今日主要景點:
Barcelona
Basílica de la Sagrada Família (聖家教堂)
Hospital de la Santa Creu i Sant Pau (聖十字及聖保祿醫院)
Mirador de Colom (哥倫布紀念塔)
Salamanca (餐廳)
早餐都係食 hostel 包嘅,仍然係食果啲嘢~
今日第一站係 Basílica de la Sagrada Família (聖家教堂)
Sagrada Família 由 Antoni Gaudi 設計,於 1882 年開始興建,直至現時還未建好,佢係現時唯一一座還未建好就已經被列入世界遺產嘅建築物~
原來興建呢座教堂嘅資金係來自捐獻,所以建造進度要視乎資金而定,唔怪得起極都未起好啦~
酒店距 Sagrada Família 約 20 分鐘步程,我都係鍾意行多啲,就行過去,唔搭 metro 喇~
途經呢座嘢,唔知咩嚟~
到咗 Sagrada Família 未夠九點,仲未開門,門外有兩條龍,兩條龍都有約五十人~
入口有指示,原來一條係排隊買飛,一條係已經有飛,只係等入場~
到咗九點,條龍開始郁,郁得比想像中快,好快就買到飛,另外,搭 lift 上去塔上面,係要另外收費嘅~
入到去教堂入面,怕晏啲會有好多人上塔上面,所以就上去先~
由於唔係好知道邊部 lift 係,於是就問啲職員啦~
好彩我哋有早啲上去嘅諗法,因為我哋一問職員,佢要求我哋俾張飛佢睇,原來飛上面有晒資料,指定邊部 lift上(唔止一部),同咩時段上~
賣飛嘅冇同我哋講,當然,自己都有責任,冇睇清楚張飛,真係好彩~
咁嘅措施都幾好,可以有效控制人流,唔會有太多人同一時間上去~
周圍都係建築器材~
塔裡面係咁嘅~
塔上面嘅樓梯都幾窄,現場有晒告示說明唔准向上行,但偏偏就係有人唔聽~
塔上面嘅風景~
落返地下嘅旋轉樓梯,有啲危險,要好小心咁行~
教堂嘅內部真係設計得好特別,好靚,真係嘆為觀止~
行到某一個角落,有兩位職員企喺門口,一左一右,行緊埋去嘅時候,見到佢哋阻止緊一位女士進入,從佢哋嘅身體語言,似係因為該位女士著住條短褲,所以唔俾入~
我哋又冇戴帽,又冇著背心,又冇著涼鞋,又冇著短褲,諗住冇問題啦,點知都係唔俾入,原因係:prayers only
其實我覺得,佢應讓問一吓我哋係唔係 prayer 先,而唔係從外表去斷定我哋唔係 prayer,雖然都九乘九肯定,但我覺得呢個係一個禮貌問題~
再講,佢都有放啲擺明係遊客嘅西方人士入去......
不過我只會咁諗,講明 prayers only,我哋又唔係 prayer,亦都無謂入去騷擾人,不過可以裝吓~ XDDD
行完就坐低再靜心欣賞吓~
下圖中可見到分咗兩個區域,呢兩個區域都有唔同嘅規矩,但我就唔見有告示說明~
圖底果一個區域,唔容許有人站著不動,一定要坐低,想影相都一定要坐低~
再入啲嘅區域,唔容許有人站著不動,一定要坐低,並且唔可以影相,坐低影都唔得~
由於冇告示嘅關係,每次見到有人違規(其實當事人都唔知自己違規),職員都需要上前阻止~
差唔多每一個入嚟嘅人都會影相,更加有人企定定喺條通道度影相,其實,點解唔整個告示牌呢?要人肉咁對每一個人去解說~
我相信呢個世界,多數嘅遊客都好守規矩嘅,戙個牌喺度,就唔駛搞到個個入嚟嘅人都好似做錯事咁,要被勸止~
我哋坐咗喺度足有半個小時,完全唔知為咩,今日行程先啱啱開始,肯定唔係因為攰而不願離開~
我相信,我哋都被呢度嘅氣氛深深咁吸引住,所以坐咗半個鐘都唔願走~
坐夠就行埋個博物館~
離開咗 Sagrada Família,經過條街見到好多嘢食,又求其咁搵咗間嚟醫肚~
我自己最鍾意就係咁,唔需要餐餐定好晒去邊度食,去到求其衝入去,就算唔好食都唔緊要,一樣咁開心~
我煞有介事咁講唔好食都一樣咁開心,就係因為呢餐真係唔好食~
Falafel en Plat
同 menu 果樣好有出入,貎似曲奇果啲又粉粉地,食完都唔知咩嚟,薯條變咗薯仔,總之就唔好食啦~
Lasaña Vegetal
食得多肉醬千層麵,試吓呢個有波菜同洋蔥嘅千層麵,味道一般,可以啦~
