今日行程:
Day 09:Isaac → 北村韓屋村 → 學林茶館 → PRO(醬油蟹) → Remicone → 狎鷗亭紅豆餅 → 廣藏市場 → NOLBOO(部隊鍋) → SPAREX → 東大門(行街)
一早起身,梗係問吓 David 身體如何啦,佢話冇嘢,咁我表面睇佢都冇乜嘢嘅~
噚日喺春川食唔到 Isaac,今日補返~
之前上網睇,食過嘅都話好食,仲係好好食嗰隻,有個仲話一日三餐都食佢~
真係咁好食?食到上癮咁?
終於可以自己感受吓~
我哋分別叫咗牛排同烤肉,滿心期待咁食~
係,真係幾好食,但又實在唔算特別,係可以想像到嘅味道,至少唔會心思思想再食......
之後行經 DDP 設計廣場,雖然未開門,不過呢度嘅建築物幾特別~
今日第一站係「北村韓屋村」
擁有六百年歷史嘅韓屋村,而且係完整保留至今,有著非常高嘅觀賞價值~
遊覽北村韓屋村,除咗隨心而行,亦可以好似尋寶咁,跟住北村八景嘅位置去行~
關於北村八景嘅資料,可以參考吓首爾市嘅官網:
http://www.visitseoul.net/cb/m/article/article.do?...
(註:連結中提到嘅 Photo Spot 標示,據聞已被移去,而我自己亦確實未喺現場見到過~)
而八景嘅位置,除咗現場有指示外(但指示牌唔多,見到就影低佢先),亦可到北村文化中心攞啲資料睇~
我哋到嘅時候差唔多九點,基本上係冇人,好正!
由於呢度係住宅區,遊覽呢度嘅時候,真係要盡量靜啲,現場亦唔難見到一啲提醒人要肅靜嘅提示~
時間越來越晏,人自然越來越多,初初就有大陸團,再跟住就有香港團,成個環境開始嘈雜,唉,真係唔可以自律啲咩~
期間,有個年約五十嘅男人勁大聲喂咗一聲,係隔四條行車線都可以聽得到嘅聲浪~
莫講話現場根本唔應該咁樣講嘢,其實如果佢係要對方聽到佢嘅喂一聲,都係絕對唔需要咁大聲嘅~
跟住有親友「殊」佢,佢仲唔知衰,之後嘅對話如下:
男人:做咩呀,唔講得嘢咖咩?
親友:嘈住人瞓覺呀!
男人:佢老母仲瞓?就嚟十點喇仲瞓!
親友都無可奈何,唔再同佢對話,免得佢繼續嘈,只係用手勢示意好喇好喇~
其實人哋就算瞓醒,都唔代表你可以騷擾人,真係好冇禮貌,好冇修養,無恥,冇品!
我肯定佢知道自己唔啱,因為之後佢都冇繼續嘈落去,只係當刻唔想認衰而已~
喺較早前,我已經聽到佢哋十點三要集合,我實在唔想喺啲咁優美嘅環境下對住呢啲賤人,我決定去第二度行吓先,過咗佢哋嘅集合時間先返嚟~
一路行,去到有個位可以坐吓,David 主動話想休息吓~
吓?一個體力無窮無盡,自身有再生能源嘅人話想休息吓?
呢次大件事喇,佢肯定病咗啦!
之前問佢做乜今日冇晒聲,係咪覺得呢度好悶,佢仲話係......
