搭升降機，首先要通過一條由花崗岩造成嘅隧道，呢條隧道，長年冇陽光照射到，感覺極為潮濕~

升降機內禁止攝影，以下相片來自官網~
實際上，望落嘅顏色並沒有相片看上去咁金色，唔知係本身係咁定還是經過歲月嘅摧殘變成咁~

經過 41 秒就可以上到距巴士站平台 124 米嘅山頂~
別墅而家變咗做餐廳~

由於別墅變咗做餐廳，別墅本身已經唔係焦點，反而係步行上前方嘅山頭，睇吓風景~

呢邊山頭有好多嶙峋怪石，中間仲有行人步道~

呢條路我真係唔敢行......

由呢度落，就可以去到奧地利，感覺好牙煙，真係不敢想像！

由山頭呢邊回望過去別墅，風景一流！

回程唔搭升降機喇，步行~

行行吓見到個觀景台~

屎塔每次去旅行，都有一個同樣嘅挑戰，就係喺旅程中唔好仆街，今次，佢挑戰失敗......
佢行到落觀景台時，踢到地上面凸出嘅石，失重心向前傾，下意識雙腳再跑多幾步，救唔返重心不特止，仲因為佢跑呢幾步，令佢跌得更傷~
喺跌落地之時，潛意識要保護部相機，所以冇用雙手撐地嚟減低身體嘅傷害~
佢平時仆完街會笑，但今次冇，面露痛苦表情，我走到佢身邊都唔敢扶佢起身，怕整親佢~
期時本已離開嘅三位男士回頭想幫忙，不過屎塔話佢冇乜嘢，係撞落地嗰吓痛啲啫，等痛楚過咗其實還好~
我慢慢扶佢起身，觀察吓佢身上嘅傷痕，主要都係手腳擦損，有流血，筋骨嗰啲佢話冇嘢~
用水清理咗傷口之後再休息吓，似乎好返好多了~
跟住睇吓部相機，鏡頭前面濾鏡邊崩咗，但唔影響運作~

喺咁嘅地面衝住仆街，佢絕對只算輕傷~

觀景台嘅風景~

繼續落~

落到巴士站，嚟緊嗰班車係 10:35，就睇吓有冇位同可唔可以早啲上車~
最後我哋搭 10:35 呢班車落山~

下一站閒逛 Gosau (戈紹)
Gosau 係我去下一個地方會途經嘅地方，覺得幾靚，所以順道遊覽~

沿途風景~

Gosau (戈紹)

下一站 Vorderer Gosausee (前高薩湖)

沿途風景~

泊好車後，有幾個講國語嘅人問我哋想去個湖度應該點行~
我同佢哋講我都係第一次嚟，唔肯定，我估應該係行嗰邊(我指著某方)~
其實嗰邊係湖嘅方向，亦見有似路非路嘅地方，所以覺得應該冇錯~
好彩冇估錯~

由於大家都係環湖遊，所以會有互相超越嘅情況，碰面時都會傾吓偈~
佢哋一行五人，來自台灣，由捷克開始玩，自駕遊，玩到今日係第 30 日~
非常令人羨慕，真希望我同屎塔都可以無憂無慮咁暢遊歐洲一個甚至幾個月~

之後其中一人，知道我哋今晚會到 Hallstatt (哈爾施塔特)過夜，即時向我哋展示咗一張相，係金黃色嘅 Hallstatt (哈爾施塔特)，佢叫我哋聽朝七點鐘去影就影到~
好，就跟你指示去做！

去程時多雲，冇乜太陽，否則 Vorderer Gosausee 又係一處無敵美景，遠處仲有小雪山襯托~
幸好回程時有少少太陽，不至於全程灰暗~

計劃行程時冇為意呢度可以坐纜車上高啲嘅地方欣賞風景，嚟到先至知~
但喺湖邊坐纜車上去欣賞風景，實在太吸引，唔理咁多，照上，行程嘅嘢，之後再度過~

買飛時，我見到有「Dachstein」呢個字，而我聽日係會去 Dachstein Salzkammergut，依我呢幾日買嘅飛嚟睇，呢邊興 Combined Ticket，於是我就問吓售票處個伯伯，會唔會有呢兩個地方嘅 Combined Ticket~
伯伯解釋得極詳盡，但可惜唔係答緊我問嘅嘢......
佢咁用心解釋俾我聽，費事打斷佢啦~

期間佢提到，今明兩日，冇巴士過 Dachstein Salzkammergut~
不過佢知道我自駕之後，就即時為我哋高興起嚟話 Perfect！
當佢知道我來自香港，佢即刻話佢好多年前去過香港，上過山頂睇夜景~
跟住又話幾年前去過台灣，感覺都幾好~

聽佢講完，已經錯過咗一班車，要等多三個字......
而我，仲未得到我想要嘅答案，不過當然，我唔敢再問喇，否則下一班車都上唔到......

