今日主要景點:
Barcelona
Montjuïc
Fundació Joan Miró (美術館)
Museu Nacional d'Art de Catalunya (博物館)
原來飲醉酒真係會打老婆......
噚晚發夢俾人搶手提電話,同賊人糾纏期間,我一拳打埋個賊度......
夢中就打個賊,現實就一拳打落屎塔個肚度......
今日第一站係 Montjuïc
Montjuïc 係一座山嘅名,上 Montjuïc,諗住睇吓風景~
成座山咁大,邊個位最有利呢?唔知係我唔識搵定點,點搵都搵唔到有人提過,旅遊書都冇講~
咁就唯有利用 google maps 去搵,睇吓邊個位好啲~
早餐都係食 hostel 包埋嘅,都係食果啲嘢,check-out 完就拎埋行李出門口,今日晏晝要過 Madrid~
由酒店去 Montjuïc,有幾種方法,最後揀咗搭 metro 到山腳再轉巴士上 Montjuïc~
仲有一個特別適合遊客嘅上山方法:吊車,不過頭班車成十點先開,而且都幾貴,所以冇揀到~
上 Montjuïc 前,先要去一去 Sants 火車站,寄存行李先~
到咗火車站先發現身上最細面額嘅紙幣係 EUR50,寄存行李果度有部有找換機,不過只接受 EUR20 或以下紙幣,即係冇用啦~
唯有去隔離麵包店買個包打散佢~
搞掂晒就搭返 metro 過 Montjuïc 山腳~
去到巴士站,竟然唔見咗 50 號呢條巴士線!
究竟係取消咗定係搬咗站呢?
我哋就喺周圍果啲巴士站度睇吓,結果搵咗附近嘅巴士站都冇,退而求其次咪睇吓有冇邊條巴士線上到 Montjuïc,但係又冇喎......
諗住喺巴士站問吓人,但係又全部都係公公婆婆,未必溝通到咖喎,唔理咁多,搵個望落最後生嘅嚟問吓~
我指住我份 notes 上面 Montjuïc 呢個字問佢點上去,佢係咁講啲我聽唔明嘅說話,又用手勢指上山方向果邊,再用兩隻手指示意步行~
婆婆,你唔係叫我行上去下嘛?其實諗諗吓,佢未必係叫我哋行上去,唔理咁多,向住佢指嘅方向行過去,去到先算~
去到婆婆指住嘅方向,一個遠處嘅一個巴士站,終於俾我哋搵到 50 號線巴士站!
講返呢個婆婆,佢嘅熱心真係打動到我,佢熱心到我一問佢就即刻企起身,面上帶住笑容不停咁講,知道我聽唔明,用盡方法去令我明白佢想講咩,我深信,如果佢唔係等緊巴士,佢一定會帶領我哋去果個巴士站度~
先前搭 metro 過嚟,已經係喺 Barcelona 嘅第十程車,即係已經用晒張 T-10,不過咁,理論上,若干時間內轉乘巴士係唔需要補錢的~
但係我又有啲擔心,論理上咋喎,唔得咁點算?上到巴士先冇飛就麻煩!
反正回程都仲要搭一次車,而家走去買一張車飛先,就算呢程巴士要再用一張飛,我都有飛用~
巴士站個螢幕顯示,嚟緊呢班車仲有 18 分鐘先到,而我估計,我只需要 10 分鐘就可以走落 metro 買飛再返返上嚟~
到我買完飛返上嚟,其實只係用咗 5 分鐘,就係呢 5 分鐘,我哋錯過咗一班車,我返到上嚟係望住架 50 號巴士駛離巴士站......
有冇搞錯,又話 18 分鐘嘅,就算唔會好準,都唔會差咁遠卦......
跟住佢又顯示下一班係 30 分鐘後,之前搵路已經嘥咗好多時間,而家仲要等多半個鐘,唉~~~
巴士站附近嘅風景~
最後等咗 9 分鐘就有車,呢個顯示牌,真係信你一成,雙目失明~
上到巴士,我用果張 T-10 入落部打票機度,部機嘅紅燈著咗,即係冇得免費轉乘啦,好彩買定張飛唧~
落咗車,好容易就行到去我心目中嘅地方,不過風景就真係一般~
下一站係 Fundació Joan Miró (美術館)
Fundació Joan Miró 係包括係 Articket 七間美術館之一,唔需要額外俾入場費~
由呢度行過去,大約要 15 分鐘步程~
館內禁止拍攝,所以都冇影到相~
撞啱同埋一大班小朋友一齊參觀,成個館都係啲小朋友嘅聲音,真係嘈到爆......