David 坐低休息,但睇佢狀態又唔係真係咁差,於是我同屎塔就自己四圍行吓~
行完返嚟,接返 David 就繼續行~
喺呢頭附近,都見到貼有展望臺嘅告示,不過我相信唔係免費開放嘅展望臺,應該係私人嘅收費展望臺~
因我做功課時,冇人提過有呢個展望臺,估計係冇人去過~
當然,亦唔排除係最近先有,所以冇咩人提~
我哋沿住告示行去,一如所料,係私人收費展望臺,不入了~
時間已經過咗嗰團人嘅集合時間,我哋就行返返去,希望唔會再遇到唔識尊重其他人嘅人~
行到返去,都有唔少人,但唔見有人大聲講嘢,都係正常人,咁就好嘞~
八景嘅精髓,我實在未必了解,為免誤會,就唔逐一介紹喇~
北村韓屋村隨影~
遊畢北村韓屋村,時間比預期早好多,我將今日行程嘅次序重新調整,而家去咗學林茶館先~
下一站係「學林茶館」
認識學林茶館,係因為「來自星星的你」呢套韓劇,睇劇時仲未有韓遊嘅打算,不過由於覺得茶館好有文藝嘅氣息,所以看完過後,喺心目中都留下相當嘅印象~
趁住呢次韓遊,就到嚟呢間茶館參觀吓~
茶館外部,真係睇唔出內部嘅優雅~
學林茶館比想像中細,我哋揀咗坐閣樓,貪上面冇人,自成一角,又可以居高臨下咁去望吓呢間茶館~
現場有好幾檯都係講廣東話,而且有一檯講嘢好大聲,我哋坐閣樓都感到被騷擾~
來自星星的你嘅都敏俊坐過嘅位~
據知如果冇預先訂座,都幾難可以坐到,我哋嚟到嘅呢刻就已經俾人訂咗~
叫咗幾杯飲品,相當不錯~
呢間茶館的確幾有文藝嘅氣氛,真係有啲唔捨得離開~
下一站係「PRO(醬油蟹)」
要喺首爾食醬油蟹,係好容易嘅一件事,不過我哋第一次食,一定要幫趁啲比較出名嘅,中伏(毒)機會應該會比較少吧~
而喺首爾比較出名嘅有三間,其中我揀咗「PRO」同「大瓦房」,而第三間,因為喺做功課時有人話食完肚痛又屙又嘔,立刻將間嘢從我嘅選擇中剔除~
原本我揀咗大瓦房嘅,不過今日掉咗行程,無論喺食嘢嘅時間性同路程上,去 PRO 都比較方便,就咁決定~
未食過醬油蟹嘅我哋,除咗期待,亦非常好奇!
好奇在於,網上面每一個提及醬油蟹嘅人,都講到好好食,無時無刻都想再食,人間極品咁樣!
至於話唔好食嘅人,印象中係冇!
一種食物能贏盡每一個人嘅讚美,而自己又未食過,怎不教人好奇?
嚟到 PRO,menu 都唔係睇咗好耐就可以落單,反正主攻醬油蟹,只要每人有一隻食就夠~
我哋叫咗三隻細嘅,包埋其他配菜~
嚟喇嚟喇,終於都可以一嘗呢種世間美食!
滿心期待,卻換嚟撤底失望......
蟹膏唔算多,呢個可能係運氣問題,冇計~
味道呢?我哋三個都同樣覺得不外如是,絕非食完一口想再食多口,純綷因為叫咗,而且午飯時間,都要食嘢咖,所以食晒佢~
真係好失望,味道遠遜預期!可能我哋唔識欣賞~
幸好,蟹膏用嚟撈飯食都仲可以~
食物以外,PRO 呢度啲人嘅態度真係唔多好,黑口黑面,好似好唔想服務我哋咁~
用同樣嘅價錢,去食多次韓牛好過!
不過唔試過又唔知嘅,不過真係試過就算~
下一站係「Remicone」
想去食佢嘅 Thunder Bomb~
由 PRO 行落去 Remicone,都有一段路程,呢段路程途經好多時裝店同其他店舖,所以呢頭好旺,相信係一個出名嘅購物區~
途經 LINE FRIENDS STORE,門口有一隻好巨型嘅熊仔,真係好能夠吸引到人行入去,我哋都唔例外~
David 好快就睇完行咗出門口,其實我知佢梗係唔舒服,所以都出門口睇住佢~
佢話想搵個公園坐低休息吓,等我哋去完 Remicone 再返嚟 join 佢~
講真,我哋邊度放心任由佢一個喺公園休息,我哋話陪佢休息一陣先再去 Remicone,佢又堅持話唔駛~
我建議不如落地鐵休息,因為地鐵人流多,亦有地方休息,我哋會比較放心~
不過佢又話唔好,佢話只係飯氣攻心,唔係唔舒服~
呢啲咁嘅大話,呃得邊個吖~
最後佢都係堅持一齊行去 Remicone,好啦,你點話點好~
行完 LINE FRIENDS STORE 就繼續向 Remicone 進發~
去到 Remicone,David 話好飽唔食,明啦,所以我同屎塔就 share 一杯 Thunder Bomb~
嗯......又係好普通,都係 gimmick 大於一切~
下一站係「狎鷗亭紅豆餅」
據說呢檔紅豆餅用料足兼外脆內軟,所以就記錄在案,睇吓有冇機會嚟到~
David 喺我哋多番遊說下,終於都肯喺地鐵站度休息吓,於是我哋就趁呢段時間,上去地鐵站口買件紅豆餅食吓,試吓係咪咁好食先~
一出地鐵站就見到呢檔嘢,兩位老人家態度親切,笑容滿面,儘管我哋只係買一件價值 400 韓圜嘅紅豆餅(當時實在太飽),佢哋嘅態度依然係咁和藹可親~
至於件餅,真係外脆內軟兼有蛋香,餡料足,紅豆夠晒大粒又好味,實在係好難得食到咁高質嘅紅豆餅!