不過西班牙消費真係平啲,上面兩樣嘢加埋唔駛 EUR13,唔好話法國或者瑞士,就連意大利都冇咁平~
下一站係 Hospital de la Santa Creu i Sant Pau (聖十字及聖保祿醫院)
而家望到嘅呢間醫院冇咩好長遠嘅歷史,1930 年起好,由六間小型醫院組成,一直到 2009 年都仲係用作醫院用途,而家就改建緊,將會成為一間博物館同文化中心~
但其實佢嘅前身在 1401 年已經建成,位置亦不在現址~
由呢度去 Hospital de la Santa Creu i Sant Pau,約十分鐘步程,一直沿住行人步道,非常舒適~
Hospital de la Santa Creu i Sant Pau
正面嘅閘係鎖住嘅,行去左邊睇吓,又冇位入,行去右邊睇吓,就見到有個 poster 指住有個展覽嘅入口~
我哋跟住去睇吓,去到展覽室嘅入口就見到更多部份嘅醫院範圍~
不過四圍都有工程做緊,可能因為咁而暫不開放~
我哋見個展覽係免費入場,就入去睇吓~
不過就真係冇咩好睇,好快就行返出嚟~
出返嚟搵個位坐低計劃吓行程,張地圖突然有一點水,再等多陣又有第二點,有冇搞錯,個天咁光咁藍都落雨,真係估你唔到~
不過睇佢個款都唔會落得大同耐,我哋都係慢慢執好啲嘢先離開~
執好晒嘢佢就停咗雨,唔理喇,落去 metro 先~
就喺搵 metro 之際,我哋見到醫院嘅另一個出入口,呢個出入口主要係車輛嘅出入口,又走入去睇吓~
今次終於都可以入到室內嘅部份參觀~
穿過醫院,去咗另一邊出入口,睇咗陣地圖都唔知自己喺邊度,唔理喇,邊行邊搵~
行咗幾條街都唔見 metro 站,去咗間花舖問人~
花舖門口有隻狗,我哋行埋去佢都冇反應,完全唔怕人~
終於搵到 metro 站,呢個站係 Camp de l'Arpa,睇睇 metro map,原來呢個站唔係最近醫院果個站,即係我哋都行咗好遠吓......
下一站係 Parc de la Ciutadella
原先安排今日去 Palau Güell 嘅,但噚日去咗,而家就變咗冇地方去,睇吓啲資料,睇吓可以去邊啦~
一係用盡張 Articket,邊啲冇計劃去嘅就去埋佢,不過我自己對現代藝術嘅興趣唔係好大,其實唔係好想去......
打開地圖再睇睇,突然間醒起 hostel 個位小姐,喺我哋入住果日介紹過嘅地方,有一個公園叫 Parc de la Ciutadella,我哋本身冇諗住去嘅,就去呢度啦!
根據地圖,Parc de la Ciutadella 附近仲有個凱旋門,所以我就搵最近呢個凱旋門嘅 metro 站,由凱旋門慢慢行落 Parc de la Ciutadella~
一出 metro 就見到個凱旋門~
喺呢條路上面,有人跑步,有人踩板,有人玩飛碟,一直行到尾就係 Parc de la Ciutadella~
其間有隻狗仔大戰滑板男,係咁追住個滑板男嚟吠,個滑板男都冇晒佢符,改為步行,行咗十幾米見隻狗冇跟住嚟又踩返上板,點知隻狗即刻追返上嚟又吠過,好似有仇咁~
個池有大鴨小鴨~
上去上面時遇到簽名黨,同樣都係唔理佢哋,過咗佢哋見到有兩個外籍人士落緊樓梯,我哋上到高位企喺度睇吓佢點應對果啲簽名黨~
成個情形係咁嘅,有一個簽名黨走埋去叫佢哋簽名,果兩個外籍人士不虞有詐,真係諗住幫佢哋簽,本來坐喺地果幾個簽名黨好緊張咁即刻起身,其中兩個見有其他獵物,所以冇走上嚟,另外有一個即刻上嚟增援~
果兩個外籍人士唔知係真係咁機警定只係咁蹺,兩個人嘅袋都係放身後,啲簽名黨冇機可乘,最後都冇事發生~
其實冇事發生,都唔排除同我哋有關,因為果兩個簽名黨不時向上望我哋,唔知係咪怕我哋睇到以冇落手~
其實就算有事發生,我哋都唔敢出手,因為我哋唔知背後有咩人操縱住啲簽名黨,實在太冒險~
呢個公園以前有隻白化大象喺度,不過佢喺 2004 年已經離世,現在就只有呢個象像作為紀念~
噴泉對開有間小賣店,見到有雪糕賣,梗係要幫襯吓啦~
呢個時候,坐埋一邊食雪糕,一邊欣賞風景真係一樂也~
屎塔以為係薄荷味,食落先知唔係,仲要覺得係怪味~
我呢杯,一睇就知係咩味,一睇就知好食啦!
