《瞬間看地球》Stranger's Blog

今日行程：

Day 01：日產租車 → 一蘭 → 海峽 Dramaship → 火の山展望台 → BEAR FRUITS → 閒逛門司港 (宿：豊後高田市)

喺香港機場呢邊，一切都好順利，亦準時起飛，唯獨要提一提係降落問題，真係俾佢嚇親，觸地時發出一聲巨響，機身震盪力達到有機會扭傷頸嘅程度~
唔知係環境問題定咩問題嘞~

嚟到福岡機場，正在落緊大雨，心情都隨之而冷了一截~

去到入境大堂，嘩，咁鬼多人嘅！
可能咁啱有幾班機一齊到，我聽到前面嘅人一般都係講韓文~

今日第一站係「日產租車」
經中介 book 車，有幾間租車公司同日產嘅價係差唔多，咁我梗係揀日產啦，話晒係大公司~

順利入境，攞埋行李，呢刻我心入面一片茫然，我完全唔知點去日產租車！
呢排實在太忙，我連去旅行嘅嘢都係最尾一刻先搞掂，至於去日產租車嘅方法，我應該係潛意識知道屎塔去過，佢會帶我去，所以我忽略咗，正路我係唔會依賴佢嘅~

點都好，屎塔開始發功，開始帶路，不過睇見佢不太確定嘅思緒，我都有啲擔心......
最後喺佢半靠記憶，半靠指示嘅情況下搵到去國內線嘅穿梭巴士~
由於喺坐車中途已經見到日產租車嘅所在地，所以一落車已經有個明確方向，不過落緊大雨，拖住個篋，真係有啲狼狽~
 

入到日產租車，對方一聽到我哋講英文，已經噏出咗我個名，咁就掂晒啦！
佢即場 sell 我買無償保，唔知係我 book 車時大意睇漏眼定上網經中介冇得 book 無償保，正路我見到有都會 book 埋，仲以為冇添~
計過數，八日只係俾多二百幾港幣，唔駛諗，要！
我喺沖繩租車都買過無償保，直情車身都唔駛驗，因為還車時有花都唔會要我賠，但係呢度就一樣要驗，原因就唔清楚~
由於我係經中介 book 車，冇得指定車款，只可以指定類別，所以事前我係唔知佢俾咩車我嘅，今次俾我嘅係 Nissan Note~

開咗車，離開咗日產租車先醒起，之前喺網上面訂咗 KEP，忘了問有冇加埋入 ETC 度......
不過就算冇加問題都唔大嘅，我計過買同唔買 KEP，都唔差太多，冇都冇所謂嘅~

下一站係「一蘭」
我喺香港冇食過一蘭，嚟到九州，點都要試吓嘅~
今次去嘅呢間分店喺糟屋郡，主要係因為我去門司港中途會經過~

一蘭停車場~
 

嚟到一蘭嘅停車場，見到有啲位係俾指定人仕停泊嘅，我哋自然唔會泊入去，不過其實單憑圖示，我哋都唔能夠百份百明白當中含義~
圖中有輪椅圖示，當然明白啦，但女仕呢？究竟呢個女仕嘅圖示，需唔需要夾埋輪椅去用呢？
咁我估就梗係唔需要啦，但係如果唔需要，又係咪所有女仕都可以泊呢？其實又冇理由吖......
最後我哋估計，女仕嘅圖示，可能係代表懷孕嘅婦女~
 

入到一蘭，有兩部購票機，我哋大鄉里，都研究咗一陣先買好兩碗麵，好彩後面冇人等啫~
 

跟住有職員見到我哋，就諗住帶位，不過我哋一開口講英文，對方先是一呆，然後有點不知所措~
跟住就帶咗我哋入一間房，其實所謂房，只係間隔，一邊係入口，一邊與廚房相連，以木製小窗口相隔~
 

坐低咗之後，廚房嗰邊有人開咗隻木窗，俾咗啲紙仔我哋，英文版嚟嘅，上面係俾我哋揀麵嘅軟硬度、湯嘅濃淡度、辣度等等~
我哋揀好晒就俾返佢~

等咗一陣，啲麵上檯喇，睇落真係好吸引，好似好好食咁！
食一注麵，喝一啖湯，真係好味，正！
碟豬肉都好香~
不過隻蛋就唔係流心嘅，唔知係我哋唔識叫，定係一蘭嘅蛋唔興做流心呢~
我同屎塔揀嘅麵質相差一級，真係食得出有分別，好嘢！
 

