今日行程：
Day 02：栗林公園 → 蒲生烏冬 → 金刀比羅宮 → しょうゆ豆本舗×浪花堂餅店 → 小便小僧 → 酒店(新祖谷温泉ホテルかずら橋)
今日第一係「栗林公園」
一個 400 多年前，用咗 100 年先起好嘅美麗庭園~
一早嘅計劃，係 0800 出門口，亦知道對某啲團員嚟講實在係太早，所以就可以自由參與，反正步行可達，中途加入甚或不參與都冇問題~
我同屎塔就會 0800 出發，預計唔需要瞓覺嘅媽咪亦會參與，飛珊呢，就難講喇~
噚晚同佢哋商量時，已確定我哋三個(包括媽咪)會參與，亦講好咗，0800 唔見飛珊就當佢哋唔去，唔會等~
之後再喺較後時間，阿飛再同我哋講話佢哋唔去喇~
到咗今朝，冇變化，三人出發~
由酒店步行過栗林公園約需 5 分鐘，好近~
栗林公園嘅開放時間，會因應日出時間而調整，三月嚟講，0630 已經可以入內參觀~
睇睇小冊子，內裡分兩條路線，一條 60 分鐘(南庭)，一條 40 分鐘(北庭)~
栗林公園呢度，有一個例牌影相位，入場券嘅照片亦都係呢一個景，就係由飛來峰眺望偃月橋與南湖嘅景致~
兩條線加埋 100 分鐘，其實我哋係夠時間行嘅，不過佢所講嘅時間，係咪真係咁準確呢？
唔理喇，行咗飛來峰嗰條線先，即係 60 分鐘嗰條~
行到某個位有好多條又肥又大嘅錦鯉，於是就喺身後嘅舖頭買咗啲魚糧餵魚~
餵完魚再向前行就係飛來峰~
眺望偃月橋與南湖~
可能光線不足，又或者唔係綠草如茵嘅時節，我覺得人哋影嘅相係靚過實景......
睇睇時間，我哋未行完呢條路線已經行咗個幾鐘，唔好話北庭，就連南庭呢邊都行唔晒，睇嚟要揀嚟行~
最後決定唔行內園路線，直接行埋外圍就離開~
臨離開前，行咗陣商店，裡面有預製好嘅骨付鳥，梗係唔會買啦，預製好嘅肯定唔係嗰回事啦~
下一站係「蒲生烏冬」
當地人極為稱讚嘅烏冬店~
匯合埋飛珊之後，就出發去蒲生烏冬~
噚日第一日到，就話俾我揸先姐，今日，都係時候到佢哋玩吓~
我問邊個想揸，初時係冇人出聲嘅，大家都想讓大家揸，明嘅~
其實我知屎塔冇大興趣，而且佢真係想揸，佢自會出聲~
媽咪呢？嗯......佢實在太耐冇揸過，喺一般市區嘅道路，我相信佢都未必有信心~
所以我就直接轉向阿飛，問佢揸唔揸~
阿飛未表態，阿珊話唔好喇，跟住到屎塔，佢話：你始終要跨過呢個關口~
兩姊妹一人一句，阿飛最後都勇敢地決定嘗試~
不過由於呢個場嘅出入口真係窄，所以我就落車幫佢睇位，再俾少少指示佢~
一路揸到去蒲生烏冬，冇咩驚險場面，只係一般新手會出現嘅問題，不過以佢考完又少揸，而且又咁耐冇揸嚟講，已算非常不錯~
蒲生烏冬~
蒲生烏冬嘅舖面好細，基本上只係工作嘅地方~
入到去攞碗麵，可冷可熱，再自己夾餸，之後俾收銀睇一睇，佢自然會計數，跟住俾錢，再落啲湯(可冷可熱)，搞掂~
個個都係揸住碗麵就行出出面搵位坐~
座位方面只有長椅，冇檯的，相當隨意~
餸就有約十多款，不過後面好多人，我係求其快快手咁夾咗一兩樣~
食過嘅有蝦、魚、墨魚餅~
蝦係一般嘅天羅蝦，幾好~
魚就真係幾腥，幸好我還可以接受到~
墨魚餅非常不錯，不過只係食咗好細塊，真係唔夠喉~
其實烏冬先係主角，麵條質感實在，有咬勁亦很順滑，實在係烏冬界嘅上品~
就喺我哋食緊麵嘅時候，有幾個日本人行過，佢哋向住我哋豎起手指公，仲講咗句：Japan best
當然，單憑一句咁嘅說話，係可以有好多唔同嘅理解，不過有時啲嘢唔使諗得咁複雜，就將佢理解為日本最好嘅鳥冬吧~
田園中嘅一間鳥冬小舖，一人手揸一碗烏冬，一流嘅環境，一流嘅風味，感覺一級棒~
食完烏冬，喺附近嘅舖頭度買咗雪糕食，同埋買咗啲烏冬做手信~
下一站係「金刀比羅宮」
可以話係四國必遊神社之一~
金刀比羅宮建於山上，想要到達御本宮，要爬 785 級樓梯先可以到達，如想到達最高點嘅奧社(嚴魂神社)，就要爬多六百幾級，共 1368 級樓梯~
相信好多人都只會上到御本宮，而我哋亦都係好多人當中嘅其中幾個......