對於呢個館嘅展品,真係唔識欣賞,冇咩興趣~
下一站係 Museu Nacional d'Art de Catalunya (博物館)
Museu Nacional d'Art de Catalunya 係包括係 Articket 七間美術館之一,唔需要額外俾入場費~
由呢度行過去,大約要 10 分鐘步程~
原先諗住冇咩時間參觀呢間博物館,不過反正上到嚟,速遊一吓亦無妨~
呢度都有分幾個展館,由於時間唔太充裕,揀咗想睇嘅展館先,睇到幾多就幾多~
行到差唔多夠鐘,我同屎塔講,要走喇,否則冇時間食 lunch~
屎塔竟然同我講,不如買嘢上車食(晏啲要搭車過 Madrid),用多啲時間行吓個博物館~
我梗係同意啦,可以花多啲時間喺博物館,你要我邊行邊食都仲得,冇所謂~
到最後,只有 Art Modern 呢個展館冇時間睇~
博物館內部份展品~
遊覽完 Museu Nacional d'Art de Catalunya,就行返去 metro 站,約需 20 分鐘~
沿途風景~
呢度有個大噴水池,傍晚會有匯演,但係咪日日有就冇研究,因為我知我冇機會睇到~
離開時遇到簽名黨,有個簽名黨走埋嚟叫屎塔簽名,我哋例牌以手勢示意拒絕,今次對方同一般遇到嘅簽名黨唔同,佢問屎塔識唔識英文,屎塔繼續以手勢示意拒絕,對方同屎塔講咗句:fuck you
屎塔即時直豎中指回應,對方連續講咗幾次 fuck you,不過就冇跟住我哋,我哋梗係唔理佢啦,話之佢~
行到去 metro 就買飛搭返車去火車站~
搭 metro 時冇位坐,其實就冇咩所謂嘅,兩個站姐,但係有個婆婆笑容滿面,望住屎塔係咁指住個空位(啱啱有人起身)係咁講嘢,明顯係話俾屎塔知有位坐啦~
人哋一番好意,本來冇諗住坐都照坐啦~
好人好事仲未完,我前面果個人又起身,屎塔隔離果位女士即刻話同我掉位,等我可以同屎塔坐埋一齊~
成件事真係好溫暖,呢種人情味真係唔係咁容易遇得到~
去到火車站就拎返啲行李,再去麥記買嘢食,跟住就過安檢入閘等開去 Madrid 嘅火車~
講起呢程火車,俾個火車網搞到我白白蝕咗二百幾蚊港紙~
我好早就睇中咗班車,知道早買可以以低至四折就買到~
要知道西班牙鐵路真係好貴,我好著緊咁日日都上去睇,希望買到最平嘅飛~
終於有一日俾我見到我想搭果班車有飛賣,嗱嗱聲走去買啦,入到去見到 EUR47.9,正,即刻買兩張~
點知個網中途發生故障,但由於未到俾錢位,所以我就再買過~
點知今次入到去個價錢係 EUR59.9,買兩張就貴咗 EUR24!
頂你個肺,我遲咗買唔到就冇說話好講吖,俾個網搞到買唔到平飛條氣真係唔順,不過唔順都冇計咖,再唔買連半價都買唔到!殺你!
今次成功呀,買完飛諗住睇吓啲價有冇再升返,一入到去見到個價去返 EUR47.9......
分明玩我姐......
上到車就食嘢,買咗兩個包,正常味道,唔求佢好好食,唔難食就得~
約三個鐘後就到咗 Madrid 嘅 Atocha-Renfe 火車站,買埋 T-10 交通票,再轉乘 metro 去酒店~
坐完 metro,又遇到令人窩心嘅事情~
出閘時,我前面出閘個位女士見我拖住個篋,就幫我拉住個閘,等我出得方便啲,其實佢唔咁做我都唔會好唔方便,但係點都好,好欣賞對方出於好心嘅善意行為~
仲有,當我停咗喺度,諗住睇吓邊個出口啱嘅時候,就有位男士指住個 sortida 字,話俾我哋知,呢個就係 exit 咁解~
其實我所遇到嘅,都係好小事,但確實令我留下好深刻又好美好嘅印象~
行到旅館下面果條街,非常多人,因為呢度有好多舖頭,可以話係一條購物街~
入到房,屎塔見到係兩張單人牀,劈頭第一句就話:好嘢,今晚唔駛俾人打! ~_~!!!
放低晒啲行李就出街買生果同食晚飯~
我打開本旅遊書,睇吓佢有冇咩推介嘅餐廳喺呢度附近,我發現其中一間非常近,步行幾分鐘就到,一於去呢間試吓~
行到過去,間嘢好似冇開門,行埋啲睇,原來開 2030,唔等啦,求其喺附近入咗間好普通嘅餐廳~
Spaguetti Bolognese
意粉過淋,麻麻地~
Pizza Pepperoni
OK,不過意大利果啲好食好多~
送咗一兜嘢,橄欖同埋唔知咩嚟,唔敢食,食完嘢就返旅館~
呢間旅館叫自己做 hostel,不過佢係有兩粒星嘅,而且服務十足十酒店咁,每日會更換毛巾、整理房間,究竟佢係 hostel 定係 hotel 呢?
留言列表