下一站係「海峽 Dramaship」
海峽 Dramaship 有一層係布置成舊日本街嘅場景，呢啲嘢屎塔好鍾意，趁住嚟開門司港，所以就決定去睇吓~

海峽 Dramaship
 

嚟到海峽 Dramaship，買咗飛先醒起，參觀舊日本街場景，係免費嘅，收費嘅部份係我唔打算參觀的！
唉，十吓十吓咁，冇理由要求退票咁搞笑咖，人哋都未必退啦，冇計啦，唯有行埋收費嘅部份~
不過呢，錯有錯著嘅，因為出面仍然落住大雨，由落機到而家都未停過，基本上都唔太想出去閒逛，咁花多啲時間喺呢度就啱晒啦~

我哋跟住指示，先行咗收費嘅部份~
收費部份係禁止攝影的~
呢度樓高五層，我哋首先進入嘅一個中心廣場，廣場邊係一條斜路迴廊，能夠通往各層，可以想像到，上一層要行差唔多一個圈先上到~
我哋進入呢個所謂廣場之前，工作人員好熱心咁提我哋嚟緊幾點有表演睇~

上到其中一層，展示嘅係一啲古代、中世、近世、近代嘅歷史場景，人物造型唔算精細，反而服飾方面就造得幾好，成個展館都幾好睇~

又上到唔知邊層，向海一邊嘅係落地大玻璃，美景盡入眼簾~
落地玻璃加海景，固然係美景嘅保証，更令人覺得靚嘅係，呢度嘅弧形設計，同出面嘅環境係夾得天衣無縫，渾然天成，令成個觀景更加靚，絕非普通室內觀景台可比~
不過上到嚟嘅呢刻，距離表演仲有五分鐘，我哋決定落去睇表演先~

由於上嚟嘅時候都有啲迂迴，亦因為時間緊迫，所以我哋直接問在場職員點樣返落地下睇表演，佢即刻帶我哋去一部隱蔽嘅 lift，幫我哋撳埋樓層，非常好嘅服務態度~

落到地下睇表演嗰度，即刻有個人嚟接我哋，可能因為個表演即將開始，廣場亦只得漆黑一片，相信表演應該隨時會開始~

由我哋入嚟呢個展覽館至而家，係冇見過職員以外嘅人，直至我哋坐低咗，至見到有四個人(兩對男女)喺迴廊上面~

表演呢，只係喺一個球形物體上面播影片，由於係講日文嘅，我哋自然係聽唔明，諗住睇吓動畫，都應該知佢想講咩嘅，不過可惜，到最後都唔知佢想表達啲咩，只係有個河童喺度走嚟走去，好悶......
早知就唔趕落嚟睇表演，留返喺上面欣賞吓美景啦~

悶咗幾個字，我哋諗住返返上去，由於之前係搭 lift 落嚟嘅，於是我哋就諗住搭返 lift 上去~
一心以為頭先嗰度係五樓，點知上到五樓先知唔係嗰度，五樓都有觀景台，不過係露天嘅，雖然而家好鬼大雨，不過一場嚟到，都想出一出去睇吓嘅~
 

好嘞，望吓四周圍，頭先嗰度應該係四樓，咁啱我哋見到有樓梯，就諗住落一層，點知，條樓梯只通往二樓......
喺二樓，見到有啲小冊子，見到有介紹觀景台，我哋就攞住呢張相，問職員點去，職員就帶我哋行過另一邊，到咗......
原來小冊子個觀景台喺二樓，唔係我哋想去嗰個......
 

由於溝通方面實在係有好大困難，我哋都唔想再問，費事煩住晒，我哋見到部 lift，就搭上四樓睇吓~
上到四樓，完全唔係嗰回事，唉，放棄喇~
諗住搭 lift 快靚正，唔駛行迴廊不停轉圈先上到去，點知去極都去唔到，唉，咁正嘅景觀，無緣喇......

時間無多，我哋而家一定要去咗舊街嗰邊先，即係原本嚟呢度嘅目的~

穿過舊街入口，我唔知點解會向後望，就係因為呢一吓向後望，就望到喺入口頂呢度，有介紹我哋去極都去唔到嘅觀景檯，原本諗住行完舊街就揸住幅相問人，不過我哋好快就清醒，而家呢個時間，連行舊街都只係僅僅夠時間，邊有可能返得返上去吖，算罷......
 