一次過爬 785 級樓梯，究竟係輕鬆定係辛苦呢？心裡面都冇乜概念，不過我自己平時都多行樓梯，其實真係冇擔心過~
而擁有超人般體力嘅媽咪同做開運動嘅阿飛就更加冇問題啦，係嗰兩姊妹就難講啲~
差唔多到我心目中嘅停車場，見到第二個場差唔多平一半，只係行多 100 米唔夠，唔諗咁多，即刻叫阿飛扭入去~
上山初段會途經一啲商店，門口都有放一啲手杖，亦見好多回程嘅人有拎住，原以為可以免費取用，後來獲告知要有消費先可以借用，所以最後都係冇用到~
對於啲行動唔方便或體力不足嘅人士嚟講，可以選擇利用人手枱上去嘅服務~
進入咗神社嘅範圍，由於係禁止擺賣嘅，所以就唔會再見到商店或擺賣嘅檔口，除咗佢哋~
這就是金刀比羅宮內嘅「五人百姓」，由於佢哋嘅上幾代人一直都喺度擺賣，所以就特許俾佢嘅後代繼續喺宮內繼續經營~
而賣嘅主要係名為「加美代飴」嘅糖果~
不過，睇嚟生意很一般，先唔講齋睇唔買係好平常嘅事，呢度就連靠近睇吓嘅人都絕無僅有......
繼續行，就會見到「金刀比羅犬」~
金刀比羅犬嘅故事可見以下網頁：
http://www.konpira.or.jp/about/dog/dog-2011.html
不過為免連結日後出現問題連不上，都係喺呢度貼一次比較穩妥~
※※※※※※※※※※※※※※※※※※※※※※※※※※※※※※※※※※※※※※※※※※※※※※※※※※
「こんぴら狗」
江戸時代、庶民は旅行を禁止されていましたが、神仏への参拝の場合はその限りではありませんでした。
数ある神社仏閣のなかでも、伊勢神宮への参拝の旅は特別で、庶民にとって一生に一度の夢であり、「お伊勢参り」と言われました。
それに並び「丸金か京六か」と言われ、讃岐の金毘羅大権現（今の金刀比羅宮）と、京都六条の東西本願寺への参拝の旅も人生の一大イベントでした。
当時、江戸を中心とした東日本の各地からこれらの社寺への参拝の旅は大変なことで、当人に代わって旅慣れた人が代理で参拝に行くことがありました。これを「代参」と言いました。
旅を途中で諦めることにした人が、道中で知り合った旅人に旅費と初穂料（お賽銭）を託し代参してもらうこともあったようです。
金毘羅大権現への代参で有名なのが森石松です。清水次郎長（山本長五郎）の代わりに参拝し、預かった刀を奉納したと伝えられています。
実は、代参をしたのは“人”だけではなかったのです。「こんぴら参り」と記した袋を首にかけた犬が、飼い主の代参をすることもあったのです。
袋には、飼い主を記した木札、初穂料、道中の食費などが入っていました。