今日終於都可以食到啲令人滿足嘅食物,儘管佢只係一件價值 400 韓圜嘅紅豆餅~
返到落地鐵站,我哋冇叫醒 David,而係坐喺佢附近,等佢醒咗,發現我哋喺度,先再開始行程,希望佢有多啲時間休息~
下一站係「廣藏市場」
一個好出名又好地道嘅市場~
嚟到廣藏市場,感覺真係好地道,一啲商業味道都冇~
不過檔檔賣嘅嘢都差唔多,再加上我哋都唔肚餓,最後都冇買到嘢食,真係嚟行個圈就算~
本來 David 可以喺度食活八爪魚,不過佢而家邊有胃口吖~
行完廣藏市場,我哋商議咗一陣,決定取消原訂今晚會去嘅「貝類倉庫」同「八爪魚一條街」
原本貝類倉庫就係今晚嘅晚餐,而八爪魚一條街呢,就係趁屎塔喺東大門行街嘅時候,我陪 David 去嘅~
係陪,因為我唔打算食,只係 David 好想試啫~
以 David 而家嘅狀態(比中午時差),以上呢兩樣嘢都唔係好啱佢食,下次有機會再試啦~
我哋決定今晚食清啲,去食部隊鍋~
部隊鍋都算清?清,叫個最清,一定冇辣嘅就得啦~
食完部隊鍋再送 David 去汗蒸幕休息~
下一站係「NOLBOO(部隊鍋)」
就去返之前嚟過但食唔到嗰間!
去到 NOLBOO,叫個最清,確保唔辣嘅一齊食~
材料只係腸仔餐肉火腿公仔麵通心粉之類,真係好齋~
咁嘅材料,自然不抱期望,當然係想像中嘅味道,下次有機會要試吓辣味嘅海鮮鍋,應該會好正!
下一站係「SPAREX」
位於 Good Morning City 地庫嘅汗蒸幕~
去到汗蒸幕,睇得出 David 好渴望快啲去瞓個覺,不過快還快,就算喺佢精神時,我哋都唔放心佢一個人,何況而家佢病緊~
我哋幫佢安排好晒所有嘢,約好十點鐘喺返而家身處嘅地方等,我哋睇住佢行入去,直至見佢唔到先離開~
下一站就係喺東大門行街~
其實屎塔唔係真係想行街,我哋甚至有諗過自己去貝類倉庫食嘢,不過我哋買咗嘅手信好少,要趁呢個時候去搜羅一下,冇計~
如果去旅行唔駛刻意去買手信就好囉~
我哋行過嘅商場有:「樂天(Lotte Fitin)」、「Good Morning City」、「Hello Apm」、「美利來(Migliore)」、「Doota」、「平和市場」等等~
我哋主要集中去買手信,所以每個商場都冇行晒,只去想去嘅部份~
期間喺 Doota 見到 Remicone,早知唔駛去新沙洞咁遠!咁就唔會去 PRO,遇到咁差嘅態度!不過如果唔係咁,又食唔到咁正嘅紅豆餅,哈,隨緣吧~
我哋喺 Doota 仲見到有 LINE FRIEND STORE,又行咗陣~
最後喺 Doota 嘅 food court 落腳,因為實在太攰喇,唔可以再行,去食啲嘢休息吓~
士多啤梨班戟同奇異果汁,兩樣都好好味!
差唔多時間,就去旅館攞返啲行李,再去匯合 David~
David 準時喺約好咗嘅地方等,精神唔錯~
之後就搭車去機場,搭 0420 嘅機返香港,完結今次旅程~
留言列表