舊街呢度，不如想像般嘅場景，沒有那種懷舊嘅味道，有點失望~
 

忍受著橫風橫雨影咗幾張相~
 

下一站係「火の山展望台」
可以望到門司港同関門橋，夜景不錯的~

原先計劃行吓門司港嘅，不過到離開海峽 Dramaship 呢刻，仍然落著大雨，唔行啦~
其實我哋心知咁嘅天氣，就算上到火の山展望台，都應該冇嘢睇，不過而家真係冇地方去，又未到食飯時間，不如上去視察吓環境，睇吓有冇奇蹟，就算冇，都叫做嚟過，知道個環境係點，對下次再嚟都有少少幫助~

去到上山嗰條路，一架車都冇，行行吓見到閘口，仲以為唔俾上添，望真啲，應該冇問題~
 

我哋懷住肯定冇嘢睇嘅心情，終於到達山頂，一如所料啦，成個可見範圍都被濃霧包圍，乜都睇唔到~
 

下一站係「BEAR FRUITS」
上戶彩推介嘅咖哩飯~

落到 BEAR FRUITS，附近都唔見有停車場，就諗住周圍兜吓先~
兜吓兜吓都唔係好對路，於是就打算搵個地方停低睇吓 GPS，不過一路上後面都有車，唔敢行得太慢，更加唔敢隨意停低，點知去到某便利店停車場時，已經離開 BEAR FRUITS 好遠了~

我哋利用 GPS 搵吓啲停車場喺邊，不過呢，唔知係咪我哋唔識用，當你想佢顯示停車場位置時，佢做唔到導航；當你想佢導航時，佢又唔會顯示途經嘅停車場~
咁冇計啦，唯有認定一個停車場再叫佢帶我哋去~
去到附近，見到有個停車場，見近近地，唔諗咁多，就泊呢個~

呢種停車場(地下有塊鐵板升起嗰種)，喺我出發前都有 search 過，睇吓有冇人教點用，不過唔係好搵到，都唔緊要，我相信摸吓摸吓總會搞得掂~
我哋泊好車，記住車位編號，再走去部機度，撳車位編號，佢自然有張單出~
之前聽過人哋話要將張單放喺車頭，不過我見現場兩部車都冇放，所以我都冇咁做~
但係問題嚟喇，點解塊鐵板冇升起嘅？係咪我哋有啲咩做漏咗呢？
咁啱有位女仕嚟攞車，我哋就問吓佢，不過對方完全聽唔明英文，於是我就指一指塊鐵板，頂，呢一刻塊鐵板已經升起咗......
不過呢位女仕好有心，佢走埋部機度又指又講嘢，再去另一邊有講細則嘅牌度又指又講，其實只要塊鐵板升起咗，我哋就已經冇其他問題~
咁人哋咁有心，我哋仍然用心聆聽同俾反應，直至佢講完為止~
 

泊好車就行過去 BEAR FRUITS~
 

BEAR FRUITS 坐位唔多，客人亦少，可能因為雨天關係吧~
 

睇完 menu，諗住叫一個普通咖喱飯，一個牛肉咖喱飯，點知佢話牛肉賣晒~
咁冇計啦，最後點咗一個咖喱飯餐，一個咖喱飯單叫~
餐跟湯、沙律、飲品~
 

咖喱飯上檯時仍然係沸騰狀態，非常熱，但係中間隻蛋嘅蛋黃仍然呈半生狀態，好嘢！
成兜嘢就只有咖喱、蛋同飯，個咖喱完全係主角嚟，由第一口至最尾一口，都充滿住咖喱嘅香味，非常不錯！
不過我自己就略嫌單調，如果可以食到咖喱牛肉飯，可能會更好~
 

下一站係「閒逛門司港」
本來呢，就係晏晝行嘅，不過成個晏晝都落大雨，冇心機行~
直至食完飯嘅時候，見到冇乜雨，所以就行咗陣，但其實咁夜都冇咩好行~
就連門司港車站都裝修緊，落晒圍板，想參觀吓車站外觀都冇機會~
 

最後我哋見到某處燈火通明，有啲舖頭仔行吓，於是就去行咗陣，不過人哋都就收工，所以都唔係行咗好耐~
 

門司港隨影~
 

行完諗住攞車走人，又落大雨，希望今日落晒佢，聽日好天啲啦~

攞車手續都好簡單，喺部機度撳返個編號，俾錢就搞掂~

揸咗差唔多兩個鐘車就到酒店，完結今日行程~