犬は、旅人から旅人へと連れられ、街道筋の人々に世話をされ、目的地にたどり着いたのです。
金毘羅大権現へたどり着いた犬も、そんなのどかな風習により、立派に務めを果たしたのでしょう。この「こんぴら参り」の代参をした犬は、特に「こんぴら狗」と呼ばれたのです。
※※※※※※※※※※※※※※※※※※※※※※※※※※※※※※※※※※※※※※※※※※※※※※※※※※
我就唔識日文嘅，不過為咗留個記憶，就做咗少少功課，試著去翻譯同理解一下，簡單咁記下~
「金刀比羅犬」
喺江戶時代，平民被禁止出外旅行(唔清楚旅行嘅定義係點)，不過如果係到神社參拜則不在此限~
對平民來說，參拜金刀比羅宮，係其中一樣被視為一生人要做一次嘅事情~
喺當時，要喺東日本嘅關東地區去到金刀比羅宮，係一件相當不容易嘅事，尤其係行動不便或體力不足以應付旅途嘅人士~
於是佢哋就會派家中嘅犬隻代辦~
飼主會喺狗嘅頸上掛上「參拜金刀比羅宮」嘅牌，再寫上參拜者嘅名稱同祈願內容，同時會喺狗嘅頸上掛個小袋子，用嚟放有狗嘅食物同參拜用嘅金錢，咁就可以向金刀比羅宮出發~
代理狗狗本身當然係唔識自己去金刀比羅宮，靠嘅係唔同人以接力方式，引領代理狗狗到達目的地~
例如，有人會喺關東去關西，就帶領代理狗狗去關西，再由關西跟隨會去四國嘅旅人，如此類推，回程亦如是~
所以代理狗狗亦被稱作為「金刀比羅犬」
再向上行就見到兩隻馬~
其中一隻等咗好耐都唔抬頭......
附近有件「奉納」
再上就見到座大嘢，以為已經到御本宮，原來唔係，呢座係「旭社」
再上一段長樓梯，就真正到咗「御本宮」
對我呢個普通到不能再普通嘅遊人嚟講，上到嚟御本宮其實冇咩大意義，都係為上而上~
而呢 785 級樓梯，相信對好多人嚟講都唔係一件困難嘅事，主要係因為佢中間有啲平路，行一段先再有樓梯，亦有啲地方有啲嘢睇吓，其實可以話係分咗好幾次咁行，所以唔會太辛苦~
而我相信要一口氣行 268 級樓梯上天壇大佛，絕對要比今日嘅呢 785 級樓級辛苦得多~
喺山中爬咗咁多樓梯，嚟到御本宮呢度，居高臨下，豁然開朗~
至於奧社(嚴魂神社)，就不上了~
原本計劃係落返山腳，去「中野うどん学校」食烏冬(食咋，冇打算自己製作)，不過大家都未肚餓，所以就取消呢個行程~
回程時見到一棵櫻花開咗~
落到山腳，唔食正餐，都會買啲小食食吓嘅~
其中一間叫「しょうゆ豆本舗×浪花堂餅店」，係計劃中要去嘅，喺呢度可以試吓香蔥豉油烏冬味雪糕~
一鹹一甜，講唔上好夾，但又幾得意，唔抗拒，不過食到筒尾就好鬼鹹，因為啲豉油流晒落底......