繼續行就見到個小湖~
跟住見到有動物園,我哋諗住如果平平地都想入去睇吓~
嘩,EUR17 一個,咁鬼貴嘅,梗係唔入啦~
下一站係 Mirador de Colom (哥倫布紀念塔)
呢個塔係紀念 Christopher Columbus 第一次航海到美洲之後返回西班牙嘅地方~
佢仲係一個觀光塔,可以搭 lift 上到塔頂觀光的~
過咗動物園,一路行到底就到咗海邊,睇返 metro map,由呢度去 Mirador de Colom,搭 metro 的話唔多方便,我深信由海邊到到海邊,一定有巴士到~
睇吓啲巴士站,結果梗係有啦~
落咗巴士就已經好近 Mirador de Colom~
去到都唔見有人龍,其實係咪真係可以上咖?
咁就搵吓點上啦,行吓行吓就見到有 BCN Original Shop,我手頭上有 BCN Original Shop 九折券,就入去睇吓~
行行吓俾我哋見到呢個牌~
天呀!唔好話俾我知呢部就係上 Mirador de Colom 果部 lift 呀!
我嗱嗱聲走去問吓職員,結果,唉,連一絲希望都幻滅喇,就係呢部 lift 呀......
我又喺度諗,好唔好搭吓吊車代替上塔去欣賞吓風景,不過我印象中吊車好貴,但都諗住去搵個站睇吓先~
原來個吊車站喺好鬼遠,結果都係放棄咗呢個念頭,但係其實唔緊要,因為前日上過 Parc Güell,聽日又會上山睇風景,其實都夠啦~
跟住就到 Rambla del Mar 行吓~
行完又坐咗好耐,享受吓呢份悠閒,非常寫意~
下一站係 Salamanca (餐廳)
做功課時不停咁 search,想搵間有人推介嘅食肆食西班牙海鮮飯,選擇都幾多,不過好多都話好多人,book 咗位都要排隊咁話~
為咗就我自己嘅行程,就揀咗 Salamanca,近海邊,好似幾好~
由呢度去 Salamanca,梗係搭巴士啦,方便快捷又可以睇吓風景~
落咗車就見到個沙灘~
行幾分鐘就到 Salamanca~
可能仲係早,冇咩人,亦因為冇咩人,坐落都覺得幾凍,海邊不停有風吹埋嚟~
食物方面叫咗一個湯,同埋主角 - 西班牙海鮮飯
先上檯嘅係橄欖同埋麵包~
其實橄欖咁樣成粒食,真係唔係好合我哋胃口,我試咗一粒就冇食喇~
Sopa de Marisco receta de la Abule de Galicia
簡單啲講就係海鮮湯,最過癮嘅係,湯入面有飯粒嘅~
味道真係鮮味非常,好味!
Paella de Marisco
海鮮配料嘅海鮮飯,Menu 寫明最少要二人份~
我哋仲見到可以揀冇殼版,咁梗係貴啲啦,不過我哋冇揀度,唔係因為佢貴啲,而係食海鮮去晒殼好似唔夠滋味~
佢幫我哋分之前都有俾我哋望一望先,我硬著頭皮請佢等一等,快速走過去影咗張相~
嘩,真係好好食,好鮮味,噚日食過兩次 Paella,完全唔係呢回事,係唔同境界嘅~
不過咁,開頭食到津津有味,但食到一半,開始覺得膩,一來份量好足,二來味道比較濃,食到後半都唔係好想食,三個人食就差唔多~
之後仲送上蛋糕,話係免費嘅~
個面好甜,個芯又硬硬哋,總之就唔好食,不過人哋一番心意,又唔係多,我哋都有食晒佢~
食完甜品仲有嘢免費送上,佢送咗兩杯飲品俾我哋,我以為係酒,話俾佢知我哋唔飲酒嘅,佢話唔係酒嚟,咁是旦啦~
我聞一聞又冇咩味,細細啖咁飲少少,奶嘢!
呢杯真係有酒精嘅飲品嚟!我只係飲咗少少,半啖都冇,成個喉嚨好似著火咁,跟住仲好似有啲嘢湧上個鼻同個腦度,好彩呢種感覺只係維持咗十秒左右,我以為自己真係醉咗~
屎塔問我會唔會打佢,我好奇點解佢有此一問,佢話男人飲醉咗就會打老婆......
走嘅時候見到佢推咗盤海鮮出嚟~
返酒店都係搭巴士~
等巴士嘅地方~
留言列表