《瞬間看地球》Stranger's Blog

我自己對九州係一啲概念都冇嘅，亦都一直冇諗過去九州~

本來冇計劃今年再去旅行，咁啱今年六月，屎塔嘅公司旅行去九州，去咗幾日，冇我份嘅~

講吓講吓，不如年尾都去一次旅行吖，又講吓講吓，不如去九州睇紅葉吖，點知講吓講吓就成事~

上次去京都睇紅葉，係我第一次睇紅葉，真係好靚，深深被紅葉吸引，我自己就好鍾意~

所以對今次去九州睇紅葉非常雀躍~

睇吓啲資料，原來九州睇紅葉嘅地方非常多，真係正！

本來個行程係由福岡過大分再落熊本宮崎，最後去埋鹿兒島，唔去長崎同佐賀住~
不過後期知道櫻島火山爆發，相信短時間內都唔可以入島，所以就決定只落到熊本(加少少宮崎)，之後搭汽車渡輪過島原再過長崎，向上往佐賀同福岡~
不過有一樣嘢幾可惜，就係當我哋決定轉去長崎時，諗住去端島(軍艦島)，點知想訂位時已經太遲，成個星期都訂滿晒，冇計~
又，出發前大約一個月，阿蘇火山又爆，可能到時都係上唔到阿蘇火山，睇吓有冇運啦~

今次搭香港航空來回福岡，希望冇咩問題啦~

出發前定好嘅行程：
Day 01：日產租車 → 一蘭 → 海峽 Dramaship → 閒逛門司港 → 火の山展望台 → BEAR FRUITS (宿：豊後高田市)

Day 02：田染荘 → 昭和の町 → 九州自然動物公園 → 地獄めぐり → 溫泉水蒸氣瞭望台 → 鶴見岳展望台 → 酒店 → グリルみつば (宿：別府)

Day 03：金鱗湖 → 閒逛由布院 → B-Speak → 九重夢大吊橋 → 九醉溪展望所 → 鍋瀑布 → 大觀峰 (宿：阿蘇)

Day 04：天空之道 → 草千里 → 阿蘇火山博物館 → 白川水源 → 原尻瀑布 → 用作公園 → 岡城阯(如有時間) (宿：豊後大野市)

Day 05：稻積水中鍾乳洞 → 高千穗峽 → Tokyu Hands → 勝烈亭 (宿：熊本)

Day 06：熊本城 → 黑亭 → 搭汽車渡輪過島原 → 仁田峠展望所 → 雲仙地獄 → 稻佐山 → 草花洛 (宿：長崎)

Day 07：原爆落下中心地碑 → 長崎原爆資料館 → 御船山樂園 → 祐徳稲荷神社 → 東与賀海岸シチメンソウ群生地 → 柳川白秋道路 → 若松屋 (宿：鳥栖)

Day 08：大興善寺 → 秋月城跡 → 光明禪寺 → 猫カフェ NYAON → 日產租車

出發！