除咗香蔥豉油烏冬味雪糕，仲有黃金雪糕~
唔清楚呢個黃金雪糕係咩味，有人話似芝士，我自己就食唔到芝士味，但又真係食唔出係咩味~
一路行一路買嘢食，期間仲食咗：
燒栗子~
勁好食！
年糕~
好煙韌~
類似雪米糍嘅嘢~
不錯~
雖然我哋冇去中野うどん学校食烏冬，不過都有入商店度買手信~
金刀比羅宮一帶隨影~
下一站係「小便小僧」
一個放置喺懸崖上嘅小便小僧雕像~
傳說當時開闢公路嘅工人，經常嚟到呢塊岩石處休息，然後有人提出比試，看看誰夠膽企喺呢塊岩石度小便，但小便不能灑到這塊岩石上~
不過最後都冇人能夠完成呢項壯舉~
後來有人為咗紀念呢件事，所以就喺度樹立雕像~
傳說歸傳說，是真是假就不得而知~
開車到小便小僧，途經一大段山路，連錦不斷嘅 S 形盲彎，最攞命嘅係單線雙程行車！
一條行車線，處處盲彎，左邊係嶙峋嘅岩石，凹凸不平，靠埋啲都有機會撞到，右邊係懸崖，真係每分每秒都好危險！
我事前唔知道路況係咁差，如果我一早知，我會同阿飛講不如俾我揸，阿飛其實已經算唔錯，但始終呢啲路好危險，點講阿飛都係欠缺一點經驗~
不過如果阿飛冇信心，佢自然會開聲，所以我都冇講啲咩，就由佢繼續揸，需要時俾啲意見便可以~
行行吓，迎頭嚟咗部貨車(五噸半平斗)，大家都停咗車，我唔清楚貨車後面有冇可以讓車嘅地方，我淨係知貨車冇動靜，而我左後方係有一處闊少少嘅位可以讓一讓，細車讓大車，其實都係不成文規定啦，於是我就開始教阿飛點樣倒車~
有時啲嘢，自己做到，唔代表識教人，我表達能力差，冇計，最後唯有自己嚟~
其實我都唔肯定我將車倒到嗰個闊少少嘅位，係咪夠位俾部貨車過，不過呢刻嚟講，只好咁做~
由於我後面仲有幾部車，所以部貨車同我平排時，我要即刻開車，等所有車過晒，部貨車先可以繼續行~
總算順利過咗呢關~
之後我問阿飛仲揸唔揸，佢就話唔揸喇，有啲頭痛~
精神極度集中加緊張，頭痛都好正常，辛苦晒你喇阿飛~
行行吓，見到「祖谷溪展望台」，就停低睇吓~
上咗呢個展望台，不得不提吓高知嘅「播磨屋橋」~
播磨屋橋，被稱為日本三大最失望景點之一，而我哋相信，祖谷溪展望台，有機會問鼎第四大~ XDDD
上面有個木製看台，從看台上面望出去嘅景~
看台以外，勉強叫做望到個溪谷~
幾經辛苦，終於都到達小便小僧~
唔知點解岩石上，都係硬幣，我諗又係擲幣祈福嘅習俗吧~
頭頂同小便處都有......
之後就揸車去酒店~
今晚住嘅係溫泉酒店，所以我哋今日嘅行程係好早就完結，早啲去酒店~
沿途嘅路況，比之前嘅略為好啲，有部份路係正常嘅雙線雙程，係落斜加 S 形彎，要揸得小心啲~
未夠六點去到酒店，我哋定好七點先食晚飯，飯前嘅呢段時間，就去浸溫泉~
同好多溫泉酒店一樣，溫泉係有分室內同室外，而呢度嘅室外溫泉，係要搭纜車上去嘅，幾特別~
上面有男湯，有女湯，亦有混浴，另外仲有個足湯~
我就例牌唔會去公眾溫泉浸嘅，所以就去咗足湯~
屎塔今日唔浸得溫泉，就同我一齊去浸足湯~
見差唔多時候，就落返去酒店，準備食晚餐~
溫泉酒店好多都係一泊二食，呢度都唔例外~
用膳嘅環境不錯~
擺喺檯面嘅，有部份係唔知咩嚟，冇理由逐樣問咖，食啦！
一路食仲一路有新加，感覺就好似你一直唔離開，一直都有新嘢上咁......
食食吓佢仲問我哋要唔要飯，我哋齊心快狠準咁同佢講唔要，真係擔心答遲一秒都會俾幾碗飯我哋，大佬，真係夾硬食都食唔落喇......
燒物就係佢燒埋俾我哋嘅~
食完嘞，坦白講，味道唔算出色，食完呢餐，我懷念嘅反而係長崎嘅「草花洛」，精緻、美味、幸福~
長崎「草花洛」
http://strangerstupid.blogspot.hk/2016/02/20151122.html
食完飯就走去酒店內嘅商店度買手信~
我哋 check-in 時，酒店俾咗啲 coupon 我哋，每人有 5 張，總共 25 張，買滿 2000 円可用一張，每張當 1000 円用，冇限一次過可以用幾多張~
我哋咁多人加加埋埋買咗 6040 円，用咗 3 張 coupon，即係實質只係俾咗 3040 円，超抵！
買完嘢就各自返房~
留言列表