決定搭纜車上嚟係非常正確，喺纜車睇到嘅景，同環湖遊係好唔同，各有各美~

不過睇完佢本小冊子，都唔係好睇到邊個位睇風景靚啲~
咁唯有周圍行吓先，睇吓會唔會有指示~

上面呢度完全冇指示，搵到最好嘅景觀只係咁樣~

於是我哋折返車站，搵職員問吓邊度睇風景好啲~
對方俾咗兩個地方我哋，其中一個我哋頭先去過喇~
另一個，要行 20 分鐘，來回就 40 分鐘，而且時間嘅嘢，話唔埋嘅~
如果照去嘅話，我下一個行程都幾受影響，但一場上到嚟，唔係唔行埋佢下嘛~
唔理喇，照行，之後嘅嘢之後再算~

山頭四圍都整路，好爛，而本身有嘅道路，絕對唔係觀景路線，極其量只係通道而已~
我感覺上嚟呢度，根本就冇乜景好睇，只係我一廂情願以為搭得纜車上山，一定有靚景睇~
我依照嗰個人教嘅方向行，直至行到盡頭，都冇嘢睇~

期間仲行咗段非常斜又全部係沙石嘅路，著住對普通波鞋係絕對應付唔到呢啲路，每步都要踏穩先可以行第二步~
上都咁難，落唔知點算......

最後我哋搵咗條喺草地間似路非路嘅路，個景叫做好少少啦~

原來呢度海拔都有 1550 米~

到落返嗰條好斜嘅沙石路，有時踏前一步係會跣半個鞋位~
但都冇辦法，只好慢慢逐步逐步落~
好彩最後有驚無險~

呢張相，正正喺纜車側邊，上車前影嘅~
如果冇咗棵樹，呢度已經係最好風景嘅位置~

但係邊有咁多如果吖，就算真係冇咗棵樹，呢個位置都絕對唔可以逗留~
我哋都只係行埋去，舉機，撳掣，就走入車廂，過程可能只係兩秒~

搭返纜車落山~

今次上山，風景並沒有令我哋覺得很滿意，但絕對無後悔上咗去，至少喺纜車睇到嘅風景係非常好~

下一站 Hallstatt (哈爾施塔特) 及 Beinhaus (骨頭屋)
Hallstatt 被譽為全歐洲甚至係全世界最美小鎮~

沿途風景~

時間比計劃遲咗好多，去到旅館 check-in 完就立刻動身行去 Beinhaus (骨頭屋)~

沿途風景~
就呢一少段路，見到嘅多數都係亞洲遊客~

Beinhaus (骨頭屋)

喺現場我見唔到禁止攝影嘅告示，但直覺話俾我知，呢啲地方，通常唔俾影相~
於是我就喺買飛嘅時候問吓對方，對方話可以~
不過我都係覺得唔適宜貼太多相，就貼兩張吧~

入場時會派一張簡介，離開時要交回，內容大概如下：
此骨頭屋在 12 世紀已經存在，直至現在約存放了 1200 個頭骨，全標有死亡日期。
由於存放屍體的墓地有限，所以埋入地下的屍體，約 10 至 15 年，就會被取出頭骨及股骨，處理過後放在這裡。
由 1720 年開始，藝術家用象徵墓地裝飾的花環來描繪，以表達人們對逝去的親人的敬愛。
離我們年代最近的頭骨是 1995 年存放在此，這位女士死於 1983 年，將頭骨擺放在此是她的個人願望。
今天當然不再需要為了節省空間而將骨頭從墳墓裡拿出來，因為今天大部份已採取火化的方式。
現在，希望將自己的骨頭放在這裡的想法是很少的，但如有這樣想法的人，死前寫下遺囑，在死後 10 年，便會有相關人士作出安排。

Beinhaus 比行車路高，望出去風景都唔錯~